Ñuu Siria ni̱xi̱yo iin ñá loʼo ñá ñuu Israel xíkaní ndóo na̱ veʼeñá. Na̱ chíñu ñuu Siria ki̱ʼinñá ku̱a̱ʼa̱n xíʼinna, ta vitin káchíñuñá nu̱ú ñá síʼí ta̱ Naamán iin ta̱ níʼin yichi̱ nu̱ú na̱ xíka ku̱a̱chi. Ñáyóʼo xi̱ndasakáʼnuñá Jehová, soo na̱ yiví kán va̱ása ndásakáʼnunara.

Ta̱ Naamán xi̱kuumiíra iin kue̱ʼe̱ ña̱ ndeéní ta xóʼvi̱kavíra xíʼinña. Ñá loʼo yóʼo xi̱kuni̱ñá chindeéñára, xa̱ʼa ña̱yóʼo ni̱ka̱ʼa̱nñá xíʼin ñá síʼíra: “Xínii̱ iin ta̱ kuchiñu sandáʼa yiíún. Chí ñuu Israel íyo iin ta̱a ta̱ naní Eliseo profeta Jehová kúúra ta̱kán kivi sandáʼa yiíún”.

Ñá síʼí ta̱ Naamán na̱túʼunñá xíʼinra ña̱ ni̱ka̱ʼa̱n ñá loʼo xíʼinñá. Ta̱yóʼo kúni̱ra keʼéra ndiʼiña, ña̱ va̱ʼa nduva̱ʼara xa̱ʼa ña̱yóʼo ku̱a̱ʼa̱nra ñuu Israel nu̱ú íyo veʼe ta̱ Eliseo. Ta̱ Naamán nda̱kanixi̱níra xa̱ʼa ta̱ Eliseo ña̱ va̱ʼaní nda̱kiʼinrara. Soo va̱ása níkeʼéra saá ta̱ káchíñu nu̱úvara ki̱ta nda̱kiʼin ta̱ Naamán ta ni̱ka̱ʼa̱nra xíʼinra: “Kúaʼan ta ki̱ʼviún u̱xa̱ yichi̱ ti̱xin yu̱ta Jordán. Tasaá nduva̱ʼún”.

 Ta̱ Naamán va̱ása níkutóora ña̱yóʼo ta ni̱ka̱ʼa̱nra: “Nda̱kanixi̱níi̱ ta̱ profeta yóʼo ka̱ʼa̱nra xíʼi Ndióxi̱ ta kaka ndaʼa̱ra chóʼo ta kaka ndaʼa̱ra chí káa ta sandáʼara yi̱ʼi̱. Soo ña̱ ni̱ka̱ʼa̱nra kúúña ku̱ʼi̱n ki̱ʼvii̱ yu̱ta tá íyo ñuu Israel. Ta va̱ʼaka yu̱ta íyo chí ñuu Siria. ¿Nda̱chun va̱ása kívi ku̱ʼi̱n yu̱ta tá íyo ñuu miíi̱?”. Ta̱ Naamán ni̱sa̱a̱níra ta ki̱tara ku̱a̱ʼa̱nra.

Na̱ káchíñu nu̱ú ta̱ Naamán chi̱ndeénara ña̱ ndakani vií xi̱níra ta ni̱ka̱ʼa̱nna xíʼinra: “¿Á su̱ví nda̱a̱ ndáakaña káʼa̱nna xíʼún ta keʼévaúnña ña̱ va̱ʼa nduva̱ʼún? Ña̱ ni̱ka̱ʼa̱n ta̱ profeta xíʼún va̱ása yo̱ʼvi̱ña. ¿Nda̱chun xíún keʼúnña?”. Ta Naamán xi̱niso̱ʼora ña̱ ni̱ka̱ʼa̱nna ta ni̱ki̱ʼvira u̱xa̱ yichi̱ ini yu̱ta Jordán. Tá ni̱ki̱ʼvira ña̱ yichi̱ u̱xa̱ ta ki̱tara kǒoka kue̱ʼe̱ kúúmiíra. Ni̱kusi̱íní-inira ta ta̱xira tixaʼvi ndaʼa̱ ta̱ Eliseo. Ta ni̱ka̱ʼa̱nra: “Vitin na̱kunda̱a̱-inii̱ Jehová kúú Ndióxi̱ ta̱ nda̱a̱”. Ta̱ Naamán ndi̱kóra veʼera ta kǒoka kue̱ʼe̱ kúúmiíra. ¿Ndáaña ndo̱ʼo ñá loʼo ñuu Israel tá xi̱niñára?