1. ¿Ndáaña kíʼin Jehová kuenta xíʼin tá xítora ña̱ kéʼé na̱ ñuura?

TÁ KÚNDA̱A̱-INIYÓ ña̱ kúsi̱íní-ini Jehová xíʼin na̱ ñuura, ña̱yóʼo sákusi̱íníña-iniyó (Sal. 149:4). Jehová xítora ña̱ va̱ʼa ña̱ kúúmiíyó ta kúnda̱a̱-inira ña̱ kivi xa̱a̱yó keʼéyó ña̱ va̱ʼa, ta táxira ña̱ kutáʼanyó xíʼinra. Ta tá nda̱kú íyo iniyó xíʼinra, ndiʼi tiempo koo yatinra xíʼinyó (Juan 6:44).

2. ¿Nda̱chun íxayo̱ʼvi̱ña xíʼin sava na̱ hermano ña̱ kandíxana ña̱ kúʼvi̱-ini Jehová xínirana?

² Soo íyo sava na̱ kivi ndakanixi̱ní ña̱yóʼo: “Kúnda̱a̱va-inii̱ ña̱ kúʼvi̱ní-ini Jehová xínira na̱ ñuura, soo ¿á kúʼvi̱-inira xínira yi̱ʼi̱?”. ¿Nda̱chun ndákanixi̱ní sava na̱ hermano saá? Ná kotoyó ña̱ káʼa̱n ñá Oksana, * ñáyóʼo ni̱xo̱ʼvi̱níñá tá ni̱xi̱yo loʼoñá ta káchiñá: “Xi̱kusi̱íní-inii̱ tá nda̱kuchii̱ ta ni̱xai̱ ku̱ui̱ precursora, soo tá ni̱ya̱ʼa xa̱ʼu̱n ku̱i̱ya̱ ki̱xáʼíi̱ ndákaʼíi̱n xa̱ʼa̱ ndi̱ʼi̱ ña̱ ndo̱ʼíi̱ tá ni̱xi̱yo loʼi̱. Ta nda̱kanixi̱níi̱ ña̱ va̱ása kúsi̱íka-ini Jehová xíʼin ña̱ kéʼíi̱, saátu nda̱kanixi̱níi̱ ña̱ va̱ása kúʼvi̱ka-inira xínira yi̱ʼi̱”. Ta saátu iin ñá precursora ñá naní Yua ni̱xo̱ʼvi̱níñá tá ni̱xi̱yo loʼoñá, ñáyóʼo káchiñá: “Ni̱xa̱i̱ nda̱kuchii̱ saáchi xi̱kuni̱i̱ sákusi̱íi̱-ini Jehová, soo nda̱kanixi̱níi̱ ña̱ va̱ása xa̱a̱ Jehová kuʼvi̱-inira kunira yi̱ʼi̱”.

3. ¿Ndáa pregunta ndakuiinyó nu̱ú artículo yóʼo?

³ Nda̱a̱ táki̱ʼva ndo̱ʼo sava ná hermana ná ni̱ka̱ʼa̱nyó xa̱ʼa̱ yóʼo, sana saátu miíyó kúʼvi̱-iniyó xíniyó Jehová soo íxayo̱ʼvi̱ña xíʼinyó ña̱ kandíxayó ña̱ kúʼvi̱-inira xínira miíyó. Nu̱ú artículo yóʼo ndakuiinyó u̱vi̱ pregunta: ¿Nda̱chun xíniñúʼu kandíxayó ña̱ ndixa kúʼvi̱-ini Jehová xínira miíyó? Ta, ¿ndáaña kivi keʼéyó tá kíxáʼayó ndákanixi̱níyó ña̱ va̱ása kúʼvi̱ka-inira xínira miíyó?

4. ¿Nda̱chun va̱ása xíniñúʼu kaka-iniyó ña̱ kúʼvi̱-ini Jehová xínira miíyó?

