Tá ná kaku se̱ʼe nu̱úndó sana kusi̱í-inindó á sana ndi̱ʼi̱ní-inindó xíʼinna. Na̱ va̱lí ku̱a̱ʼání tiempo xíniñúʼuna ña̱ kundaandóna. Sana va̱ása kooka tiempondó ña̱ ndakiʼindée va̱ʼandó á sana kixaʼá ndi̱ʼi̱ní-inindó, xa̱ʼa ndiʼi ña̱yóʼo sana sa̱a̱ xíʼin táʼanndó. Ña̱kán u̱vi̱ saándó xíniñúʼu chika̱a̱ndó ndée ña̱ inkáchi kundaandó se̱ʼendó ta saátu va̱ása nandosóndó xa̱ʼa miíndó ña̱ kundaa táʼanndó. ¿Nda̱saa va̱ʼa chindeé consejo ña̱ va̱xi nu̱ú Biblia ndóʼó tá kíxaʼá íyo tu̱ndóʼo nu̱úndó?

ÑA̱ KÁʼA̱N BIBLIA: ‘Na̱ ndixa kúʼvi̱-ini xíni táʼan kǒo ndíʼi̱-inina xa̱ʼa iinlá miína ta kǒo sáa̱ kamanaʼ (1 Corintios 13:4, 5). Ndóʼó ná si̱ʼí ná káku nu̱ú se̱ʼe, ña̱ va̱ʼaní kúúña tá ndíʼi̱ní-inindó xa̱ʼa se̱ʼendó. Ta saátu xíniñúʼu ndi̱ʼi̱-inindó xa̱ʼa yiíndó ña̱ ná kǒo ndakanixi̱níra ña̱ kǒo kúni̱kandóra. Vivií ka̱ʼa̱nndó xíʼinra, ña̱kán va̱ʼa ná kunira ña̱ kúni̱ndó xínindóra ta kusi̱í-inindó ña̱ chíndeéra ndóʼó ña̱ ndáandó ña̱ loʼo se̱ʼendó.

‘Ndóʼó ta̱a vivií koondó xíʼin ñá síʼíndó xíniñúʼu kunda̱a̱-inindó ña̱ ndóʼoná.ʼ (1 Pedro 3:7.) Tá ña̱ nu̱ú kúú ña̱ íyo se̱ʼún xíʼin ñá síʼún xíniñúʼu kunda̱a̱-iniún chi ña̱ loʼo se̱ʼendó kúú ña̱ kundi̱ʼi̱ka-iniñá xa̱ʼa vitin. Sana kunaavañá á nda̱a̱ kusuchí-iniñá xa̱ʼa ña̱ íyoní chiñu nu̱úñá. Á sana nda̱a̱ sa̱a̱ñá xíʼún, soo va̱ása sa̱ún xíʼinñá, chi tá káchi Biblia “ta̱ kǒo sáa̱ kama, va̱ʼaka ta̱a kúú ta̱yóʼo nu̱ú iin ta̱a ta̱ ndakú” (Proverbios 16:32). Kiʼin va̱ʼún kuenta xíʼin ñá síʼún tá xíniñúʼuñá iin ña̱ʼa chindeé táʼan xíʼinñá (Proverbios 14:29).

ÑA̱ VA̱ʼA KEʼÉNDÓ:

• Ndóʼó ta̱a: Ni tá ñuú kúúña chindeé táʼanndó xíʼin ñá síʼíndó ña̱ kundaandó se̱ʼendó. Sava yichi̱ nda̱a̱ sandákoondó sava ña̱ kéʼéndó ña̱ va̱ʼa ku̱a̱ʼáka tiempo koondó xíʼin ñá síʼíndó xíʼin se̱ʼendó

• Ndóʼó ná si̱ʼí: Tá kúni̱ yiíndó chindeéra ndóʼó xíʼin se̱ʼendó taxindó ná chindeéra ndóʼó. Tá kǒo xíni̱ra kundaara ña̱ loʼo va̱ása nda̱ʼyi̱ndó nu̱úra vivií sanáʼa̱ndóra

ÑA̱ KÁʼA̱N BIBLIA: “Ta u̱vi̱ saána iinlá xa̱a̱na nduuna” (Génesis 2:24). Ni xa̱kakuva se̱ʼendó vitin, kǒo nandosóndó xa̱ʼa ña̱ káʼa̱n Biblia ña̱ iinlá xa̱a̱ndó nduundó. Chika̱a̱níndó ndée ña̱ vií koo xíʼin táʼanndó.

