Ta̱ su̱tu̱ káʼnu Elí ni̱xi̱yo u̱vi̱ se̱ʼera: Ta̱ Hofní xíʼin ta̱ Finehás. Na̱yóʼo su̱tu̱ ni̱xi̱yona ta xi̱kachíñuna ini tabernáculo. Soo kǒo níkandíxana ley Jehová ta i̱xandi̱va̱ʼanína xíʼin na̱ yiví. Tá ku̱a̱ʼa̱n na̱ ñuu Israel taxina kití ndaʼa̱ Jehová, ta̱ Hofní xíʼin ta̱ Finehás ndákiʼinna ndiʼi ku̱ñu ña̱ va̱ʼa xa̱ʼa miína. Ta̱ Elí xi̱xini̱vara ña̱ kini xi̱keʼé na̱ se̱ʼera, soo kǒo ni̱ka̱ʼa̱nra xíʼinna. ¿Ndáaña keʼé Jehová xíʼinna túviún?

Ta̱ Samuel loʼovara nu̱ú ta̱ Hofní xíʼin ta̱ Finehás soo kǒo ña̱ kini níkeʼéra. Xa̱ʼa ña̱yóʼo kúsi̱íní-ini Jehová xíʼinra. Iin ñu̱ú tá kísi̱n ta̱ Samuel xi̱niso̱ʼora ña̱ kánanara. Tasaá nda̱koora xínura ku̱a̱ʼa̱nra nu̱ú ta̱ Elí ta káchira: “Yóʼo ki̱xa̱i̱”. Soo ta̱ Elí ni̱ka̱ʼa̱nra: “Kǒo níkanai̱ yóʼó, kúaʼan ku̱su̱ún”. Tasaá ku̱a̱ʼa̱nra ku̱su̱nra. Soo tuku xi̱niso̱ʼora ña̱ kánanara. Tá xi̱niso̱ʼora kánanara yichi̱ u̱ni̱, saá na̱kunda̱a̱-ini ta̱ Elí ña̱ Jehová kúú ta̱ kána ta̱ Samuel. Ta̱ Elí ni̱ka̱ʼa̱nra xíʼin ta̱ Samuel tá ná kuniso̱ʼo tukura ña̱ kánanara, ná ka̱ʼa̱nra: “Ka̱ʼa̱n, Jehová, chi xíniso̱ʼovai̱ ña̱ káʼún”.

Tá ni̱xa̱a̱ ta̱ Samuel ku̱su̱nra xi̱niso̱ʼora kánana: “Samuel, Samuel”. Tasaá nda̱kuiinra: “Ka̱ʼa̱n, Jehová, chi xíniso̱ʼovai̱  ña̱ ka̱ʼún”. Ta ni̱ka̱ʼa̱n Jehová: “Ka̱ʼa̱n xíʼin ta̱ Elí ña̱ taxii̱ castigo ndaʼa̱ra xíʼin na̱ veʼera. Saáchi xínivara ña̱ kéʼé se̱ʼera ña̱ kini ini ña̱ tabernáculo ta va̱ása káʼa̱nra xíʼinna”. Tá inka ki̱vi̱ ta̱ Samuel xu̱nára yéʼé ña̱ tabernáculo. Soo yíʼvira natúʼunra xíʼin ta̱ Elí. Soo ta̱ Elí ka̱nara ta̱ Samuel ta ni̱ka̱ʼa̱nra: “Se̱ʼe miíi̱, ¿ndáaña ni̱ka̱ʼa̱n Jehová xíʼún?”. Tasaá na̱túʼun ta̱ Samuel ndiʼi ña̱ ni̱ka̱ʼa̱n Jehová.

Ta̱ Samuel xa̱ʼnura ta ku̱ura migo Jehová. Na̱ ñuu Israel na̱kunda̱a̱-inina ña̱ nda̱ka̱xin Jehová ta̱ Samuel ña̱ koora profeta xíʼin juez.