Ka̱ʼa̱n xíʼin Ndióxi̱ ta viíní sákuaʼún ña̱ ka̱ʼún. Ka̱ʼa̱n xíʼin Ndióxi̱ ná chindeéra yóʼó ña̱ va̱ʼa kundi̱ʼi̱-iniún xa̱ʼa ña̱ sanáʼún ta su̱víka xa̱ʼa miíún. Ndakaʼán va̱ʼún ndáaña kúni̱ún ka̱ʼún xa̱ʼa xíʼinna. Xíʼin tu̱ʼun miíún ka̱ʼúnña, ta va̱ása kaʼviúnña ni kǒo ku̱a̱ʼání yichi̱ ndikóún ka̱ʼún tá iin iin tu̱ʼun ña̱ va̱xi nu̱ú bosquejo.

Xíʼin ndiʼi níma̱ún ka̱ʼún. Ndakanixi̱ní ndáa xa̱ʼa kúú ña̱ ndáyáʼviní ka̱ʼún ña̱yóʼo xíʼin na̱ xíniso̱ʼo yóʼó. Tá ná keʼún ña̱yóʼo va̱ʼaníka ka̱nda̱ ndaʼún ta saátu kivi na̱ʼún nu̱úna xíʼin ki̱ʼva ña̱ xítoún ña̱ kúsi̱íní-iniún káʼún xíʼinna.

Kotoún nu̱ú na̱ káʼún xíʼin. Tá kivi kotoún nu̱ú na̱ káʼún xíʼin, kivi keʼúnña. Tá táxiún iin discurso, nu̱úka ña̱ kotoún nu̱ú ndiʼina, va̱ʼaka siʼna iin na̱ yiví kotoún nu̱ú, ta tándi̱ʼi saá kotoún nu̱ú inkana.