1, 2. a) ¿Ndáaña kéʼé ku̱a̱ʼá na̱ yiví xa̱ʼa ña̱ kúni̱na koona libre? b) ¿Ndáaña kúu xa̱ʼa ña̱ kéʼéna ña̱yóʼo?

TIEMPO vitin ku̱a̱ʼání na̱ yiví káʼa̱nna xa̱ʼa ña̱ kooyó na̱ yiví libre ta kǒoyó kundayáʼvika nu̱ú táʼanyó chi inkáchi koo ndiʼiyó. Ku̱a̱ʼání ñuu, na̱ yiví kúni̱na sa̱ñána ndaʼa̱ na̱ íxandi̱va̱ʼa xíʼinna, sa̱ñána ndaʼa̱ tu̱ndóʼo, keena ndaʼa̱ ña̱ ndáʼvi. Savatuna káʼa̱nna ña̱ ná taxina ka̱ʼa̱nna ña̱ ndákanixi̱nína á ña̱ keʼéna ña̱ kúni̱ miína. Ndiʼi na̱ yiví kúni̱na koona libre.

² Ña̱ va̱ʼa koona libre, kíxaʼána xíkana nu̱ú ku̱a̱chi, xíkana marcha ta nda̱a̱ káʼa̱nna contra na̱ gobierno. Soo kǒo xáa̱na ndúuna libre chi ña̱ va̱xikava kúú tu̱ndóʼo nu̱úna nda̱a̱ xáa̱na xíʼi̱na. Tasaá xínu ña̱ ni̱ka̱ʼa̱n ta̱ rey Salomón: “Ña̱ xáʼndachíñu ta̱a nu̱ú ta̱a táʼan miína nina tu̱ndóʼova íyo” (Ecl. 8:9).

3. ¿Ndáaña xíniñúʼu keʼéyó ña̱ va̱ʼa ndixa si̱í kooyó?

³ Ta̱ discípulo Santiago ni̱ka̱ʼa̱nra ndáaña kúú ña̱ xíniñúʼu keʼéyó ña̱ va̱ʼa ndixa si̱í kooyó. Ta ni̱ka̱ʼa̱nra na̱ yiví na̱ si̱íní íyo kúú “na̱ xíniso̱ʼo ley Ndióxi̱ ta kéʼéna ña̱ káʼa̱nña” (Sant. 1:25). Jehová kúú ta̱ ta̱xi ley yóʼo, ña̱kán xíni̱ va̱ʼara ndáa ña̱ʼa kúú ña̱  xíniñúʼuyó ña̱ va̱ʼa ndixa si̱í kooyó. Ta̱xira ndiʼi ña̱ xi̱niñúʼu ta̱ Adán xíʼin ñá Eva ña̱ va̱ʼa ndixa si̱í koona ta ta̱xitura ña̱ xi̱kuuna na̱ yiví libre.

4. ¿Ndáaña kúú ña̱ kǒo níxindi̱ʼi̱-ini ta̱ Adán xíʼin ñá Eva xa̱ʼa? (Koto na̱ʼná ña̱ va̱xi chí xa̱ʼa).

⁴ U̱vi̱ capítulo ña̱ va̱xi chí nu̱ú kíxaʼá Génesis káʼa̱n káxiña xíʼinyó xa̱ʼa ñuʼú livi nu̱ú ni̱xi̱yo ta̱ Adán xíʼin ñá Eva ña̱ kǒo ña̱ ndáʼvi níxi̱yo, ni kǒo na̱ níkundi̱va̱ʼa xíʼin inkana, ni kǒo na̱ níxi̱yi̱ʼví kán. Tasaá kúú ña̱ kúni̱ miíyó kooyó tiempo vitin. Ta̱ Adán xíʼin ñá Eva ndixaní kúú ña̱ xi̱kuuna libre. Chi va̱ása níxindi̱ʼi̱-inina xa̱ʼa ña̱ kuxuna, ni xa̱ʼa chiñu kachíñuna, ni xa̱ʼa kue̱ʼe̱ kǒo níxindi̱ʼi̱-inina, ni xa̱ʼa ña̱ kuvina (Gén. 1:27-29; 2:8, 9, 15).Tá ndixa xi̱kuuna libre, ¿á va̱ʼa xi̱keʼéna ndiʼi ña̱ xi̱kuni̱ miína? Ná kotoyó.

