1, 2. a) ¿Nda̱chun xi̱ndi̱ʼi̱ní-ini na̱ yiví na̱ xi̱ndoo tiempo ta̱ Pablo xa̱ʼa ña̱ kuuna esclavo á na̱ yiví libre? b) ¿Ndáana kúú na̱ taxi ña̱ ndixa kuuyó libre ka̱chi ta̱ Pablo?

NA̱ YIVÍ na̱ xi̱ndoo ñuu Roma xi̱kuta̱aní-inina xa̱ʼa ña̱ xi̱kuumiína ley, ña̱ káʼa̱n ña̱ ná koo ña̱ nda̱kú ta ná koo na̱ yiví libre. Soo na̱ ñuu Roma ni̱xa̱a̱na ndu̱una iin ñuu káʼnu ta ku̱a̱ʼá ndée xi̱kuumií na̱ chíñu, xa̱ʼa ña̱ xi̱niñúʼuna ku̱a̱ʼá na̱ esclavo. Ni̱xi̱yo iin tiempo ta ku̱a̱ʼání na̱ yiví xi̱kuu esclavo. Tiempo saá ndiʼi na̱ yiví xi̱natúʼunna xa̱ʼa na̱ esclavo saátu xa̱ʼa ña̱ koona libre, ndiʼina xi̱ndi̱ʼi̱-ini xa̱ʼa ña̱yóʼo nda̱a̱ na̱ cristiano na̱ xi̱ndoo kán xi̱ndi̱ʼi̱-inina xa̱ʼa ña̱yóʼo.

² Ta̱ apóstol Pablo ni̱ka̱ʼa̱nníra xa̱ʼa ña̱ kuuyó na̱ yiví libre. Soo va̱ása níndakanixi̱níra táki̱ʼva xi̱ndakanixi̱ní na̱ yiví na̱ xi̱ndoo tiempora, chi na̱kán xi̱ndakanixi̱nína xa̱ʼa ña̱ keʼéna ku̱a̱ʼáka ley. Ta̱ Pablo xíʼin inka na̱ cristiano chi̱ka̱a̱nína ndée ña̱ chi̱ndeé táʼanna xíʼin na̱ yiví ña̱ va̱ʼa sa̱kuaʼana xa̱ʼa Reino Ndióxi̱. Ta saátu ña̱ kunda̱a̱-inina ña̱ ndáyáʼviní ña̱ ni̱xi̱ʼi̱ ta̱ Jesús xa̱ʼayó. Ta̱ apóstol Pablo ni̱ka̱ʼa̱nra xíʼinna ndáaña keʼéna  ña̱ va̱ʼa ndixa xa̱a̱na kuuna na̱ yiví libre. Nu̱ú carta u̱vi̱ ña̱ ka̱ʼyíra ku̱a̱ʼa̱n nu̱ú na̱ ñuu Corinto káxiní ni̱ka̱ʼa̱nra: “Saáchi Jehová kúú espíritu; ta nu̱ú íyo espíritu Jehová ndiʼina sáña̱” (2 Cor. 3:17).

3, 4. a) ¿Ndáaña ni̱ka̱ʼa̱n ta̱ Pablo xa̱ʼa nu̱ú versículo ña̱ va̱xi chí sa̱tá 2 Corintios 3:17? b) ¿Ndáaña xíniñúʼu keʼéyó ña̱ va̱ʼa nduuyó na̱ yiví libre nu̱ú Jehová?

³ Nu̱ú mií carta yóʼo, xa̱a̱ ya̱chi̱ka loʼo ni̱ka̱ʼa̱n ta̱ Pablo xa̱ʼa ña̱ ndo̱ʼo ta̱ Moisés tá nu̱ura chí yuku̱ Sinaí tá ni̱xa̱ʼa̱nra nu̱ú iin ángel ta̱ chi̱ndaʼá Jehová. Iin kána taxa ñuʼu̱ nu̱úra. Tá xi̱ni na̱ ñuu Israel ña̱yóʼo ni̱yi̱ʼvína ña̱kán nda̱sira nu̱úra xíʼin iin ti̱ko̱to̱ (Éx. 34:29, 30, 33; 2 Cor. 3:7, 13). Ta̱ Pablo ni̱ka̱ʼa̱nra tá sákuaʼa iinna xa̱ʼa Jehová ndánu̱ná nu̱úna (2 Cor. 3:16). ¿Ndáaña kúni̱ kachira xíʼin ña̱yóʼo?

