Na̱ yiví na̱ xi̱ndoo ñuu Nínive ña̱ kíndo̱o chí Asiria nina ña̱ va̱ása va̱ʼa xi̱keʼéna. Jehová ni̱ka̱ʼa̱nra xíʼin ta̱ profeta Jonás ná ku̱ʼu̱nra ka̱ʼa̱nra xíʼinna ña̱ xíniñúʼu nasamana ña̱ kéʼéna. Soo ta̱yóʼo va̱ása níxa̱ʼa̱nra ñuu Nínive, inka xiyova ki̱tara ku̱a̱ʼa̱nra ta nda̱ara iin barco tú ku̱a̱ʼa̱n chí ñuu Tarsis.

Tá xa̱a̱ ku̱a̱ʼa̱nna nu̱ú mar, ki̱xaʼá ndeéní káni ta̱chí, na̱ ku̱a̱ʼa̱n kán ni̱yi̱ʼvínína ta káʼa̱nna xíʼin ndióxi̱na ta ndáka̱tu̱ʼunna: “¿Nda̱chun ndóʼoyó ña̱yóʼo?”. Saá ni̱ka̱ʼa̱n ta̱ Jonás: “Ku̱a̱chi yi̱ʼi̱ kúúña. Inka ñuu ku̱a̱ʼi̱n chi kǒo kúni̱i̱ keʼíi̱ ña̱ káʼa̱n Jehová. Chika̱a̱ndó yi̱ʼi̱ ini ti̱kui̱í tasaá sayáa ta̱chí”. Na̱ ku̱a̱ʼa̱n ini tú barco va̱ása xíínna chika̱a̱nara ini mar, soo tuku ta tuku káʼa̱nra xíʼinna. Xa̱ʼa ña̱yóʼo chi̱ka̱a̱nara ta sa̱yáa ta̱chí.

Ta̱ Jonás nda̱kanixi̱níra ña̱ kuvira. Tá sáʼvikara ku̱a̱ʼa̱nra ini ti̱kui̱í, ni̱ka̱ʼa̱nra xíʼin Jehová. Jehová ta̱xi iin ti̱a̱ká káʼnu kokóríra, soo va̱ása níxi̱ʼi̱ra. Tá ndíka̱a̱ra inirí, ni̱ka̱ʼa̱nra xíʼin Jehová: “Vitin kandíxai̱ ndiʼi ña̱ káʼún xíʼi̱n”. Jehová chi̱ndeéra ta̱ Jonás tá xi̱ndika̱a̱ra ini tí ti̱a̱ká u̱ni̱ ki̱vi̱ ta va̱ása níxi̱ʼi̱ra tasaá ndu̱xanrí ta̱ Jonás nu̱ú ñuʼú yi̱chí.

Jehová sa̱kákura ta̱ Jonás, soo ¿á va̱ása chindaʼáka Jehová ta̱ Jonás ña̱ ku̱ʼu̱nra ñuu Nínive? Tuku ni̱ka̱ʼa̱n Jehová xíʼinra ña̱  ku̱ʼu̱nra, ta ku̱a̱ʼa̱nvara. Ni̱xa̱ʼa̱nra ta ni̱ka̱ʼa̱nra xíʼinna: “Jehová sandiʼi-xa̱ʼara ñuu yóʼo ti̱xin 40 ki̱vi̱”. Ta̱yóʼo kǒo níndakanixi̱níra ndáaña kuu xíʼinna. Na̱ ñuu Nínive ka̱ndíxana ta sa̱ndákoona ña̱ kéʼéna. Ta̱ rey ñuu Nínive ni̱ka̱ʼa̱nra xíʼinna: “Ka̱ʼa̱n ndáʼvindó xíʼin Ndióxi̱ ta ndikó-inindó ta sana kǒo sandiʼi-xa̱ʼara miíyó”. Tá xi̱ni Jehová ña̱yóʼo kǒo nísandiʼi-xa̱ʼarana.

Ta̱ Jonás ni̱sa̱a̱níra xa̱ʼa ña̱ kǒo nísandiʼi-xa̱ʼa Jehová ñuu kán. Ndakanixi̱ní xa̱ʼa ña̱yóʼo: Jehová xi̱ndatura xíʼin ta̱ Jonás ta ku̱ndáʼvi-inira xi̱nirara. Soo ta̱ Jonás kǒo níkundáʼvi-inira kunira na̱ yiví ñuu Nínive. Chi ta̱yóʼo ki̱tara chí sa̱ta ñuu ta xi̱koora ku̱nda̱ti iin yitu̱n ta sáa̱níra. Tándi̱ʼi ni̱yi̱chi̱ tú yitu̱n yóʼo ta ni̱sa̱a̱níra. Ña̱kán ni̱ka̱ʼa̱n Jehová xíʼinra: “Ndáyáʼvika yitu̱n yóʼo nu̱ún ta su̱víka na̱ yiví na̱ íyo ñuu Nínive. Yi̱ʼi̱ ku̱ndáʼvi-inii̱ xi̱nii̱na xa̱ʼa ña̱kán kǒo nísandiʼi-xa̱ʼíi̱na”. ¿Ndáaña xi̱kuni̱ Jehová sanáʼa̱ra ta̱ Jonás? Ña̱ ndáyáʼviníka na̱ yiví nu̱ú iin tú yitu̱n.