LECCIÓN 11
¿Ndáana ka̱ʼyí tutu xa̱ʼa ta̱ Jesús?
Koto na̱ va̱xi nu̱ú na̱ʼná yóʼo. Va̱xi ta̱ Mateo, ta̱ Marcos, ta̱ Lucas, ta̱ Juan, ta̱ Pedro, ta̱ Santiago, ta̱ Judas xíʼin ta̱ Pablo. Ndiʼi na̱yóʼo ni̱xi̱yona tá tiempo ni̱xi̱yo ta̱ Jesús, ta ka̱ʼyína xa̱ʼa ña̱ ke̱ʼéra. ¿Á kúni̱ún kunda̱a̱ka-iniún xa̱ʼana?...
¿Ndáana kúú na̱ va̱xi nu̱ú na̱ʼná yóʼo?
Ta̱ Mateo, ta̱ Juan xíʼin ta̱ Pedro u̱ni̱ na̱yóʼo kúú na̱ xi̱táʼan va̱ʼa xíʼinra ta ni̱xi̱kana xíʼinra na̱túʼunna xa̱ʼa tu̱ʼun Ndióxi̱. ¿Á kivi na̱ʼa̱ ndaʼúnna nu̱ú na̱ʼná yóʼo?... Ta̱ Mateo ka̱ʼyí iin libro ña̱ káʼa̱n xa̱ʼa ta̱ Jesús, ta saátu ta̱ Juan. Ta íyoka inka libro ka̱ʼyí ta̱ Juan, ka̱ʼyíra libro ña̱ naní Revelación, ka̱ʼyíra u̱ni̱ carta ña̱ naní: Iin Juan, U̱vi̱ Juan xíʼin U̱ni̱ Juan. Ta̱ apóstol Pedro ka̱ʼyíra u̱vi̱ carta ña̱ naní: Iin Pedro xíʼin U̱vi̱ Pedro. Nu̱ú carta ña̱ u̱vi̱, ta̱ Pedro ka̱ʼyíra ña̱ xi̱niso̱ʼora ni̱ka̱ʼa̱n Jehová chí ndiví xa̱ʼa ta̱ Jesús: “Ta̱yóʼo kúú Se̱ʼi̱ ta̱ kúni̱níi̱ xíni̱i̱”.
Savaka na̱ va̱xi nu̱ú na̱ʼná, ka̱ʼyítu na̱yóʼo tutu ña̱ káʼa̱n xa̱ʼa ta̱ Jesús. Iin ta̱ ka̱ʼyí tutu xa̱ʼa ta̱ Jesús kúú ta̱ Marcos. Ta̱yóʼo sana xi̱nira ndiʼi ña̱ ku̱u tá ki̱vi̱ ti̱inna ta̱ Jesús ku̱a̱ʼa̱n xíʼinna. Inka ta̱ naní Lucas. Ta̱yóʼo médico xi̱kuura, tá ni̱xi̱ʼi̱ ta̱ Jesús, ndu̱ura discípulo.
Inka u̱vi̱ ñani ta̱ Jesús na̱ válíka nu̱úra ka̱ʼyítu na̱yóʼo tutu xa̱ʼara. ¿Á xíni̱ún ndáana kúúna?... Nu̱ú na̱ʼná yóʼo va̱xina iinra naní Santiago ta inkara naní Judas. Tá xa̱ʼa, na̱yóʼo kǒo níxikandíxana ña̱ sa̱náʼa̱ ta̱ Jesús. Ña̱ túvi miína ta̱ sánava kúúra. Soo tándi̱ʼi ka̱ndíxavanara ta ni̱xa̱a̱na ndu̱una discípulo.
Vitin ná ka̱ʼa̱nyó xa̱ʼa ta̱ Pablo. ¿Á xíni̱ún míí va̱xira nu̱ú na̱ʼná yóʼo? Tá kúma̱níka nduura discípulo ta̱ Jesús, Saulo xi̱naníra. Ta̱yóʼo xi̱sa̱a̱-inira xi̱xinira na̱ xi̱ndiku̱n sa̱tá ta̱ Jesús ta i̱xandi̱va̱ʼara xíʼinna. ¿Á kúni̱ún kunda̱a̱-iniún ndachun va̱ʼa ndu̱ura discípulo ta̱ Jesús?... Iin ki̱vi̱ tá ku̱a̱ʼa̱nra chí ñuu Damasco kama xi̱niso̱ʼora ni̱ka̱ʼa̱n iinna xíʼinra chí ndiví. Ta̱ Jesús kúú ta̱ ni̱ka̱ʼa̱n xíʼinra, ta káchira: “¿Ndachun íxandi̱va̱ʼún xíʼin na̱ kándíxa yi̱ʼi̱?” Saá na̱kunda̱a̱-ini ta̱ Pablo ña̱ xíniñúʼu nasamara miíra ta nduura discípulo ta̱ Jesús. Ta̱ Pablo ka̱ʼyíra 14 libro ña̱ va̱xi nu̱ú Biblia, ki̱xaʼára xíʼin carta ña̱ Romanos iinsaá nda̱a̱ carta ña̱ naní Hebreos.
Ná kaʼviyó Biblia ndiʼi ki̱vi̱. Tá káʼviyóña ku̱a̱ʼání ña̱ʼa sákuaʼayó xa̱ʼa ta̱ Jesús. ¿Á kúni̱ún sakuaʼakaún xa̱ʼara?...