⁴ Táki̱ʼva sa̱kuaʼayó nu̱ú inka artículo, iinlá ta̱ kivi keʼé ndiʼi ña̱ kúni̱ miíra kúú Jehová chi ta̱yóʼo kúú ta̱ i̱xava̱ʼa ndiʼi ña̱ʼa. Ña̱kán nu̱ú íyora kivi koo na̱ yiví libre saátu nu̱ú íyo espíritura. Soo ña̱ va̱ʼa nduuyó na̱ yiví libre xíniñúʼu ndikóyó nu̱ú Jehová. Ña̱yóʼo kúni̱ kachiña ña̱ va̱ʼaní ná kutáʼanyó xíʼinra. Na̱ ñuu Israel na̱ ni̱xi̱ka chí ñuʼú yi̱chí va̱ása níxindakanixi̱nína táki̱ʼva xi̱ndakanixi̱ní Jehová. Nda̱a̱ táki̱ʼva íyo na̱ ndási iin ti̱ko̱to̱ nu̱ú ta ndási ti̱ko̱to̱ níma̱na saá ni̱xi̱yona. Xi̱kuni̱na keʼéna ña̱ kúni̱ miína ña̱ va̱ʼa sakusi̱ína-inina (Heb. 3:8-10).

5. a) ¿Ndáaña sáñá espíritu santo Jehová miíyó ndaʼa̱? b) ¿Nda̱chun va̱ʼa kúnda̱a̱-iniyó nda̱a̱ na̱ kúú esclavo á na̱ ndíka̱a̱ veʼeka̱a kivi sa̱ñána ndaʼa̱ ña̱yóʼo? c) ¿Ndáaña sakuaʼayó xa̱ʼa?

⁵ Soo espíritu santo Jehová sáñáña miíyó ta ndáyáʼvika ña̱yóʼo nu̱ú ña̱ sa̱ñáyó keʼéyó ña̱ kúni̱ miíyó. Ña̱ espíritu santo Jehová sáñáña miíyó ña̱ keeyó ndaʼa̱ ku̱a̱chi ta va̱ása kuvikayó, saátu ña̱ keeyó ndaʼa̱ ña̱ sánáʼa̱ na̱ veʼe-ñu̱ʼu vatá xíʼin ndiʼi costumbre ña̱ kéʼé na̱yóʼo. Ta nda̱a̱ ni iin na̱ yiví kǒo kivi tavá miíyó ndaʼa̱ ña̱yóʼo (Rom. 6:23; 8:2). Ta va̱ʼaní ña̱ táxi Jehová ndaʼa̱yó. Chi ni kúúyó esclavo nu̱ú inkana á ni ndíka̱a̱yó veʼeka̱a va̱ʼava sa̱ñáyó ndaʼa̱ ña̱yóʼo (Gén. 39:20-23). Saá kúú ña̱ ndo̱ʼo ta̱ hermano Eric Frost xíʼin ta̱ Horst Henschel. U̱vi̱ saána ku̱a̱ʼá ku̱i̱ya̱ xi̱ñuʼuna veʼeka̱a xa̱ʼa ña̱ kándíxana Ndióxi̱. Va̱ʼa kuniyóna ta kuniso̱ʼoyó ña̱ káʼa̱nna nu̱ú JW Broadcasting (PELÍCULA > ENTREVISTA XÍʼIN EXPERIENCIA > YÁʼANA NU̱Ú TU̱NDÓʼO). Soo vitin ná sakuaʼayó xa̱ʼa ña̱yóʼo: ¿ndáa ki̱ʼva náʼa̱yó ña̱ chíndayáʼviyó ña̱ kúúyó na̱ yiví libre ta ndáa ki̱ʼva ndaka̱xin va̱ʼayó ña̱ keʼéyó?

6. ¿Nda̱saa ni̱na̱ʼa̱ na̱ ñuu Israel ña̱ va̱ása níchindáʼvina ña̱ ta̱vá Ndióxi̱ miína ñuu Egipto?