Ndóʼó ná si̱ʼí, taxindó tixaʼvi ndaʼa̱ yiíndó ña̱ chíndeéra ndóʼó. Tá táxindó tixaʼvi ndaʼa̱ra, nda̱a̱ táki̱ʼva íyo iin ña̱ sándáʼa saá íyoña (Proverbios 12:18). Ndóʼó ta̱a, ka̱ʼa̱nndó xíʼin ñá síʼíndó ña̱ kúni̱ndó xínindóñá ta ña̱ kúsi̱íní-inindó ña̱ ndáañá veʼe (Proverbios 31:10, 28).

‘Iin iin miíyó ná kundi̱ʼi̱-iniyó xa̱ʼa inkana.ʼ (1 Corintios 10:24.) Ndiʼi ña̱ kéʼéndó ná na̱ʼa̱ña ña̱ ndixa ndíʼi̱-inindó xa̱ʼa táʼanndó, taxi tixaʼvi ndaʼa̱ ñá síʼún á yiíún xa̱ʼa ña̱ kéʼéna. Tavándó tiempo ña̱ va̱ʼa natúʼun xíʼin táʼanndó. Nda̱a̱ ña̱ ku̱su̱n xíʼin táʼanndó xíniñúʼu natúʼunndó xa̱ʼaña, su̱ví iinlá miíndó kundi̱ʼi̱-inindó xa̱ʼa. Xíniñúʼu natúʼun xíʼin táʼanndó ña̱kán va̱ʼa kunda̱a̱-ini xíʼin táʼanndó. Ña̱ Biblia káchiña: ‘Kǒo kuxiʼndáandó nu̱ú táʼanndó ña̱ xíniñúʼu taxindó ndaʼa̱ táʼanndó, tá kǒo ku̱su̱nndó xíʼin táʼanndó siʼna natúʼunndó xa̱ʼa ña̱yóʼoʼ (1 Corintios 7:3-5). Kǒo kukaʼan nu̱úndó ka̱ʼa̱nndó xa̱ʼa ña̱yóʼo. Chi ña̱yóʼo chindeé ndóʼó ña̱ kunda̱a̱-ini xíʼin táʼanndó tasaá va̱ʼaka koo xíʼin táʼanndó.

ÑA̱ VA̱ʼA KEʼÉNDÓ:

• Xíniñúʼu tavándó tiempo ña̱ va̱ʼa natúʼun xíʼin táʼanndó

• Na̱ʼa̱ndó ña̱ kúʼvi̱-inindó xíni táʼanndó, kivi kaʼyíndó iin tutu loʼo á iin ña̱ʼa loʼo taxindó ndaʼa̱ táʼanndó

ÑA̱ KÁʼA̱N BIBLIA: “Nani tá loʼovíún sa̱kuaʼún xa̱ʼa tu̱ʼun Ndióxi̱, ta ña̱yóʼo kivi chindeé yóʼó ña̱ va̱ʼa ka̱kún” (2 Timoteo 3:15). Natúʼun xíʼin táʼanndó ndáa ki̱ʼva sanáʼa̱ndó se̱ʼendó. Ndakaʼánndó chi na̱ va̱lí ni kúma̱níva kakuna xa̱va̱ʼava sakuaʼana. Tá ñúʼuna ti̱xin siʼína kiviva ndakunina tu̱ʼunndó. Tá xa̱kakuna ni kǒo kúnda̱a̱-inina ña̱ káʼa̱nndó, kiviva kaʼvindó nu̱úna chi ña̱yóʼo chindeéñaʼá tá xa̱kuchéena kutóona kaʼvina.

Kǒo ndakanixi̱níndó ña̱ loʼoní se̱ʼendó ña̱ natúʼunndó xíʼinna xa̱ʼa Ndióxi̱. Nu̱ú se̱ʼendó ka̱ʼa̱nndó xíʼin Jehová (Deuteronomio 11:19). Tá sísíkíndó xíʼin se̱ʼendó natúʼunndó xíʼinna xa̱ʼa ña̱ʼa ña̱ i̱xava̱ʼa Jehová (Salmo 78:3, 4). Tá xáʼnu se̱ʼendó ku̱a̱ʼa̱nna, kuni miívana ña̱ ndixa kúʼvi̱-inindó xínindó Jehová tasaá sakuaʼana kuʼvi̱-inina kuninara.

ÑA̱ VA̱ʼA KEʼÉNDÓ:

• Ka̱ʼa̱nndó xíʼin Jehová ña̱ ná taxira yichi̱ nu̱úndó ña̱ va̱ʼa sanáʼa̱ndó se̱ʼendó

• Tuku ta tuku ndikóndó ka̱ʼa̱nndó iin tu̱ʼun ña̱ va̱ʼa ná sakuaʼa se̱ʼendó tá válíkana