1, 2. ¿Ndáaña kúni̱ kachi ña̱ ndacháʼvina xa̱ʼa̱yó, ta nda̱chun xi̱niñúʼu keʼéna ña̱yóʼo?

SU̱VÍ ta̱ yiví ku̱a̱chi níxi̱yo ta̱ Adán tá i̱xaso̱ʼora ña̱ ni̱ka̱ʼa̱n Ndióxi̱, ta xa̱ʼa̱ ña̱yóʼo va̱ása níkivika kutakura ndiʼi tiempo ta saátu na̱ se̱ʼera. Ni xi̱kunda̱a̱va-ini ta̱ Adán ndáaña xíniñúʼu keʼéra soo nda̱kaxinra ña̱ ixaso̱ʼora ña̱ káʼa̱n Ndióxi̱. Ta xa̱ʼa̱ ña̱yóʼo xi̱niñúʼu kuvira. Soo, ¿ndáaña kundoʼo na̱ se̱ʼera chi na̱yóʼo kǒoví ña̱ va̱ása va̱ʼa níkeʼéna? (Rom. 5:12, 14). ¿Á ni̱xi̱yo iin ña̱ kivi keʼé Jehová ña̱ va̱ʼa ndachaʼvira xa̱ʼa̱na tasaá va̱ása kuvina? Tá ni̱ya̱ʼa loʼo tiempo ña̱ ni̱ki̱ʼvi ta̱ Adán ku̱a̱chi, Jehová ni̱ka̱ʼa̱nra ndáa ki̱ʼva sakǎkura ndiʼi na̱ se̱ʼe ta̱ Adán, tasaá va̱ása kuumiíkana ku̱a̱chi ta ni va̱ása kuvikana (Gén. 3:15). Tá ni̱ya̱ʼa tiempo, Jehová chi̱ndaʼára se̱ʼera ña̱ ki̱xira ni̱xi̱ʼi̱ra xa̱ʼa̱ na̱ yiví ña̱ va̱ʼa ndacháʼvira xa̱ʼa̱na (Mar. 10:45; Juan 6:51).

² ¿Ndáaña kúni̱ kachi ña̱ ndacháʼvina xa̱ʼa̱yó? Nu̱ú ña̱ Escrituras Griegas, káʼa̱nña ña̱ ni̱xi̱ʼi̱ ta̱ Jesús ña̱ va̱ʼa chaʼvira xa̱ʼa̱ ña̱ sa̱ndíʼi-xa̱ʼa̱ ta̱ Adán (1 Cor. 15:22). ¿Nda̱chun xi̱niñúʼu ndacháʼvira xa̱ʼa̱ ña̱yóʼo? Saáchi ley Jehová xi̱ka̱ʼa̱nña ña̱ táki̱ʼva íyo mií ña̱ ndi̱ʼi̱-xa̱ʼa̱ saá koo ña̱ chaʼvina (Éx. 21:23, 24). Ta̱ Adán su̱ví na̱ yiví ku̱a̱chi níxi̱kuura, soo sa̱ndíʼi-xa̱ʼa̱ra ña̱yóʼo tá i̱xaso̱ʼora. Ña̱kán ña̱ va̱ʼa xi̱nu ña̱ xi̱ka̱ʼa̱n ley, ta̱ Jesús xi̱niñúʼu chaʼvira xa̱ʼa̱ ña̱ sa̱ndíʼi-xa̱ʼa̱ ta̱ Adán (Rom. 5:17). Tasaá ni̱xa̱a̱ra ndu̱ura iin “yivá ta̱ íyo ndiʼi tiempo” nu̱ú ndiʼi na̱ kándíxa ña̱ ni̱xi̱ʼi̱ra (Is. 9:6; Rom. 3:23, 24).