⁴ Tá kándíxayó ña̱ kúʼvi̱-ini Jehová xínira miíyó, saá kúú ña̱ kúni̱kayó kachíñuyó nu̱úra, ni nda̱a̱ ndáaka tu̱ndóʼo ná ya̱ʼayó nu̱ú. Soo tá xíka-iniyó ña̱ kúʼvi̱-inira xínira miíyó va̱ása koo ndee̱yó ña̱ keʼéyó chiñu nu̱úra (Prov. 24:10). Ña̱kán tá ná ndakava-iniyó ta kixáʼayó ndakanixi̱níyó ña̱ va̱ása kúʼvi̱ka-ini Jehová xínira miíyó, va̱ása kuchiñuyó ya̱ʼayó nu̱ú tu̱ndóʼo ña̱ táxi ta̱ Ndi̱va̱ʼa ndaʼa̱yó (Efes. 6:16).

5. ¿Ndáaña ndo̱ʼo sava na̱ hermano na̱ ki̱xáʼa xíka-ini xa̱ʼa̱ ña̱ kúʼvi̱-ini Ndióxi̱ xínirana?

⁵ Sava na̱ hermano kíxáʼana ndákanixi̱nína ña̱ va̱ása kúʼvi̱ka-ini Jehová xínirana, ta xa̱ʼa̱ ña̱yóʼo va̱ása kándíxakanara. Iin ta̱ anciano ta̱ naní James káchira: “Ni xi̱kachíñui̱ ti̱xin Betel ta saátu xi̱kusi̱í-inii̱ ña̱ xi̱ndika̱i̱ ti̱xin congregación nu̱ú káʼa̱nna inka tu̱ʼun, soo ki̱xáʼa xíka-inii̱ á ndixa kúsi̱í-ini Jehová xíʼin chiñu ña̱ xi̱keʼíi̱ nu̱úra. Ta saátu ki̱xáʼíi̱ ndákanixi̱níi̱ ña̱ sana va̱ása xíniso̱ʼokara oración ña̱ kéʼíi̱ nu̱úra”. Ñá Eva ñá káchíñu ti̱xin Betel káchiñá: “Ki̱ʼii̱n kuenta ña̱ iin ña̱ i̱yoní kúú ña̱ kaka-iniyó xa̱ʼa̱ ña̱ kúʼvi̱-ini Jehová xínira miíyó, chi saá va̱ása kúsi̱íka-iniyó káchíñuyó nu̱úra”. Ta̱ Michael, ta̱ kúú precursor regular ta kúútura anciano káchira: “Tá va̱ása kándíxaún ña̱ ndíʼi-ini Jehová xa̱ʼún loʼo tá loʼo kúxíkáún nu̱úra”.

6. ¿Ndáaña xíniñúʼu keʼéyó tá kíxáʼayó ndákanixi̱níyó ña̱ va̱ása kúʼvi̱ka-ini Jehová xínira miíyó?

⁶ Ña̱ ni̱ka̱ʼa̱n na̱ hermano yóʼo chíndeétáʼanña xíʼinyó kunda̱a̱-iniyó nda̱chun iin ña̱ i̱yoní kúúña kaka-iniyó xa̱ʼa̱ ña̱ kúʼvi̱-ini Ndióxi̱ xínira miíyó. Ta, ¿ndáaña xíniñúʼu keʼéyó tá kixáʼayó ndákanixi̱níyó saá? Ndi̱ku̱n kama taváyóña xi̱níyó ta ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ táxi̱n koo iniyó, ta ná kundaara níma̱yó xíʼin ña̱ ndákanixi̱níyó tasaá va̱ása kundi̱ʼi̱ka-iniyó (Sal. 139:23; nota; Filip. 4:6, 7). Ta ná ndakaʼányó chi íyo inkaka na̱ hermano na̱ íxayo̱ʼvi̱ña xíʼin kandíxana ña̱ kúʼvi̱-ini Jehová xínirana. Ta nda̱a̱ sava na̱ xi̱kachíñu nu̱ú Jehová tiempo xi̱naʼá ndo̱ʼo táʼan ña̱yóʼo. Ná kotoyó ndáaña kivi sakuaʼayó xíʼin ña̱ ke̱ʼé ta̱ apóstol Pablo.

7. ¿Ndáa tu̱ndóʼo xi̱kuumií ta̱ Pablo?

