¿Á íxayo̱ʼviña xíʼún ña̱ kuniso̱ʼún ña̱ káʼa̱nndi̱ xíʼún?... Sana íxayo̱ʼvivaña xíʼún. ¿Á xíni̱ún ndáaña va̱ʼa chindeé miíún? Ña̱ va̱ʼa chindeé yóʼó kúú ña̱ kundiku̱n táʼan ña̱ ke̱ʼé ta̱ Jesús. ¿Á xíni̱ún ndiʼi tiempo va̱ʼaní xi̱niso̱ʼora ña̱ xi̱ka̱ʼa̱n Jehová xíʼinra saátu ña̱ xi̱ka̱ʼa̱n yivára xíʼin siʼíra xíʼinra?... Ta vitin ná sakuaʼa loʼoyó xa̱ʼara.

Tá kúma̱níka kixi ta̱ Jesús nu̱ú Ñuʼú yóʼo, chí ndiví ni̱xi̱yora xíʼin Yivára, Jehová. Soo tá ki̱xira nu̱ú Ñuʼú yóʼo ni̱xi̱yotu yivára xíʼin siʼíra yóʼova. Yivára xi̱naní José ta siʼíra xi̱naní María. ¿Á kúni̱ún kunda̱a̱-iniún nda̱saa va̱ʼa ni̱xa̱a̱na xi̱kuuna yivára?...

Jehová ke̱ʼéra iin milagro, ña̱ va̱ʼa kaku ta̱ Jesús ti̱xin ñá María táki̱ʼva káku ndiʼi na̱ va̱lí ti̱xin siʼína. Tá ni̱xi̱nu i̱i̱n yo̱o̱ ka̱kuvara nu̱ú Ñuʼú yóʼo. Tasaá kúúña ni̱xa̱a̱ ta̱ José xíʼin ñá María xi̱kuuna yivá ta̱ Jesús nu̱ú Ñuʼú yóʼo.

Tá ndíka̱a̱ ta̱ Jesús 12 ku̱i̱ya̱ra, ke̱ʼéra iin ña̱ʼa tasaá ni̱na̱ʼa̱ra ña̱ kúʼvi̱ní-inira xínira Jehová. Ña̱yóʼo ku̱uña tá ki̱vi̱ ke̱e na̱ veʼe ta̱ Jesús ku̱a̱ʼa̱nna xíʼinra chí ñuu Jerusalén ña̱ ndasakáʼnuna Jehová. Tá xa̱ndikóna ku̱a̱ʼa̱nna chí veʼena, ta̱ José xíʼin ñá María xi̱nina kǒo ta̱ Jesús ku̱a̱ʼa̱n xíʼinna. Iníí na̱ndukúnara soo kǒora níndaniʼína. ¿Á xíni̱ún ndáaña ke̱ʼé ta̱ José xíʼin ñá María?...

Kama ndi̱kóna chí ñuu Jerusalén ta ki̱xaʼána nándukúna ta̱ Jesús. Ndíʼi̱kaví-inina xa̱ʼara iníí ni̱xi̱kana na̱ndukúnara u̱ni̱ ki̱vi̱. Nda̱a̱ vitinví nda̱niʼínara. ¿Á xíni̱ún míí nda̱niʼínara?... Ini templo nda̱niʼínara. ¿Ndachun ndíka̱a̱ra ini templo? Saáchi ta̱yóʼo xi̱kutóoníra sakuaʼara xa̱ʼa Jehová. Xi̱kuni̱níra Jehová ta xi̱kuni̱ra keʼéra ña̱ʼa ña̱ kútóo Jehová. Ndiʼi tiempo xi̱niso̱ʼora ña̱ ni̱ka̱ʼa̱n Jehová ni i̱xayo̱ʼviña xíʼinra. Soo, ¿á xi̱xiniso̱ʼotura ña̱ xi̱ka̱ʼa̱n ta̱ José xíʼin ñá María xíʼinra?... Xi̱xiniso̱ʼovara ña̱ xi̱ka̱ʼa̱nna káchi Biblia.

¿Ndáaña sákuaʼún xíʼin ña̱ ke̱ʼé ta̱ Jesús?... Xíniñúʼu kuniso̱ʼún ña̱ káʼa̱nndi̱ xíʼún ni sava yichi̱ íxayo̱ʼviña xíʼún. ¿Á kuniso̱ʼún ña̱ káʼa̱nndi̱ xíʼún?...