Ñá Rebeca xi̱kuni̱níñá Jehová. Saátu yiíñá ta̱ Isaac xi̱kuni̱ra Jehová. Yóʼo sakuaʼayó míí xi̱ni ta̱ Isaac ñá Rebeca. Ta sakuaʼatuyó ndachun xi̱kusi̱í-ini Jehová xíʼin ñá Rebeca. Soo vitin siʼna xa̱ʼa ta̱ Isaac yiíñá sakuaʼayó.

Yivá ta̱ Isaac, Abrahán xi̱naníra ta siʼíra xi̱naní Sara. Ñuu Canaán xi̱ndoona, na̱ yiví ñuu kán va̱ása níxindasakáʼnuna Jehová. Ta̱ Abrahán xi̱kuni̱ra tindaʼa̱ se̱ʼera ta̱ Isaac xíʼin iin ñá ndásakáʼnu Jehová. Ña̱kán chi̱ndaʼára ta̱ káchíñu nu̱úra, sana ta̱ Eliezer chi̱ndaʼára ni̱xa̱ʼa̱n ñuu Harán ña̱ ndukúra ñá síʼí ta̱ Isaac. Chi ñuu Harán kúú nu̱ú ndóo na̱ táʼan ta̱ Abrahán.

Ta̱ Eliezer nda̱kiʼinra ku̱a̱ʼa̱nra xíʼin inkaka na̱ káchíñu nu̱ú ta̱ Abrahán. Ku̱a̱ʼa̱n 10 tí camello xíʼinna ta ndísorí ña̱ʼa kuxuna xíʼin ña̱ʼa ña̱ taxina ndaʼa̱ na̱ veʼe nu̱ú xa̱a̱na. Soo, ¿ndáaña keʼé ta̱ Eliezer ña̱ va̱ʼa ndaniʼíra iin ñá tindaʼa̱ xíʼin ta̱ Isaac? Ta̱yóʼo xíni̱ra chi ná si̱ʼí ñuu yóʼo xáʼa̱nná táváná ti̱kui̱í pozo. Ña̱kán tá ni̱xa̱a̱na ñuu Harán, ke̱ena ku̱a̱ʼa̱nna chí nu̱ú íyo pozo yóʼo. Tasaá ki̱xaʼá ta̱ Eliezer káʼa̱nra xíʼin Jehová: “Ka̱ʼi̱n xíʼin iin ñá loʼo ná taxiñá ti̱kui̱í koʼi̱. Tá ná taxiñá ti̱kui̱í ndaʼíi̱ ta taxituñá ti̱kui̱í koʼo tí camello sa̱na̱i̱ kúni̱ kachiña, ñáyóʼo kúú ñá ndákaxiún koo ñá síʼí ta̱ Isaac”.

Kama ki̱xa̱a̱ ñá Rebeca yu̱ʼu̱ pozo. Ña̱ Biblia káchiña liviní ñaʼá xi̱kuuñá. Ta̱ Eliezer ndu̱kúra ti̱kui̱í nu̱úñá ta ñáyóʼo ni̱ka̱ʼa̱nñá xíʼinra: “Va̱ʼava taxivai̱ ti̱kui̱í koʼún ta taxitui̱  ti̱kui̱í koʼo tí camello sa̱na̱ún”. Ku̱a̱ʼání ti̱kui̱í ta̱váñá, chi ku̱a̱ʼání ti̱kui̱í xíʼi tí camello. Koto nu̱ú na̱ʼná, ¿ndáaña kéʼé ñá Rebeca?... Tá xi̱ni ta̱ Eliezer ndiʼi ña̱yóʼo, na̱kunda̱a̱-inira: chi nda̱kuiin Jehová ña̱ ni̱ka̱ʼa̱nra xíʼinra.

Ta̱ Eliezer ku̱a̱ʼá ña̱ʼa livi ta̱xira ndaʼa̱ ñá Rebeca. Ñáyóʼo ni̱ka̱ʼa̱nñá xíʼinra ná ku̱ʼu̱nra veʼeñá xíʼin na̱ ku̱a̱ʼa̱n xíʼinra. Ta̱ Eliezer ni̱ka̱ʼa̱nra xíʼin na̱ veʼe ñá Rebeca ndáa xa̱ʼa kúú ña̱ ni̱ka̱ʼa̱n ta̱ Abrahán xíʼinra ku̱a̱ʼa̱nra ñuu Harán. Saátu ni̱ka̱ʼa̱nra xíʼinna ndáa ki̱ʼva nda̱kuiin Jehová yu̱ʼu̱ra ña̱ ni̱ka̱ʼa̱nra xíʼinra. Na̱ veʼe ñá Rebeca ni̱kusi̱íní-inina. Ni̱ka̱ʼa̱nna xíʼin ta̱ Eliezer: “Taxivandi̱ ñá Rebeca ña̱ tindaʼa̱ñá xíʼin ta̱ Isaac”.

¿Nda̱saa túvi yóʼó, á ka̱ndíxa ñá Rebeca tindaʼa̱ñá xíʼin ta̱ Isaac?... Tá ni̱nda̱ka̱tu̱ʼunnañá, ka̱ndíxavañá. ¿Ndachun va̱ʼa ka̱ndíxañá? Saáchi ñá Rebeca xa̱kunda̱a̱-iniñá Jehová kúú ta̱ chi̱ndaʼá ta̱ Eliezer. Tasaá nda̱kiʼinñá ku̱a̱ʼa̱nñá xíʼinra chí ñuu Canaán, tá ni̱xa̱a̱na ñuu yóʼo, ti̱ndaʼa̱vañá xíʼin ta̱ Isaac.

Ñá Rebeca ka̱ndíxaníñá ña̱ ni̱ka̱ʼa̱n Jehová xíʼinñá ña̱kán va̱ʼaní xi̱ndaarañá. Ti̱xin na̱ veʼe ñáyóʼo ki̱xi ta̱ Jesús. Ta saátu kundaa Jehová miíún ná kandíxaún ña̱ káʼa̱nra xíʼún nda̱a̱ táki̱ʼva ni̱xi̱yo ñá Rebeca. Jehová kusi̱íní-inira xíʼún tá kándíxaúnra.