Tá ndóoka na̱ veʼe ta̱ Jacob ñuu Egipto, israelita xi̱ka̱ʼa̱nra xíʼinna. Tá ni̱xi̱ʼi̱ ta̱ Jacob xíʼin ta̱ José, inka ta̱ faraón ki̱xaʼá xáʼndachíñu. Ta̱ faraón yóʼo ni̱yi̱ʼvíra chi ku̱a̱ʼání kúú na̱ ñuu Israel ta ndakúka ni̱xi̱yona nu̱ú na̱ ñuu Egipto. Tasaá i̱xanduxara xíʼinna ña̱ kachíñuna nu̱úra ña̱ keʼéna ndo̱ʼo xíʼin chiʼina. Ni kininí xi̱keʼé na̱ ñuu Egipto xíʼinna, na̱yóʼo ku̱a̱ʼáka ku̱a̱ʼa̱n ndúuna. Xa̱ʼa ña̱ va̱ása níkutóo ta̱ faraón ña̱yóʼo, ni̱ka̱ʼa̱nra ná kaʼnína ndiʼi na̱ ta̱a válí se̱ʼe na̱ ñuu Israel na̱ sa̱kán káku soo va̱ása kaʼnína ná síʼí válí. ¿Ndáaña ndákanixi̱níún ndo̱ʼo na̱ ñuu Israel xa̱ʼa ña̱yóʼo?

Iin ñaʼá ñá ñuu Israel ñá xi̱naní Jokébed ka̱ku iin ta̱a loʼo se̱ʼeñá ta liviníra. Xa̱ʼa ña̱ kǒo kúni̱ñá kaʼnínara, chi̱ka̱a̱ñára ini iin canasta, ta chi̱se̱ʼéñára tañu ndo̱o̱ tú íyo yu̱ʼu̱ yu̱ta Nilo. Ñá Míriam ku̱ʼva ta̱ loʼo yóʼo, ki̱ndoo yatinñá ña̱ va̱ʼa kuniñá ndáaña ndoʼora.

Ñá se̱ʼe ta̱ faraón ku̱a̱ʼa̱nñá kuchiñá yu̱ta ta xi̱niñá iin canasta. Ini ña̱yóʼo xi̱niñá ndíka̱a̱ iin ta̱  loʼo ta ku̱ndáʼvi-iniñá xi̱niñára. Ñá Míriam ni̱ka̱ʼa̱nñá xíʼinñá: “¿Á kúni̱ún ku̱ʼi̱n ndukúi̱ iin ñaʼá ñá sakuaʼnu ta̱ loʼo yóʼo?”. Va̱ʼa ka̱chi ñá se̱ʼe ta̱ faraón, tasaá ni̱xa̱ʼa̱n ñá Míriam nda̱kiʼinñá siʼíñá. Ñá se̱ʼe ta̱ faraón ni̱ka̱ʼa̱nñá xíʼin ñá Jokébed: “Kiʼin ta̱ loʼo yóʼo sakuaʼnura ta chaʼvii̱ yóʼó”.

Tá xa̱ʼnu ta̱ loʼo yóʼo, ñá Jokébed ta̱xiñára ndaʼa̱ ñá se̱ʼe ta̱ faraón. Ñáyo̱ʼo chi̱nu̱úñá ki̱vi̱ra ña̱ kunaníra Moisés, tasaá ni̱xa̱a̱ra ndu̱ura se̱ʼeñá. Tá xa̱ʼnu ta̱ Moisés ndu̱ura iin príncipe ta kuvi koo ndiʼi ña̱ kúni̱ra ndaʼa̱ra. Soo va̱ása nínandosó-inira xa̱ʼa Jehová. Ta̱ Moisés xíni̱vara ta̱ ñuu Israel kúúra ta su̱ví ta̱ ñuu Egipto kúúra, ta nda̱ka̱xinra kachíñura nu̱ú Jehová.

Tá xa̱a̱ ndíka̱a̱ ta̱ Moisés 40 ku̱i̱ya̱ kúni̱ra chindeé táʼanra xíʼin na̱ ñuura. Iin ki̱vi̱ xi̱nira ta̱ ñuu Egipto kánira iin ta̱ ñuu Israel. Tá xi̱nira ña̱yóʼo, ka̱nira ta̱ ñuu Egipto ta xa̱ʼníra ta̱yóʼo ta̱ chi̱se̱ʼérara ti̱xin yu̱ti. Tá na̱kunda̱a̱-ini ta̱ faraón xa̱ʼa ña̱yóʼo, kúni̱ra kaʼníra ta̱ Moisés, soo ta̱yóʼo xi̱nura ku̱a̱ʼa̱nra ñuu Madián. Tá ni̱xa̱a̱ra kán Jehová chindeé táʼanra xíʼinra.