1. ¿Ndáaña ke̱ʼé Jehová tasaá ta̱xira ndée ndaʼa̱ na̱ yiví tá i̱xaso̱ʼo ta̱ Adán xíʼin ñá Eva ña̱ ni̱ka̱ʼa̱nra?

NANI tá nda̱kava na̱ ñuyǐví ndaʼa̱ ku̱a̱chi, Jehová náʼa̱ra nu̱úyó ña̱ kúúra iin Ndióxi̱ ta̱ táxi ndée ndaʼa̱yó. Tá ki̱vi̱ i̱xaso̱ʼo ta̱ Adán xíʼin ñá Eva ña̱ ni̱ka̱ʼa̱n Ndióxi̱, mií ki̱vi̱ saá ni̱ka̱ʼa̱nra iin profecía xíʼinna, tá ná xi̱nu ña̱yóʼo, taxiña ndée ndaʼa̱ na̱ se̱ʼe ta̱ Adán. Ña̱ profecía yóʼo va̱xiña nu̱ú Génesis 3:15 tá káʼa̱nña xíʼinyó ña̱ sandiʼi-xa̱ʼara ta̱ Ndi̱va̱ʼa xíʼin ndiʼi ña̱ kéʼéra (1 Juan 3:8; Rev. 12:9).

2. ¿Ndáaña ke̱ʼé Jehová ña̱ va̱ʼa ta̱xira ndée ndaʼa̱ ta̱ Noé?

² Ta̱ Noé ni̱xi̱yora nu̱ú iin ñuyǐví nu̱ú kǒo níxikandíxana Ndióxi̱, iinlá miíra xíʼin na̱ veʼera kúú na̱ xi̱ndasakáʼnu Jehová. Iníí ni̱xi̱yo na̱ yiví na̱ xi̱kanitáʼan ta xi̱keʼénína ña̱ kini, sana xa̱ʼa ña̱yóʼo kivi kusuchí-inira (Gén. 6:4, 5, 11; Jud. 6). Soo Jehová ta̱xira ndée ndaʼa̱ra ña̱ va̱ʼa ndakú koo inira (Gén. 6:9). Ni̱ka̱ʼa̱nra xíʼinra ña̱ sandiʼi-xa̱ʼara ñuyǐví kini kán  ta ni̱ka̱ʼa̱nra xíʼinra ndáaña xíniñúʼu keʼéra ña̱ va̱ʼa ka̱kura xíʼin na̱ veʼera (Gén. 6:13-18). Chi̱ndeéníva ña̱yóʼo ta̱ Noé.

3. ¿Ndáaña ke̱ʼé Jehová ña̱ va̱ʼa ta̱xira ndée ndaʼa̱ ta̱ Josué? (Koto na̱ʼná ña̱ va̱xi chí xa̱ʼa).

³ Tá ni̱ya̱ʼa tiempo ta̱ Josué nda̱kiʼinra iin chiñu ña̱ ndeéní, ña̱ saki̱ʼvira na̱ ñuu Israel nu̱ú ñuʼú ña̱ ni̱ka̱ʼa̱n Ndióxi̱ taxira ndaʼa̱na. Ña̱ va̱ʼa ki̱ʼvina xíniñúʼu sandiʼi-xa̱ʼana na̱ ñuu na̱ xi̱ndoo yatin xíʼinna. Jehová ku̱nda̱a̱-inira ña̱ ndi̱ʼi̱va-ini ta̱ Josué. Xa̱ʼa ña̱yóʼo ni̱ka̱ʼa̱nra xíʼin ta̱ Moisés ná taxira ndée ndaʼa̱ra. Ni̱ka̱ʼa̱nra: “Ka̱ʼa̱n xíʼin ta̱ Josué taxi ndée ndaʼa̱ra, saáchi ta̱yóʼo kúú ta̱ ku̱ʼu̱n nu̱ú na̱ ñuu ta saki̱ʼvirana nu̱ú ñuʼú ña̱ kuni kuitíún” (Deut. 3:28). Ta miítu Jehová ta̱xi ndée ndaʼa̱ ta̱ Josué xíʼin tu̱ʼun yóʼo: “¿Á su̱ví yi̱ʼi̱ kúú ta̱ káʼa̱n xíʼún? Ndakú koo iniún. Kǒo yi̱ʼvíún, saáchi Jehová íyora xíʼún nda̱a̱ ndáaka nu̱ú ku̱a̱ʼún” (Jos. 1:1, 9).