⁷ ¿Á ku̱a̱ʼání chiñu kúúmiíyó ta túviyó ña̱ va̱ása kúchiñuyó keʼéyó ndiʼiña? Ki̱ʼva saá ndo̱ʼo ta̱ apóstol Pablo, ta̱yóʼo su̱ví xa̱ʼa̱ iinlá kuití congregación níxi̱ndi̱ʼi̱-inira xa̱ʼa̱, chi ni̱ka̱ʼa̱nra ña̱ xi̱ndi̱ʼi̱inira xa̱ʼa̱ ndiʼi na̱ congregación (2 Cor. 11:23-28).  ¿Á xa̱a̱ ku̱a̱ʼání tiempo kúúmiíyó iin kue̱ʼe̱ ña̱ ndeéní ta xa̱ʼa̱ ña̱yóʼo va̱ása kívika koo si̱íyó? Ta̱ apóstol Pablo xi̱ndi̱ʼi̱ní-inira saáchi ni̱ka̱ʼa̱nra ña̱ ndíka̱a̱ iin iñú ku̱ñura, ta sana iin kue̱ʼe̱ xi̱kuu ña̱yóʼo (2 Cor. 12:7-10). ¿Á ndákava-iniyó xa̱ʼa̱ ña̱ íxayo̱ʼvi̱ña xíʼinyó keʼéyó ña̱ va̱ʼa? Sava yichi̱ xi̱ndoʼo ta̱ Pablo ña̱yóʼo. Ta̱yóʼo xi̱ndakavaní-inira saáchi ndiʼi tiempo xi̱xiniñúʼu chika̱a̱ra ndee̱ ña̱ keʼéra ña̱ va̱ʼa (Rom. 7:21-24).

8. ¿Ndáaña chi̱ndeétáʼan xíʼin ta̱ Pablo ña̱ nda̱kundeéra ka̱chíñura nu̱ú Jehová ni ni̱ya̱ʼara nu̱ú tu̱ndóʼo?

⁸ Ni ni̱ya̱ʼa ta̱ Pablo nu̱ú ku̱a̱ʼání tu̱ndóʼo nda̱kundeévara ka̱chíñura nu̱ú Jehová. ¿Nda̱chun va̱ʼa ku̱chiñura ke̱ʼéra ndiʼi ña̱yóʼo? Ni xi̱kunda̱a̱va-inira ndáaña kúú ña̱ xi̱ ixayo̱ʼvi̱ xíʼinra keʼéra, soo ña̱ xi̱chindeétáʼanní xíʼinra kúú ña̱ xi̱kandíxara ña̱ ni̱xi̱ʼi̱ ta̱ Jesús. Ta saátu xi̱xini va̱ʼara ña̱ ni̱ka̱ʼa̱n ta̱ Jesús ña̱ ndiʼi na̱ kándíxa miíra kivi ndakiʼinna ña̱ kutakuna ndiʼi tiempo (Juan 3:16; Rom. 6:23). Ta̱ Pablo xi̱kandíxara ña̱ ni̱xi̱ʼi̱ ta̱ Jesús xa̱ʼa̱ra ta saátu xi̱kandíxara ña̱ íxakáʼnu-ini Jehová xa̱ʼa̱ na̱ kéʼé ña̱ va̱ása va̱ʼa tá ndándikó-inina (Sal. 86:5).

9. ¿Ndáaña sákuaʼayó xíʼin ña̱ ni̱ka̱ʼa̱n ta̱ Pablo nu̱ú Gálatas 2:20?

⁹ Ta̱ Pablo xi̱kandíxanívara ña̱ xi̱kuʼvi̱ní-ini Jehová xi̱xinirara, saáchi chi̱ndaʼára se̱ʼera ña̱ ni̱xi̱ʼi̱ra xa̱ʼa̱ra. Ná kotoyó tu̱ʼun ña̱ ni̱ka̱ʼa̱n ta̱ Pablo ña̱ va̱xi nu̱ú Gálatas 2:20 * (kaʼviña). Ta̱ Pablo ka̱chira: “Kándíxai̱ se̱ʼe Ndióxi̱ ta̱ ni̱kuʼvi̱ní-ini xi̱ni yi̱ʼi̱ ta ni̱xi̱ʼi̱ra xa̱ʼíi̱”. Ta̱ Pablo va̱ása níndakanixi̱níra ña̱ va̱ása kivi kuʼvi̱-ini Ndióxi̱ kunirara, ta ni va̱ása níka̱ʼa̱nra ña̱yóʼo: “Kúnda̱a̱va-inii̱ ña̱ kúʼvi̱-ini Jehová xínira na̱ ñanii̱ soo va̱ása kívi kuʼvi̱-inira kunira yi̱ʼi̱”. Nu̱úka ña̱ ka̱ʼa̱nra saá, ni̱ka̱ʼa̱nra ña̱yóʼo xíʼin na̱ hermano ñuu Roma: “Tá kúúkayó na̱ yiví ku̱a̱chi ta̱ Cristo ni̱xi̱ʼi̱ra xa̱ʼa̱yó” (Rom. 5:8). Ña̱ kúʼvi̱-ini Ndióxi̱ xínira miíyó va̱ása ndiʼi-xa̱ʼa̱ña.

