Iin ñaʼá ñá íyo ñuu Israel ñá naní Noemí xíʼin yiíñá xíʼin u̱vi̱ se̱ʼeñá ke̱ena ku̱a̱ʼa̱nna chí ñuu Moab chi kǒoka ña̱ kuxuna ñuu Israel. Soo ni̱xi̱ʼi̱va yiíñá. Ta na̱ ta̱a se̱ʼeñá ti̱ndaʼa̱na xíʼin ná ñuu Moab: Ñá Rut xíʼin ñá Orpá. Ni̱ya̱ʼa tiempo ni̱xi̱ʼi̱tu yií náyóʼova.

Tá na̱kunda̱a̱-ini ñá Noemí ña̱ kǒoka so̱ko íyo ñuu Israel, ndi̱kóñá. Ñá Rut xíʼin ñá Orpá ku̱a̱ʼa̱nná xíʼinñá, soo tá ku̱a̱ʼa̱nná ñá Noemí ni̱ka̱ʼa̱nñá: “Ndóʼó va̱ʼaní inindó, kúni̱i̱ ti̱ndaʼa̱ tukundó. Ndikóndó ñuu Moab”. Náyóʼo nda̱kuiinná: “Kúni̱níndi̱ xínindi̱ yóʼó ta kǒo kúni̱ndi̱ sandákoondi̱ yóʼó”. Soo ñá Noemí ni̱ka̱ʼa̱nñá xíʼinná ña̱ ndikóná. Tándi̱ʼi ñá Orpá ndi̱kóvañá soo ñá Rut va̱ása níndikóña. Ñá Noemí ni̱ka̱ʼa̱nñá: “Ñá Orpá xa̱a̱ ndi̱kóñá nu̱ú na̱ ñuuñá xíʼin ndióxi̱ñá. Saátu yóʼó ndikó veʼe nu̱ú íyo siʼún”. Ñá Rut nda̱kuiinñá: “Kǒo sandákoi̱ yóʼó. Ñuún koo ñui̱, ta Ndióxi̱ún koo Ndióxi̱i̱”. ¿Ndáaña ndo̱ʼo ñá Noemí tá ni̱ka̱ʼa̱n ñá Rut ña̱yóʼo?

Tá ni̱xa̱a̱ ñá Rut xíʼin ñá Noemí ñuu Israel tiempo ndákayana cebada kúúña. Iin ki̱vi̱ ni̱xa̱ʼa̱n ñá Rut ka̱chíñuñá nu̱ú ñuʼú ta̱ Boaz, se̱ʼe ñá Rahab. Ta̱yóʼo na̱kunda̱a̱-inira ña̱ ke̱eñá ñuu Moab xíʼin ña̱ nda̱kúní ni̱xi̱yo iniñá xíʼin ñá Noemí. Ta ni̱ka̱ʼa̱nra xíʼin na̱ káchíñu nu̱úra ña̱ sa̱ndákoona sava ña̱ʼa nu̱ú ñuʼúra ña̱ ndakayañáña.

 Ñu̱ú saá ñá Noemí ni̱nda̱ka̱tu̱ʼunñá ñá Rut: “¿Ndáa míí ni̱xa̱ʼún ka̱chíñún?”. Tasaá ni̱ka̱ʼa̱n ñá Rut: “Ñuʼú ta̱ Boaz”. Saa ni̱ka̱ʼa̱n ñá Noemí: “Táʼan yiíi̱ kúú ta̱ Boaz. Nu̱ú ñuʼúra kachíñún xíʼin savaka ná válí. Chi kǒo na̱ keʼé yóʼó kán”.

Ñá Rut ka̱chíñuñá ñuʼú ta̱ Boaz nda̱a̱ tá ndi̱ʼi sa̱keena. Ta̱ Boaz xi̱nira ña̱ va̱ʼaní ñaʼá kúúñá ta va̱ʼaní káchíñuñá. Tiempo saá tá iin ta̱a ni̱xi̱ʼi̱ra ta kǒo se̱ʼera níxi̱yo iin na̱ táʼanra va̱ʼa tindaʼa̱ xíʼinñá. Xa̱ʼa ña̱yóʼo ta̱ Boaz ti̱ndaʼa̱ra xíʼin ñá Rut. Ni̱xi̱yo iin se̱ʼena ta̱ xi̱naní Obed. Tándi̱ʼi ta̱ Obed ni̱xa̱a̱ra ku̱ura xi̱í ta̱ David. Ná kítáʼan xíʼin ñá Noemí ni̱kusi̱íní-ininá. Nda̱a̱ xi̱ka̱ʼa̱nná xíʼinñá: “Siʼna ñá Rut ta̱xi Jehová ndaʼún ta va̱ʼaní iniñá xíʼún. Ta vitin inka se̱ʼeñániún ta̱xira ndaʼún. Ná ndasakáʼnuyó Jehová xa̱ʼa ña̱yóʼo”.