LECCIÓN 7
Káxi ka̱ʼún ta ña̱ ndixa ná kooña
Lucas 1:3
Viíní ndaka̱xiún ña̱ ka̱ʼún xa̱ʼa ta nandukú va̱ʼún xa̱ʼaña á ña̱ ndixa kúúña, ña̱ va̱ʼa kandíxanaña.
NDÁA KI̱ʼVA KEʼÚNÑA:
-
Na̱ndukú mií ña̱ nda̱a̱ ta kuniñúʼuña. Ka̱ʼa̱n xa̱ʼa ña̱ va̱xi nu̱ú tu̱ʼun Ndióxi̱, ta kivitu kaʼviúnña nu̱úna. Tá xa̱ʼa ciencia ná ka̱ʼún, á xa̱ʼa iin noticia, á iin experiencia á inkaka ña̱ʼa, kiʼin va̱ʼún kuenta á mií ña̱ ndixa kúú ña̱ ndáka̱xiún kuniñúʼún.
-
Viíní kuniñúʼún ña̱ nda̱ka̱xiún. Tá káʼún xa̱ʼa iin texto, ná kitáʼanña xíʼin savaka versículo ña̱ va̱xi xíʼinña, ta saátu xíʼin inkaka ña̱ va̱xi nu̱ú tu̱ʼun Ndióxi̱ á nu̱ú tutu ña̱ tává na̱ ñuu Ndióxi̱ (Mt. 24:45). Tá káʼún xa̱ʼa ña̱ va̱xi nu̱ú inkaka tutu, va̱ása nasamaúnña, nda̱a̱ táki̱ʼva va̱xiña saá koo ña̱ kuniñúʼún.
-
Chindeétáʼan xíʼinna ná ndakanixi̱nína. Tá ndi̱ʼi ka̱ʼviún iin texto nu̱úna á ni̱ka̱ʼún xíʼinna xa̱ʼa iin ña̱ʼa, keʼé sava pregunta ta kuniñúʼu ilustración ña̱ kivi chindeétáʼan xíʼinna ña̱ va̱ʼaka kunda̱a̱-inina.