5. ¿Ndáaña xíniñúʼuyó ña̱ va̱ʼa kooyó na̱ yiví libre?

⁵ Sava na̱ yiví káchina ña̱ kuuyó na̱ yiví libre kúni̱ kachiña ña̱ va̱ʼa keʼéyó ndiʼi na̱ kúni̱yó ta kǒona ka̱ʼa̱n xíʼinyó xa̱ʼa ña̱ kéʼéyó. Iin enciclopedia káchiña: “Ña̱ kuuyó libre kúni̱ kachiña ña̱ va̱ʼa ndaka̱xinyó keʼéyó ña̱ kúni̱ miíyó”. Ta ña̱ encliclopedia yóʼo káchikaña: “Nu̱ú na̱ ka̱ʼvi xa̱ʼa ley, na̱ yiví kúúna libre tá kǒo táxi na̱ gobierno ley yo̱ʼvi̱ní ndaʼa̱na, á ley ña̱ taxi tu̱ndóʼo ndaʼa̱na” (The World Book Encyclopedia). Xíʼin ña̱yóʼo kúnda̱a̱-iniyó, ña̱ va̱ʼa kooyó libre xíniñúʼu ña̱ ka̱ʼa̱n iinna xíʼinyó ndáaña kúú ña̱ va̱ʼa ta ndáaña kúú ña̱ va̱ása va̱ʼa. Ta, ¿ndáana kúú na̱ kivi ka̱ʼa̱n xíʼinyó xa̱ʼa ña̱yóʼo?

6. a) ¿Nda̱chun iinlá Jehová kúú ta̱ va̱ʼa kéʼé ndiʼi ña̱ kúni̱ miíra? b) Miíyó na̱ yiví, ¿nda̱chun kǒo kívi keʼéyó ndiʼi ña̱ kúni̱yó?

⁶ Ña̱ xíniñúʼu kunda̱a̱-iniyó kúú ña̱ iinlá Jehová kúú ta̱ kivi keʼé ndiʼi ña̱ kúni̱ miíra. Saáchi ta̱yóʼo kúú ta̱ i̱xava̱ʼa ndiʼi ña̱ʼa ta íyoní ndée ndaʼa̱ra ta kúúra rey iníísaá ñuyǐví (1 Tim. 1:17; Rev. 4:11). Ná ndakaʼányó xa̱ʼa tu̱ʼun ña̱ liviní ni̱ka̱ʼa̱n ta̱ rey David ña̱ va̱xi nu̱ú 1 Crónicas 29:11, 12 (kaʼviña). * Yóʼo ni̱ka̱ʼa̱nra ña̱ iinlá Jehová kúú ta̱ káʼnu nu̱ú ndiʼiyó. Na̱ ndóo nu̱ú ndiví xíʼin miíyó na̱ ndóo nu̱ú ñuʼú yóʼo, kǒo kívi keʼéyó ndiʼi ña̱ kúni̱yó. Xíniñúʼu kunda̱a̱-iniyó iinlá Jehová kúú ta̱ kivi ka̱ʼa̱n xíʼinyó ndáaña kivi keʼéyó ta ndáaña kǒo kívi keʼéyó. Ta ña̱yóʼo kúú ña̱ ke̱ʼéra tá ki̱xaʼá ñuyǐví yóʼo.

7. ¿Ndáaña kúú sava ña̱ kéʼéyó ni kǒo ndákanixi̱níyó xa̱ʼaña ta kéʼévayóña ta sákusi̱íníña-iniyó?

