¿Á va̱ása yo̱ʼvi ndasakáʼnuyó Jehová túviún?... Ku̱a̱ʼání na̱ yiví káʼa̱nna yo̱ʼviní ndasakáʼnuyóra. Soo ña̱ Biblia káʼa̱nña xíʼinyó ña̱ va̱ʼava ndasakáʼnuyóra. Káʼa̱nña xíʼinyó xa̱ʼa iin ta̱ loʼo xi̱naní Josías, ta̱yóʼo chi̱ka̱a̱níra ndée ña̱ nda̱sakáʼnura Jehová. Iin ña̱ chi̱ndeé táʼan xíʼinra kúú ña̱ viíní nda̱kaxinra na̱ xi̱kuu migora. Yóʼo sakuaʼakayó xa̱ʼa ta̱ Josías xíʼin na̱ migora.

Yivá ta̱ Josías xi̱kuu rey ñuu Judá, Amón xi̱naníra. Ta̱ Amón su̱ví ta̱a va̱ʼa níxikuura chi xi̱ndasakáʼnura ndióxi̱ vatá. Tá ni̱xi̱ʼi̱ ta̱ Amón ta̱ Josías se̱ʼera ndu̱u rey ñuu Judá. ¿Á xíni̱ún nda̱saa ku̱i̱ya̱ ta̱ Josías tá ndu̱ura rey? U̱na̱ loʼo ku̱i̱ya̱ra. ¿Á tá ni̱xi̱yo yivárá saá ni̱xi̱yora?... Su̱ví saá níxi̱yora.

Nani tá loʼovíra xi̱kuni̱ra ndasakáʼnura Jehová. Xa̱ʼa ña̱yóʼo nda̱kaxinra na̱ ndásakáʼnu Jehová ña̱ koona migora ta na̱yóʼo chi̱ndeénara ña̱ va̱ʼa ndasakáʼnura Jehová. ¿Ndáana xi̱kuu migo ta̱ Josías?

Iin ta̱ xi̱kuu migora xi̱kuu ta̱ profeta Sofonías. Ta̱yóʼo xi̱ka̱ʼa̱nra xíʼin na̱ yiví ñuu Judá xa̱ʼa tu̱ndóʼo ña̱ kixi nu̱úna tá kǒo sandákoona  ña̱ ndasakáʼnuna ndióxi̱ vatá. Ta̱ Josías xi̱niso̱ʼora ña̱ ni̱ka̱ʼa̱n ta̱ Sofonías, ta iinlá Jehová nda̱sakáʼnura va̱ása níndasakáʼnura ndióxi̱ vatá.

Inka ta̱ xi̱kuu migora xi̱kuu ta̱ Jeremías. Sana inkáchi ku̱i̱ya̱vana, tá ni̱xi̱yo válína yatin xi̱ndoo xíʼin táʼanna. Ta̱ Jeremías xíʼin ta̱ Josías chi̱ka̱a̱na ndée ña̱ nda̱sakáʼnuna Jehová. Va̱ʼakaví xi̱táʼanna, tá ni̱xi̱ʼi̱ ta̱ Josías ta̱ Jeremías ka̱ʼyíra iin yaa ña̱ káʼa̱n xa̱ʼa ña̱ kúsuchí-inira xa̱ʼa ta̱ Josías.

¿Ndáaña sákuaʼayó xíʼin ña̱ ke̱ʼé ta̱ Josías?... Nani tá loʼovíra xi̱kuni̱ra keʼéra ña̱ va̱ʼa nu̱ú Jehová. Ña̱kán nda̱kaxinra na̱ ndásakáʼnu Jehová koo migora. Ta saátu miíún tá kúni̱ún ndasakáʼnún Jehová xíniñúʼu ndakaxiún na̱ ndásakáʼnu-ñaʼá ña̱ koona migoún ña̱ va̱ʼa chindeéna yóʼó ña̱ ndasakáʼnúnra.