Ta̱ Moisés 40 ku̱i̱ya̱ ni̱xi̱yora ñuu Madián. Tiempo kán ti̱ndaʼa̱ra ta ka̱ku se̱ʼera. Tá ndáara ndikachi sa̱na̱ra chí yuku̱ Sinaí xi̱nira iin ña̱ʼa. Xi̱nira kánuu ñuʼu̱ ndaʼa̱ iin yitu̱n, soo kǒo ña̱ ndóʼonú. Tá ku̱yatinra xi̱niso̱ʼora iin na̱ ni̱ka̱ʼa̱n xíʼinra: “Moisés, kǒo kívi kuyatiún. Tavá ndu̱xa̱ún, chi nu̱ú ñuʼú yi̱i̱ kúú ña̱ níndichiún”. Mií Jehová xi̱niñúʼu iin ángel ña̱ ni̱ka̱ʼa̱nra xíʼin ta̱ Moisés.

Ta̱ Moisés ni̱yi̱ʼvíra, ña̱kán sa̱si ndaʼa̱ra nu̱úra. Ta ni̱ka̱ʼa̱nkana xíʼinra: “Xítoi̱ ña̱ ndóʼoní na̱ ñui̱. Tavái̱na ñuu Egipto ña̱ ku̱ʼu̱nna kundoona iin ñuʼú va̱ʼa. Ta yóʼó ku̱ʼu̱n tavána”. ¿Ndáaña ndo̱ʼo ta̱ Moisés tá ni̱ka̱ʼa̱n Jehová ña̱yóʼo xíʼinra?

Ta̱ Moisés ni̱nda̱ka̱tu̱ʼunra: “¿Ndáaña kachii̱ xíʼinna tá ná nda̱ka̱tu̱ʼunna ndáana chindaʼá yi̱ʼi̱?”. Ndióxi̱ nda̱kuiinra: “Ka̱ʼún xíʼinna Jehová Ndióxi̱ ta̱ Abrahán, Ndióxi̱ ta̱ Isaac, Ndióxi̱ ta̱ Jacob chi̱ndaʼá yóʼó”. Ta̱ Moisés ni̱ka̱ʼa̱nra: “Soo, ¿tá kǒo kándíxana yi̱ʼi̱?”. Jehová ke̱ʼéra iin milagro ña̱ kandíxa ta̱ Moisés ña̱ chindeérara. Ni̱ka̱ʼa̱nra xíʼinra ná sakánara yitu̱n tú níʼira, tá sa̱kánaranú ndu̱unú iin ko̱o̱. Ta̱ Moisés ti̱in tukurarí ta ndu̱urí iin yitu̱n. Saá ni̱ka̱ʼa̱n Jehová xíʼinra: “Tá ná ke̱ʼún ña̱ milagro yóʼo saá na̱ʼún ña̱ yi̱ʼi̱ chi̱ndaʼá yóʼó”.

Soo ta̱ Moisés ni̱ka̱ʼa̱nra: “Kǒo kívi mií ka̱ʼi̱n nu̱ú na̱ yiví”. Jehová ni̱ka̱ʼa̱nra: “Yi̱ʼi̱ ka̱ʼa̱n xíʼún ndáaña ka̱ʼún xíʼinna, ta ku̱ʼu̱n ta̱ Aarón xíʼún ña̱ chindeéra yóʼó”. Vitin ña̱ na̱kunda̱a̱-ini ta̱ Moisés ña̱ íyo Jehová xíʼinra, ndi̱kóra chí ñuu Egipto xíʼin na̱ veʼera.