ÑA̱ KIVI CHINDEÉTÁʼAN XÍʼIN NA̱ XA̱A̱ TI̱NDAʼA̱
4. Ixakáʼnu-inindó xa̱ʼa̱ táʼanndó
¿NDÁAÑA KÚNI̱ KACHI ÑA̱YÓʼO?
Ña̱ ixakáʼnu-iniyó xa̱ʼa̱ inkana kúú ña̱ nandósó-iniyó xa̱ʼa̱ ña̱ ke̱ʼéna xíʼinyó ta va̱ása ndakaʼánkayó xa̱ʼa̱ña. Ña̱yóʼo va̱ása kúni̱ kachiña ña̱ va̱ása ndáyáʼvi ña̱ ku̱u á na̱ʼa̱yó ña̱ va̱ása níkuuña.
TEXTO ÑA̱ VA̱XI NU̱Ú BIBLIA: “Kǒo sandákoondó ña̱ kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na, ni íyo iin ña̱ va̱ása va̱ʼa ke̱ʼéna xíʼinndó” (Colosenses 3:13).
“Tá kúʼvi̱-iniún xíniún iinna, va̱ása kíʼinníún kuenta xíʼin ña̱ va̱ása va̱ʼa ña̱ kéʼéna, chi ña̱ kíʼún kuenta xíʼin kúú ña̱ chíka̱a̱na ndee̱ ña̱ keʼéna ña̱ va̱ʼa” (ta̱ Aaron).
¿NDA̱CHUN NDÁYÁʼVINÍ ÑA̱YÓʼO?
Tá ná ndakaniní-iniún xa̱ʼa̱ ña̱ va̱ása va̱ʼa ña̱ ke̱ʼéna xíʼún, nda̱a̱ kivi xa̱ún kiʼún iin kue̱ʼe̱ á nda̱a̱ kivi sandíʼi-xa̱ʼa̱ña ña̱ ti̱ndaʼa̱ndó.
“Yiíi̱ ni̱ka̱ʼa̱nra xíʼi̱n ña̱ ná ixakáʼnu-inii̱ xa̱ʼa̱ra, xa̱ʼa̱ iin ña̱ ke̱ʼéra xíʼi̱n ña̱ sa̱xóʼvi̱ní-inii̱. Tá xa̱ʼa̱ i̱xayo̱ʼvi̱ña xíʼi̱n ña̱ ixakáʼnu-inii̱ xa̱ʼa̱ra, soo tándi̱ʼi ke̱ʼévai̱ña. Iin ña̱ ndándikóní-inii̱ xa̱ʼa̱ kúú ña̱ va̱ása kama ní ixakáʼnu-inii̱ xa̱ʼa̱ra, tasaá va̱ása xo̱ʼvi̱níndi̱ xa̱ʼa̱ ña̱yóʼo” (ñá Julia).
¿NDÁAÑA KIVI KEʼÚN?
NDAKANIXI̱NÍ XA̱ʼA̱ ÑA̱YÓʼO
Ndakanixi̱ní xa̱ʼa̱ ña̱ va̱xi yóʼo, tá na̱ ti̱ndaʼa̱ xíʼún ke̱ʼéna iin ña̱ sa̱xóʼvi̱ yóʼó.
¿Á kamaní ndákava-iniún tá kéʼéna ña̱ va̱ása va̱ʼa xíʼún?
¿Á xíniñúʼún ña̱ ná ndukúna ña̱ káʼnu-ini nu̱ún, á kiviva nandósó-iniún xa̱ʼa̱ña?
NATÚʼUN TÁʼANNDÓ XA̱ʼA̱ ÑA̱YÓʼO
¿Nda̱saa tiempo yáʼa saá íxakáʼnu-iniyó xa̱ʼa̱ táʼanyó?
¿Ndáaña kivi keʼéyó ña̱ va̱ʼa kamaka ixakáʼnu-iniyó xa̱ʼa̱ táʼanyó?
ÑA̱ KIVI KEʼÚN
Tá na̱ ti̱ndaʼa̱ xíʼún sa̱xóʼvi̱na-iniún, va̱ása ndakanixi̱níún ña̱ ke̱ʼénaña xa̱ʼa̱ ña̱ kúni̱ kuitína saxóʼvi̱na yóʼó.
Kunda̱a̱-ini xíʼin ña̱ kéʼé na̱ ti̱ndaʼa̱ xíʼún, ta ndakaʼún saáchi ndiʼivayó ku̱a̱ʼání yichi̱ kíʼviyó ku̱a̱chi (Santiago 3:2).
“Va̱ása íxayo̱ʼvi̱ va̱ʼaña xíʼinyó ña̱ koo káʼnu-iniyó xa̱ʼa̱ táʼanyó tá u̱vi̱ saáyó ke̱ʼé ña̱ va̱ása va̱ʼa, soo tá iin kuitíyó ke̱ʼé ña̱yóʼo íxayo̱ʼvi̱vaña xíʼinyó ña̱ koo káʼnu-iniyó xa̱ʼa̱ táʼanyó. Ña̱ va̱ʼa ixakáʼnu-iniyó xa̱ʼa̱ táʼanyó xíniñúʼu vitání koo iniyó” (ñá Kimberly).
TEXTO ÑA̱ VA̱XI NU̱Ú BIBLIA: “Kamaka ndasaviún ku̱a̱chi” (Mateo 5:25).
Tá ná ndakaniní-iniún xa̱ʼa̱ ña̱ va̱ása va̱ʼa ña̱ ke̱ʼéna xíʼún, nda̱a̱ kivi xa̱ún kiʼún iin kue̱ʼe̱ á nda̱a̱ kivi sandíʼi-xa̱ʼa̱ña ña̱ ti̱ndaʼa̱ndó