3. Nda̱a̱ táki̱ʼva káchi Juan 14:31 xíʼin 15:13, ¿nda̱chun ka̱ndíxa ta̱ Jesús kuvira xa̱ʼa̱yó?

³ Ta̱ Jesús ka̱ndíxara kuvira xa̱ʼa̱yó, saáchi kúʼvi̱ní-inira xínira yivára ta saátu kúʼvi̱ní-inira xínira miíyó (kaʼvi Juan 14:31; *  15:13). * Ta ña̱yóʼo chi̱ndeétáʼan xíʼinra ña̱ ke̱ʼéra ña̱ kúni̱ yivára ta nda̱kú ni̱xi̱yo inira xíʼinra nda̱a̱ tá ni̱xi̱ʼi̱ra. Ta tíxa̱ʼvi ña̱ ke̱ʼéra kivi xi̱nu ña̱ xi̱kuni̱ Jehová koo nu̱ú ñuʼú yóʼo tá xa̱ʼa̱. Nu̱ú artículo yóʼo sákuaʼayó nda̱chun ta̱xi Ndióxi̱ ña̱ ni̱xo̱ʼvi̱ní ta̱ Jesús tá kúma̱ní kuvira. Ta saátu ka̱ʼa̱nyó xa̱ʼa̱ ta̱ apóstol Juan, chi ta̱yóʼo ta̱xiníra tíxa̱ʼvi xa̱ʼa̱ ña̱ nda̱chaʼvi ta̱ Jesús xa̱ʼa̱yó. Tándi̱ʼi, sákuaʼayó ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱yóʼo, ta ndáa ki̱ʼva chindayáʼviyó ña̱ ke̱ʼé Jehová xíʼin ta̱ Jesús xa̱ʼa̱yó.

4. Ka̱ʼa̱n ndáa ki̱ʼva ni̱xi̱ʼi̱ ta̱ Jesús.

⁴ Ná ndakanixi̱níyó xa̱ʼa̱ ña̱ ndo̱ʼo ta̱ Jesús tá kúma̱níka kuvira. Ta̱xira ña̱ ná tiin na̱ soldado ñuu Roma miíra, ta saátu ta̱xira ña̱ ka̱ninara ni kivi ka̱ʼa̱nra xíʼin ku̱a̱ʼání na̱ ángel ña̱ chindeétáʼanna xíʼinra (Mat. 26:52-54; Juan 18:3; 19:1). Ta nda̱a̱ ni̱nda̱tá sa̱tára xa̱ʼa̱ ña̱ ndeéní ka̱ninara xíʼin yoʼo̱, tasaá káa sa̱tára ta i̱xandúxana xíʼinra ña̱ kuisora iin yitu̱n. Ta̱ Jesús ki̱xáʼara ndísora túyóʼo ku̱a̱ʼa̱nra. Soo na̱ soldado ñuu Roma i̱xandúxana xíʼin iin ta̱ ta̱a ña̱ kuisora túyóʼo xíʼin ta̱ Jesús (Mat. 27:32). Tá xa̱a̱ ni̱xa̱a̱ ta̱ Jesús lugar nu̱ú kuvira, na̱ soldado ka̱anna ndaʼa̱ra xíʼin xa̱ʼa̱ra ta ka̱tikaanara ndaʼa̱ tú yitu̱n kán. Xa̱ʼa̱ ña̱ ve̱era, ndeéka nda̱ndika̱ nu̱ú ka̱anna ndaʼa̱ra xíʼin xa̱ʼa̱ra. Ta na̱ migora xíʼin siʼíra ku̱suchíkaví-inina ta xa̱kuna, soo na̱ xi̱niʼi yichi̱ nu̱ú na̱ judío ku̱sikindaanara (Luc. 23:32-38; Juan 19:25). Ku̱a̱ʼání hora ni̱xo̱ʼvi̱ ta̱ Jesús, ta xa̱ʼa̱ ña̱ ku̱naáníra i̱xayo̱ʼviníña xíʼinra ndakiʼinra ta̱chíra. Ta̱yóʼo xi̱kunda̱a̱va-inira ña̱ nda̱kú ni̱xi̱yó inira xíʼin Jehová, ña̱kán ndáa si̱ín yichi̱ ni̱ka̱ʼa̱nra xíʼinra. Tándi̱ʼi, nda̱kundee xi̱níra á na̱kundayi xi̱níra tasaá ni̱xi̱ʼi̱ra, ta̱yóʼo ni̱xo̱ʼvi̱níra (Mar. 15:37; Luc. 23:46; Juan 10:17, 18; 19:30).

5. ¿Ndáaña sa̱kúsuchíka-ini ta̱ Jesús?

