Tá xa̱a̱ kúúmiíi̱ 13 ku̱i̱ya̱ ki̱xáʼíi̱ va̱ása viíka kítáʼi̱n xíʼin Jehová. Xi̱ndakanixi̱níi̱ ña̱ na̱ va̱lí na̱ xi̱kaʼvi xíʼi̱n ti̱xin escuela va̱ʼa xi̱keʼéna ña̱ xi̱kuni̱ miína, ta saátu yi̱ʼi̱ xi̱kunii̱ keʼíi̱ táʼan ña̱kán. Xi̱ndakanixi̱níi̱ ña̱ yo̱ʼvi̱ní ndiʼi ña̱ xi̱ka̱ʼa̱n na̱ yivái̱ xíʼi̱n ta saátu consejo ña̱ va̱xi nu̱ú Biblia. Ta ni va̱ása níxi̱kutóokai̱ kachíñui̱ nu̱ú Jehová. Ni xi̱kandíxavai̱ ña̱ íyo Jehová, soo xi̱ndakanixi̱níi̱ ña̱ va̱ása yatin íyora xíʼi̱n.

Va̱ása nísandákovíi̱ ña̱ natúʼi̱n xíʼin na̱ yiví xa̱ʼa̱ Ndióxi̱, soo va̱ása níchikai̱ ndee̱ ña̱ kachíñukai̱ nu̱úra. Ta ni va̱ása níxi̱kaʼvi kúei̱ ña̱ va̱ʼa ku̱ʼi̱n natúʼi̱n xíʼin na̱ yiví xa̱ʼa̱ra, ña̱kán xi̱ ixayo̱ʼvi̱níña xíʼi̱n ña̱ natúʼi̱n xíʼinna. Ta xa̱ʼa̱ ña̱yóʼo va̱ása níxi̱kuumiíi̱ revisita, ni va̱ása níxi̱sanáʼi̱ na̱ yiví, ta ni loʼo va̱ása níxi̱kutóokai̱ keʼíi̱ ña̱ chiñu yóʼo. Ta xa̱ʼa̱ ña̱kán ni̱xa̱i̱ nda̱kanixi̱níi̱: “¿Á ndixaví íyo na̱ kútóo keʼé chiñu yóʼo ndiʼi semana xíʼin ndiʼi yo̱o̱?”.

Tá ni̱xi̱nui̱ 17 ku̱i̱ya̱, xi̱kuni̱níi̱ koo iinlá miíi̱ ta va̱ása kookai̱ xíʼin na̱ yivái̱, ña̱kán ku̱a̱ʼi̱n koi̱ chí Australia. Na̱ yivái̱ ni̱ndi̱ʼi̱ní-inina, soo xi̱ndakanixi̱nína  ña̱ ndakundeévai̱ kachíñui̱ nu̱ú Jehová tá ná xa̱i̱ ñuu kán.

Tá ni̱xa̱i̱ Australia, ki̱xáʼa íxayo̱ʼvi̱níkaña xíʼi̱n ña̱ ndasakáʼnui̱ Ndióxi̱. Va̱ása níxi̱xa̱ʼa̱n ni̱ʼii̱ reunión ta xi̱kitáʼi̱n xíʼin na̱ va̱lí na̱ xi̱keʼé táʼan ña̱ xi̱keʼé miíi̱, iin ki̱vi̱ xi̱xa̱ʼa̱nndi̱ reunión ta inka ki̱vi̱ xi̱xa̱ʼa̱nndi̱ vikó ta kán xi̱xiʼindi̱ ta xi̱tixáʼandi̱. Vitin kíʼii̱n kuenta ña̱ xi̱keʼíi̱ ña̱ káʼa̱n Ndióxi̱ soo saátu xi̱keʼíi̱ táʼan ña̱ kéʼé na̱ ñuyǐví yóʼo, soo va̱ása níxi̱kusi̱í-inii̱ tá xi̱keʼíi̱ ña̱yóʼo.

Tá ni̱ya̱ʼa u̱vi̱ ku̱i̱ya̱ xi̱nitáʼi̱n xíʼin iin ñá hermana, ñá chi̱ndeétáʼan xíʼi̱n ña̱ kixáʼa tukui̱ vií ndakanixi̱níi̱ xa̱ʼa̱ ña̱ kéʼíi̱, ta ñáyóʼo va̱ása níkiʼinvíñá kuenta ña̱ chi̱ndeétáʼanñá xíʼi̱n. Iin veʼe ni̱xi̱yoi̱ xíʼin inka u̱ʼu̱n ná hermana, ta nda̱kiʼinndi̱ iin ta̱ superintendente ña̱ circuito xíʼin ñá síʼira ñá naní Tamara ña̱ koona veʼendi̱ iin semana. Ta̱ hermano kán xi̱keʼéra sava chiñu ña̱ congregación, soo ñá Tamara xi̱xiyóñá xíʼinndi̱ ta xi̱sakúsi̱íníñá-inindi̱. Ta ku̱tóoníi̱ ña̱ ke̱ʼéñá, ta va̱ása níndakanixi̱níi̱ ña̱ si̱íní-iniñá ni xi̱ndi̱ʼi̱ní-iniñá xa̱ʼa̱ chiñu Ndióxi̱.