⁷ Ta̱ Adán xíʼin ñá Eva ni ku̱a̱ʼáníva ña̱ va̱ʼa xi̱keʼé miína. Soo íyotu sava ña̱ xa̱kin Jehová ki̱ʼva nu̱úná á va̱ʼa keʼénaña á kǒo kívi keʼénaña. Íyo savaña tá xi̱keʼénaña kǒo níxindakanixi̱nína xa̱ʼaña. Tá kúú ña̱ ndakiʼinna ta̱chína, ña̱ kuxuna, xíʼin ña̱ ku̱su̱nna á inkaka ña̱ʼa. Tá xi̱keʼénaña va̱ása níxindakanixi̱nína ña̱ sásiní Jehová nu̱úna xíʼin ña̱yóʼo. Chi Jehová i̱xava̱ʼarana ña̱ kusi̱íní-inina ña̱ keʼéna ña̱yóʼo (Sal. 104:14, 15; Ecl. 3:12, 13). ¿Á su̱ví ndiʼivayó kútóoyó ndakiʼinyó ta̱chíyó nu̱ú iin lugar ña̱ va̱ása yaku̱a̱, ña̱ kuxuyó ña̱ kútóo miíyó á ña̱ va̱ʼaní ku̱su̱nyó ta inka kivi va̱ʼaní kuniyó? Tá kéʼéyó ña̱yóʼo va̱ása íxayo̱ʼvi̱ña xíʼinyó, kúsi̱íníva-iniyó xíʼinña. Ta saátu xi̱ndoʼo ta̱ Adán xíʼin ñá Eva, xi̱kusi̱íníva-inina.

8. ¿Ndáa chiñu xa̱ʼnda Jehová nu̱ú ta̱ Adán xíʼin ñá Eva, ta nda̱chun ni̱ka̱ʼa̱nra ña̱yóʼo xíʼinna?

⁸ Jehová ni̱ka̱ʼa̱nra xíʼin ta̱ Adán xíʼin ñá Eva ña̱ ná sakutúna nu̱ú ñuʼú yóʼo xíʼin  se̱ʼena ta ná kundaanaña (Gén. 1:28). ¿Á ña̱ xa̱ʼnda Jehová chiñu yóʼo nu̱úna kúni̱ kachiña ña̱ sa̱siníra nu̱úna? Su̱ví saá íyoña. Ña̱ xi̱kuni̱ra kúú ña̱ ndiʼi na̱ yiví ná ndasalivina nu̱ú ñuʼú ta koona nu̱úña ndiʼi tiempo (Is. 45:18). Tiempo vitin sava na̱ yiví va̱ása tíndaʼa̱na á savatuna ni ti̱ndaʼa̱na soo kǒo xíínna koo se̱ʼena, su̱ví ña̱yóʼo kúni̱ kachiña ña̱ yáʼandosóna ña̱ káʼa̱n Ndióxi̱. Ku̱a̱ʼánítuna tíndaʼa̱na ta káku se̱ʼena ni kúnda̱a̱-inina ña̱ kivi koo tu̱ndóʼo nu̱úna xa̱ʼa ña̱yóʼo (1 Cor. 7:36-38). ¿Nda̱chun kéʼéna ña̱yóʼo? Saáchi Ndióxi̱ i̱xava̱ʼara miíyó ña̱ kusi̱í-iniyó ta va̱ʼa kuniyó tá kéʼéyó ña̱yóʼo (Sal. 127:3). Ta̱ Adán xíʼin ñá Eva va̱ʼakaví kusi̱í-ini u̱vi̱ saána kundoona xíʼin táʼanna ndiʼi tiempo saátu xíʼin na̱ se̱ʼena.

9. ¿Nda̱chun va̱ása xo̱ʼvi̱ ta̱ Adán xíʼin ñá Eva tá níxiniso̱ʼona chiñu ña̱ xa̱ʼnda Ndióxi̱ ña̱ va̱xi nu̱ú Génesis 2:17?

