LECCIÓN 3
Ñá Rahab ka̱ndíxañá Jehová
Ná kachi miíyó, ndóoyó ñuu Jericó ña̱ ndíka̱a̱ nu̱ú ñuʼú ña̱ Canaán. Na̱ ñuu yóʼo va̱ása ndásakáʼnuna Jehová. Soo yóʼo íyo iin ñaʼá ñá naní Rahab, síín íyoñá nu̱ú ndiʼina.
Tá loʼoví ñá Rahab xa̱kunda̱a̱-iniñá xa̱ʼa Jehová. Ta na̱kunda̱a̱tu-iniñá ña̱ chi̱ndeé táʼanra xíʼin na̱ ñuura ña̱ ka̱nitáʼanna xíʼin na̱ inka ñuu. Xi̱niñúʼura ta̱ Moisés ña̱ va̱ʼa ta̱vára na̱ ñuu Israel ña̱ ñuu Egipto. Jehová ta̱ʼvíra mar Rojo ña̱ va̱ʼa ni̱ya̱ʼa na̱ ñuura. Ta vitin kúnda̱a̱-iniñá na̱ ñuu Israel xa̱yatin ñuuñá ña̱ Jericó ki̱xa̱a̱na.
Ñá Rahab chi̱ndeéñá na̱ ni̱xa̱ʼa̱n xi̱to se̱ʼé ñuu Jericó chi ka̱ndíxañá Jehová
Iin ñu̱ú, ni̱xa̱a̱ se̱ʼé u̱vi̱ ta̱a na̱ ñuu Israel ñuu Jericó ña̱ kunina ndáa ki̱ʼva káa ñuu yóʼo. Ni̱xa̱a̱na veʼe ñá Rahab, ñáyóʼo sa̱yaʼáñána veʼeñá. Ta míí ñu̱ú saá na̱kunda̱a̱-ini ta̱ rey ñuu Jericó xa̱ʼa na̱yóʼo, ta na̱kunda̱a̱-inira ndóona veʼe ñá Rahab. Ña̱kán chi̱ndaʼára ta̱a ku̱a̱ʼa̱nna na̱ndukúna na̱yóʼo. ¿Ndáaña ke̱ʼé ñá Rahab? Chi̱se̱ʼéñána xi̱ní veʼeñá, ta ni̱ka̱ʼa̱nñá xíʼin na̱ ki̱xa̱a̱ nándukúñaʼá: “Na̱ ki̱xi veʼi̱ yóʼo xa̱ku̱a̱ʼa̱nvana. Kuaʼánndó sa̱tána chi ni̱ʼivandóna”. Ña̱yóʼo kúú ña̱ ke̱ʼé ñá Rahab ña̱ va̱ʼa chi̱ndeéñána. ¿Á kúni̱ún kunda̱a̱-iniún ndáa xa̱ʼa kúú ña̱ chi̱ndeé táʼanñá xíʼinna?... Saáchi ñáyóʼo kándíxañá Jehová. Ta xíni̱ñá chi Jehová chindeé táʼanvara xíʼin na̱ ñuura ña̱ va̱ʼa ndakiʼinna ñuʼú Jericó xíʼin ñuʼú Canaán koo ñuʼúna.
Na̱ ni̱xa̱ʼa̱n xi̱to se̱ʼé yóʼo tá xa̱kunumí keena veʼeñá, ni̱ka̱ʼa̱nna xíʼinñá: tá ná sandiʼi-xa̱ʼa Ndióxi̱ ñuu Jericó sakákuvarañá xíʼin na̱ veʼeñá. Soo ñá Rahab xíniñúʼu keʼéñá iin ña̱ʼa ña̱ va̱ʼa ka̱kuñá. ¿Á xíni̱ún ndáaña ke̱ʼéñá?... Ni̱ka̱ʼa̱nna xíʼinñá: “Xíniñúʼu katikaún yoʼo̱ kuaʼá yóʼo chí ventanaún ta ndiʼi na̱ veʼún xíniñúʼu kuñuʼuna xíʼún ini veʼe yóʼo”. Ndiʼi ña̱ ni̱ka̱ʼa̱nna xíʼin ñá Rahab ke̱ʼéñáña. ¿Á kúni̱ún ka̱ʼi̱n xíʼún ndáaña ku̱u?...
Jehová sa̱kákura ñá Rahab xíʼin na̱ veʼeñá
Loʼo ki̱vi̱ ni̱ya̱ʼa, na̱ ñuu Israel ki̱xaʼána káva̱na sa̱tá ñuu Jericó. Iin iin yichi̱ ni̱ka̱va̱na sa̱táña ti̱xin ña̱ i̱ñu̱ ki̱vi̱ ta ni iinna va̱ása káʼa̱n. Soo ña̱ ki̱vi̱ u̱xa̱, u̱xa̱ yichi̱ ni̱ka̱va̱na sa̱táña tándi̱ʼi iin kuití ni̱nda̱ʼyi̱ kóʼóna xíʼin ndiʼi ndéena. Ta íyo iin ña̱ ku̱u: Jehová sa̱ndúvara nama̱ ña̱ ñuu Jericó. Soo, ¿ndáaña ndo̱ʼo veʼe ñá Rahab? Xa̱ʼa ña̱ tíkaa yoʼo̱ kuaʼá chí ventanañá va̱ása nínduvaña. Koto nu̱ú na̱ʼná, ¿á tíkaa yoʼo̱ kuaʼá chí ventanañá?... Ñá Rahab xíʼin na̱ veʼeñá ni̱ka̱kuvana.
¿Á ka̱ndíxa ñá Rahab Jehova?... Ka̱ndíxavañára chi xíni̱ñá va̱ʼa kundaara miíñá. Tá na̱túʼunna xíʼinñá xa̱ʼa Jehová ni̱xa̱a̱ñá ka̱ndíxañára. Saátu miíún ku̱a̱ʼání ña̱ʼa ku̱a̱ʼa̱n sákuaʼún xa̱ʼa Jehová vitin. ¿Á kandíxaún Jehová nda̱a̱ táki̱ʼva i̱xaa ñá Rahab?...