Ñá Tamara xi̱kuʼvi̱ní-iniñá xi̱xiniñá tu̱ʼun Ndióxi̱, ta xi̱kusi̱íní-iniñá xi̱keʼéñá chiñu nu̱úra ta nda̱a̱ miíi̱ xi̱kuni̱ keʼé táʼan ña̱yóʼo. Ñáyóʼo xi̱kusi̱íní-iniñá saáchi ku̱a̱ʼání ña̱ xi̱taxiñá ndaʼa̱ Jehová, soo yi̱ʼi̱ va̱ása níxi̱kusi̱í-inii̱ saáchi loʼoní xi̱kachíñui̱ nu̱úra. Xa̱ʼa̱ ña̱ xi̱kusi̱íní-iniñá xi̱kachíñuñá nu̱ú Jehová, chi̱ka̱a̱ní ña̱yóʼo ndee̱ xíʼi̱n. Ta ña̱ xi̱keʼéñá sa̱ndákaʼánña yi̱ʼi̱ xa̱ʼa̱ ña̱ kúni̱ Jehová ná kusi̱í-iniyó kachíñuyó nu̱úra (Sal. 100:2).

Xi̱kunii̱ kusi̱í-inii̱ nda̱a̱ táki̱ʼva xi̱kusi̱í-ini ñá Tamara, soo xi̱niñúʼu nasamai̱ sava ña̱ xi̱keʼíi̱. Ta ku̱a̱ʼá tiempo ni̱ya̱ʼa tasaá ki̱xáʼi̱ loʼo tá loʼo na̱samai̱ ña̱ xi̱keʼíi̱. Ya̱chi̱ka xi̱kaʼvii̱ ña̱ va̱ʼa ku̱ʼi̱n natúʼi̱n xíʼin na̱ yiví xa̱ʼa̱ Ndióxi̱, ta xi̱kui̱ precursora auxiliar sava yo̱o̱. Ña̱yóʼo chi̱ndeétáʼanña xíʼi̱n ña̱ va̱ása yi̱ʼvíkai̱ natúʼi̱n xa̱ʼa̱ Ndióxi̱, ta xa̱ʼa̱ ña̱ xi̱xiniñúʼukai̱ Biblia xi̱kusi̱íka-inii̱ tá xi̱natúʼi̱n xíʼin na̱ yiví. Tasaá ki̱xáʼíi̱ kúi̱ precursora auxiliar ndiʼi yo̱o̱.

 Ki̱xáʼíi̱ kitáʼi̱n xíʼin na̱ hermano na̱ xa̱a̱ síín síín ku̱i̱ya̱, na̱ ndixa xi̱ndi̱ʼi̱-ini xa̱ʼa̱ chiñu Jehová ta xi̱kusi̱í-inina xi̱kachíñuna nu̱úra. Ña̱ xi̱keʼéna chi̱ndeétáʼanña xíʼi̱n ña̱ ndakanixi̱níi̱ ndáaña kúú ña̱ ndáyáʼvi va̱ʼaka nu̱úi̱, ta saátu ña̱ kaʼvi ni̱ʼikai̱ tu̱ʼun Ndióxi̱. Loʼo tá loʼo ki̱xáʼa kútóokai̱ natúʼi̱n xíʼin na̱ yiví xa̱ʼa̱ Ndióxi̱ ta ni̱xa̱i̱ ku̱ui̱ precursora regular. Ta ni ku̱a̱ʼání ku̱i̱ya̱ ni̱ya̱ʼa kixáʼa tukui̱ kúsi̱í-inii̱ ndíka̱i̱ ti̱xin congregación.

Tá ni̱ya̱ʼa u̱ʼu̱n ku̱i̱ya̱ saá xi̱nitáʼi̱n xíʼin ta̱ Alex, ta̱yóʼo va̱ʼaní ta̱a kúúra, ta kúʼvi̱ní-inira xínira Jehová ta saátu ndíʼi̱ní-inira ña̱ natúʼunra xíʼin na̱ yiví xa̱ʼa̱ Ndióxi̱. Tá xi̱nitáʼíi̱n xíʼinra kúúra siervo ministerial, ta xa̱a̱ i̱ñu̱ ku̱i̱ya̱ kúúra precursor. Ta saátu ni̱xi̱yora loʼo tiempo chí Malaui, ña̱ va̱ʼa natúʼunra xíʼin na̱ yiví xa̱ʼa̱ Ndióxi̱. Ta kán ni̱xi̱yora xíʼin sava na̱ misionero, ta na̱yóʼo chi̱núuna iin yichi̱ va̱ʼaní nu̱úra ta chi̱ka̱a̱na ndee̱ xíʼinra ña̱ kundi̱ʼi̱ka-inira xa̱ʼa̱ chiñu Ndióxi̱.