4, 5. a) ¿Ndáaña ke̱ʼé Jehová ña̱ va̱ʼa ta̱xira ndée ndaʼa̱ na̱ ñuura tá tiempo xi̱naʼá? b) ¿Ndáaña ke̱ʼé Jehová ña̱ va̱ʼa ta̱xira ndée ndaʼa̱ se̱ʼera?

⁴ Jehová su̱ví loʼo kuitína nítaxira ndée ndaʼa̱ chi ku̱a̱ʼánína chi̱ndeéra. Xa̱ʼa ña̱ kúnda̱a̱-inira ña̱ kuniñúʼu na̱ ñuu Judá ndée tá ná ku̱ʼu̱nna koona ñuu Babilonia ni̱ka̱ʼa̱nra ña̱yóʼo xíʼinna: “Va̱ása yi̱ʼvíún, chi yi̱ʼi̱ íyoi̱ xíʼún. Va̱ása kotoún inka xiyo, chi yi̱ʼi̱ kúú Ndióxi̱ miíún. Yi̱ʼi̱ taxi ndée ndaʼún. Yi̱ʼi̱ chindeé yóʼó, yi̱ʼi̱ koo tui̱n xíʼún” (Is. 41:10). Ka̱ndíxaní na̱ cristiano na̱ xi̱ndoo tá siglo nu̱ú ña̱yóʼo, ta saátu xíniñúʼu kéʼé miíyó (kaʼvi 2 Corintios 1:3, 4). *

⁵ Jehová ta̱xitura ndée ndaʼa̱ se̱ʼera ta̱ Jesús. Tá nda̱kuchi ta̱yóʼo, xi̱niso̱ʼora ni̱ka̱ʼa̱n iinna chí ndiví: “Ta̱yóʼo kúú se̱ʼi̱, ta̱ kúni̱níi̱ xínii̱, ta̱yóʼo kúú ta̱ nda̱ka̱xii̱n” (Mat. 3:17). Chi̱ndeéníva tu̱ʼun yóʼo ta̱ Jesús tá ni̱xi̱kara na̱túʼunra xa̱ʼa Ndióxi̱.

6. ¿Nda̱saa chíndeéña miíyó ña̱ ni̱ka̱ʼa̱n ta̱ Jesús xa̱ʼa xu̱ʼún?

⁶ Ta̱ Jesús xi̱ndiku̱nra yichi̱ yivára. Ná ka̱ʼa̱nyó xa̱ʼa iin ña̱ ke̱ʼéra tá ni̱ka̱ʼa̱nra xa̱ʼa xu̱ʼún, ni̱ka̱ʼa̱nra xíʼin na̱ discípulo ña̱ xíniñúʼu ndakú koo inina ña̱ kachíñuna nu̱ú Ndióxi̱. Nu̱ú historia yóʼo, ni̱ka̱ʼa̱nra xa̱ʼa iin ta̱a ta̱ ni̱ka̱ʼa̱n xíʼin na̱ káchíñu nu̱úra: “Va̱ʼaní moso kúún nda̱kúní-iniún. Va̱ʼaní ka̱chíñún xíʼin loʼo ña̱ʼa yóʼo. Taxii̱ kundisochíñún xíʼin ku̱a̱ʼání ña̱ʼa. Naʼa ki̱ʼviún veʼi̱ ta kusi̱íní-iniún xíʼi̱n” (Mat. 25:21, 23).

7. a) ¿Ndáa ki̱ʼva xi̱taxi ta̱ Jesús ndée ndaʼa̱ na̱ apóstolra? b) ¿Ndáaña ke̱ʼéra ña̱ ta̱xira ndée ndaʼa̱ ta̱ Pedro?

⁷ Ta̱ Jesús xi̱taxiníra ndée ndaʼa̱ na̱ apóstol nda̱a̱ tá xi̱keʼéna ña̱ʼa ña̱ kǒo kútóora. Ku̱a̱ʼání yichi̱ xi̱kanitáʼanna xa̱ʼa ndáana kúú na̱ ndáyáʼvika. Soo ta̱ Jesús xi̱ka̱ʼa̱nra xíʼinna ña̱ ná ndakaʼánna ña̱ xíniñúʼu vitá koo inina ta va̱ʼa kachíñuna nu̱ú inkana, ta va̱ása kuni̱na kaʼndana chiñu (Luc. 22:24-26). Ta̱ Pedro sava yichi̱ ke̱ʼéra ña̱ va̱ása va̱ʼa ta sa̱kusuchíra-ini ta̱ Jesús (Mat. 16:21-23; 26:31-35, 75). Soo ta̱ Jesús kǒo níkundasíra ta̱ Pedro, ta̱xira ndée ndaʼa̱ra ta nda̱a̱ ni̱ka̱ʼa̱nra xíʼinra ña̱ ná chindeéra inka na̱ hermano (Juan 21:16).

