Tá káʼa̱nyó xa̱ʼa Jehová, sava na̱ yiví sáa̱na xíʼinyó á kúsi̱kindaana miíyó. Ta ña̱yóʼo sándakavaña-iniyó. Ta sana ndakanixi̱níyó: “Kǒo ka̱ʼa̱nkai̱ xa̱ʼa Jehová”. ¿Á xa̱ndóʼún saá sava yichi̱?... Ña̱ Biblia káʼa̱nña xíʼinyó xa̱ʼa iin ta̱a, ta̱yóʼo xi̱kuni̱vara Jehová soo si̱loʼo sandákoora ka̱ʼa̱nra xa̱ʼa Jehová. Jeremías xi̱naníra. Yóʼo sakuaʼayó xa̱ʼa ña̱ ndo̱ʼora.

Tá ni̱xi̱yo loʼo ta̱ Jeremías, Jehová ni̱ka̱ʼa̱nra xíʼinra ña̱ ná ka̱ʼa̱nra xíʼin na̱ yiví ña̱ ná sandákoona ña̱ kini kéʼéna. Xa̱ʼa ña̱yóʼo i̱xayo̱ʼviña xíʼinra, ta ni̱yi̱ʼvívara. Ña̱kán ni̱ka̱ʼa̱nra xíʼin Jehová: “Ta̱ loʼova kúi̱ ta va̱ása xíni̱i̱ ndáaña ka̱ʼi̱n xíʼinna”. Soo Jehová nda̱kuiinra yu̱ʼu̱ra: “Va̱ása yi̱ʼvíún chi yi̱ʼi̱ chindeé yóʼó”.

 Tasaá ki̱xaʼá ta̱ Jeremías káʼa̱nra xíʼin na̱ ñuu: “Tá kǒo násamandó ña̱ kéʼéndó Jehová taxira castigo ndaʼa̱ndó”. ¿Á xi̱niso̱ʼona ña̱ ni̱ka̱ʼa̱nra xíʼinna?... Kǒo níxiniso̱ʼona, savana ni̱kusi̱kindaanara ta savana ni̱sa̱a̱nína xíʼinra. Ta savatuna nda̱a̱ xi̱kuni̱na kaʼnínara. ¿Á ni̱yi̱ʼví ta̱ Jeremías xa̱ʼa ña̱yóʼo?... Ni̱yi̱ʼvívara ta ni̱ka̱ʼa̱nra: “Va̱ása kúni̱kai̱ ka̱ʼi̱n xa̱ʼa Jehová”. Soo, ¿á ndixa sa̱ndákoora ña̱ ka̱ʼa̱nra xa̱ʼa Jehová?... Va̱ása nísandákoora ka̱ʼa̱nra xa̱ʼara. Saáchi kúni̱níra xínirara ña̱kán kǒo níkivi sandákoora ka̱ʼa̱nra xa̱ʼara. Ta xa̱ʼa ndiʼi ña̱ ke̱ʼéra, Jehová xi̱ndaarara.

Iin yichi̱, ta̱a na̱ ndi̱va̱ʼa-ini chi̱ka̱a̱na ta̱ Jeremías ini iin ya̱vi̱ kúnu nu̱ú chútu nda̱ʼyi̱. Ta ni ña̱ kuxura kǒo ni ti̱kui̱í koʼora kǒo. Ña̱ xi̱kuni̱ na̱yóʼo kúúña ná kuvi ta̱ Jeremías ini ya̱vi̱. Soo, Jehová chi̱ndeévarara.

¿Ndáaña sákuaʼayó xíʼin ña̱ ndo̱ʼo ta̱ Jeremías?... Ni sava yichi̱ ni̱yi̱ʼvíra kǒo nísandákoora ka̱ʼa̱nra xa̱ʼa Jehová. Tasaá miíún, sava na̱ yiví kúsi̱kindaana yóʼó á sáa̱na xíʼún tá káʼún xa̱ʼa Jehová xíʼinna. Ta sana nda̱a̱ kukaʼan nu̱ún á yi̱ʼvívaún. Soo nda̱a̱ ni iin yichi̱ va̱ása sandákoún ka̱ʼún xa̱ʼa Jehová. Ndakaʼán chi Jehová chindeéra yóʼó nda̱a̱ tá chi̱ndeéra ta̱ Jeremías.