⁵ Ta̱ Jesús va̱ása ní kusuchí-inira xa̱ʼa̱ ki̱ʼva ña̱ xa̱ʼnínara, chi ña̱ ku̱suchíka-inira xa̱ʼa̱ kúú ña̱ vatá ña̱ ni̱ka̱ʼa̱nna xa̱ʼa̱ra. Chi chi̱ka̱a̱na ku̱a̱chira ña̱ va̱ása ní ixato̱ʼóra ki̱vi̱ Ndióxi̱ (Mat. 26:64-66). Ta̱ Jesús ni̱ndi̱ʼi̱ní-inira xa̱ʼa̱ ña̱ chi̱ka̱a̱na ku̱a̱chira ña̱ va̱ása ní ixato̱ʼóra ki̱vi̱ Ndióxi̱, ña̱kán xi̱kuni̱ra ña̱ ná ndatavá yivárara nu̱ú ña̱ tu̱ndóʼo yóʼo (Mat. 26:38, 39, 42). ¿Nda̱chun ta̱xi Jehová ni̱xo̱ʼvi̱ní se̱ʼera ta ni̱xi̱ʼi̱ra? Ná kotoyó ndáa xa̱ʼa̱ kúúña.

6. ¿Nda̱chun xi̱niñúʼu katikaana ta̱ Jesús ndaʼa̱ iin yitu̱n?

⁶ Ña̱ nu̱ú, ta̱ Jesús xi̱niñúʼu kuvira ndaʼa̱ iin yitu̱n ña̱ va̱ʼa ndatavára na̱ judío ndaʼa̱ iin chiʼña ña̱ nda̱kiʼinna (Gál. 3:10, 13). Nda̱kiʼinna chiʼña yóʼo saáchi ki̱ndoona ña̱ kuniso̱ʼona ley Ndióxi̱, soo va̱ása níxindiku̱nna ña̱yóʼo. Ta xi̱kuuna na̱ yiví ku̱a̱chi xa̱ʼa̱ ña̱ ke̱ʼé ta̱ Adán (Rom. 5:12). Ley ña̱ ta̱xi Ndióxi̱ ndaʼa̱ na̱ ñuu Israel xi̱ka̱ʼa̱nña, ña̱ tá iin na̱ yiví ni̱ki̱ʼvina iin ku̱a̱chi ndeé xi̱niñúʼu kuvina xa̱ʼa̱ ña̱yóʼo, ta savana xi̱katikaanana ndaʼa̱ iin yitu̱n (Deut. 21:22, 23; 27:26). * Ña̱kán tá ka̱tikaana ta̱ Jesús ndaʼa̱ yitu̱n ta ni̱xi̱ʼi̱ra, ta̱yóʼo nda̱tavára na̱ judío ndaʼa̱ chiʼña ña̱ nda̱kiʼinna, tasaá ndakiʼinna ku̱a̱ʼá ña̱ va̱ʼa.

7. ¿Ndáa inka xa̱ʼa̱ kúú ña̱ ta̱xi Ndióxi̱ ña̱ ná xo̱ʼvi̱ se̱ʼera?

⁷ Ña̱ u̱vi̱, Ndióxi̱ ta̱xira ná xo̱ʼvi̱ se̱ʼera ña̱ va̱ʼa xa̱a̱ra koora su̱tu̱ káʼnu. Ta̱ Jesús na̱kunda̱a̱-inira ña̱ yo̱ʼvi̱ní kundiku̱nyó ña̱ káʼa̱n Ndióxi̱ tá yáʼayó nu̱ú iin tu̱ndóʼo. Ta xa̱ʼa̱ ña̱ ndeéní ni̱xo̱ʼvi̱ ta̱ Jesús xa̱kundáʼvira nu̱ú Ndióxi̱ ña̱ ná chindeétáʼanra xíʼinra. Xa̱ʼa̱ ña̱ ni̱xo̱ʼvi̱ní ta̱ Jesús tá ni̱ya̱ʼara nu̱ú tu̱ndóʼo, “kúnda̱a̱va-inira ndáa ki̱ʼva chindeétáʼanra xíʼin na̱ yáʼa nu̱ú tu̱ndóʼo”. Táxiníyó tíxa̱ʼvi ndaʼa̱ Jehová xa̱ʼa̱ ña̱ nda̱kaxinra ta̱ Jesús ña̱ koora su̱tu̱ káʼnu, chi va̱ʼaní  kúnda̱a̱-inira xíʼin ña̱ ndóʼoyó (Heb. 2:17, 18; 4:14-16; 5:7-10).