Tá ku̱i̱ya̱ 2003, ti̱ndaʼíi̱ xíʼin ta̱ Alex ta inkáchi káchíñundi̱ nu̱ú Jehová tiempo vitin. Xa̱a̱ ku̱a̱ʼání ña̱ ndáyáʼvi sákuaʼandi̱, ta ku̱a̱ʼání bendición táxi Jehová ndaʼa̱ndi̱.

Tá ku̱i̱ya̱ 2009 ni̱ka̱ʼa̱nna xíʼinndi̱ ña̱ koondi̱ misionero ta ku̱ʼu̱nndi̱ chí Timor Oriental, iin país loʼo ña̱ ndíka̱a̱ yatin chí Indonesia. Tá ni̱ka̱ʼa̱nna ña̱yóʼo xíʼinndi̱ nda̱kanda̱ní-inindi̱ ta ni̱kusi̱íní-inindi̱, soo saátu ni̱yi̱ʼvíndi̱. Tá ni̱ya̱ʼa u̱ʼu̱n yo̱o̱, saá ni̱xa̱a̱ndi̱ Dili ña̱ kúú capital ña̱ país kán.

Xi̱niñúʼu ka̱anndi̱ ki̱ʼva ña̱ íyo na̱ yiví kán, tu̱ʼun ña̱ káʼa̱nna, ña̱ xíxina ta saátu ki̱ʼva ña̱ tákuna. Tá xi̱xa̱ʼa̱nndi̱ xi̱natúʼunndi̱ xíʼin na̱ yiví xa̱ʼa̱ Ndióxi̱, xi̱ndani̱ʼíndi̱ na̱ nda̱ʼví, na̱ va̱ása níxa̱ʼa̱n escuela, ta saátu xi̱ndani̱ʼínndi̱  ku̱a̱ʼání na̱ ni̱xo̱ʼvi̱ní xa̱ʼa̱ ña̱ ni̱xi̱yo ku̱a̱chi país kán. *

Xi̱kusi̱íní-inii̱ ña̱ xi̱natúʼi̱n xíʼin na̱ yiví ñuu kán saáchi va̱ʼaní xi̱xiniso̱ʼona. Tá kúú, iin ki̱vi̱ nda̱niʼíi̱ iin ñá loʼo ñá kúúmií 13 ku̱i̱ya̱ ñá naní María * ta xi̱kusuchíkaví-iniñá saáchi sa̱kán íyo loʼo ku̱i̱ya̱ ni̱xi̱ʼi̱ siʼíñá ta saátu va̱ása níxi̱xininíñá yiváñá. Ta ñá María va̱ása níxi̱kunda̱a̱-iniñá ndáaña keʼéñá tá xa̱a̱ ná kuchéeñá, nda̱a̱ táki̱ʼva ndóʼo ku̱a̱ʼání na̱ va̱lí. Ndákaʼíi̱n ña̱ iin yichi̱ xákuñá na̱túʼunñá xíʼi̱n xa̱ʼa̱ ña̱ ndóʼoñá, soo va̱ása níkunda̱a̱ káxi inii̱ xíʼin ña̱ ni̱ka̱ʼa̱nñá, saáchi ta̱ʼán sakuaʼa va̱ʼi̱ ka̱ʼi̱n tu̱ʼun ña̱ káʼa̱nñá. Ña̱kán ni̱ka̱ʼi̱n xíʼin Jehová ña̱ ná chindeétáʼanra xíʼi̱n ña̱ va̱ʼa chika̱i̱ ndee̱ xíʼinñá. Tasaá ki̱xáʼíi̱ káʼvii̱ sava texto nu̱úñá ña̱ va̱ʼa sandíkoi̱-iniñá. Tá ni̱ya̱ʼa ku̱i̱ya̱ ki̱ʼii̱n kuenta ndáa ki̱ʼva na̱samañá ki̱ʼva ña̱ tákuñá, ki̱ʼva ña̱ náʼa̱ñá ta saátu ña̱ xi̱keʼéñá. Tasaá tá ni̱ya̱ʼa loʼo tiempo ni̱xa̱a̱ñá nda̱kuchiñá, ta vitin sánáʼa̱ñá na̱ yiví xa̱ʼa̱ Ndióxi̱. Vitin na̱ congregación kúú na̱ veʼeñá ta kúʼvi̱ní-inina xíninañá.

