Na̱ yiví na̱ va̱ʼaní káchíñu va̱ása yíʼvina kachíñuna. Chi kútóonívana kachíñuna tasaá kivi satána ña̱ʼa ña̱ xíniñúʼuna, ta chindeétáʼanna xíʼin inkana, ni chiñu ña̱ kéʼéna va̱ása liviníña nu̱ú inkana.

Ni va̱ása kútóoyó kachíñuyó, soo xíniñúʼuva kachíñuyó ña̱ va̱ʼa kuumiíyó ña̱ xíniñúʼuyó. Tiempo vitin ña̱ va̱ʼa miíyó kúú ña̱ chika̱a̱yó ndee̱ ña̱ kachíñuyó, saáchi ku̱a̱ʼání na̱ yiví va̱ása kútóona keʼéna chiñu ña̱ ve̱e (Eclesiastés 3:13).

“Tá chíka̱i̱ ndee̱ ña̱ kachíñui̱ va̱ʼaní kúnii̱ ta kúsi̱íní-inii̱. Xa̱ʼa̱ ña̱kán kútóokai̱ kachíñui̱, ta saátu tá va̱ʼa káchíñuyó káʼa̱n va̱ʼa inkana xa̱ʼa̱yó” (ta̱ Reyon).

TEXTO ÑA̱ VA̱XI NU̱Ú BIBLIA: “Na̱ chíka̱a̱ ndee̱ ña̱ kachíñuna ku̱a̱ʼá ña̱ va̱ʼa ndákiʼinna” (Proverbios 14:23, Nueva Versión Internacional).

Consejo ña̱ va̱xi yóʼo, chindeétáʼanña xíʼún ña̱ kusi̱í-iniún kachíñún.

Sakuaʼa ña̱ vií keʼún ña̱ʼa. Kundi̱ʼi̱-iniún xa̱ʼa̱ ña̱ kéʼún, ni tá kéʼún chiñu ti̱xin veʼún á ti̱xin escuela ta saátu tá káchíñún. Tá xa̱a̱ xíni̱ún keʼún iin ña̱ʼa, ndukú ki̱ʼva ña̱ viíka keʼúnña á kamaka keʼúnña. Tá viíka ná keʼún ña̱yóʼo kusi̱íka-iniún xíʼinña.

TEXTO ÑA̱ VA̱XI NU̱Ú BIBLIA: “¿Á xa̱a̱ xi̱niún iin ta̱a ta̱ va̱ʼaní káchíñu? Nu̱ú na̱ rey kachíñu ta̱yóʼo; kǒo kachíñura nu̱ú na̱ yiví na̱ núu” (Proverbios 22:29).

Ndakanixi̱ní xa̱ʼa̱ inkana. Ku̱a̱ʼání yichi̱, tá sáxi̱nún chiñu ña̱ kéʼún ña̱yóʼo chíndeétáʼanña xíʼin inkana. Tá kúú, tá sáxi̱nún chiñu ña̱ táxina ndaʼún ti̱xin veʼún, ña̱yóʼo chíndeétáʼanña xíʼin na̱ veʼún.

TEXTO ÑA̱ VA̱XI NU̱Ú BIBLIA: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hechos 20:35).

Va̱ása loʼo kuití chika̱ún ndee̱ xíʼin ña̱ kéʼún. Va̱ása keʼún nda̱saa ña̱ ni̱ka̱ʼa̱n kuitína xíʼún, chika̱a̱ ndee̱ ña̱ keʼún ku̱a̱ʼákaña. Tasaá, miíún kúú na̱ ndaka̱xin ndáaña keʼún. Ña̱ nda̱a̱ kúú ña̱ xa̱a̱ ku̱a̱ʼáka kachíñún, soo keʼún ña̱yóʼo xa̱ʼa̱ ña̱ kúni̱ miíún ta su̱ví xa̱ʼa̱ ña̱ íxandúxana xíʼún keʼúnña (Mateo 5:41).

TEXTO ÑA̱ VA̱XI NU̱Ú BIBLIA: “Kǒo kúni̱i̱ keʼún ña̱yóʼo xíʼin ña̱ nduxa̱, va̱ʼaka níma̱ miíún ná kanaña” (Filemón 14).

Kiʼin kuenta xíʼin ña̱ kéʼún. Ña̱ vií kachíñún va̱ása kúni̱ kachiña, ña̱ xíniñúʼu ku̱a̱ʼáníka kachíñún. Xíniñúʼu kiʼún kuenta xíʼin ña̱ kéʼún, tasaá kutóún kachíñún ta saátu ña̱ ndakindeún.

TEXTO ÑA̱ VA̱XI NU̱Ú BIBLIA: “Va̱ʼaníka tá ná ndakindee̱yó nu̱úka ña̱ ndeéní kachíñuyó ta kooyó nda̱a̱ táki̱ʼva íyo na̱ ndíku̱n sa̱tá ta̱chí” (Eclesiastés 4:6).