8. ¿Ndáa inka xa̱ʼa̱ kúú ña̱ ta̱xi Ndióxi̱ ña̱ ná xo̱ʼvi̱ní ta̱ Jesús?

⁸ Ña̱ u̱ni̱, Jehová ta̱xira ni̱xo̱ʼvi̱ se̱ʼera ña̱ va̱ʼa na̱ʼa̱ra ña̱ kuchiñuva na̱ yiví nda̱kú koo inina xíʼinra ni ná ya̱ʼana nu̱ú tu̱ndóʼo ña̱ ndeéní. Saáchi ta̱ Ndi̱va̱ʼa káʼa̱nra ña̱ ndásakáʼnuyó Ndióxi̱ xa̱ʼa̱ ña̱ʼa ña̱ táxira ndaʼa̱yó, ta va̱ása kuchiñuyó nda̱kú koo iniyó xíʼin Ndióxi̱. Ta ndákanixi̱níra ña̱ va̱ása kúʼvi̱-iniyó xíniyó Jehová nda̱a̱ táki̱ʼva ke̱ʼé ta̱ Adán (Job 1:9-11; 2:4, 5). Ta xa̱ʼa̱ ña̱ xi̱kandíxaní Jehová ña̱ nda̱kú koo ini se̱ʼera xíʼinra, ta̱xira ña̱ ná kotondosó ta̱ Ndi̱va̱ʼa ta̱yóʼo. Ta̱ xa̱ʼa̱ ña̱ nda̱kú ni̱xi̱yo ini ta̱ Jesús ni̱na̱ʼa̱ra ña̱ ta̱ vatá kúú ta̱ Ndi̱va̱ʼa.

9. ¿Ndáa yichi̱ sa̱ndákoo ta̱ apóstol Juan nu̱úyó?

⁹ Ku̱a̱ʼání na̱ ndásakáʼnu Ndióxi̱ íxandi̱va̱ʼana xíʼinna á yáʼana nu̱ú inkaka tu̱ndóʼo. Soo ndákundeéna nátúʼunna xíʼin na̱ yiví xa̱ʼa̱ra ta kúndeé-inina nu̱ú ña̱yóʼo, saáchi kándíxana ña̱ ni̱xi̱ʼi̱ ta̱ Jesús. Ná ka̱ʼa̱nyó xa̱ʼa̱ ña̱ ndo̱ʼo ta̱ apóstol Juan, yáʼaka 60 ku̱i̱ya̱ ni̱xi̱kara na̱túʼunra xa̱ʼa̱ ta̱ Cristo xíʼin xa̱ʼa̱ ña̱ nda̱chaʼvira xa̱ʼa̱yó. Tá xa̱a̱ kúyatin ndakiʼinra 100 ku̱i̱ya̱, na̱ chíñu ña̱ ñuu Roma nda̱kanixi̱nína ña̱ kúúra iin ta̱a ta̱ kéʼé ña̱ va̱ása va̱ʼa, ta xa̱ʼa̱ ña̱yóʼo chi̱ndaʼánara ku̱a̱ʼa̱nra chí isla ña̱ Patmos. Soo ta̱yóʼo su̱ví ña̱ va̱ása va̱ʼa níkeʼéra saáchi xa̱ʼa̱ Ndióxi̱ na̱túʼunra xíʼin xa̱ʼa̱ ta̱ Jesús (Apoc. 1:9). Va̱ʼaní yichi̱ sa̱ndákoora nu̱úyó saáchi xi̱kandíxaníra Ndióxi̱ ta ndakúní ni̱xi̱yo inira.

10. ¿Ndáa ki̱ʼva ni̱na̱ʼa̱ ta̱ Juan nu̱ú libro ña̱ ka̱ʼyíra ña̱ táxiníra tíxa̱ʼvi xa̱ʼa̱ ña̱ nda̱chaʼvi ta̱ Jesús xa̱ʼa̱yó?