⁶ Tá iinna táxi regalo ña̱ ndáyáʼviní ndaʼa̱yó, táxiníyó tixaʼvi ndaʼa̱na. Jehová ta̱xira ña̱ ki̱ndoo libre na̱ ñuu Israel tá ta̱várana ndaʼa̱ na̱ ñuu Egipto. ¿Ndáaña i̱xaa na̱yóʼo? Tá xa̱a̱ ni̱ya̱ʼa i̱ñu̱ yo̱o̱ ña̱ ni̱sañána, ki̱xaʼána ndákaʼánna xa̱ʼa ña̱ xi̱xixina xíʼin ña̱ xi̱xiʼina ñuu Egipto ta ki̱xaʼána nátúʼun kúáchina xa̱ʼa ña̱ xi̱taxi Jehová ndaʼa̱na. Nda̱a̱ ni̱ka̱ʼa̱nna ña̱ kúni̱na ndikóna ñuu Egipto. Ña̱ xi̱ndayáʼvika nu̱ú na̱kán kúú ti̱a̱ká, pepino, sandía, yiva, ti̱kumi xíʼin ti̱kumi yájo nu̱úka ña̱ koona na̱ yiví libre ña̱ va̱ʼa ndasakáʼnuna Jehová. Ña̱kán ni̱sa̱a̱níra xíʼinna (Núm. 11:5, 6, 10; 14:3, 4). Xíʼin ña̱yóʼo sákuaʼayó iin ña̱ʼa ña̱ ndáyáʼviní.

7. a) ¿Nda̱saa ke̱ʼé ta̱ Pablo consejo ña̱ ta̱xi miíra ña̱ va̱xi nu̱ú 2 Corintios 6:1? b) ¿Ta ndáa ki̱ʼva keʼétu miíyó ña̱yóʼo?

⁷ Ta̱ apóstol Pablo ni̱ka̱ʼa̱nra xíʼin na̱ cristiano  na̱ xi̱ndoo tiempora ña̱ ná chindayáʼvinína ña̱ ta̱xi Jehová se̱ʼera ni̱xi̱ʼi̱ xa̱ʼayó ña̱ va̱ʼa kuuyó na̱ yiví libre (kaʼvi 2 Corintios 6:1). * Ná ndakaʼányó chi ta̱ apóstol Pablo va̱ása va̱ʼa níxikunira xa̱ʼa ña̱ xi̱ndika̱a̱ra ndaʼa̱ ku̱a̱chi saátu ña̱ kuvira. Soo ke̱ʼéra ña̱ ni̱ka̱ʼa̱nra: “Tixaʼvi Ndióxi̱ xa̱ʼa se̱ʼera ta̱ Jesucristo”. ¿Nda̱chun ni̱ka̱ʼa̱nra ña̱yóʼo? Miíra ni̱ka̱ʼa̱n: “Saáchi espíritu santo yóʼo kúú ña̱ taxi ña̱ kutakuyó xa̱ʼa ña̱ kítáʼanyó xíʼin ta̱ Cristo chi ta̱yóʼo nda̱tavá miíyó nu̱ú ku̱a̱chi xíʼin ña̱ va̱ása kuvikayó” (Rom. 7:24, 25; 8:2). Saátu miíyó ná kǒo nandosóyó ña̱ ta̱vá Jehová miíyó ndaʼa̱ ku̱a̱chi xíʼin ña̱ va̱ása kuviyó. Xa̱ʼa ña̱ ni̱xi̱ʼi̱ ta̱ Jesús xa̱ʼayó, kivi ndasakáʼnuyó Jehová xíʼin ña̱ xíni̱túni̱yó ta kǒo ña̱ʼa sándi̱ʼi̱-iniyó (Sal. 40:8).

8, 9. a) ¿Ndáa consejo ta̱xi ta̱ apóstol Pedro xa̱ʼa ña̱ ndaka̱xin va̱ʼayó ña̱ keʼéyó? b) ¿Ndáa tu̱ndóʼo kúú ña̱ íyo nu̱úyó tiempo vitin?

