Nina na̱ va̱ása va̱ʼa xi̱kuu rey nu̱ú na̱ 10 tribu ñuu Israel, tá kúú ta̱ Acab kininí ke̱ʼéra. Ti̱ndaʼa̱ra xíʼin ñá Jezabel, ndi̱va̱ʼaní ni̱xi̱yo iniñá ta xi̱ndasakáʼnuñá ndióxi̱ Baal. Ta̱ Acab xíʼin ñá Jezabel ku̱a̱ʼání na̱ yiví ni̱ka̱ʼa̱nna xíʼin ña̱ ndasakáʼnuna ndióxi̱ Baal. Xa̱ʼnína ku̱a̱ʼání profeta Jehová. ¿Ndáaña ke̱ʼé Jehová? Chi̱ndaʼára ta̱ profeta Elías ña̱ ka̱ʼa̱nra xíʼin ta̱ Acab.

Ta̱ Elías ni̱ka̱ʼa̱nra xíʼin ta̱ Acab ña̱ va̱ása koonka sa̱vi̱, chi su̱ví rey va̱ʼa kúúra. Yáʼa u̱ni̱ ku̱i̱ya̱ va̱ása níkana ña̱ʼa ña̱ xi̱chiʼina, ta ki̱xaʼá íyoní so̱ko. Soo Jehová chi̱ndaʼára ta̱ Elías ña̱ ka̱ʼa̱nra xíʼin ta̱ Acab. Ta̱ rey Acab ni̱ka̱ʼa̱nra xíʼin ta̱ Elías: “Yóʼó nina tu̱ndóʼo táxiún. Ndiʼi ña̱yóʼo ku̱a̱chi yóʼó kúúña”. Ta̱ Elías nda̱kuiinra: “Su̱ví ku̱a̱chi yi̱ʼi̱ kúúña. Kǒo sa̱vi̱ kóon chi yóʼó ndásakáʼnún ndióxi̱ Baal. Ndakaya na̱ ñuu xíʼin na̱ profeta ta̱ Baal ná ku̱ʼu̱nna xi̱ní yuku̱ Carmelo ta kán keʼéyó iin ña̱ʼa”.

Na̱ ñuu nda̱kayana xi̱ní yuku̱, ta ni̱ka̱ʼa̱n ta̱ Elías: “Xíniñúʼu ndaka̱xinndó, tá Jehová kúú Ndióxi̱ mií ta̱ nda̱a̱ ta kundiku̱nndóra. Soo tá Baal kúú ndióxi̱ ña̱ nda̱a̱ kundiku̱nndóña. Ná keʼéyó iin prueba: na̱ 450 profeta ña̱ Baal ná keʼéna iin ña̱ʼa taxina ndaʼa̱ña, ta saátu yi̱ʼi̱ ke̱ʼíi̱ iin ña̱ʼa taxi ndaʼa̱ Jehová. Na siʼna chindaʼá ñuʼu̱ kixiña chí ndiví na̱kán kúú Ndióxi̱”. Ta na̱ ñuu ka̱ndíxavana.

Na̱ profeta ña̱ Baal i̱xava̱ʼana ña̱ʼa taxina ndaʼa̱ña. Ta ki̱xaʼána kánana iníísaá ki̱vi̱: “Ndióxi̱ Baal ndakuiin yuʼúndi̱”. Soo kǒoña ndákuiin, ta̱ Elías kúsi̱kindaarana ta káchira: “Ndeé va̱ʼaka kanandó. Sana ña̱ ni̱ki̱si̱va kúúña, ta xíniñúʼu ndukaxin-iniña”. Ta xa̱a̱ kuñu̱ú, na̱ profeta ña̱ Baal kánakana, soo kǒoña ndákuiin.

Ta̱ Elías i̱xava̱ʼara ña̱ taxira ndaʼa̱ Ndióxi̱ ta chi̱ka̱a̱ra ti̱kui̱í sa̱táña. Ta ni̱ka̱ʼa̱nra: “Jehová, ná kuni na̱ ñuu yóʼo ña̱ iinlá yóʼó kúú Ndióxi̱ ta̱ nda̱a̱”. Ndi̱ku̱n saá, Jehová chi̱ndaʼára ñuʼu̱ ta xa̱ʼmiña ña̱ʼa ña̱ i̱xava̱ʼara. Ta na̱ yiví  káchina: “Jehová kúú Ndióxi̱ ta̱ nda̱a̱”. Ta̱ Elías ni̱ka̱ʼa̱nra: “Kaʼníndó ndiʼi na̱ profeta ña̱ Baal”. Tasaá xa̱ʼnína 450 na̱ profeta ña̱ Baal.

Tándi̱ʼi ka̱na iin vi̱kó loʼo nu̱ú mar, ta̱ Elías ni̱ka̱ʼa̱nra xíʼin ta̱ Acab: “Ndeéní koon sa̱vi̱, ndakiʼin carroún ta kúaʼán veʼún”. Nda̱kutú vi̱kó chí ndiví, ki̱xaʼá ta̱chí ta ndeékaví ki̱xaʼá sa̱vi̱ kóonra. Ta̱ Acab kamakaví ku̱a̱ʼa̱nra xíʼin carrora. Jehová chi̱ndeé táʼanra xíʼin ta̱ Elías ña̱ kamaka ni̱xa̱ʼa̱n ta̱yóʼo nu̱ú carro. ¿Á kooka tu̱ndóʼo nu̱ú ta̱ Elías? Vitin sakuaʼayó xa̱ʼa ña̱yóʼo.