¹⁰ Nu̱ú libro ña̱ ka̱ʼyí ta̱ Juan ni̱ka̱ʼa̱nra ña̱ kúʼvi̱ní-inira xínira ta̱ Jesús ta saátu táxiníra tíxa̱ʼvi xa̱ʼa̱ nda̱chaʼvira xa̱ʼa̱yó. Ta nu̱ú libro ña̱ ka̱ʼyíra yáʼaka 100 yichi̱ káʼa̱nra xa̱ʼa̱ ña̱ va̱ʼa ña̱ ndákiʼinyó xa̱ʼa̱ ña̱ nda̱chaʼvi ta̱ Jesús xa̱ʼa̱yó. Tá kúú, ka̱ʼyíra ña̱yóʼo: “Tá íyo iin ndóʼó ni̱ki̱ʼvi ku̱a̱chi íyo iin ta̱ chíndeétáʼan xíʼinyó ta íyora xíʼin yiváyó: ta̱yóʼo kúú ta̱ Jesucristo iin ta̱ nda̱kúní-ini” (1 Juan 2:1, 2). Ta saátu ni̱ka̱ʼa̱nra ña̱ ndáyáʼviní natúʼunyó xíʼin inkana xa̱ʼa̱ ta̱ Jesús (Apoc. 19:10). Ña̱yóʼo náʼa̱ña nu̱úyó ña̱ xi̱taxiní ta̱ Juan tíxa̱ʼvi xa̱ʼa̱ ña̱ nda̱chaʼvi ta̱ Jesús xa̱ʼa̱yó. ¿Ndáa ki̱ʼva na̱ʼa̱tu miíyó ña̱yóʼo?

11. ¿Ndáaña chindeétáʼan xíʼinyó ña̱ va̱ása ki̱ʼviyó ku̱a̱chi nu̱ú Ndióxi̱?

¹¹ Ná chika̱a̱yó ndee̱ ña̱ va̱ása ki̱ʼviyó ku̱a̱chi nu̱ú Ndióxi̱. Tá ndixa táxiyó tíxa̱ʼvi xa̱ʼa̱ ña̱ nda̱chaʼvi ta̱ Jesús xa̱ʼa̱yó va̱ása ndakanixi̱níyó siaʼa: “Va̱ása xíniñúʼu kundeéví-inii̱ tá xítondosó ta̱ Ndi̱va̱ʼa yi̱ʼi̱. Kiviva ki̱ʼvi̱i̱ ku̱a̱chi, ta tándi̱ʼi ka̱ʼi̱n xíʼin Ndióxi̱ ña̱ ná ixakáʼnu-inira xa̱ʼíi̱”. Nu̱úka ña̱ ndakanixi̱níyó ña̱ keʼéyó iin ña̱ kini, va̱ʼaka ná ka̱ʼa̱nyó ña̱yóʼo: “¿Nda̱chun xa̱i̱ keʼíi̱ ña̱ kini ta xa̱a̱ ku̱a̱ʼání ña̱ va̱ʼa kéʼé Jehová xíʼin ta̱ Jesús xa̱ʼíi̱?”. Kivi ndukúyó ndee̱ nu̱ú Jehová ta ka̱ʼa̱nyó xíʼinra: “Kǒo taxiún ndakavandi̱ ndaʼa̱ ku̱a̱chi” (Mat. 6:13).

12. ¿Ndáa ki̱ʼva kivi kundiku̱nyó consejo ña̱ va̱xi nu̱ú 1 Juan 3:16-18?

¹² Ná kuʼvi̱-iniyó kuniyó na̱ hermanoyó. Tá kéʼéyó ña̱yóʼo náʼa̱tuyó ña̱ táxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, chi su̱ví xa̱ʼa̱ mií kuitíyó níxi̱ʼi̱ra chi saátu ni̱xi̱ʼi̱ra xa̱ʼa̱ na̱ hermanoyó. Ta̱ Jesús ka̱ndíxara kuvira xa̱ʼa̱na saáchi kúʼvi̱ní-inira xínirana (kaʼvi 1 Juan 3:16-18). * Ki̱ʼva ña̱ kéʼéyó xíʼin na̱ hermanoyó náʼa̱ña á kúʼvi̱-iniyó xíniyóna (Efes. 4:29, 31–5:2).  Tá kúú, chíndeétáʼanyó xíʼinna tá ndeé ndóʼona á tá yáʼana nu̱ú inkaka tu̱ndóʼo xa̱ʼa̱ ña̱ kúun sa̱vi̱ kini, xa̱ʼa̱ ña̱ táan á inkaka ña̱ʼa. Soo, ¿ndáaña xíniñúʼu keʼéyó tá iin na̱ hermano ni̱ka̱ʼa̱nna á ke̱ʼéna iin ña̱ va̱ása va̱ʼa xíʼinyó?