⁸ Su̱ví kuití ña̱ taxiyó tixaʼvi, chi xíniñúʼu kiʼinyó kuenta ña̱ vií keʼéyó chiñu xa̱ʼa ña̱ táxi Ndióxi̱ kúúyó na̱ yiví libre. Ta̱ apóstol Pedro ni̱ka̱ʼa̱nra ña̱ va̱ása va̱ʼa keʼéyó ña̱ kini á ndiʼi ña̱ kúni̱ miíyó xa̱ʼa ña̱ kúúyó na̱ yiví libre (kaʼvi 1 Pedro 2:16). * Ña̱yóʼo sándakaʼánña miíyó xa̱ʼa ña̱ ke̱ʼé na̱ ñuu Israel chí ñuʼú yi̱chí. Tiempo vitin kúú ña̱ xíniñúʼu kundiku̱n va̱ʼakayó ña̱ káʼa̱n tu̱ʼun yóʼo. Ta̱ ndi̱va̱ʼa xíʼin ñuyǐví yóʼo xíniñúʼuna ku̱a̱ʼání ña̱ʼa ña̱ va̱ʼa sandáʼvina miíyó tá kúú ti̱ko̱to̱, ña̱ kuxuyó, ña̱ koʼoyó, ña̱ keʼéyó á inkaka ña̱ʼa. Nu̱ú tele távána na̱ yiví na̱ va̱ʼaní náʼa̱ ña̱ va̱ʼa ná ndakanixi̱níyó ña̱ xíniñúʼu satáyó ku̱a̱ʼá ña̱ʼa ni kǒo xíniñúʼuyó ña̱yóʼo. Va̱ása yo̱ʼvi̱ ndakavayó ndaʼa̱ ña̱yóʼo ta va̱ása yo̱ʼvi̱ keʼéyó ña̱ kúni̱ miíyó.

⁹ Consejo ta̱ Pedro ku̱a̱ʼání nu̱ú kivi chindeéña miíyó tá kúú nu̱ú káʼviyó á nu̱ú káchíñuyó. Na̱ íxayo̱ʼvi̱níña xíʼin kúú na̱ va̱lí na̱ xáʼa̱n escuela chi ku̱a̱ʼána káʼa̱n xíʼinna ña̱ ná kaʼvi va̱ʼana. Chi káʼa̱nna xíʼinna tá ná kaʼvi va̱ʼana saá ni̱ʼína iin chiñu ña̱ va̱ʼaní tasaá ku̱a̱ʼáka xu̱ʼún kiʼinna. Ta nda̱a̱ káʼa̱nna xíʼinna nda̱saa cháʼvina na̱ ka̱ʼvi va̱ʼa ta nda̱saa cháʼvina na̱ kǒo níkaʼvi va̱ʼa. Kivi ndakanixi̱ní na̱ va̱lí yóʼo ña̱ va̱ʼaníva ña̱ kaʼvi va̱ʼana, soo xíniñúʼu ndaka̱xin va̱ʼana ña̱ keʼéna chí nu̱únínu. ¿Ndáaña xíniñúʼu ndákanixi̱ní na̱ va̱lí yóʼo xa̱ʼa ta saátu na̱ yivána?

10. ¿Ndáaña xíniñúʼu ndakaʼányó xa̱ʼa tá kúni̱yó keʼéyó iin ña̱ʼa?