⁹ Jehová xa̱ʼndara inka chiñu nu̱ú ta̱ Adán xíʼin ñá Eva, káxiní ni̱ka̱ʼa̱nra xíʼinna xa̱ʼa ndáa castigo kixi nu̱úna tá ná ya̱ʼandosónaña: “Soo yitu̱n tú kúúmií ku̱i̱ʼi ña̱ kunda̱a̱-iniún xa̱ʼa ña̱ va̱ʼa xíʼin xa̱ʼa ña̱ va̱ása va̱ʼa, kǒo xíniñúʼu kaxíún ña̱ʼa ndaʼa̱nú, saáchi tá ná kaxíún ña̱ʼa ndaʼa̱nú míí ki̱vi̱ saá kuvivaún” (Gén. 2:17). ¿Á yo̱ʼvi̱ní chiñu xa̱ʼndara nu̱úna á kixi tu̱ndóʼo nu̱úna tá ná keʼéna ña̱ ni̱ka̱ʼa̱nra? ¿Á sa̱siníra nu̱úna xa̱ʼa ña̱ ni̱ka̱ʼa̱nra ña̱yóʼo xíʼinna? Su̱ví saá íyoña. Ku̱a̱ʼání na̱ nándukú xa̱ʼa Biblia káchina ña̱ va̱ʼava kúú ña̱ ni̱ka̱ʼa̱nra xíʼinna. Inkara káʼa̱nra xa̱ʼa ña̱ va̱xi nu̱ú Génesis 2:16, 17 ña̱ “iinlá Ndióxi̱ kúú ta̱ xíni̱ ndáaña kúú ña̱ va̱ʼa [...] ña̱ xíniñúʼu keʼé miíyó na̱ yiví ta ndáaña kúú ña̱ va̱ása va̱ʼa [...]. Tá kúni̱yó va̱ʼa kundooyó xíniñúʼu kandíxayó Ndióxi̱ ta kuniso̱ʼoyó ña̱ káʼa̱nra. Chi tá ná kǒo keʼéyó ña̱yóʼo, xíniñúʼu ndaka̱xin miíyó ndáaña kúú ña̱ va̱ʼa ta ndáaña va̱ása va̱ʼa”. Soo va̱ása níkuva̱ʼayó ña̱ keʼéyó ña̱yóʼo.

10. ¿Nda̱chun síín íyo ña̱ ndaka̱xinyó keʼéyó ña̱ kúni̱ miíyó nu̱ú ña̱ kaʼndayó chiñu ña̱ ka̱ʼa̱nyó ndáaña kúú ña̱ va̱ʼa ta ndáaña kúú ña̱ va̱ása va̱ʼa?

¹⁰ Savana káʼa̱nna chiñu ña̱ xa̱ʼnda Ndióxi̱ nu̱ú ta̱ Adán sa̱siña nu̱úra ña̱ keʼéra ña̱ kúni̱ miíra. Soo su̱ví ña̱ ndixa kúú ña̱yóʼo. Su̱ví iin kúúña ndaka̱xinyó keʼéyó ña̱ kúni̱ miíyó nu̱ú ña̱ kaʼndayó chiñu, ña̱ ka̱ʼa̱nyó ndáaña kúú ña̱ va̱ʼa ta ndáaña kúú ña̱ va̱ása va̱ʼa. Ta̱ Adán xíʼin ñá Eva kivi ndaka̱xin miívana tá kúni̱na kuniso̱ʼona ña̱ káʼa̱n Ndióxi̱ á kǒo kúni̱na. Soo iinlá Jehová kúú ta̱ kivi ka̱ʼa̱n ndáaña kúú ña̱ va̱ʼa ta ndáaña va̱ása va̱ʼa. Ña̱yóʼo kúni̱ ka̱chi tú “yitu̱n tú kúúmií ku̱i̱ʼi ña̱ kunda̱a̱-inina xa̱ʼa ña̱ va̱ʼa xíʼin xa̱ʼa ña̱ va̱ása va̱ʼa” tú na̱kuva̱ʼa nu̱ú jardín ña̱ Edén (Gén. 2:9). Xíniñúʼu ndakuniyó ña̱ su̱ví ndiʼi yichi̱ xíni̱yó ndáaña kivi kixi nu̱úyó tá kéʼéyó ña̱ kúni̱ miíyó á ña̱ va̱ʼa kixi nu̱úyó á su̱ví ña̱ va̱ʼa. Ña̱kán, sava yichi̱ ni va̱ʼaníva ndákanixi̱ní iinna xa̱ʼa ña̱ keʼéna, va̱xi tu̱ndóʼo nu̱úna á nda̱a̱ xáa̱na xíʼi̱na (Prov. 14:12). Ndóʼoyó ña̱yóʼo xa̱ʼa ña̱ kúúyó na̱ yiví ku̱a̱chi. Jehová viíní sa̱náʼa̱ra ta̱ Adán xíʼin ñá Eva ndáa ki̱ʼva ndaka̱xinna ña̱ keʼéna. Ta, ¿ndáaña ke̱ʼé na̱yóʼo?

