Ni̱ya̱ʼa u̱vi̱ yo̱o̱ ña̱ ke̱e na̱ ñuu Israel ñuu Egipto, ta ni̱xa̱a̱na xi̱kundoona yuku̱ Sinaí. Tasaá ni̱ka̱ʼa̱n Jehová xíʼin ta̱ Moisés ña̱ ná ndaara nu̱ú yuku̱ ta ni̱ka̱ʼa̱nra xíʼinra: “Yi̱ʼi̱ kúú ta̱ ta̱vá na̱ ñuu Israel. Tá ná kuniso̱ʼona ña̱ káʼi̱n, ta keʼéna ña̱ káʼa̱n ley ta̱xii̱ ndaʼa̱na, saá xa̱a̱na koona na̱ ñui̱”. Tá ndi̱kó ta̱ Moisés, ni̱ka̱ʼa̱nra xíʼin na̱ ñuu Israel ña̱ ni̱ka̱ʼa̱n Jehová xíʼinra. ¿Ndáaña nda̱kuiinna? Ni̱ka̱ʼa̱nna: “Kuniso̱ʼovandi̱ ndiʼi ña̱ káʼa̱n Jehová”.

Ta̱ Moisés tuku nda̱ara chí yuku̱. Kán ni̱ka̱ʼa̱n Jehová xíʼinra: “Ti̱xin ña̱ u̱ni̱ ki̱vi̱ ka̱ʼi̱n xíʼin na̱ ñuu. Ka̱ʼa̱n xíʼinna ná kǒo ndaana yuku̱ Sinaí”. Ta̱ Moisés nu̱ura ta ni̱ka̱ʼa̱nra xíʼinna ña̱ ná koo tu̱ʼvana chi ka̱ʼa̱n Jehová xíʼinna.

Tá ni̱ya̱ʼa u̱ni̱ ki̱vi̱, na̱ ñuu Israel xi̱nina taxa xíʼin vi̱kó xi̱ní yukú. Xi̱niso̱ʼotuna ndáʼyi̱ taxa xíʼin ndiki̱. Saá nu̱u Jehová nu̱ú yuku̱ ma̱ʼñú ñuʼu̱. Na̱ ñuu Israel ni̱yi̱ʼvíkavína. Ndeéní ki̱xaʼá kánda̱ yuku̱ ta̱ iin chu̱tú xi̱níña xíʼin yi̱ʼma̱. Ndeékaví ndáʼyi̱ ndiki̱. Saá ni̱ka̱ʼa̱n Jehová: “Yi̱ʼi̱ kúú Jehová. Kǒo ndasakáʼnundó inka Ndióxi̱”.

Tuku ni̱xa̱ʼa̱n ta̱ Moisés yuku̱ ta kán ta̱xi Jehová ley ndaʼa̱ra ña̱ kaʼvira nu̱ú na̱ ñuu Israel. Nu̱ú ley kán ni̱ka̱ʼa̱nra xíʼinna nda̱saa ndasakáʼnunara ta ndáaña xíniñúʼu keʼéna. Ta̱ Moisés ka̱ʼyíra ña̱yóʼo ta tándi̱ʼi ka̱ʼviraña nu̱úna. Na̱kán ni̱ka̱ʼa̱nna: “Kuniso̱ʼondi̱ ndiʼi ña̱ káʼa̱n Jehová”. ¿Á saxínuna ndiʼi ña̱ ni̱ka̱ʼa̱nna?