¹⁰ Sava na̱ yiví ndákanixi̱nína, miívana kúú na̱ xíniñúʼu ndaka̱xin ndáaña keʼéna, ta ndákanixi̱nína va̱ʼava keʼéna ña̱ kúni̱ miína chi ña̱ va̱ʼava kúúña túvina. Sana ndákanixi̱nína xa̱ʼa ña̱ ni̱ka̱ʼa̱n ta̱ Pablo xíʼin na̱ ñuu Corinto xa̱ʼa ña̱ kuxuna: “¿Nda̱chun ka̱ʼa̱n inka na̱ yiví xa̱ʼa ña̱ kéʼíi̱?” (1 Cor. 10:29). Ña̱ nda̱a̱ kúúña libreva kúúyó ña̱ ndaka̱xinyó ndáaña kaʼviyó á ndáa chiñu kachíñuyó. Soo xíniñúʼu ndakaʼányó ña̱ kǒo kívi keʼéyó ndiʼi ña̱ kúni̱yó chi xíʼin ña̱ kéʼéyó kivi kixi tu̱ndóʼo nu̱úyó. Ña̱kán ni̱ka̱ʼa̱n ta̱ Pablo: “Ndiʼi ña̱ʼa va̱ʼavaña; soo su̱ví ndiʼiña xíniñúʼuyó. Ndiʼi ña̱ʼa va̱ʼavaña; soo su̱ví ndiʼiña chíndeé miíyó” (1 Cor. 10:23). Ña̱yóʼo chíndeé táʼanña xíʼinyó ña̱ kunda̱a̱-iniyó ña̱ va̱ása ndáyáʼviní keʼéyó ndiʼi ña̱ kúni̱ miíyó tá ndaka̱xinyó keʼéyó iin ña̱ʼa.

11. ¿Nda̱chun nda̱tavá Ndióxi̱ miíyó ndaʼa̱ ku̱a̱chi?

¹¹ Tá ni̱ka̱ʼa̱n ta̱ Pedro ndáaña va̱ása keʼéyó xa̱ʼa ña̱ táxi Ndióxi̱ kúúyó na̱ yiví libre, ni̱ka̱ʼa̱ntura iin ña̱ va̱ʼaní keʼéyó kúú ña̱ kuuyó esclavo Ndióxi̱. Jehová xi̱niñúʼura se̱ʼera ta̱ Jesús ña̱ nda̱tavára miíyó ndaʼa̱ ku̱a̱chi xíʼin ña̱ va̱ása kuvikayó ña̱ va̱ʼa ná kuniñúʼuyó ña̱ tákuyó ña̱ ndasakáʼnuyóra.

12. ¿Ndáa yichi̱ va̱ʼa sa̱ndákoo ta̱ Noé xíʼin na̱ veʼera nu̱úyó?

¹² ¿Ndáaña va̱ása keʼéyó xa̱ʼa ña̱ táxi Ndióxi̱ kúúyó na̱ yiví libre ta saá kǒo kuukayó esclavo ña̱ ñuyǐví yóʼo? Ña̱ xíniñúʼu kundi̱ʼi̱níka-iniyó xa̱ʼa kúú chiñu Ndióxi̱ (Gál. 5:16). Ná sakuaʼayó xa̱ʼa ta̱ Noé xíʼin na̱ veʼera. Ni ni̱xi̱yona iin ñuyǐví ña̱ kininí ta ndi̱va̱ʼaní ni̱xi̱yo ini na̱ yiví, va̱ása níkeʼéna táki̱ʼva xi̱keʼé na̱ yiví yóʼo. ¿Nda̱chun va̱ʼa kǒo níkeʼéna ña̱yóʼo? Saáchi ña̱ xi̱ndi̱ʼi̱ní-inina xa̱ʼa kúú ña̱ keʼéna chiñu ña̱ ta̱xi Jehová ndaʼa̱na: ña̱ keʼéna iin arca, ña̱ taxiva̱ʼana ña̱ kuxuna xíʼin ña̱ kuxu tí kití ini tú arca, ta saátu ña̱ natúʼunna xíʼin na̱ yiví xa̱ʼa ña̱ ndiʼi-xa̱ʼa ñuyǐví ndi̱va̱ʼa kán. Ña̱ Biblia káchiña: “Ta̱ Noé ke̱ʼéra ndiʼi chiñu ña̱ xa̱ʼnda Ndióxi̱ nu̱úra. Ta míí ña̱ ni̱ka̱ʼa̱n Ndióxi̱ xíʼinra ña̱kán ke̱ʼéra” (Gén. 6:22). Xa̱ʼa ña̱yóʼo ni̱ka̱kura xíʼin na̱ veʼera (Heb. 11:7).

13. ¿Ndáa chiñu xáʼnda Jehová nu̱úyó?