13. ¿Nda̱chun xíniñúʼu ixakáʼnu-iniyó xa̱ʼa̱ inkana?

¹³ Tá kéʼéna ña̱ va̱ása va̱ʼa xíʼinyó, ¿á sáa̱yó xíʼinna ta va̱ása nándósó-iniyó xa̱ʼa̱ ña̱ ke̱ʼéna? (Lev. 19:18). Tá saá íyo ña̱ kéʼéyó, ná kundiku̱nyó consejo yóʼo: “Kǒo sandákoondó kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na, ni íyo iin ña̱ va̱ása va̱ʼa ke̱ʼéna xíʼinndó. Jehová xíʼin ndiʼi níma̱ra i̱xakáʼnu-inira xa̱ʼa̱ndó, xa̱ʼa̱ ña̱kán saátu xíniñúʼu keʼé miíndó” (Col. 3:13). Tá íxakáʼnu-iniyó xa̱ʼa̱ na̱ hermanoyó saá náʼa̱yó ña̱ táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ xa̱ʼa̱yó. ¿Ndáa ki̱ʼva kundayáʼvika ña̱yóʼo nu̱úyó?

14. ¿Ndáaña chindeétáʼan xíʼinyó ña̱ chindayáʼviyó ña̱ nda̱chaʼvi ta̱ Jesús xa̱ʼa̱yó?

¹⁴ Ná taxiyó tíxa̱ʼvi ndaʼa̱ Jehová xa̱ʼa̱ ña̱ nda̱chaʼvira xa̱ʼa̱yó. Iin ñá hermana ñá kúúmií 83 ku̱i̱ya̱ ñá naní Joanna, ñá íyo chí India káchiñá: “Nu̱ú yi̱ʼi̱ ndáyáʼviní taxii̱ tíxa̱ʼvi ndaʼa̱ Jehová ndiʼi kivi xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó”. Tá kúma̱ní keʼéyó oración nu̱ú Jehová ná ndakanixi̱níyó xa̱ʼa̱ ña̱ va̱ása va̱ʼa ke̱ʼéyó ki̱vi̱ saá, ta ná ka̱ʼa̱nyó xíʼinra ña̱ ixakáʼnu-inira xa̱ʼa̱yó. Ta saátu, tá ni̱ki̱ʼviyó iin ku̱a̱chi ndeé ná ka̱ʼa̱nyó xíʼin na̱ anciano ña̱ chindeétáʼanna xíʼinyó. Na̱yóʼo va̱ʼaní kuniso̱ʼona ña̱ ka̱ʼa̱nyó ta taxina consejo ña̱ va̱xi nu̱ú Biblia ndaʼa̱yó. Ta ka̱ʼa̱nna xíʼin Jehová ña̱ ná ixakáʼnu-inira xa̱ʼa̱yó, chi xa̱a̱ ni̱xi̱ʼi̱ ta̱ Jesús xa̱ʼa̱yó, tasaá kivi ndakutáʼan vií tukuyó xíʼin Ndióxi̱ (Sant. 5:14-16).

15. ¿Nda̱chun xíniñúʼu taváyó tiempo ña̱ va̱ʼa kaʼviyó ta ndakanixi̱níyó xa̱ʼa̱ ña̱ nda̱chaʼvi ta̱ Jesús xa̱ʼa̱yó?

¹⁵ Ná ndakanixi̱níyó xa̱ʼa̱ ña̱ nda̱chaʼvi ta̱ Jesús xa̱ʼa̱yó. Iin ñá hermana ñá kúúmií 73 ku̱i̱ya̱ ñá naní Rajamani, káchiñá: “Tá káʼvii̱ xa̱ʼa̱ ndiʼi ña̱ ni̱xo̱ʼvi̱ ta̱ Jesús, iin ndákutú ti̱kui̱í nduchúnu̱úi̱ xa̱ʼa̱ ña̱ kúni̱i̱ kuakui̱”. Ta sana saátu kivi kundoʼo miíyó tá ná ndakanixi̱níyó xa̱ʼa̱ ndiʼi ña̱ ni̱xo̱ʼvi̱ se̱ʼe Ndióxi̱. Ña̱kán tá ná ndakundeéyó ndakanixi̱níyó xa̱ʼa̱ ña̱ ni̱xi̱ʼi̱ ta̱ Jesús, xa̱a̱yó kuʼvi̱ka-iniyó kuniyóra ta saátu yivára. Ta ña̱ va̱ʼa keʼéyó ña̱yóʼo, kivi kaʼvikayó xa̱ʼa̱ ña̱ nda̱chaʼvi ta̱ Jesús xa̱ʼa̱yó.