8. ¿Ndáaña ni̱ka̱ʼa̱n ta̱ Ezequías xíʼin na̱ ndísochíñu nu̱ú na̱ soldado xíʼin na̱ ñuu Judá ña̱ va̱ʼa ta̱xira ndée ndaʼa̱na?

⁸ Tá kúma̱níka kixi ta̱ Jesús nu̱ú ñuʼú yóʼo ña̱ taxira iin yichi̱ va̱ʼaní nu̱úyó, na̱ xi̱ndasakáʼnu  Ndióxi̱ xa̱a̱ kúnda̱a̱va-inina ña̱ ndáyáʼviní ña̱ taxiyó ndée ndaʼa̱ inkana. Ná kotoyó ndáaña ke̱ʼé ta̱ rey Ezequías. Tá kúni̱ na̱ ñuu Asiria kanitáʼanna xíʼin na̱ ñuu Judá, sa̱ndátakara ndiʼi na̱ ñuu xíʼin na̱ ndísochíñu nu̱ú na̱ soldado, ta ni̱ka̱ʼa̱nra xíʼinna tu̱ʼun ña̱ ta̱xi ndée ndaʼa̱na (kaʼvi 2 Crónicas 32:7, 8). *

9. ¿Ndáaña sákuaʼayó xíʼin ña̱ ndo̱ʼo ta̱ Job tá kúni̱yó taxiyó ndée ndaʼa̱ inkana?

⁹ Vitin ná ka̱ʼa̱nyó xa̱ʼa ña̱ ndo̱ʼo ta̱ Job. Ta̱yóʼo kúsuchíní-inira, soo na̱ ni̱xa̱ʼa̱n xi̱toñaʼá nu̱úka ña̱ sándi̱kona-inira ni̱ka̱ʼa̱nna tu̱ʼun ña̱ va̱ása va̱ʼa xíʼinra. Ni saá miíra sa̱náʼa̱ na̱yóʼo ña̱ va̱ʼa sándi̱kona-ini inkana. Ni̱ka̱ʼa̱nra xíʼinna, tá níndoʼona ña̱ ndo̱ʼora, ka̱ʼa̱nvara tu̱ʼun va̱ʼa xíʼinna ña̱ va̱ʼa ná kunina (Job 16:1-5). Tándi̱ʼi ta̱ Elihú xíʼin mií Jehová kúú na̱ ta̱xi ndée ndaʼa̱ ta̱ Job (Job 33:24, 25; 36:1, 11; 42:7, 10).

10, 11. a) ¿Nda̱chun xi̱niñúʼu ñá se̱ʼe ta̱ Jefté ña̱ taxina ndée ndaʼa̱ñá? b) ¿Ndáana xíniñúʼu ka̱ʼa̱nyó tu̱ʼun va̱ʼa xíʼin tiempo vitin?

¹⁰ Xi̱niñúʼutu ñá se̱ʼe ta̱ Jefté ña̱ sándi̱kona-iniñá. Ta̱ Jefté ku̱ʼu̱nra kanitáʼanra xíʼin na̱ ñuu Ammon. Soo ni̱ka̱ʼa̱nra xíʼin Jehová tá ná chindeérara ña̱ kanitáʼanra xíʼin na̱yóʼo, taxira na̱ siʼnaka kita ndakiʼin miíra tá ná ndikóra veʼera ña̱ va̱ʼa kachíñuna nu̱ú Jehová ini tabernáculo. Ta ñá ki̱ta nda̱kiʼinra kúú ñá se̱ʼera. Ta̱ Jefté ku̱suchíní-inira chi iinlá ñáyóʼo kúú se̱ʼera. Soo sa̱xínura ña̱ ni̱ka̱ʼa̱nra xíʼin Ndióxi̱ ta chi̱ndaʼára ñá se̱ʼera ñuu Siló ña̱ va̱ʼa kachíñuñá nu̱ú Jehová ndiʼi tiempo (Juec. 11:30-35).

