Jonatán xi̱naní se̱ʼe nu̱ú ta̱ rey Saúl, ta iin ta̱a ta̱ ndakúní-ini xi̱kuura. Ta̱ David ni̱ka̱ʼa̱nra ña̱ kamaníka ta̱yóʼo nu̱ú iin tí águila ta ndakúkara nu̱ú iin tí león. Iin ki̱vi̱ tá xi̱nira ndóo na̱ filisteo xi̱ní yuku̱, ni̱ka̱ʼa̱nra xíʼin ta̱ chíndeé táʼan xíʼinra kánitáʼanra: “Ku̱ʼu̱nyó kanitáʼanyó xíʼinna tá ná taxi Jehová iin seña nu̱úyó. Tá ná ka̱ʼa̱n na̱ filisteo xíʼinyó ña̱ kanitáʼanyó xíʼinna, kanitáʼanvayó”. Na̱ filisteo ni̱ka̱ʼa̱nna: “Naʼandó ná kanitáʼanyó”. Tasaá nda̱a u̱vi̱ saá ta̱yóʼo ta xa̱ʼnína 20 na̱ soldado.

Xa̱ʼa ña̱ kúú ta̱ Jonatán se̱ʼe nu̱ú ta̱ Saúl xi̱niñúʼu koora rey tá ná kuvi yivára. Soo ta̱ Jonatán xíni̱ra Jehová nda̱ka̱xinra ta̱ David ña̱ koora rey, soo va̱ása nísa̱a̱-inira kunirara. Ta̱ Jonatán xíʼin ta̱ David va̱ʼaní xi̱táʼanra. Saátu chi̱ka̱a̱ra trato xíʼin táʼanra ña̱ kundaa táʼanra.  Ña̱ va̱ʼa na̱ʼa̱ra ña̱ kúúra migo ta̱ David ta̱xira iin ti̱ko̱to̱ra ndaʼa̱ra, iin espada, iin tú arco xíʼin iin ti̱ko̱to̱ ña̱ katúnra tokóra.

Tá xínu ta̱ David nu̱ú ta̱ Saúl, ta̱ Jonatán ni̱xa̱ʼa̱nra xi̱tora ta̱ David ta ni̱ka̱ʼa̱nra: “Xíniñúʼu ndakú koo iniún ta va̱ása yi̱ʼvíún. Jehová nda̱ka̱xin yóʼó ña̱ koún rey. Ta xíni̱ yivái̱ ña̱yóʼo”. ¿Á kúni̱ún koo iin migoún táki̱ʼva ni̱xi̱yo ta̱ Jonatán?

Ta̱ Jonatán si̱lóʼo kuvira xa̱ʼa ña̱ chi̱ndeéra migora. Xíni̱vara ña̱ kúni̱ yivára kaʼníra ta̱ David, ta ni̱ka̱ʼa̱nra xíʼinra: “Tá ná kaʼníún ta̱ David, iin ku̱a̱chi kúúña. Chi kǒo ña̱ʼa níkeʼéra”. Ta̱ Saúl ni̱sa̱a̱níra xíʼin ta̱ Jonatán. Ni̱ya̱ʼa tiempo, ta̱ Saúl xíʼin ta̱ Jonatán ni̱xi̱ʼi̱na tá xíkana nu̱ú ku̱a̱chi.

Tá ni̱xi̱ʼi̱ ta̱ Jonatán, ta̱ David ni̱xa̱ʼa̱nra na̱ndukúra ta̱ Mefibóset se̱ʼe ta̱ Jonatán. Tá nda̱ni̱ʼírara ni̱ka̱ʼa̱nra xíʼinra: “Kundai̱ yóʼó ndiʼi tiempo ña̱ kutakún saáchi yiváún va̱ʼaní xi̱táʼanra xíʼi̱n. Nu̱ú íyo veʼi̱ kán koún xíʼi̱n ta nu̱ú mesa xíxii̱ kuxún”. Ta̱ David kǒo nínandósó-inira xa̱ʼa ta̱ Jonatán migora.