Ndaka̱xin ilustración ña̱ va̱ása yo̱ʼvi̱. Nda̱a̱ táki̱ʼva ke̱ʼé ta̱ Jesús saá keʼún, kuniñúʼu iin ña̱ʼa ña̱ xa̱a̱ xíni̱na ña̱ va̱ʼa sánáʼúnna xa̱ʼa iin ña̱ʼa ña̱ ndáyáʼviní. Á kuniñúʼu iin ña̱ʼa ña̱ va̱ása yo̱ʼvi̱ ña̱ va̱ʼa sánáʼúnna xa̱ʼa iin ña̱ʼa ña̱ yo̱ʼvi̱. Va̱ása ku̱a̱ʼání ña̱ ka̱ʼún xa̱ʼa iin ilustración ña̱kán va̱ʼa ná kǒo ixayo̱ʼvi̱ña xíʼinna kunda̱a̱-inina. Kiʼin va̱ʼún kuenta ná kitáʼanña xíʼin tema ña̱ káʼún xa̱ʼa xíʼinna, tasaá va̱ʼaní kunda̱a̱-inina xíʼinña.

Ndakanixi̱ní xa̱ʼa na̱ káʼún xíʼin. Kuniñúʼu ilustración ña̱ xíni̱na, á ña̱ kivi kunda̱a̱-inina xíʼin. Kiʼún kuenta ña̱ va̱ʼa kǒo sakukaʼún nu̱úna á saxo̱ʼvi̱únna xíʼin ña̱ káʼún.

Natúʼun xíʼinna xa̱ʼa ña̱ kúni̱ún sanáʼúnna. Kuniñúʼu ilustración ña̱ va̱ʼa ka̱ʼún xíʼinna xa̱ʼa ña̱ ndáyáʼvi va̱ʼaka ña̱ kúni̱ún kunda̱a̱-inina xa̱ʼa. Kiʼin va̱ʼún kuenta ña̱ ná kǒo ndakaʼán kuitína xa̱ʼa ilustración ña̱ ni̱ka̱ʼún xa̱ʼa xíʼinna chi saátu ná ndakaʼánna xa̱ʼa ña̱ sa̱náʼúnna.