10. ¿Ndáaña sákuaʼayó xíʼin Romanos 8:38, 39?

¹⁰ (Kaʼvi Romanos 8:38, 39). * Ta̱ Pablo xi̱kandíxaníra ña̱ xi̱kuʼvi̱ní-ini Jehová xi̱xinirara. Ta ni̱ka̱ʼa̱nra ña̱ nda̱a̱ ni iin ña̱ʼa “kǒo kivi sakúxíkáña miíyó nu̱ú ña̱ kúʼvi̱-ini Ndióxi̱ xínira miíyó”. Xi̱kunda̱a̱-inira ña̱ kúeení ni̱xi̱yo ini Jehová xíʼin na̱ ñuu Israel, ta saátu xi̱kunda̱a̱-inira ña̱ xi̱kundáʼviní-ini Jehová xi̱xinirara. Ta ña̱yóʼo xi̱kuni̱ kachi ta̱ Pablo: “Tá chi̱ndaʼá Jehová se̱ʼera ña̱  ni̱xi̱ʼi̱ra xa̱ʼíi̱ va̱ása xíniñúʼu kaka-inii̱ ña̱ kúʼvi̱ní-inira xínira yi̱ʼi̱” (Rom. 8:32).

11. Ni ke̱ʼé ta̱ Pablo táʼan ña̱ va̱ása va̱ʼa ña̱ ni̱ka̱ʼa̱nra xa̱ʼa̱ nu̱ú 1 Timoteo 1:12-15, ¿nda̱chun xi̱kandíxara ña̱ xi̱kuʼvi̱-ini Ndióxi̱ xi̱xinirara?

¹¹ (Kaʼvi 1 Timoteo 1:12-15). * Sana va̱ása va̱ʼa níxi̱kuni ta̱ Pablo tá xi̱ndakaʼánra xa̱ʼa̱ ña̱ va̱ása va̱ʼa ke̱ʼéra tá kúma̱ní xa̱a̱ra koora discípulo ta̱ Jesús. Ña̱kán ni̱ka̱ʼa̱nra ña̱ kúúmiíníkara ku̱a̱chi nu̱ú inkana, saáchi tá kúma̱ní sákuaʼara xa̱ʼa̱ ña̱ nda̱a̱ xi̱ ixandi̱va̱ʼaníra xíʼin na̱ cristiano nda̱a̱ ta̱ánra sava na̱yóʼo ti̱xin veʼeka̱a ta chi̱ndeétáʼanra xíʼin inkana ña̱ kaʼnína na̱yóʼo (Hech. 26:10, 11). Ná ndakanixi̱níyó ña̱ xi̱nitáʼanra xíʼin iin se̱ʼe na̱ ni̱xi̱ʼi̱ yóʼo, ¿ndáaña xi̱ndoʼo ta̱ Pablo tá xi̱kuu ña̱yóʼo? Xi̱ndandikóní-inira xa̱ʼa̱ ña̱ ke̱ʼéra tá ya̱chi̱, soo xi̱kunda̱a̱va-inira ña̱ va̱ása kivi nasamara ña̱ xa̱a̱ ke̱ʼéra. Soo xi̱kandíxara ña̱ ni̱xi̱ʼi̱ ta̱ Cristo xa̱ʼa̱ra ña̱kán ka̱ʼyíra ña̱yóʼo: “Xa̱ʼa̱ ña̱ va̱ʼa-ini Ndióxi̱ xíʼi̱n kúi̱ iin apóstol” (1 Cor. 15:3, 10). ¿Ndáaña sákuaʼayó xíʼin ña̱yóʼo? Xíniñúʼu kandíxayó ña̱ ni̱xi̱ʼi̱ ta̱ Cristo xa̱ʼa̱ iin tá iinyó, ta tíxa̱ʼvi ña̱yóʼo kivi kitáʼanyó xíʼin Jehová (Hech. 3:19). Ña̱ kíʼin Ndióxi̱ kuenta xíʼin kúú ña̱ kéʼéyó vitin ta saátu ña̱ keʼéyó chí nu̱únínu, ta va̱ása kíʼinra kuenta xíʼin ña̱ va̱ása va̱ʼa ke̱ʼéyó tá ya̱chi̱ ni xi̱kuuyó testigo Jehová á va̱ása (Is. 1:18).

