Jehová ta̱xira juez ña̱ chindeé táʼanna xíʼin na̱ ñuu Israel, soo na̱yóʼo kúni̱na iin rey. Ta ni̱ka̱ʼa̱nna xíʼin ta̱ Samuel: “Ndiʼi na̱ inka ñuu kúúmiína iin rey saátu ndi̱ʼi̱ kúni̱ndi̱ iin rey”. Va̱ása níkutóo ta̱ Samuel ña̱yóʼo. Ta ni̱ka̱ʼa̱nra xíʼin Jehová ta nda̱kuiinra: “Na̱ ñuu yóʼo su̱ví yóʼó kǒo kúni̱na xínina yi̱ʼi̱va kǒo kúni̱na xínina ka̱ʼa̱n xíʼinna ña̱ kuumiívana iin rey soo ta̱yóʼo ku̱a̱ʼání ña̱ʼa ndukúra nu̱úna”. Ni saá na̱ ñuu Israel ni̱ka̱ʼa̱nna: “Va̱ʼava, kúni̱vandi̱ iin rey”.

Tasaá Jehová ni̱ka̱ʼa̱nra xíʼin ta̱ Samuel, ta̱ koo rey na̱ ñuu yóʼo kúú ta̱ Saúl. Tá ni̱xa̱a̱ ta̱ Saúl nu̱ú íyo ta̱ Samuel chí ñuu Ramá, ta̱ Samuel nda̱ka̱xinrara ña̱ kuura rey ta sa̱káara aceite xi̱níra.

Tándi̱ʼi ta̱ Samuel nda̱kayara na̱ ñuu ña̱ kunina ta̱ kúú rey. Soo kǒora níndani̱ʼína. ¿Á xíniún nda̱chun? Saáchi chi̱se̱ʼéra miíra nu̱ú íyo ku̱a̱ʼání ña̱ʼa. Tá nda̱ni̱ʼínara, ka̱nindichinara ma̱ʼñú na̱ ñuu. Ta ta̱yóʼo kúú ta̱ súkunka nu̱ú ndiʼina, ta va̱ʼaní náʼa̱ra. Ta̱ Samuel ni̱ka̱ʼa̱nra: “Ta̱yóʼo kúú ta̱ nda̱ka̱xin Jehová”. Ta na̱ yiví ni̱ka̱ʼa̱nna: “Ta̱yóʼo kúú rey”.

Tá xa̱ʼa ta̱ rey Saúl va̱ʼaní xi̱niso̱ʼora ña̱ xi̱ka̱ʼa̱n ta̱ Samuel ta xi̱kandíxara Jehová. Soo tándi̱ʼi na̱samavara, iin ki̱vi̱ ta̱ Samuel ni̱ka̱ʼa̱nra ña̱ kundatura nda̱a̱ ná ndikó ta̱ Samuel saáví kaʼníra iin kití nu̱ú Jehová. Chi na̱ rey va̱ása xíniñúʼu keʼéna ña̱yóʼo. Soo ni̱ku̱a̱chi̱va ta̱ Samuel, ta va̱ʼaka mií ta̱ Saúl xa̱ʼní tí kití yóʼo. ¿Ndáaña ke̱ʼé ta̱ Samuel? Ni̱ka̱ʼa̱nra: “Xi̱niñúʼu kuniso̱ʼún ña̱ káʼa̱n Jehová ta vitin kǒo níkandíxaún”. ¿Ndáaña keʼé ta̱ Saúl á kuniso̱ʼora ña̱ ka̱ʼa̱n Jehová vitin?

Ta̱ Saúl ku̱a̱ʼa̱nra kanitáʼanra xíʼin na̱ ñuu Amaleq, ta̱ Samuel ni̱ka̱ʼa̱nra ña̱ ná kaʼníra ndiʼina saá. Soo ta̱ Saúl kǒo ni̱xaʼníra ta̱ rey Agag. Ta ni̱ka̱ʼa̱n Jehová xíʼin ta̱ Samuel: “Ta̱ Saúl kǒo kándíxakara yi̱ʼi̱ ta va̱ása xíniso̱ʼora ña̱ káʼi̱n”. Ta̱ Samuel ni̱kusuchíní-inira ta ni̱ka̱ʼa̱nra xíʼin ta̱ Saúl: “Jehová ndaka̱xinra  inka rey chi yóʼó kǒo kéʼún ña̱ káʼa̱nra”. Tá ki̱ta ta̱ Samuel ta̱ Saúl ti̱inra yuʼú ti̱ko̱to̱ra ta ni̱nda̱táña. Ta ni̱ka̱ʼa̱n ta̱ Samuel xíʼin ta̱ Saúl: “Saá keʼé Jehová kǒo taxikara koún rey”. Ña̱yóʼo kúni̱ kachiña Jehová ndaka̱xinra inka ta̱ koo rey iin ta̱ xíniso̱ʼora ña̱ káʼa̱nra.