Koto nu̱ú na̱ʼná, ta̱ loʼo yóʼo ta̱ yíʼvi kúúra. ¿Á xa̱ndóʼo miíún saá sava yichi̱?... Ndiʼivayó ndóʼo saá sava yichi̱. Ña̱ Biblia káʼa̱nña xíʼinyó xa̱ʼa sava na̱ xi̱ndasakáʼnu Jehová ni xi̱kuni̱vana xi̱xininara ni saáví sava yichi̱ xi̱yi̱ʼvívana. Iin ta̱ ndo̱ʼo saá xi̱kuu ta̱ Elías. Ná sakuaʼayó xa̱ʼa ña̱ ndo̱ʼora.

Tiempo xi̱naʼáví ni̱xi̱yo ta̱ Elías tá kúma̱níka kaku ta̱ Jesús. Tiempo saá ta̱ rey ñuu Israel Acab xi̱naníra ta ñá síʼíra xi̱naní Jezabel na̱yóʼo va̱ása níxikuni̱na Jehová. Ndióxi̱ vatá ña̱ naní Baal xi̱ndasakáʼnuna. Xa̱ʼa ña̱yóʼo ku̱a̱ʼání na̱ ñuu Israel xi̱ndasakáʼnu ndióxi̱ Baal. Ñá reina Jezabel su̱ví ñá va̱ʼa níxi̱kuuñá chi xi̱kuni̱ñá kaʼníñá ndiʼi na̱ xi̱ndasakáʼnu Jehová. Xa̱ʼa ña̱ xi̱ndasakáʼnu ta̱ Elías Jehová xi̱kuni̱ñá kaʼnítuñá ta̱yóʼova. ¿Ndáaña ke̱ʼé ta̱ Elías? Tá miíún níxi̱yoún tiempo saá, ¿ndáaña keʼún?...

 Ta̱ Elías xíka va̱ʼa ki̱tara ku̱a̱ʼa̱nra. Nda̱a̱ nu̱ú ñuʼú yi̱chí ni̱xa̱a̱ra ta kán chi̱se̱ʼéra miíra ini kavá. ¿Ndachun chi̱se̱ʼéra miíra?... Saáchi ta̱ ni̱yi̱ʼví kúúra. Ta̱yóʼo kǒo xíniñúʼu yi̱ʼvíra. ¿Ndachun kǒo xíniñúʼu yi̱ʼvíra? Saáchi xíni̱vara Ndióxi̱ kivi chindeéñaʼá. Tá xa̱ya̱chi̱ loʼoka chi̱ndeé Ndióxi̱ miíra. Iin yichi̱ ta̱ Elías ni̱ka̱ʼa̱nra xíʼin Ndióxi̱ ta nda̱kuiinvara yu̱ʼu̱ra, chi chi̱ndaʼára ñuʼu̱ chí ndiví ta nda̱kavaña nu̱ú ñuʼú. Íyoníva ndée Ndióxi̱. Ta̱ Elías va̱ʼava kandíxarara.

Tá ndíka̱a̱ ta̱ Elías ini kavá Jehová ni̱ndaka̱tu̱ʼu̱nrara: “¿Ndachun ndíka̱ún ini kavá yóʼo?”. Ta̱ Elías nda̱kuiinra: “Tá ya̱chi̱ ku̱a̱ʼá xi̱kuundi̱ xi̱ndasakáʼnu yóʼó ta vitin iinlá yi̱ʼi̱va ni̱ndoo. Ta yíʼviníi̱ ña̱ kaʼnína yi̱ʼi̱”, káchira. Ña̱ túvi miíra xa̱xa̱ʼní ndiʼina na̱ ndásakáʼnu Ndióxi̱. Soo Jehová ni̱ka̱ʼa̱nra xíʼinra: “Su̱ví iinlá miíún níndoo, íyoka inka u̱xa̱ mil na̱ yiví na̱ ndásakáʼnuka yi̱ʼi̱. Kǒo yi̱ʼvíún chi íyo iin chiñu taxii̱ ndaʼún”. Tá ni̱ka̱ʼa̱n Ndióxi̱ ña̱yóʼo xíʼin ta̱ Elías, ¿á ni̱kusi̱í-inira túviún?... Ni̱kusi̱íva-inira.

¿Ndáaña sákuaʼún xíʼin ña̱ ndo̱ʼo ta̱ Elías?... Sava yichi̱ sana yi̱ʼvívaún. Soo tá yíʼviún ndakaʼún ña̱ va̱ása íyo iinlá miíún, chi íyo migoún na̱ kúni̱ xíni Jehová ta kúni̱tuna xínina miíún. Ta va̱ása nandosóún chi Jehová íyoní ndéera ta ndiʼi tiempo chindeéra yóʼó. ¿Á su̱ví ña̱ va̱ʼa kúú ña̱ sa̱kuaʼayó vitin?...