12. Nda̱a̱ táki̱ʼva káchi 1 Juan 3:19, 20, ¿ndáaña xíniñúʼu keʼéyó tá túviyó ña̱ va̱ása ndáyáʼviyó ta va̱ása xíniñúʼu kuʼvi̱-inina kunina miíyó?

¹² Sava yichi̱ xa̱ʼa̱ ña̱ kúúyó na̱ yiví ku̱a̱chi níma̱yó kivi kixáʼaña sandáʼviña miíyó ta kixáʼayó ndakanixi̱níyó ña̱ va̱ása ndáyáʼviyó ta va̱ása xíniñúʼu kuʼvi̱-ini Ndióxi̱ kunira miíyó (kaʼvi 1 Juan 3:19,  20). * Xa̱ʼa̱ ña̱kán kivi kixáʼayó ndakanixi̱níyó ña̱ va̱ása kivi chaʼvi ña̱ ni̱xi̱ʼi̱ ta̱ Jesús xa̱ʼa̱ ndiʼi ku̱a̱chi ña̱ ni̱ki̱ʼviyó. Tá ná kixáʼayó ndakanixi̱níyó saá, ná ndakaʼányó chi “káʼnukava Ndióxi̱ nu̱ú níma̱yó”. Ni túviyó ña̱ va̱ása kúʼvi̱-ini Ndióxi̱ xínira miíyó ta va̱ása íxakáʼnu-inira xa̱ʼa̱yó, soo mií ña̱ nda̱a̱ kúʼvi̱va-inira xínira miíyó ta íxakáʼnu-inira xa̱ʼa̱yó, ta xíniñúʼu kandíxayó ña̱yóʼo. Ña̱kán xíniñúʼu kaʼviyó tu̱ʼunra ndiʼi saá ki̱vi̱, ka̱ʼa̱n ni̱ʼiyó xíʼinra ta taváyó tiempo ña̱ kutáʼanyó xíʼin na̱ hermanoyó. Ná kotoyó nda̱chun ndáyáʼviní u̱ni̱ saá ña̱yóʼo.

13. ¿Ndáa ki̱ʼva chindeétáʼan tu̱ʼun Ndióxi̱ xíʼinyó tá ná kaʼviyóña? (Koto recuadro “ ¿Ndáa ki̱ʼva chíndeétáʼan tu̱ʼun Ndióxi̱ xíʼinna?”).