16. ¿Ndáaña va̱ʼa ndákiʼinyó tá sánáʼa̱yó inkana xa̱ʼa̱ ña̱ nda̱chaʼvi ta̱ Jesús xa̱ʼa̱yó? (Koto na̱ʼná ña̱ va̱xi chí sa̱tá tutu yóʼo).

¹⁶ Ná sanáʼa̱yó inkana xa̱ʼa̱ ña̱ nda̱chaʼvi ta̱  Jesús xa̱ʼa̱yó. Chi tá kéʼéyó ña̱yóʼo saá kúú ña̱ chíndayáʼviníkayó ña̱ ni̱xi̱ʼi̱ ta̱ Jesús. Ta kúúmiíyó ku̱a̱ʼání tutu ña̱ chíndeétáʼan xíʼinyó ña̱ va̱ʼa natúʼunyó xíʼin na̱ yiví nda̱chun xi̱niñúʼu kuvi ta̱ Jesús xa̱ʼa̱yó. Tá kúú, iin ña̱ kivi kuniñúʼuyó kúú lección 4 ña̱ va̱xi nu̱ú folleto Ndióxi̱ káʼa̱nra tu̱ʼun va̱ʼa xíʼinyó, ña̱ naní “¿Yukú kúú Jesucristo?”. Á kivitu kuniñúʼuyó capítulo 5 ña̱ va̱xi nu̱ú libro ¿Ndáaña kúú míí ña̱ ndixa sánáʼa̱ Biblia?, ña̱ naní “Ta̱ Jesús ni̱xi̱ʼi̱ra xa̱ʼayó”. Ta inka nu̱ú kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús kúú ña̱ ku̱ʼu̱nyó Conmemoración, ta saátu kanayó inkana ña̱ ku̱ʼu̱nna xíʼinyó. Jehová ta̱xira iin chiñu ña̱ ndáyáʼviní ndaʼa̱yó ña̱ sanáʼa̱yó inkana xa̱ʼa̱ se̱ʼera.

17. ¿Nda̱chun iin regalo ña̱ ndáyáʼviní kúú ña̱ nda̱chaʼvi ta̱ Jesús xa̱ʼa̱yó?

¹⁷ Íyo ku̱a̱ʼání xa̱ʼa̱ kúú ña̱ chíndayáʼviyó ña̱ nda̱chaʼvi ta̱ Jesús xa̱ʼa̱yó ta táxiyó tíxa̱ʼvi xa̱ʼa̱ña. Chi tíxa̱ʼvi ña̱ nda̱chaʼvi ta̱ Jesús xa̱ʼa̱yó kivi kutáʼan viíyó xíʼin Jehová ni kúúyó na̱ yiví ku̱a̱chi. Ta tíxa̱ʼvi ña̱ nda̱chaʼvi ta̱ Jesús xa̱ʼa̱yó kivi ndiʼi-xa̱ʼa̱ ndiʼi ña̱ va̱ása va̱ʼa ke̱ʼé ta̱ Ndi̱va̱ʼa (1 Juan 3:8). Ta saátu xi̱nu ña̱ xi̱kuni̱ Jehová koo nu̱ú ñuʼú yóʼo, ña̱ livi kooña ta ndiʼi na̱ yiví kuʼvi̱-inina kunitáʼanna ta saátu ndasakáʼnuna iinlá miíra. Ña̱kán ndiʼi ki̱vi̱ ná ndukúyó ki̱ʼva ña̱ taxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira ta̱ Jesús ña̱ nda̱chaʼvira xa̱ʼa̱yó, chi iin regalo káʼnuní kúú ña̱ ta̱xira ndaʼa̱yó.