¹¹ Ña̱yóʼo i̱xayo̱ʼvi̱vaña xíʼin ta̱ Jefté, soo i̱xayo̱ʼvi̱kaña xíʼin ñá se̱ʼera. Ni saá ke̱ʼévañá ña̱ ni̱ka̱ʼa̱n yiváñá (Juec. 11:36, 37). Sa̱ndákooñá ndiʼi ña̱ kivi keʼéñá, va̱ása nítindaʼa̱ñá ta va̱ása níkaku se̱ʼeñá ni va̱ása níndakiʼinñá herencia ña̱ kúúmií na̱ veʼeñá. Xi̱niñúʼuníva taxina ndée ndaʼa̱ñá. Tu̱ʼun Ndióxi̱ káchiña: “Ta ña̱yóʼo ndu̱uña iin costumbre nu̱ú na̱ ñuu Israel: Ku̱i̱ya̱ tá ku̱i̱ya̱ ná se̱ʼe na̱ ñuu Israel xi̱xa̱ʼa̱nná xi̱taxiná ndée ndaʼa̱ ñá se̱ʼe ta̱ Jefté ta̱ ñuu Galaad, ku̱mí ki̱vi̱ nu̱ú ku̱i̱ya̱ xi̱xa̱ʼa̱nná” (Juec. 11:39, 40). Tiempo vitin ku̱a̱ʼání na̱ ñuu Ndióxi̱ va̱ása tíndaʼa̱na, chi kúni̱na kachíñu ku̱a̱ʼákana nu̱ú Ndióxi̱ ta xíniñúʼu ka̱ʼa̱nyó tu̱ʼun va̱ʼa xíʼinna ta chika̱a̱níyó ndéena (1 Cor. 7:32-35).

12, 13. ¿Ndáaña ke̱ʼé ta̱ Pedro ña̱ va̱ʼa ta̱xira ndée ndaʼa̱ na̱ hermano?

¹² Iin ñuu tá kúma̱níka kuvira, ta̱ Jesús ni̱ka̱ʼa̱nra xíʼin ta̱ apóstol Pedro: “Simón, Simón, koto, ta̱ Ndi̱va̱ʼa ndu̱kúra ndóʼó ña̱ va̱ʼa sakánda̱ra ndóʼó táki̱ʼva kéʼéna xíʼin trigo. Soo yi̱ʼi̱ ka̱ʼi̱n xa̱ʼún xíʼin Ndióxi̱ ña̱ va̱ʼa ná kandíxakaúnra; ta saá miíún, tá ná ndikóún va̱ʼa taxiún ndée ndaʼa̱ na̱ hermano” (Luc. 22:31, 32).

¹³ Ta̱ Pedro xi̱kuura iin ta̱ xi̱niʼi yichi̱ nu̱ú na̱ congregación tá siglo nu̱ú (Gál. 2:9). Ña̱ ndakúní ni̱xi̱yora tá Pentecostés xíʼin inkaka yichi̱ chi̱ndeéníña na̱ hermano. Tá xa̱a̱ ni̱ya̱ʼa ku̱a̱ʼá tiempo káchíñura nu̱ú Ndióxi̱ ni̱ka̱ʼa̱nra xíʼinna: “Ka̱ʼyíi̱ tu̱ʼun yóʼo, ña̱ va̱ʼa ná ndundakú-inindó ta káʼi̱n xíʼinndó ña̱ ndixa kúú ña̱ náʼa̱ Ndióxi̱ ña̱ kúʼvi̱-inira xínira ndóʼó, xa̱ʼa ña̱yóʼo xíniñúʼu ndakú koo inindó” (1 Ped. 5:12).  Carta ña̱ ka̱ʼyí ta̱ Pedro chi̱ndeéníña na̱ hermano na̱ ni̱xi̱yo tiempo xi̱naʼá. Nani ndátuyó ña̱ xi̱nu tu̱ʼun ña̱ ni̱ka̱ʼa̱n Jehová xíniñúʼuyó ña̱ taxina ndée ndaʼa̱yó (2 Ped. 3:13).

14, 15. ¿Nda̱chun xa̱a̱ ku̱a̱ʼání tiempo chíndeé táʼan ña̱ ka̱ʼyí ta̱ Juan xíʼin na̱ ñuu Ndióxi̱?

