Ñá Jezabel ni̱xi̱yo iin se̱ʼeñá ñá xi̱naní Atalía ta saátu ñáyóʼo ndi̱va̱ʼaní ni̱xi̱yo iniñá. Ñá Atalía ti̱ndaʼa̱ñá xíʼin iin rey ta̱ ñuu Judá. Tá ni̱xi̱ʼi̱ra se̱ʼera ki̱xaʼá xáʼndachíñu. Tá ni̱xi̱ʼi̱ se̱ʼera, ñá Atalía ki̱xaʼá xáʼndachíñu. Ña̱ va̱ʼa ni iinna ná kǒo kindaa ña̱ chíñu ndaʼa̱ñá xa̱ʼníñá ndiʼi na̱ se̱ʼe ta̱ rey xíʼin inkaka na̱ kivi xa̱a̱ koo rey. Nda̱a̱ na̱ se̱ʼeñániñá xa̱ʼníñá. Xa̱ʼa ña̱yóʼo ndiʼina yíʼvinína xíninañá.

Ta̱ su̱tu̱ káʼnu Jehoiadá xíʼin ñá síʼíra ñá Jehoseba kúnda̱a̱-inina ña̱ va̱ása va̱ʼa ña̱ kéʼé ñá Atalía. Xa̱ʼa ña̱yóʼo ndu̱kúna ki̱ʼva ña̱ saka̱kuna ta̱ loʼo Jehoás, se̱ʼeñáni ñá Atalía. Ta ini templo xa̱ʼnura i̱xaana.

Tá xa̱a̱ u̱xa̱ ku̱i̱ya̱ ta̱ Jehoás, ta̱ Jehoíada nda̱kayara ndiʼi na̱ ndáa yéʼé ña̱ templo xíʼin na̱ se̱ʼe ta̱ Leví ta ni̱ka̱ʼa̱nra: “Kundaandó yéʼé. Va̱ása taxindó ki̱ʼvina”. Saá ta̱ Jehoiadá chi̱núura corona xi̱ní ta̱ Jehoás ña̱ koora rey ñuu Judá. Tasaá ni̱ka̱ʼa̱n ndiʼina: “Ta̱yóʼo kúú rey”.

Ñá Atalía xi̱niso̱ʼoñá ña̱ ni̱ka̱ʼa̱nna ta xínuñá ni̱xa̱ʼa̱nñá chí templo. Tá xi̱niñá ta̱ Jehoás ña̱ kúúra rey ni̱ka̱ʼa̱nñá: “Na̱ contra na̱ contra”. Ta na̱ ndáa kán ti̱innañá ku̱a̱ʼa̱nñá xíʼinna ta xa̱ʼnínañá. Ñáyóʼo nina ña̱ va̱ása va̱ʼa ke̱ʼéñá nu̱ú na̱ ñuu kán. Ta ¿ndáaña kuu vitin?

Ta̱ Jehoiadá chi̱ndeé táʼanra xíʼin na̱ ñuu yóʼo ña̱ chi̱ka̱a̱na iin trato xíʼin Jehová. Saá ki̱ndoona ña̱ iinlá Jehová ndasakáʼnuna. Ta̱ Jehoiadá ni̱ka̱ʼa̱nra xíʼinna ná sandiʼi-xa̱ʼana templo ña̱ Baal xíʼin ndiʼi ndióxi̱ vatá. Ni̱ka̱ʼa̱nra xíʼin na̱ su̱tu̱ xíʼin na̱  se̱ʼe ta̱ Leví ná kachíñuna ini templo ña̱ va̱ʼa ku̱ʼu̱n na̱ yiví ndasakáʼnuna Jehová. Ka̱tara na̱ kundaa yéʼé ña̱ va̱ʼa ná kǒo ki̱ʼvi na̱ kéʼé ña̱ kini ini templo. Tándi̱ʼi ta̱ Jehoiadá xíʼin na̱ chíñu nda̱kiʼinna ta̱ Jehoás ku̱a̱ʼa̱nra xíʼinna chí nu̱ú xi̱ndoo na̱ rey ta chi̱ndúʼúnara nu̱ú trono. Ni̱kusi̱íní-ini na̱ ñuu Judá. Vitin va̱ʼa ndasakáʼnuna Jehová chi kǒoka ñá Atalía ni na̱ ndásakáʼnu ña̱ Baal. ¿Á ndakú ni̱xi̱yo ini ta̱ Jehoiadá? Xa̱ʼa ña̱ ndakúní-inira chindeé táʼanra xíʼin ku̱a̱ʼání na̱ yiví.