Na̱ ñuu Asiria sa̱ndíʼi-xa̱ʼana u̱xu̱ tribu na̱ ñuu Israel. Ta vitin ta̱ rey ñuu Asiria ta̱ Senaquerib, kúni̱ra sandiʼi-xa̱ʼara na̱ u̱vi̱ ñuu kíndo̱o chí ñuu Judá. Tasaá ki̱xaʼára sándiʼi-xa̱ʼara sava ñuu válí ña̱ íyo ñuu Judá. Soo ña̱ xi̱kuni̱kara sandiʼi-xa̱ʼara kúú ñuu Jerusalén. Soo ña̱ va̱ása xíni̱ ta̱ Senaquerib kúúña Jehová ndáa na̱ ñuu yóʼo.

Ta̱ Ezequías rey ñuu Judá, cha̱ʼvira ku̱a̱ʼání xu̱ʼún ndaʼa̱ ta̱ Senaquerib ña̱ va̱ása sandiʼi-xa̱ʼarana. Ta̱ Senaquerib nda̱kiʼinra xu̱ʼún soo ni saá ni̱ka̱ʼa̱nra xíʼin na̱ soldadora ná ku̱ʼu̱nna kaʼnína na̱ ñuu Jerusalén. Ni̱yi̱ʼvínína chi kúyatinka na̱ ñuu Asiria va̱xina. Ta̱ Ezequías ni̱ka̱ʼa̱nra: “Va̱ása yi̱ʼvíndó. Ndixava ndakú na̱ ñuu Asiria soo Jehová taxi ña̱ ndakúka kooyó nu̱úna”.

Ta̱ Senaquerib chi̱ndaʼára ta̱ rabsaqué, ña̱ kusi̱kindaara na̱ ñuu Jerusalén. Ta̱ rabsaqué ni̱xa̱a̱ra chí sa̱tá ñuu ta ni̱ka̱ʼa̱nra: “Va̱ása kuchiñu Jehová saka̱kura ndóʼó. Va̱ása taxindó sandáʼvi ta̱ Ezequías ndóʼó. Kǒo ndióxi̱ kuchiñu saka̱ku ndóʼó ndaʼa̱ndi̱”.

Ta̱ Ezequías ni̱nda̱ka̱tu̱ʼunra Jehová ndáaña keʼéra, Jehová nda̱kuiinra: “Va̱ása yi̱ʼvíún xa̱ʼa ña̱ káʼa̱n ta̱ rabsaqué. Ta̱ Senaquerib va̱ása ki̱ʼvira ñuu Jerusalén”. Ta̱ Senaquerib chi̱ndaʼára carta ndaʼa̱ ta̱ Ezequías, ta káchiña: “Va̱ʼaka ndataxindó miíndó. Jehová kǒo kuchiñura saka̱kura ndóʼó”. Ta̱ Ezequías ni̱ka̱ʼa̱nra xíʼin Ndióxi̱: “Jehová, saka̱ku ndi̱ʼi̱, ña̱ va̱ʼa ná kunda̱a̱-inina ña̱ iinlá yóʼó kúú Ndióxi̱ mií ta̱ nda̱a̱”. Jehová nda̱kuiinra: “Ta̱ rey ñuu Asiria va̱ása ki̱ʼvira ñuu Jerusalén. Kundaavai̱ ñui̱”.

Ta̱ Senaquerib nda̱kanixi̱níra ña̱ sandiʼi-xa̱ʼara ñuu Jerusalén. Soo iin ñu̱ú Jehová chi̱ndaʼára iin ta̱ ángel nu̱ú ndóo na̱ ñuu Asiria. Ta̱ ángel xa̱ʼníra  185,000 na̱ soldado. Ni̱xi̱ʼi̱ ndiʼi na̱ ta̱a na̱ ndakú va̱ʼa kítáʼan xíʼin ta̱ rey xa̱ʼa ña̱yóʼo ndi̱kóra veʼera. Ña̱yóʼo ke̱ʼé Jehová ña̱ va̱ʼa chi̱ndeé táʼanra xíʼin ta̱ Ezequías tasaá ni̱ka̱ku ñuu Jerusalén, chi saá ni̱ka̱ʼa̱nra keʼéra. Tá níxi̱yoún ñuu Jerusalén, ¿á kandíxaún ña̱ chindeé táʼan Jehová xíʼún?