Chí ventana veʼe ta̱ rey Acab ña̱ íyo chí ñuu Jezreel níndichira ta xítora ñuʼú nu̱ú íyo tú uva ta̱ Nabot. Xi̱kutóoníraña ta ni̱ka̱ʼa̱nra xíʼin ta̱ Nabot ná xi̱kóraña kiʼinra. Soo ta̱yóʼo va̱ása níxikóraña, chi ley Jehová xi̱ka̱ʼa̱nña ña̱ va̱ása va̱ʼa xi̱kóna ñuʼú ña̱ xi̱taxi yivána ndaʼa̱na. Ña̱ va̱ʼava ke̱ʼé ta̱ Nabot. ¿Á i̱xato̱ʼó ta̱ Acab ña̱ ni̱ka̱ʼa̱n ta̱ Nabot xíʼinra? Va̱ása. Ta̱ ni̱sa̱a̱va kúúra, ta xa̱ʼa ña̱yóʼo nda̱sira miíra ini veʼera ta kǒo níxiinra kuxura.

Ñá reina Jezabel xi̱kuu ñá síʼí ta̱ Acab, ta ndi̱va̱ʼaní ni̱xi̱yo iniñá. Ni̱ka̱ʼa̱nñá xíʼinra: “Yóʼó kúú rey ñuu Israel ta kivi kuumiíún ndiʼi ña̱ kúni̱ún. Ñuʼú ña̱ kúni̱ún yi̱ʼi̱ taxiña ndaʼún”. Tasaá ka̱ʼyíñá carta ku̱a̱ʼa̱n ndaʼa̱ na̱ xi̱ku̱aʼa. Ta nu̱ú carta yóʼo ni̱ka̱ʼa̱nñá xíʼinna ña̱ ná ka̱ʼa̱nna ta̱ Nabot ni̱ka̱ʼa̱n ndi̱va̱ʼara xa̱ʼa Ndióxi̱ ta ná kaʼnínara xíʼin yu̱u̱. Na̱yóʼo ke̱ʼéna ndiʼi ña̱ ni̱ka̱ʼa̱nñá xíʼinna. Tándi̱ʼi ni̱ka̱ʼa̱nñá xíʼin ta̱ Acab: “Ta̱ Nabot ni̱xi̱ʼi̱vara. Vitin va̱ʼa ndakiʼún ñuʼúra”.

Ñá reina Jezabel xa̱ʼnítuñá ku̱a̱ʼání na̱ yiví na̱ xi̱ndasakáʼnu Jehová nda̱a̱ táki̱ʼva ke̱ʼéñá xíʼin ta̱ Nabot. Saátu xi̱ndasakáʼnuñá ndióxi̱ vatá ta ku̱a̱ʼáníka ña̱ kini xi̱keʼéñá. Soo Jehová xítora ndiʼi ña̱yóʼo. ¿Ndáaña keʼéra xíʼinñá?

Tá xa̱a̱ ni̱xi̱ʼi̱ ta̱ Acab, se̱ʼera ta̱ Jehoram ki̱xaʼá kúú rey. Tasaá Jehová chi̱ndaʼára iin ta̱a ta naní Jehú ña̱ taxira castigo ndaʼa̱ ñá Jezabel xíʼin na̱ veʼeñá.

Ta̱ Jehú nda̱ara sa̱tá carrora ta ku̱a̱ʼa̱nra chí ñuu Jezreel, nu̱ú íyo ñá Jezabel, ta saátu ke̱ʼé ta̱ Jehoram nda̱ara sa̱tá carrora ta ku̱a̱ʼa̱nra ka̱ʼa̱nra xíʼin ta̱ Jehú. Tá nda̱kutáʼan ta̱ Jehoram xíʼin ta̱ Jehú ni̱nda̱ka̱tu̱ʼunrara: “¿Á ta̱ va̱xi va̱ʼa kúún Jehú?”. Ta̱ Jehú nda̱kuiinra: “Su̱ví ta̱ va̱xi va̱ʼa kúi̱ chi  síʼún nina ña̱ kini kéʼéñá”. Tasaá kúni̱ ta̱ Jehoram kunura soo ta̱ Jehú iin kama ka̱nirara xíʼin iin flecha ta ni̱xi̱ʼi̱ra.

Tándi̱ʼi ta̱ Jehú ku̱a̱ʼa̱nra chí nu̱ú íyo ñá Jezabel. Tá na̱kunda̱a̱-iniñá ña̱ va̱xi ta̱ Jehú livikaví nda̱saviíñá miíñá ta xi̱ko̱o̱ñá chí ventana ndátuñára. Tá ki̱xa̱a̱ ta̱ Jehú nu̱ú íyoñá ni̱ka̱ʼa̱n ndi̱va̱ʼañá xíʼinra. Ta̱ Jehú ni̱ka̱ʼa̱nra xíʼin na̱ káchíñu nu̱úñá: “Sakánandóñá chí ventana”. Tasaá ke̱ʼé na̱yóʼo, sa̱kánanañá ta ni̱xi̱ʼi̱ñá.

Tándi̱ʼi ta̱ Jehú xa̱ʼníra 70 saá na̱ se̱ʼe ta̱ Acab ta sa̱ndiʼi-xa̱ʼara ndióxi̱ Baal ña̱ xi̱ndasakáʼnuna. ¿Ndáaña sákuaʼún? Jehová xítora ndiʼi ña̱ kéʼéyó ta táxira castigo ndaʼa̱ na̱ kéʼé ña̱ va̱ása va̱ʼa.