¹⁴ Inka ta̱ xi̱niʼi yichi̱ xíʼin na̱ congregación tá siglo nu̱ú xi̱kuu ta̱ apóstol Juan. Ña̱ va̱ʼaní ka̱ʼyíra xa̱ʼa ta̱ Jesús, ta̱xiña ndée ndaʼa̱ na̱ xi̱ndasakáʼnu Ndióxi̱ tá tiempo xi̱naʼá ta saátu tiempo vitin táxiña ndée ndaʼa̱yó. Iinlá nu̱ú evangelio yóʼo kúú nu̱ú ni̱ka̱ʼyi̱ tu̱ʼun ña̱ ni̱ka̱ʼa̱n ta̱ Jesús, tá kúʼvi̱-iniyó xínitáʼanyó náʼa̱yó ña̱ ndixa kuuyó discípulora (kaʼvi Juan 13:34, 35). *

¹⁵ Nu̱ú u̱ni̱ carta ña̱ ka̱ʼyíra va̱xi ku̱a̱ʼání ña̱ va̱ʼa sakuaʼayó. Tá kúsuchíní-iniyó xa̱ʼa ña̱ va̱ása va̱ʼa níkeʼéyó xi̱naʼá, ¿á va̱ása kúsi̱í-iniyó tá káʼviyó xa̱ʼa ña̱ ni̱xi̱ʼi̱ ta̱ Jesús chíndeéña miíyó ña̱ ndoo ku̱a̱chiyó? (1 Juan 1:7). Soo, tá va̱ása kándíxa níma̱yó ña̱ íyo Jehová ña̱ káʼnu-ini xa̱ʼayó, ndákiʼinyó ndée ña̱ káʼviyó ña̱ xa̱a̱ xíni̱va Ndióxi̱ ña̱ ndóʼoyó (1 Juan 3:20). Iinlá ta̱ Juan kúú ta̱ ka̱ʼyí xa̱ʼa ña̱ kúʼvi̱-ini Ndióxi̱ xínira miíyó (1 Juan 4:8, 16). Ta nu̱ú carta ña̱ u̱vi̱ xíʼin ña̱ u̱ni̱ va̱ʼaní tu̱ʼun ni̱ka̱ʼa̱nra xíʼin na̱ hermano na̱ ndákundeéka káchíñu nu̱ú Ndióxi̱ (2 Juan 4; 3 Juan 3, 4).

16, 17. ¿Ndáaña ke̱ʼé ta̱ apóstol Pablo ña̱ va̱ʼa ta̱xira ndée ndaʼa̱ na̱ hermano na̱ xi̱ndoo xi̱naʼá?

¹⁶ Ta̱ chi̱ndeé táʼan ku̱a̱ʼáka yichi̱ xíʼin na̱ hermano xi̱kuu ta̱ apóstol Pablo. Sana tá ki̱xaʼána kúúna cristiano, ku̱a̱ʼání na̱ apóstol  ni̱xi̱yona ñuu Jerusalén, nu̱ú ni̱xi̱yo na̱ cuerpo gobernante (Hech. 8:14; 15:2). Na̱ cristiano na̱ ñuu Judea xi̱ka̱ʼa̱nna xa̱ʼa ta̱ Cristo xíʼin na̱ yiví na̱ xi̱kandíxa ña̱ íyo iinlá Ndióxi̱. Soo, espíritu santo chi̱ndaʼáña ta̱ apóstol Pablo ña̱ va̱ʼa ku̱ʼu̱nra natúʼunra xíʼin na̱ yiví na̱ xi̱kuu griego xíʼin na̱ xi̱kuu romano, chi na̱yóʼo ndióxi̱ vatáva xi̱ndasakáʼnuna (Gál. 2:7-9; 1 Tim. 2:7).

¹⁷ Ta̱ Pablo ni̱xi̱katura ñuu Turquía, ñuu Grecia xíʼin ñuu Italia, ta ke̱ʼéra ku̱a̱ʼání congregación xíʼin na̱ va̱ása níxikuu judío. Xi̱niñúʼuníva na̱yóʼo ndée chi na̱ ñuu miívana kúú na̱ xi̱sa̱a̱-ini xi̱xiniñaʼá (1 Tes. 2:14). Nu̱ú carta ña̱ ka̱ʼyíra tá ku̱i̱ya̱ 50, ña̱ ku̱a̱ʼa̱n ndaʼa̱ na̱ congregación xa̱á ña̱ Tesalónica, ta̱ Pablo ni̱ka̱ʼa̱nra xíʼin na̱ hermano: “Ndiʼi tiempo táxindi̱ tixaʼvi ndaʼa̱ Ndióxi̱ tá káʼa̱nndi̱ xa̱ʼandó xíʼinra tá kéʼéndi̱ oración, saáchi ndákaʼánndi̱ xa̱ʼa chiñu ña̱ kéʼéndó xíʼin ñá ndakúní íyo inindó” (1 Tes. 1:2, 3). Saátu ni̱ka̱ʼa̱nra ña̱yóʼo: “Sándi̱kondó-ini táʼanndó, ta chindeé táʼanndó” (1 Tes. 5:11).