¹³ Ná kaʼviyó tu̱ʼun Ndióxi̱ ndiʼi ki̱vi̱. Tá ná keʼéyó ña̱yóʼo saá xa̱a̱yó kuxini̱kayó ndáa ki̱ʼva íyo Jehová, ta saátu xa̱a̱yó kunda̱a̱-iniyó ña̱ kúʼvi̱ní-inira xínira miíyó. Tá ndiʼi ki̱vi̱ ná ndakanixi̱níyó xa̱ʼa̱ ña̱ káʼa̱n tu̱ʼun Ndióxi̱, ña̱yóʼo chindeétáʼanña xíʼinyó ña̱ viíka koo ña̱ ndákanixi̱níyó ta nasamayó ña̱ ndíka̱a̱ níma̱yó (2 Tim. 3:16). Iin ta̱ anciano ta̱ naní Kevin, ta̱ xi̱ndakanixi̱ní ña̱ va̱ása ndáyáʼvira káchira: “Tá káʼvii̱ Salmo 103 ta ndákanixi̱níi̱ xa̱ʼa̱ña, chíndeétáʼanña xíʼi̱n ña̱ nasamai̱ ña̱ ndákanixi̱níi̱ ta kunda̱a̱-inii̱ ndáaña ndákanixi̱ní Jehová xa̱ʼíi̱”. Ñá Eva ñá xa̱a̱ ni̱ka̱ʼa̱nyó xa̱ʼa̱ nu̱ú párrafo 5 káchiñá: “Tá xa̱a̱ xi̱ku̱aá távai̱ tiempo ña̱ ndakanixi̱níi̱ ssʼa kúú ña̱ ndáyáʼvika nu̱ú Jehová. Ta ña̱yóʼo chíndeétáʼanña xíʼi̱n ña̱ kandíxakai̱ Ndióxi̱ ta va̱ása kundi̱ʼi̱ní-inii̱”.

14. ¿Ndáa ki̱ʼva chíndeétáʼan ña̱ oración xíʼinyó?

¹⁴ Ná keʼé ni̱ʼiyó oración (1 Tes. 5:17). Tá kúni̱yó viíní kitáʼanyó xíʼin iin na̱ yiví xíniñúʼu natúʼun ni̱ʼiyó xíʼinna ta ka̱ʼa̱nyó xíʼinna xa̱ʼa̱ ña̱ ndóʼoyó, ta ki̱ʼva saá xíniñúʼu keʼéyó xíʼin Jehová. Tá nátúʼunyó xíʼinra xa̱ʼa̱ ña̱ ndóʼoyó, xa̱ʼa̱ ña̱ ndákanixi̱níyó xíʼin xa̱ʼa̱ ña̱ sándi̱ʼi̱-iniyó saá náʼa̱yó ña̱ ndáa-iniyóra ta kándíxayó ña̱ kúʼvi̱-inira xínira miíyó (Sal. 94:17-19; 1 Juan 5:14, 15). Ñá Yua, ñá ni̱ka̱ʼa̱nyó xa̱ʼa̱ nu̱ú párrafo 2, káchiñá: “Tá káʼi̱n xíʼin Jehová, su̱ví iinlá xa̱ʼa̱ ña̱ ndo̱ʼi̱ ña̱ ki̱vi̱ kán nátúʼi̱n xíʼinra, chi káʼi̱n xíʼinra xa̱ʼa̱ ndiʼi ña̱ ndóʼi̱. Ta nu̱úka ña̱ kotoi̱ Jehová nda̱a̱ táki̱ʼva íyo iin ta̱ chíñu, xítoi̱ra nda̱a̱ táki̱ʼva íyo yivái̱ ta̱ kúʼvi̱ní-ini xíni yi̱ʼi̱”. (Koto ña̱ recuadro “ ¿Á xa̱a̱ ka̱ʼviúnña?”).

15. ¿Ndáa ki̱ʼva náʼa̱ Jehová ña̱ ndíʼi̱-inira xa̱ʼa̱ iin tá iinyó?

¹⁵ Ná kitáʼanyó xíʼin na̱ hermanoyó. Nda̱a̱ táki̱ʼva íyo iin regalo ña̱ ta̱xi Jehová ndaʼa̱yó saá íyo na̱yóʼo (Sant. 1:17). Jehová náʼa̱ra ña̱ ndíʼi̱-inira xa̱ʼa̱ iin tá iinyó, saáchi ta̱xira na̱ hermano ña̱ koona nda̱a̱ táki̱ʼva íyo na̱ veʼeyó ta na̱yóʼo kúʼvi̱ní-inina xínina miíyó (Prov. 17:17). Tá chi̱ndaʼá ta̱ Pablo carta ña̱ ku̱a̱ʼa̱n ndaʼa̱ na̱ ñuu Colosas, ni̱ka̱ʼa̱nra xa̱ʼa̱ sava na̱ hermano na̱ chi̱ndeétáʼan xíʼinra ta sa̱ndíkona-inira (Col. 4:10, 11). Ta nda̱a̱ ta̱ Jesús xi̱niñúʼu chindeétáʼan na̱ migora xíʼinra, sava na̱yóʼo xi̱kuuna na̱ ángel á na̱ yiví, ta ta̱xira tíxa̱ʼvi ndaʼa̱na xa̱ʼa̱ ña̱ chi̱ndeétáʼanna xíʼinra (Luc. 22:28, 43).