Jehová kúú ta̱ chíndeétáʼan xíʼin na̱ hermano ña̱ va̱ʼa natúʼunna xíʼin na̱ yiví xa̱ʼa̱ra chí Timor Oriental. Ni xa̱a̱ íyo u̱xu̱ ku̱i̱ya̱ nda̱kuchi ku̱a̱ʼání na̱ publicador, soo ku̱a̱ʼání na̱yóʼo xa̱a̱ kúúna precursor, siervo ministerial á anciano. Inkana káchíñuna ti̱xin Oficina ña̱ Traducción, ta kán sándaya̱ʼana tutu ña̱ tává na̱ ñuu Ndióxi̱ inka nu̱ú tu̱ʼun ña̱ káʼa̱nna país kán. Kúsi̱íní-inii̱ tá xíniso̱ʼi̱ xítana ti̱xin reunión, ta saátu tá xítoi̱ ña̱ kúsi̱íní-inina ta ndákundeéna sákuaʼana xa̱ʼa̱ Jehová.

Síínníva íyo ki̱ʼva ña̱ tákuna chí Timor Oriental nu̱ú ki̱ʼva ña̱ tákuna chí Australia. Soo xi̱kusi̱íníva-inii̱ tá ni̱xi̱yoi̱ chí Timor Oriental. Sava yichi̱, tá xi̱xa̱ʼa̱nndi̱ xíʼin tú autobús, iin chútu na̱ yiví ininú na̱ ni̱xa̱ʼa̱n sa̱tá ti̱a̱ká yi̱chí ta saátu verdura. Ta tá xi̱xa̱ʼa̱nndi̱ xi̱sanáʼa̱ndi̱ na̱ yiví xa̱ʼa̱ Ndióxi̱, xi̱kiʼvindi̱ ini veʼe válína ta ndeékaví niʼní-iniña, ta ña̱ ñuʼú kúú iniña ta iin táxí táʼan nduxú xíkarí. Ni ni̱xi̱yo ña̱ i̱xayo̱ʼvi̱ xíʼindi̱ soo xi̱kusi̱íva-inindi̱.

Tá ndákanixi̱níi̱ xa̱ʼa̱ ña̱ ndo̱ʼi̱ tá ya̱chi̱, táxiníi̱ tíxa̱ʼvi ndaʼa̱ na̱ yivái̱ saáchi chi̱ka̱a̱nína ndee̱ ña̱ sa̱náʼa̱na yi̱ʼi̱ xa̱ʼa̱ Jehová, ta chi̱ndeétáʼanna xíʼi̱n tá ni̱xi̱yo loʼi̱. Ndixaní kúú ña̱ káʼa̱n Proverbios 22:6 chi saá íyo ña̱ ke̱ʼé na̱ yivái̱. Siʼíi̱ xíʼin yivái̱ kúsi̱íní-inina xa̱ʼa̱ chiñu ña̱ kéʼé ta̱ Alex xíʼin yi̱ʼi̱, ta saátu kúsi̱íní-inina tá xítona ndáa ki̱ʼva xíniñúʼu Jehová ndi̱ʼi̱ ña̱ va̱ʼa kachíñundi̱ nu̱úra. Ta nda̱a̱ tá ku̱i̱ya̱ 2016, ki̱xáʼa ta̱ Alex kúúra superintendente ña̱ circuito chí ñuu ña̱ kíʼin na̱ Betel ña̱ Australasia kuenta xíʼin.

Ndákanda̱ní-inii̱ xa̱ʼa̱ ña̱ va̱ása níxi̱kutóoi̱ natúʼi̱n xíʼin na̱ yiví xa̱ʼa̱ Ndióxi̱ tá ya̱chi̱, saáchi vitin kútóonívai̱ natúʼi̱n xíʼin na̱ yiví. Vitin kíʼi̱n kuenta ña̱ ndixa sákúsi̱í-iniyó kúú ña̱ kachíñuyó nu̱ú Jehová xíʼin ndiʼi níma̱yó, ni nda̱a̱ ndáaka tu̱ndóʼo ná ya̱ʼayó nu̱ú. Xa̱a̱ 18 ku̱i̱ya̱ inkáchi káchíñui̱ nu̱ú Jehová xíʼin ta̱ Alex, ta kúsi̱íní-inindi̱. Vitin kúnda̱a̱-inii̱ ña̱ ndixaní kúú tu̱ʼun ña̱ ni̱ka̱ʼa̱n ta̱ David xíʼin Jehová tá ka̱chira: “Ndiʼi na̱ ndáa-ini yóʼó kusi̱í-inina; ndiʼi tiempo ka̱ʼa̱nna ña̱ kúsi̱íní-inina [...], ta na̱ kúʼvi̱-ini xíni ki̱vi̱ún chindeétáʼún xíʼinna ña̱ kusi̱í-inina” (Sal. 5:11).