18. ¿Nda̱saa chi̱ndeé na̱ cuerpo gobernante ta̱ Felipe?

¹⁸ Tá siglo nu̱ú, Jehová xi̱niñúʼura na̱ cuerpo gobernante ña̱ va̱ʼa ta̱xira ndée ndaʼa̱ ndiʼi na̱ hermano, ta saátu ta̱xira ndée ndaʼa̱ na̱ kíʼin kuenta xíʼin congregación. Tá ni̱ka̱ʼa̱n ta̱ Felipe xa̱ʼa ta̱ Cristo xíʼin na̱ samaritano, na̱ cuerpo gobernante chi̱ndeénara ña̱ va̱ʼa keʼéra chiñura. Nda̱a̱ chi̱ndaʼána ta̱ Pedro xíʼin ta̱ Juan, ña̱ va̱ʼa ná ka̱ʼa̱nna xíʼin Jehová ña̱ ná taxira espíritu santo ndaʼa̱ na̱ hermano (Hech. 8:5, 14-17). Ta̱xiníva ña̱yóʼo ndée ndaʼa̱ ta̱ Felipe xíʼin na̱ hermano na̱ sa̱kán ki̱xaʼá kúú cristiano.

19. ¿Nda̱saa chi̱ndeé carta ña̱ chi̱ndaʼá na̱ cuerpo gobernante nu̱ú na̱ hermano xi̱ndoo xi̱naʼá?

¹⁹ Tá ni̱ya̱ʼa tiempo, ni̱nda̱ka̱tu̱ʼunna na̱ cuerpo gobernante á xíniñúʼu kaʼnda loʼona nu̱ú yi̱i̱ na̱ cristiano na̱ va̱ása níxikuu judío táki̱ʼva xi̱ka̱ʼa̱n ley ña̱ ta̱xi ta̱ Moisés ndaʼa̱ na̱ judío (Hech. 15:1, 2). Na̱ cuerpo gobernante ni̱ka̱ʼa̱nna xíʼin Ndióxi̱ ta ndu̱kúna espíritu santo nu̱úra, nda̱kani va̱ʼa xi̱nina xíʼin ña̱ káʼa̱n tu̱ʼun Ndióxi̱ ta ni̱ka̱ʼa̱nna ña̱ va̱ása xíniñúʼuka kaʼndana nu̱ú yi̱i̱ inkana. Ña̱ va̱ʼa kunda̱a̱-ini inka na̱ hermano xa̱ʼa ña̱yóʼo, xi̱niñúʼuna na̱ chíndeé táʼan xíʼinna ña̱ chi̱ndaʼána carta nu̱ú na̱ congregación. Tá ka̱ʼvi na̱ hermano carta yóʼo ku̱si̱íní-inina (Hech. 15:27-32).

20. a) ¿Ndáaña kéʼé na̱ cuerpo gobernante ña̱ va̱ʼa táxina ndée ndaʼa̱ ndiʼi na̱ ñuu Ndióxi̱? b) ¿Ndáaña sakuaʼayó nu̱ú inka artículo?

²⁰ Tiempo vitin na̱ cuerpo gobernante na̱ Testigo Jehová táxina ndée ndaʼa̱ na̱ ñuʼú Betel, táxina ndée ndaʼa̱ na̱ kúú precursor especial xíʼin inkakana ta táxituna ndée ndaʼa̱ ndiʼi na̱ ndásakáʼnu Jehová iníísaá ñuyǐví. Táki̱ʼva ndo̱ʼo na̱ xi̱ndoo tá siglo nu̱ú, ndiʼiyó kúsi̱íní-iniyó ña̱ táxina ndée ndaʼa̱yó. Saátu na̱ cuerpo gobernante ta̱vána tá ku̱i̱ya̱ 2015 folleto ña̱ naní Jehová desea que vuelva ña̱ va̱ʼa taxina ndée ndaʼa̱ na̱ yiví ña̱ iníísaá ñuyǐví ña̱ ná ndikó tukuna ñuu Ndióxi̱. Soo, ¿á nda̱saa na̱ hermano na̱ kíʼin kuenta xíʼin congregación kúú na̱ xíniñúʼu taxi ndée ndaʼa̱ inkana? Nu̱ú inka artículo sakuaʼayó xa̱ʼa ña̱yóʼo.