16. ¿Ndáa ki̱ʼva chíndeétáʼan na̱ hermano xíʼinyó ña̱ kuyatinkayó nu̱ú Jehová?

 ¹⁶ ¿Á káʼa̱nyó xíʼin na̱ hermano na̱ íyo ti̱xin congregación ña̱ chindeétáʼanna xíʼinyó? Ta, ¿á táxiyó keʼéna ña̱yóʼo? Tá nátúʼunyó xíʼin iin na̱ hermano na̱ viíní kítáʼan xíʼin Ndióxi̱ xa̱ʼa̱ ña̱ ndóʼoyó, ña̱yóʼo va̱ása kúni̱ kachiña ña̱ va̱ása kándíxakayó Ndióxi̱, saáchi ña̱ ka̱ʼa̱nyó xíʼin na̱yóʼo kivi chindeétáʼanña xíʼinyó. Ná ndakanixi̱níyó xa̱ʼa̱ ña̱ káʼa̱n ta̱ James, ta̱ ni̱ka̱ʼa̱nyó xa̱ʼa̱ nu̱ú párrafo 5, ta̱yóʼo káchira: “Xa̱ʼa̱ ña̱ kítáʼi̱n xíʼin na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ va̱ʼaní chíndeétáʼanna xíʼi̱n. Tá ndákava-inii̱, na̱ migoi̱ va̱ʼaní xíniso̱ʼona ña̱ káʼi̱n xíʼinna ta sándakaʼánna yi̱ʼi̱ ña̱ kúʼvi̱ní-inina xínina yi̱ʼi̱. Tá kéʼéna ña̱yóʼo kíʼi̱n kuenta ña̱ kúʼvi̱ní-ini Jehová xínira yi̱ʼi̱ ta ndíʼi̱-inira xa̱ʼíi̱”. Xíʼin ña̱yóʼo kúnda̱a̱-iniyó ña̱ ndáyáʼviní koo na̱ migoyó ti̱xin congregación.

17, 18. ¿Ndáana xíniñúʼu kandíxayó, ta nda̱chun?

¹⁷ Ta̱ Ndi̱va̱ʼa kúni̱ra ná ndakava-iniyó ta ná sandákooyó keʼéyó ña̱ kútóo Ndióxi̱. Ta kúni̱ra ná ndakanixi̱níyó ña̱ va̱ása kúʼvi̱-ini Jehová xínira miíyó, ta va̱ása xíniñúʼu sakǎkura miíyó chi su̱ví na̱ yiví va̱ʼa kúúyó. Soo nda̱a̱ táki̱ʼva íyo ña̱ sa̱kuaʼayó, su̱ví ña̱ ndixa kúú ña̱ káʼa̱n ta̱ Ndi̱va̱ʼa.

¹⁸ Jehová kúʼvi̱ní-inira xínira miíyó ta ndáyáʼviní iin tá iinyó nu̱úra. Tá ná kuniso̱ʼoyó ndiʼi ña̱ káʼa̱nra, ndiʼi tiempo kuʼvi̱ní-inira kunira miíyó nda̱a̱ táki̱ʼva kéʼéra xíʼin ta̱ Jesús (Juan 15:10). Ña̱kán, tá kúni̱ níma̱yó sandáʼviña miíyó á ta̱ kúni̱ ta̱ Ndi̱va̱ʼa sandáʼvira miíyó ña̱ ndakanixi̱níyó ña̱ va̱ása kúʼvi̱-ini Jehová xínira miíyó, ná va̱ása kandíxayó ña̱yóʼo. Va̱ʼaka ná kandíxayó ña̱ káʼa̱n Jehová, chi ta̱yóʼo xítora ña̱ va̱ʼa kúúmií iin tá iinyó. Ta ná kandíxayó ña̱ “kúsi̱íní-inira xíʼin na̱ ñuura”, ta saátu xíʼin miíyó.