Ña̱ taxiyó consejo ndaʼa̱ na̱ va̱lí se̱ʼeyó kúni̱ kachiña, ña̱ ka̱ʼa̱nyó xíʼinna ndáaña keʼéna, ña̱ sanáʼa̱yóna á sava yichi̱ chindeétáʼanyó xíʼinna ña̱ nasamana ña̱ va̱ása va̱ʼa kéʼéna. Ku̱a̱ʼá yichi̱ xíniñúʼu sanáʼa̱yóna ndáaña kúú ña̱ va̱ʼa keʼéna, tasaá va̱ʼaní koo ña̱ ndakaxinna keʼéna ta kǒo keʼéna ña̱ va̱ása va̱ʼa.

Tiempo vitin ku̱a̱ʼání na̱ íyo se̱ʼe va̱ása káʼa̱nna xíʼin se̱ʼena xa̱ʼa̱ ña̱ va̱ása va̱ʼa kéʼéna, saáchi yíʼvina saxóʼvi̱na na̱ va̱lí se̱ʼena. Soo sava na̱ íyo se̱ʼe sánáʼa̱na se̱ʼena ndáaña kivi keʼéna ta ndáaña va̱ása kívi keʼéna, ta sanáʼa̱nana ña̱ ná kandíxana ña̱yóʼo.

“Na̱ va̱lí se̱ʼeyó xíniñúʼu káxi kunda̱a̱-inina ndáaña va̱ása xíniñúʼu keʼéna, tasaá va̱ʼa xa̱a̱na koona na̱ yiví na̱ xa̱a̱ xu̱xa-ini ta vií koo ña̱ ndaka̱xinna keʼéna, saáchi tá ná kǒo keʼéna ña̱yóʼo íyona nda̱a̱ táki̱ʼva íyo iin barco tú kǒo na̱ káva, chi tá ná ya̱ʼa tiempo kivi xa̱a̱na keʼéna ña̱ va̱ása va̱ʼa ta xo̱ʼvi̱na xa̱ʼa̱ ña̱yóʼo” (ñá Pamela).

Ka̱ʼa̱n xíʼinna xa̱ʼa̱ ña̱ kivi kundoʼona. Ka̱ʼa̱n xíʼin na̱ va̱lí se̱ʼún ña̱ tá va̱ása kándíxana ña̱ káʼún xíʼinna kivi xo̱ʼvi̱na xa̱ʼa̱ ña̱ kéʼéna. Soo tá xíniso̱ʼona ña̱ káʼún, ka̱ʼa̱n xíʼinna ña̱ va̱ʼaní íyo ña̱ kéʼéna.

“Xa̱ʼa̱ ña̱ va̱ása kándíxaka na̱ va̱lí na̱ yivána tiempo vitin, ndiʼi tiempo káʼi̱n xíʼin na̱ va̱lí se̱ʼi̱ ña̱ va̱ʼaní íyo ña̱ kéʼéna tá kándíxana ña̱ káʼi̱n. Tasaá va̱ása íxayo̱ʼvi̱ña xíʼinna ña̱ kuniso̱ʼona consejo ña̱ táxii̱ ndaʼa̱na tá íyo ña̱ va̱ása va̱ʼa ke̱ʼéna” (ñá Christine).

TEXTO ÑA̱ VA̱XI NU̱Ú BIBLIA: “Saáchi ña̱ chíʼiyó ña̱kán kúú ña̱ ndakiʼinvayó” (Gálatas 6:7).

Kiʼin kuenta xíʼin ña̱ kéʼéna. Tá táxiún consejo ndaʼa̱ se̱ʼún, kiʼin kuenta xíʼin ku̱i̱ya̱na, ña̱ xíni̱na keʼéna ta saátu á ndeéní íyo ña̱ ke̱ʼéna. Va̱ʼaníka chíndeétáʼan consejo xíʼinna tá kítáʼanña xíʼin ña̱ va̱ása va̱ʼa ke̱ʼéna. Tá kúú, tá na̱ va̱lí se̱ʼún va̱ása íxato̱ʼóna ña̱ ni̱ka̱ʼún xa̱ʼa̱ ndáa ki̱ʼva kuniñúʼuna celular, kivi kindaún ña̱yóʼo ndaʼa̱na loʼo tiempo. Ta kiʼinndó kuenta ña̱ va̱ása ndasandó iin ku̱a̱chi loʼo iin ku̱a̱chi káʼnu.

“Ndiʼi tiempo kíʼi̱n kuenta á xa̱ʼa̱ ña̱ kúni̱ mií se̱ʼi̱ kǒo níxiinra kuniso̱ʼora á na̱ndósóva-inira xa̱ʼa̱ ña̱ ni̱ka̱ʼi̱n xíʼinra ña̱kán ke̱ʼéra iin ña̱ va̱ása va̱ʼa. Va̱ása inkáchi íyo ña̱ taxiyó consejo ndaʼa̱na tá miína kúú na̱ nda̱kaxin ña̱ ke̱ʼéna iin ña̱ va̱ása va̱ʼa nu̱ú ña̱ ka̱ʼa̱nyó xíʼinna tá ke̱ʼéna iin ña̱ va̱ása va̱ʼa soo kǒo níkiʼinna kuenta xíʼin ña̱yóʼo” (ta̱ Wendell).

TEXTO ÑA̱ VA̱XI NU̱Ú BIBLIA: “Ndóʼó na̱ íyo se̱ʼe, kǒo sasáa̱ndó se̱ʼendó ña̱ va̱ʼa ná kǒo ndakava-inina” (Colosenses 3:21).

Viíní keʼún xíʼinna. Tá vií táxiún consejo ndaʼa̱ na̱ va̱lí se̱ʼún, na̱yóʼo kiʼinna kuenta xíʼin ña̱ kéʼún ta va̱ása ixayo̱ʼvi̱ña xíʼinna ña̱ kuniso̱ʼona consejo ña̱ táxiún ndaʼa̱na, ta saátu ña̱ sakuaʼana xíʼin ña̱ va̱ása va̱ʼa kéʼéna.

“Ndiʼi tiempo xi̱ka̱ʼa̱nndi̱ xíʼin se̱ʼendi̱ ña̱ xi̱kusi̱í-inindi̱ xíʼin ndiʼi ña̱ va̱ʼa ña̱ xi̱ndaka̱xinra keʼéra, soo tá xi̱keʼéra ña̱ va̱ása va̱ʼa xi̱ka̱ʼa̱nndi̱ xíʼinra ña̱ va̱ása ndiʼi tiempo ndakaʼánra xa̱ʼa̱ ña̱yóʼo tá ná nasamara ña̱ kéʼéra, saátu íyondi̱ ña̱ chindeétáʼanndi̱ xíʼinra ña̱ nasamara ña̱ kéʼéra” (ta̱ Daniel).

TEXTO ÑA̱ VA̱XI NU̱Ú BIBLIA: “Iin na̱ kúʼvi̱-ini xíni inkana va̱ása kamaní-inina ta va̱ʼaní-inina” (1 Corintios 13:4).