¹³ ¿Ndáa chiñu xáʼnda Jehová nu̱úyó? Ña̱ ku̱ʼu̱nyó natúʼunyó xíʼin na̱ yiví xa̱ʼara (kaʼvi Lucas 4:18, 19). * Tiempo vitin ku̱a̱ʼání na̱ yiví nda̱a̱ táki̱ʼva íyo na̱ ndási nu̱ú saá íyona íxaa ta̱ Ndi̱va̱ʼa chi kándíxana veʼe-ñu̱ʼu vatá, ndíʼi̱ní-inina xa̱ʼa xu̱ʼún ta kándíxana na̱ chíñu (2 Cor. 4:4). Ta miíyó ndíku̱nyó sa̱tá ta̱ Jesús ta chíndeé táʼanyó xíʼin na̱ yiví ña̱ sákuaʼana xa̱ʼa Jehová ta xa̱a̱na  ndasakáʼnunara chi ta̱yóʼo kúú Ndióxi̱ ta̱ táxi kuuyó libre (Mat. 28:19, 20). Yo̱ʼvi̱va keʼéyó ña̱yóʼo, ta va̱xi tu̱ndóʼo nu̱úyó xíʼinñá. Sava ñuu, na̱ yiví kǒo xíínna kunina ña̱ sánáʼa̱yó ta savana ndeéní ndi̱va̱ʼa-inina. Ña̱ xíniñúʼu nda̱ka̱tu̱ʼunyó miíyó kúúña á kivi keʼékayó chiñu Ndióxi̱ xa̱ʼa ña̱ kúúyó na̱ yiví libre.

14, 15. ¿Ndáaña kéʼé ku̱a̱ʼání na̱ ndásakáʼnu Jehová? (Koto na̱ʼná ña̱ va̱xi chí xa̱ʼa).

¹⁴ Kúsi̱íní-iniyó ña̱ xítoyó ña̱ ku̱a̱ʼání na̱ ndásakáʼnu Jehová chíka̱a̱na ndée ña̱ loʼo ña̱ʼana koo ña̱ va̱ʼa kachíñukana ku̱a̱ʼá tiempo nu̱ú Jehová, xa̱ʼa ña̱ xítona ña̱ xa̱a̱ ku̱yatin ndiʼi-xa̱ʼa ñuyǐví yóʼo (1 Cor. 9:19, 23). Savana ñúʼukavana congregaciónna, ta savatuna ku̱a̱ʼa̱nna inka ñuu nu̱ú kúma̱níní na̱ natúʼun xa̱ʼa Ndióxi̱. Ña̱ informe káchiña ña̱ ti̱xin ña̱ u̱ʼu̱n ku̱i̱ya̱ vitin yáʼa 250,000 kúu na̱ hermano na̱ ndu̱u precursor. Ta vitin ki̱ʼva 1,100,000 kúúna. Va̱ʼaní íxaana ña̱ nda̱ka̱xinna ña̱ kachíñuna nu̱ú Jehová xa̱ʼa ña̱ kúúna libre (Sal. 110:3).

