Yóʼo natúʼi̱n xíʼún xa̱ʼa iin ta̱ loʼo, ta̱yóʼo sa̱kákura ta̱ apóstol Pablo ña̱ va̱ása níxaʼnínara. Kǒo xíni̱yó nda̱saa xi̱naníra. Ña̱ xíni̱ kuitíyó kúúña xi̱kuura xa̱xi̱n ta̱ Pablo. Iin ta̱ loʼo ndakúní-ini xi̱kuura. ¿Á kúni̱ún natúʼi̱n xíʼún ndáaña ke̱ʼéra?...

Ta̱ Pablo chi̱ka̱a̱nara veʼeka̱a ñuu Jerusalén xa̱ʼa ña̱ nátúʼunra xíʼin na̱ yiví xa̱ʼa Jehová. Soo na̱ sáa̱-ini xíniñaʼá ki̱xaʼá káʼa̱nna xíʼin táʼanna ña̱ ku̱ʼu̱nna ka̱ʼa̱nna xíʼin ta̱ níʼi chíñu nu̱ú na̱ soldado: “Chindaʼá na̱ soldadoún ná ku̱ʼu̱nna xíʼin ta̱ Pablo veʼe nu̱ú tiinna ku̱a̱chi̱ xíʼinra”. Ña̱ xi̱kuni̱na kúúña kundaanara yichi̱, tá ná ya̱ʼara kán kaʼnínara.

Ta̱ loʼo xa̱xi̱n ta̱ Pablo tá na̱kunda̱a̱-inira xa̱ʼa ña̱yóʼo. ¿Ndáaña ke̱ʼéra? Ni̱xa̱ʼa̱nra na̱túʼunra xíʼin xitora ta̱ Pablo. Ta ta̱yóʼo ni̱ka̱ʼa̱nra xíʼinra: “Kama kuaʼán natúʼun ndiʼi ña̱yóʼo xíʼin ta̱ níʼi chíñu nu̱ú na̱ soldado”. ¿Á i̱xayo̱ʼviña xíʼinra ku̱ʼu̱nra natúʼunra xíʼin ta̱yóʼo?... I̱xayo̱ʼvivaña xíʼinra chi iin ta̱ soldado káʼnuní xi̱kuu ta̱yóʼo. Soo ta̱ loʼo yóʼo ndakúní ni̱xi̱yo inira chi ni̱xa̱ʼa̱nvara ni̱ka̱ʼa̱nra xíʼin ta̱yóʼo xa̱ʼa ndiʼi ña̱ na̱kunda̱a̱-inira.

Ta̱yóʼo xi̱niso̱ʼora ndiʼi ña̱ ni̱ka̱ʼa̱n ta̱ loʼo yóʼo xíʼinra. Ña̱ va̱ʼa chindeéra ta̱ Pablo, va̱ʼaka chi̱ndaʼárara ku̱a̱ʼa̱nra chí ñuu Cesarea. Ta ni̱ka̱ʼa̱nra xíʼin ki̱ʼva 500 na̱ soldado ná ku̱ʼu̱nna xíʼin ta̱ Pablo. “Míí ñu̱ú vitin xíniñúʼu ku̱ʼu̱nndó xíʼinra”, káchira. ¿Á ni̱ka̱ku ta̱ Pablo yichi̱ á xa̱ʼnínara? ¿Nda̱saa túvi yóʼó?... Ni̱ka̱kuvara. Na̱ kúni̱ kaʼní-ñaʼá kǒo níkuchiñuna kaʼnínara.

¿Ndáaña sákuaʼún xa̱ʼa ta̱ loʼo yóʼo?... Saátu miíún kivi ndakú koo iniún nda̱a̱ táki̱ʼva ni̱xi̱yo ta̱ loʼo xa̱xi̱n ta̱ Pablo. Chi xíniñúʼu ndakú koo iniyó ña̱ va̱ʼa natúʼunyó xa̱ʼa Jehová xíʼin na̱ yiví. Ta miíún, ¿á ndakú koo iniún ña̱ natúʼún xíʼin na̱ yiví xa̱ʼa Jehová?... Tá ná natúʼún xíʼinna xa̱ʼa Jehová, ku̱a̱ʼánína kivi ka̱ku.