11, 12. ¿Nda̱chun ki̱xi tu̱ndóʼo káʼnu nu̱ú ta̱ Adán xíʼin ñá Eva? Ka̱ʼa̱n xa̱ʼa iin ejemplo.

¹¹ Ta̱ Adán xíʼin ñá Eva kǒo níkandíxana ña̱ ni̱ka̱ʼa̱n Ndióxi̱. Ñá Eva ku̱si̱íní-iniñá xíʼin ña̱ ni̱ka̱ʼa̱n ta̱ Ndi̱va̱ʼa: “Ndanu̱ná nu̱úndó ta xa̱a̱ndó koondó táki̱ʼva káa míí Ndióxi̱, kunda̱a̱-inindó xa̱ʼa ña̱ va̱ʼa xíʼin xa̱ʼa ña̱ va̱ása va̱ʼa” (Gén. 3:5). Soo ¿á va̱ʼaka ni̱xi̱yona xa̱ʼa ña̱ ke̱ʼéna ña̱ kúni̱ miína? Va̱ása va̱ʼa níxi̱yona. Ta ni va̱ása níxi̱nu ña̱ ni̱ka̱ʼa̱n ta̱ Ndi̱va̱ʼa xíʼinna. Kama ni̱xa̱a̱na na̱kunda̱a̱-inina  tá kǒo kéʼéna ña̱ káʼa̱n Ndióxi̱ ta kéʼéna ña̱ kúni̱ miína kixi tu̱ndóʼo nu̱úna (Gén. 3:16-19). ¿Nda̱chun ndo̱ʼona saá? Saáchi miíyó na̱ yiví va̱ása ní ixava̱ʼa Jehová miíyó ña̱ kaʼndayó chiñu ña̱ ka̱ʼa̱nyó ndáaña kúú ña̱ va̱ʼa ta ndáaña kúú ña̱ va̱ása va̱ʼa (kaʼvi Proverbios 20:24; * Jeremías 10:23). *

¹² Ná ka̱ʼa̱nyó xa̱ʼa iin ta̱ káva avión. Ña̱ va̱ʼa xa̱a̱ra nu̱ú ku̱a̱ʼa̱nra xíniñúʼu kundiku̱nra ña̱ ni̱ka̱ʼa̱nna xíʼinra ta kuniñúʼura ndiʼi ña̱ va̱xi ini tú avión. Saátu natúʼun táʼanra xíʼin na̱ yiví na̱ kíʼin kuenta xíʼin tú avión ña̱ va̱ʼa taxina yichi̱ nu̱úra ndáa mií ndachíra ku̱ʼu̱nra xíʼinnú, ama kúú ña̱ ndachíra ku̱ʼu̱nra ta ama kúú ña̱ nuura xíʼinnú. Soo tá kǒo ndíku̱nra ña̱ káʼa̱nna xíʼinra ta ku̱a̱ʼa̱nra nu̱ú kúni̱ miíra, sana kuu iin tu̱ndóʼo káʼnuní. Táki̱ʼva saá íyo ña̱ ke̱ʼé ta̱ Adán xíʼin ñá Eva. Kǒo níxindiku̱nna yichi̱ ña̱ ta̱xi Ndióxi̱ nu̱úna. Ta ¿ndáaña ku̱u? Ki̱xi tu̱ndóʼo káʼnu nu̱úna, nda̱kavana ndaʼa̱ ku̱a̱chi xa̱ʼa ña̱yóʼo kuvi miína xíʼin se̱ʼena na̱ kaku chí nu̱únínu (Rom. 5:12). Xa̱ʼa ña̱ ke̱ʼéna ña̱ kúni̱ miína, ndi̱ʼi-xa̱ʼa ña̱ kúúna na̱ yiví libre.

