Chí yuku̱ Sinaí ke̱e na̱ ñuu Israel ku̱a̱ʼa̱nna. Ni̱xi̱kana ñuʼú yi̱chí ña̱ naní Parán ta ni̱xa̱a̱na nda̱a̱ Cadés. Kán ni̱ka̱ʼa̱n Jehová xíʼin ta̱ Moisés: “Chindaʼá 12 ta̱a, ña̱ ku̱ʼu̱nna koto se̱ʼéna ñuu Canaán, ñuʼú yóʼo kúú ña̱ taxii̱ kundoo na̱ ñuu Israel”. Tasaá ta̱ Moisés nda̱ka̱xinra 12 ta̱a ta ni̱ka̱ʼa̱nra xíʼinna: “Kúaʼanndó kotondó á va̱ʼa ñuʼú kúúña ña̱ chiʼiyó nu̱úña. Ta kotondó á ndakúna, á káʼnu ñuuna á loʼoña”. Saá ke̱ena ku̱a̱ʼa̱nna ñuu Canaán, ta kán ku̱a̱ʼa̱n ta̱ Josué xíʼin ta̱ Caleb.

Tá ni̱ya̱ʼa 40 ki̱vi̱ ndi̱kó na̱ ta̱a na̱ chi̱ndaʼá ta̱ Moisés. Níʼina higo, granada xíʼin uva, ta ni̱ka̱ʼa̱nna: “Va̱ʼaní ñuʼú kúú ñuu Canaán soo na̱ yiví kán ndakúnína, ta náʼnuní nama̱ ñuuna”. Soo ta̱ Caleb ni̱ka̱ʼa̱nra: “Kuchiñuvayó ndakiʼinyó ñuʼú kán, ná ku̱ʼu̱n kíiyó”. ¿Nda̱chun ni̱ka̱ʼa̱n ta̱ Caleb ña̱yóʼo? Saáchi miíra xíʼin ta̱ Josué kándíxana Jehová. Soo na̱ 10 ta̱a ni̱ka̱ʼa̱nna: “Va̱ása ku̱ʼu̱nyó. Na̱ yiví na̱ íyo kán náʼnunína. Válíní miíyó nu̱úna nda̱a̱ táki̱ʼva íyo ti̱ka íyoyó nu̱úna”.

Na̱ ñuu Israel ni̱yi̱ʼvínína, ta ki̱xaʼána káʼa̱n kúáchina: “Ná ndaka̱xinyó na̱ kuniʼi yichi̱ nu̱úyó ta ndikóyó Egipto. ¿Nda̱chun ku̱ʼu̱nyó ñuu Canaán? ¿Á xa̱ʼa ña̱ kuvivayó ku̱ʼu̱nyó?”.  Ta̱ Josué xíʼin ta̱ Caleb ni̱ka̱ʼa̱nna: “Va̱ʼaka ná kuniso̱ʼoyó ña̱ káʼa̱n Jehová. Miíra kundaa miíyó. Va̱ása yi̱ʼvíndó”. Soo na̱ ñuu Israel kǒo níkandíxana. Nda̱a̱ kúni̱na kaʼnína ta̱ Josué xíʼin ta̱ Caleb.

¿Ndáaña ke̱ʼé Jehová? Ni̱ka̱ʼa̱nra xíʼin ta̱ Moisés: “Ku̱a̱ʼání ña̱ va̱ʼa kéʼíi̱ xa̱ʼa na̱ ñuu Israel..., ni saáví kǒo xíniso̱ʼona ña̱ káʼi̱n. Xa̱ʼa ña̱yóʼo 40 ku̱i̱ya̱ kakana ñuʼú yi̱chí yóʼo nda̱a̱ ná kuvina. Na̱ kundoo nu̱ú ñuʼú ña̱ ni̱ka̱ʼi̱n taxii̱ ndaʼa̱na kúú na̱ se̱ʼena, ta̱ Josué xíʼin ta̱ Caleb”.