Ku̱a̱ʼá na̱ ñuu na̱ íyo chí Canaán na̱kunda̱a̱-inina ña̱ ndo̱ʼo na̱ ñuu Jericó. Ta nda̱kutáʼan ndiʼina ña̱ kanitáʼanna xíʼin na̱ ñuu Israel. Soo na̱ ñuu Gabaón inka ña̱ nda̱kanixi̱nína. Nda̱kundixina ti̱ko̱to̱ yatá ta ku̱a̱ʼa̱nna nu̱ú ta̱ Josué, tá ni̱xa̱a̱na nu̱úra ni̱ka̱ʼa̱nna: “Káni̱ní ñuu ke̱endi̱. Chi xi̱niso̱ʼondi̱ ña̱ ke̱ʼé Jehová xa̱ʼandó tá sa̱ndíʼi-xa̱ʼara na̱ ñuu Egipto xíʼin na̱ ñuu Moab. Tá ná ka̱ʼa̱nndó ña̱ kǒo kanitáʼanndó xíʼinndi̱, saá kúú ña̱ kachíñundi̱ nu̱úndó”.

Ta̱ Josué ka̱ndíxara ña̱ ni̱ka̱ʼa̱nna ta ni̱ka̱ʼa̱nra ña̱ kǒo kanitáʼanra xíʼinna. Soo tá ni̱ya̱ʼa u̱ni̱ ki̱vi̱ na̱kunda̱a̱-inira ña̱ yatinva ndíka̱a̱ ñuuna xíʼin na̱ ñuu Canaán. Ña̱kán ni̱ka̱ʼa̱n ta̱ Josué xíʼinna: “¿Nda̱chun sa̱ndáʼvindó ndi̱ʼi̱?”. Tasaá ni̱ka̱ʼa̱nna: “Saáchi ni̱yi̱ʼvíndi̱. Chi kúnda̱a̱-inindi̱ Jehová kúú ta̱ chíndeé ndóʼó. Xa̱ʼa ña̱yóʼo kǒo kanitáʼanndó xíʼinndi̱ ndáʼvindi̱”. Tasaá kǒo ña̱ níkeʼé ta̱ Josué xíʼinna.

Tá ni̱ya̱ʼa loʼo ki̱vi̱, u̱ʼu̱n na̱ rey ñuu Canaán ku̱a̱ʼa̱nna kanitáʼanna xíʼin na̱ ñuu Gabaón. Ta̱ Josué xíʼin na̱ soldadora ni̱xi̱kana iníísaá ñu̱ú ña̱ va̱ʼa xa̱a̱na  chindeéna na̱ ñuu Gabaón. Tá ni̱tu̱vi inka ki̱vi̱ ki̱xaʼána kánitáʼanna. Ta ki̱xaʼá xínu na̱ ñuu Canaán soo Jehová sa̱kóyora ñíʼin náʼnu nda̱a̱ táki̱ʼva íyo yu̱u̱ saá ni̱xi̱yoña. Tasaá ta̱ Josué ni̱ka̱ʼa̱nra xíʼin Jehová ña̱ ná kundichi ñu̱ʼu, ni iin yichi̱ ta̱ʼán kuu ña̱yóʼo. Soo, ¿nda̱chun ni̱ka̱ʼa̱nra ña̱yóʼo xíʼin Jehová? Saáchi xi̱kandíxaníra Jehová. Ta ña̱ ñu̱ʼu kǒo nísa̱ʼviña. Mií ki̱vi̱ saá na̱ ñuu Israel sa̱ndíʼi-xa̱ʼana na̱ ñuu Canaán.