13, 14. ¿Ndáa ki̱ʼva xa̱a̱yó kooyó na̱ yiví libre?

¹³ Ku̱a̱ʼání na̱ yiví ndákanixi̱nína tá ná keʼéna ndiʼi ña̱ kúni̱na va̱ʼaníka kundoona saá. Soo mií ña̱ nda̱a̱ ná ka̱ʼa̱nyó, tá ná keʼéyó ndiʼi ña̱ kúni̱yó kixi tu̱ndóʼo nu̱úyó, nda̱a̱ táki̱ʼva ndoʼoyó xíʼin iin cuchillo ña̱ xi̱ínní yuʼú saá ndoʼoyó xíʼin ña̱yóʼo. Nda̱a̱ yíʼviyó ña̱ ndákanixi̱níyó nda̱saa koo ñuyǐví yóʼo tá ná kǒo na̱ ka̱ʼa̱n xíʼinyó ndáaña kúú ña̱ va̱ʼa keʼéyó ta ndáaña va̱ása kívi keʼéyó. Ña̱kán nu̱ú enciclopedia ña̱ ni̱ka̱ʼa̱nyó xa̱ʼa nu̱ú párrafo 5 káchiña: “Ndiʼi ñuu íyo ley nu̱ú káʼa̱nna xíʼinyó ndáaña kivi keʼéyó ta ndáaña va̱ása kívi keʼéyó”. Sava íxayo̱ʼvi̱ ña̱yóʼo xíʼinyó. Ná ndákanixi̱níyó xa̱ʼa ndiʼi ley ña̱ ka̱ʼyí na̱ ñuyǐví yóʼo, ku̱a̱ʼání na̱ licenciado  xíʼin na̱ juez xíniñúʼu ndakanina xa̱ʼa ña̱yóʼo ta ka̱ʼa̱nna ndáa castigo ndakiʼin iin iin na̱ yiví.

¹⁴ Ta̱ Jesús ni̱ka̱ʼa̱nra ndáaña keʼéyó ña̱ va̱ʼa xa̱a̱yó kuuyó na̱ yiví libre. Ka̱chira: “Tá kéʼéndó ña̱ káʼi̱n xíʼinndó saá kúúndó discípuloi̱, ta kunda̱a̱-inindó xa̱ʼa ña̱ nda̱a̱ ta ña̱yóʼo sañáña ndóʼó” (Juan 8:31, 32). Ña̱ va̱ʼa kundiku̱nyó ña̱ ni̱ka̱ʼa̱n ta̱ Jesús xíniñúʼu keʼéyó u̱vi̱ ña̱ʼa. Siʼna xíniñúʼu kandíxayó ña̱ sa̱náʼa̱ra. Ta ña̱ u̱vi̱, xa̱a̱yó kooyó discípulora. Chi tá saá ná keʼéyó saá kúúña ndixa sa̱ñáyó. ¿Ndáaña sa̱ñáyó ndaʼa̱? Ta̱ Jesús ni̱ka̱ʼa̱nra: “Ndiʼi na̱ kíʼvi ku̱a̱chi ndaʼa̱ ku̱a̱chi ndíka̱a̱na”. Ta ni̱ka̱ʼa̱nkara: “Tá ná sañá se̱ʼe Ndióxi̱ ndóʼó, saá ndixa kúú ña̱ xa̱a̱ndó sa̱ñándó” (Juan 8:34, 36).

