Nani tá loʼoví ta̱ Samuel ni̱xi̱yora tabernáculo ta ka̱chíñura iniña. Tabernáculo yóʼo kúú nu̱ú xi̱xa̱ʼa̱n na̱ yiví xi̱ndasakáʼnuna Jehová. ¿Á kúni̱ún kunda̱a̱-iniún ndachun ni̱xi̱yo ta̱ Samuel tabernáculo? Ña̱ va̱ʼa kunda̱a̱-iniyó xa̱ʼa ña̱yóʼo siʼna ná sakuaʼayó xa̱ʼa siʼíra, ñá Ana.

Ñá Ana xi̱kuni̱kavíñá koo se̱ʼeñá, soo kǒo kívi koo se̱ʼeñá. Na̱kán ni̱ka̱ʼa̱nñá xíʼin Jehová: “Jehová ndúkúi̱ ña̱ ma̱ní nu̱ún taxiún koo se̱ʼi̱. Ná kaku iin se̱ʼi̱ taxira ku̱ʼu̱nra koora ini tabernáculo ta kán kachíñura nu̱ún”. Jehová xi̱niso̱ʼora ña̱ ni̱ka̱ʼa̱n ñá Ana ta ta̱xira iin se̱ʼeñá. Ta chi̱núuñá ki̱vi̱ra ña̱ kunaníra Samuel. Soo tá xa̱ndíka̱a̱ra u̱ni̱ á ku̱mí ku̱i̱ya̱ra saá sa̱xínu ñá Ana tu̱ʼun ña̱ ni̱ka̱ʼa̱nñá xíʼin Jehová, chi ni̱xa̱ʼa̱nñá nda̱kañára ña̱ kachíñura nu̱ú Ndióxi̱.

Elí xi̱naní ta̱ su̱tu̱ káʼnu ta̱ xi̱kachíñu ini tabernáculo. Ni̱xi̱yo u̱vi̱ se̱ʼera na̱ xa̱náʼnu, yóʼo xi̱kachíñutu na̱yóʼova. Ini tabernáculo kúú nu̱ú xi̱ndasakáʼnuna Jehová, xa̱ʼa ña̱yóʼo na̱ xi̱kachíñu yóʼo xíniñúʼu viíní koo chiñu keʼéna. Soo ta̱ Samuel xi̱xinira na̱ se̱ʼe ta̱ Elí su̱ví ña̱ va̱ʼa níxikeʼéna. ¿Á ke̱ʼé ta̱ Samuel ña̱ kini táʼan ña̱ xi̱keʼé na̱yóʼo?... Va̱ása níkeʼéraña. Ta̱ Samuel nda̱kundeéra ke̱ʼéra ña̱ va̱ʼa nda̱a̱ táki̱ʼva sa̱náʼa̱ yivára xíʼin siʼíra miíra.

¿Á ni̱ka̱ʼa̱n loʼo ta̱ Elí xíʼin na̱ se̱ʼera xa̱ʼa ña̱ kini xi̱keʼéna?... Va̱ása níka̱ʼa̱nra xíʼinna. Ña̱ xíniñúʼu keʼéra kúúña va̱ása taxikara kachíñuna ini templo. Soo kǒo ña̱yóʼo níkeʼéra. Ña̱kán ni̱sa̱a̱ní Jehová xi̱nira ta̱ Elí xíʼin na̱ se̱ʼera xa̱ʼa ña̱yóʼo ta̱xira castigo ndaʼa̱na.

Iin ñu̱ú, ta̱ Samuel ta̱ kísi̱ kúúra ta xi̱niso̱ʼora kánanara. “Samuel”, káchina. Tasaá xínura ni̱xa̱a̱ra nu̱ú ta̱ Elí, soo ta̱yóʼo ni̱ka̱ʼa̱nra xíʼinra: “Va̱ása níkanai̱ yóʼó”. Saá ku̱u yichi̱ u̱vi̱. Soo ña̱ yichi̱ u̱ni̱ ta̱ Elí ni̱ka̱ʼa̱nra xíʼin ta̱ Samuel: “Tá ná kana tukuna yóʼó, ña̱yóʼo kachiún: ‘Ka̱ʼa̱n Jehová chi xíniso̱ʼovai̱ ña̱ káʼún’”. Ña̱yóʼo kúú ña̱ ni̱ka̱ʼa̱n ta̱ Samuel, tasaá ni̱ka̱ʼa̱n Jehová xíʼinra: “Ka̱ʼa̱n xíʼin ta̱ Elí chi taxii̱ castigo ndaʼa̱ra xíʼin na̱ veʼera xa̱ʼa ndiʼi ña̱ kini kéʼéna”. ¿Á i̱xayo̱ʼviña xíʼin ta̱ Samuel ña̱ ka̱ʼa̱nra ña̱yóʼo  xíʼin ta̱ Elí?... I̱xayo̱ʼvivaña xíʼinra. Ni̱yi̱ʼvívara ka̱ʼa̱nra ña̱yóʼo xíʼin ta̱ Elí. Soo ka̱ndíxavara ña̱ ni̱ka̱ʼa̱n Jehová xíʼinra ta ni̱ka̱ʼa̱nvara xíʼin ta̱ Elí. Ña̱ ni̱ka̱ʼa̱n Jehová ni̱xi̱nuña: chi ni̱ya̱ʼa loʼo tiempo ta ni̱xi̱ʼi̱ ta̱ Elí xíʼin u̱vi̱ saá se̱ʼera.

Ta̱ Samuel va̱ʼaní yichi̱ sa̱ndákoora nu̱úyó. Chi ni ku̱a̱ʼá ña̱ kini ke̱ʼéna xi̱nira va̱ása níkeʼéra ña̱yóʼo. Ta miíún, ¿á keʼún táʼan ña̱ ke̱ʼé ta̱ Samuel? Tá ná keʼún ña̱ va̱ʼa, Jehová kusi̱í-inira xíʼún ta saátu ndi̱ʼi̱ kusi̱í-inindi̱ xíʼún.