¹⁵ ¿Ndáaña chi̱ndeé táʼan xíʼinna ña̱ va̱ʼa ke̱ʼéna saá? Ná ka̱ʼa̱nyó xa̱ʼa ta̱ John xíʼin ñá Judith. Ti̱xin ña̱ o̱ko̱ u̱xu̱ ku̱i̱ya̱ ña̱ xa̱a̱ ni̱ya̱ʼa, ku̱a̱ʼá ñuu ni̱xi̱kana na̱túʼunna xa̱ʼa Ndióxi̱. Ndákaʼánna tá ki̱xaʼá ña̱ Escuela ña̱ Precursor, tá ku̱i̱ya̱ 1977, xi̱ka̱ʼa̱nna xíʼin na̱ xi̱xa̱ʼa̱n escuela kán ña̱ ná ku̱ʼu̱nna inka ñuu nu̱ú kúma̱níka na̱ natúʼun xa̱ʼa Ndióxi̱. Ta̱ John káchira ku̱a̱ʼá yichi̱ na̱samara chiñu ña̱ xi̱kuumiíra ña̱ va̱ʼa kachíñukara nu̱ú Jehová, ta kǒo níndi̱ʼi̱ní-inira xa̱ʼa ña̱ koo ku̱a̱ʼá ña̱ʼara. Ni̱ya̱ʼa tiempo miíra xíʼin ñá síʼíra ku̱a̱ʼa̱nna inka ñuu natúʼunna xa̱ʼa Ndióxi̱. Kán na̱kunda̱a̱-inina ña̱ chi̱ndeé táʼanní xíʼinna ña̱ va̱ʼa sakuaʼana inka tu̱ʼun, á ña̱ ka̱anna ñuu nu̱ú ni̱xa̱a̱na kúú ña̱ xi̱ka̱ʼa̱nnína xíʼin Jehová ta xi̱kandíxanínara. ¿Ndáaña ndákanixi̱nína xa̱ʼa ndiʼi ku̱i̱ya̱ ña̱ ka̱chíñuna nu̱ú Jehová? Ta̱ John káchira: “Mií chiñu yóʼo kúú ña̱ va̱ʼaníka nu̱ú ndiʼiña. Kúnda̱a̱ní-inii̱ ña̱ ndixa íyo Jehová nda̱a̱ táki̱ʼva íyo iin yiváyó. Vitin kúú ña̱ kúnda̱a̱ va̱ʼaka inii̱ xíʼin ña̱ káʼa̱n Santiago 4:8 ña̱ káchi: ‘Kuyatinndó nu̱ú Ndióxi̱ tasaá kuyatinra nu̱úndóʼ. Ku̱nda̱a̱-inii̱ ña̱ nda̱ni̱ʼíi̱ ña̱ xi̱ndukúi̱: ña̱ xa̱i̱ si̱íní koi̱”.

16. ¿Ndáaña kéʼé ku̱a̱ʼání na̱ hermano xa̱ʼa ña̱ kúúna na̱ yiví libre?

¹⁶ Sava na̱ hermano loʼova tiempo kúúna precursor chi íyo ña̱ʼa ña̱ kǒo táxi kǒona precursor ku̱a̱ʼá tiempo. Ta inkatuna ku̱a̱ʼa̱nna nu̱ú kúva̱ʼa salón nu̱ú ndásakáʼnuyó Jehová ña̱ kúva̱ʼa iníísaá ñuyǐví. Tá kúú tá na̱kuva̱ʼa Betel ña̱ íyo chí Warwick (Nueva York), ki̱ʼva 27,000 na̱ hermano ka̱chíñu yóʼo. Savana ka̱chíñuna u̱vi̱ semana, savana ku̱a̱ʼá yo̱o̱ ka̱chíñuna, ta savatuna ka̱chíñuna iin ku̱i̱ya̱ á nda̱a̱ ku̱a̱ʼáka ku̱i̱ya̱. Ku̱a̱ʼánína nda̱a̱ nda̱koona ña̱ xi̱keʼéna ña̱ va̱ʼa ka̱chíñuna yóʼo. Va̱ʼaní yichi̱ sa̱ndákoona nu̱ú ndiʼiyó ña̱ va̱ʼa kuniñúʼuyó ña̱ kúúyó libre ña̱ va̱ʼa ndasakáʼnuyó Jehová.

17. ¿Ndáaña va̱ʼa ndakiʼin na̱ kéʼé ña̱ kúni̱ Ndióxi̱?

¹⁷ Táxiyó tixaʼvi ndaʼa̱ Jehová xa̱ʼa ña̱ xíni̱yóra ta kúsi̱í-iniyó xa̱ʼa ña̱ kúúyó na̱ yiví libre ña̱ va̱ʼa ndásakáʼnuyóra. Xíʼin chiñu kéʼéyó ná na̱ʼa̱yó ña̱ kúsi̱í-iniyó ña̱ kúúyó na̱ yiví libre. Ta ná kuniñúʼu viíyó ña̱yóʼo ña̱ va̱ʼa ndasakáʼnuyó Jehová. Tá saá ná keʼéyó kivi ndakiʼinyó bendición ña̱ ni̱ka̱ʼa̱nra taxira ndaʼa̱yó: “Ndiʼi na̱ yiví sa̱ñána nu̱ú ku̱a̱chi ta ni va̱ása kuvikana, tasaá xa̱a̱na ndakiʼinna ku̱a̱ʼání bendición ta koona táki̱ʼva íyo na̱ se̱ʼe Ndióxi̱” (Rom. 8:21).