15. ¿Ndáaña ni̱ka̱ʼa̱n ta̱ Jesús sa̱ñáyó ndaʼa̱?

¹⁵ Ña̱ ni̱ka̱ʼa̱n ta̱ Jesús xíʼin na̱ discípulora xa̱a̱na koona libre va̱ʼaníka ña̱yóʼo nu̱úka ña̱ káʼa̱n na̱ ñuyǐví yóʼo xa̱ʼa. Tá ni̱ka̱ʼa̱nra “tá ná sañá se̱ʼe Ndióxi̱ ndóʼó, saá ndixa kúú ña̱ xa̱a̱ndó sa̱ñándó”, ña̱ ni̱ka̱ʼa̱nra xa̱ʼa kúú ña̱ sa̱ñáyó ndaʼa̱ iin tu̱ndóʼo káʼnuní ña̱ ndíka̱a̱yó ndaʼa̱: ña̱ kúúyó na̱ yiví ku̱a̱chi. Xa̱ʼa ña̱ kúúyó na̱ yiví ku̱a̱chi su̱ví kuití kéʼéyó ña̱ va̱ása va̱ʼa chi kǒo táxiña keʼéyó ña̱ va̱ʼa. Xa̱ʼa ña̱yóʼo kúú ña̱ káʼa̱nyó ña̱ ndíka̱a̱yó ndaʼa̱ ku̱a̱chi. Ta ña̱yóʼo sándakavaña-iniyó, sásáa̱ña miíyó, sáxo̱ʼvi̱ña miíyó ta tándi̱ʼi xáʼníña miíyó (Rom. 6:23). Ta̱ apóstol Pablo va̱ʼaní xi̱kunda̱a̱-inira xa̱ʼa ña̱yóʼo (kaʼvi Romanos 7:21, 24, 25). * Tá ná sa̱ñáyó ndaʼa̱ ku̱a̱chi, saá ndixa xa̱a̱yó kuuyó na̱ yiví libre nda̱a̱ táki̱ʼva ni̱xi̱yo ta̱ Adán xíʼin ñá Eva.

16. ¿Ndáaña xíniñúʼu keʼéyó ña̱ va̱ʼa ndixa sa̱ñáyó?

¹⁶ Tá ni̱ka̱ʼa̱n ta̱ Jesús ña̱ xíniñúʼu keʼéyó ña̱ káʼa̱nra, ña̱yóʼo kúni̱ kachiña ña̱ íyo sava ña̱ʼa keʼéyó ña̱ va̱ʼa xa̱a̱yó kooyó na̱ yiví libre. Ndiʼi miíyó na̱ káʼvi tu̱ʼun Ndióxi̱ va̱ása kéʼékayó ña̱ kúni̱ miíyó ta kándíxayó ña̱ ni̱ka̱ʼa̱n ta̱ Jesús (Mat. 16:24). Nda̱a̱ táki̱ʼva ni̱ka̱ʼa̱n ta̱ Jesús tá ná ndakiʼinyó ña̱ va̱ʼa xa̱ʼa ña̱ ni̱xi̱ʼi̱ra, saá kúúña xa̱a̱yó kooyó na̱ yiví libre.

17. a) ¿Ndáaña kúú ña̱ ndixa taxi ña̱ kusi̱í-iniyó? b) ¿Ndáaña sakuaʼayó nu̱ú inka artículo?

¹⁷ Tá ná kandíxayó ña̱ sa̱náʼa̱ ta̱ Jesús saá ndixa kúú ña̱ xa̱a̱yó si̱í kooyó. Ña̱yóʼo kúú ña̱ chindeé táʼan xíʼinyó ña̱ ndixa xa̱a̱yó sa̱ñáyó ndaʼa̱ ku̱a̱chi xíʼin ña̱ va̱ása kuvikayó (kaʼvi Romanos 8:1, 21). * Nu̱ú inka artículo sakuaʼayó ndáa ki̱ʼva ndaka̱xinyó ña̱ keʼéyó vitin ña̱ va̱ʼa ndasakáʼnuyó Jehová ndiʼi tiempo.