Pregunta ña̱ kéʼé na̱ káʼvi tutu yóʼo
Tá kúma̱ní kuvi ta̱ Jesús, ¿nda̱chun ni̱ka̱ʼa̱nra tu̱ʼun ña̱ ni̱ka̱ʼa̱n ta̱ David ña̱ va̱xi nu̱ú Salmo 22:1?
Nda̱a̱ táki̱ʼva káchi Mateo 27:46, tá kúma̱ní kuvi ta̱ Jesús ni̱ka̱ʼa̱nra ña̱ tu̱ʼun yóʼo: “Ndióxi̱ miíi̱, Ndióxi̱ miíi̱, ¿nda̱chun sa̱ndákoondaʼún yi̱ʼi̱?”. Tá ni̱ka̱ʼa̱nra ña̱yóʼo saá sa̱xínura profecía ña̱ ni̱ka̱ʼa̱n ta̱ David ña̱ va̱xi nu̱ú Salmo 22:1 (Mar. 15:34). Su̱ví xa̱ʼa̱ ña̱ níndakava-ini ta̱ Jesús kúú ña̱ ni̱ka̱ʼa̱nra ña̱ tu̱ʼun yóʼo, ta ni su̱ví xa̱ʼa̱ ña̱ kǒo níxi̱kandíxakara Ndióxi̱ kúúña. Saáchi xi̱kunda̱a̱va-inira nda̱chun kúú ña̱ xi̱niñúʼu kuvira ta saátu ka̱ndíxara kuvira (Mat. 16:21; 20:28). Ta saátu xi̱kunda̱a̱-inira ña̱ va̱ása sakǎkuví Jehová miíra tá xa̱a̱ ná kuvira (Job 1:10) Ña̱kán ta̱xi Jehová ña̱ ná na̱ʼa̱ ta̱ Jesús ña̱ nda̱kú íyo inira xíʼinra, ni yo̱ʼvi̱ní ná koo ña̱ kuvira (Mar. 14:35, 36).
Tá saá, ¿nda̱chun ni̱ka̱ʼa̱n ta̱ Jesús ña̱ tu̱ʼun yóʼo? Va̱ása kúnda̱a̱ káxi-iniyó nda̱chun kúú ña̱ ni̱ka̱ʼa̱nra ña̱yóʼo, soo ná kotoyó savaña. *
Tá ni̱ka̱ʼa̱n ta̱ Jesús ña̱ tu̱ʼun yóʼo, sana xi̱kuni̱ kachira ña̱ va̱ása kasiví Jehová ña̱ kaʼnínara. Saáchi ta̱yóʼo xi̱niñúʼu kuvira xa̱ʼa̱ na̱ yiví ku̱a̱chi ta va̱ása níxiniñúʼu chindeétáʼan Jehová xíʼinra ña̱ keʼéra ña̱yóʼo. Ña̱kán xi̱niñúʼu kuvira xa̱ʼa̱yó (Heb. 2:9).
Sana ni̱ka̱ʼa̱n ta̱ Jesús xa̱ʼa̱ loʼo tu̱ʼun ña̱ va̱xi nu̱ú Salmo 22 ña̱ va̱ʼa sandákaʼánra na̱ yiví na̱ ndíta kán xa̱ʼa̱ iníísaá salmo. Tá tiempo saá, na̱ judío xi̱sakúaʼa xíʼin xi̱nína ku̱a̱ʼání salmo. Ña̱kán tá ni̱ka̱ʼa̱nra xa̱ʼa̱ iin kuití versículo xíʼina, na̱kán ndakaʼánna ña̱ káʼa̱n iníísaá salmo. Tá saá, sana chi̱ndeétáʼan ta̱ Jesús xíʼin na̱ discípulora na̱ xi̱kuu judío ña̱ va̱ʼa ndakaʼánna xa̱ʼa̱ ndiʼi profecía ña̱ va̱xi nu̱ú salmo kán, ña̱ káʼa̱n xa̱ʼa̱ ña̱ kuvira (Sal. 22:7, 8, 15, 16, 18, 24). Ta saátu nu̱ú ndíʼi ña̱ salmo yóʼo ndásakáʼnuña Jehová ta káʼa̱nña ña̱ kúúra rey nu̱ú ndiʼi ña̱ʼa ña̱ íyo nu̱ú ñuʼú yóʼo (Sal. 22:27-31).
Tá ni̱ka̱ʼa̱n Jesús tu̱ʼun ña̱ ni̱ka̱ʼa̱n ta̱ David, sana xi̱kuni̱ra na̱ʼa̱ra ña̱ kǒo ku̱a̱chi kúúmiíra. Tá kúma̱ní kaʼnína ta̱ Jesús, xi̱niñúʼu kundeé-inira chi chi̱ka̱a̱na ku̱a̱chi miíra ña̱ va̱ása ní ixato̱ʼóra ki̱vi̱ Ndióxi̱ (Mat. 26:65, 66). Tá ñuú ti̱inna ku̱a̱chi xíʼinra ta kamaní ke̱ʼéna ña̱yóʼo, ta va̱ása níxi̱ndiku̱nna ña̱ xi̱ka̱ʼa̱n ley (Mat. 26:59; Mar. 14:56-59). Tá ni̱ka̱ʼa̱n ta Jesús ña̱ tu̱ʼun yóʼo, sana xi̱kuni̱ra na̱ʼa̱ra ña̱ kǒo ku̱a̱chi kúúmiíra ña̱ xíniñúʼu kuvira xa̱ʼa̱.
Á sanatu xi̱kuni̱ ta̱ Jesús sandákaʼánra inkana ña̱ ni ni̱xo̱ʼvi̱ ta̱ David va̱ása kúni̱ kachiña ña̱ va̱ása kúsi̱íka-ini Jehová xíʼin ña̱ xi̱keʼéra. Ta̱ David xi̱kandíxavara Ndióxi̱, saáchi tándi̱ʼi ni̱ka̱ʼa̱nra ña̱ tu̱ʼun yóʼo, ni̱ka̱ʼa̱nra ña̱ xi̱kandíxara ña̱ ndáa Jehová na̱ káchíñu nu̱úra, ta ta̱xikava Jehová bendición ndaʼa̱ra (Sal. 22:23, 24, 27). Ta ki̱ʼva saátu ndo̱ʼo ta̱ Jesús ta̱ ki̱xi ti̱xin na̱ veʼe ta̱ David, ni ni̱xo̱ʼvi̱vara tá xi̱tikaara ndaʼa̱ yitu̱n va̱ása kúni̱ kachiña ña̱ va̱ása níxi̱kusi̱íka-ini Jehová xíʼinra (Mat. 21:9).
Sana xíʼin ña̱ tu̱ʼun yóʼo ni̱na̱ʼa̱ ta̱ Jesús ña̱ ni̱xo̱ʼvi̱níra xa̱ʼa̱ ña̱ va̱ása ní chindeétáʼanka Jehová xíʼinra ña̱ va̱ʼa na̱ʼa̱ra ña̱ nda̱kú íyo inira xíʼinra. Xa̱ʼa̱ ña̱ i̱xaso̱ʼo ta̱ Adán xíʼin ñá Eva nu̱ú Ndióxi̱, xi̱niñúʼu xo̱ʼvi̱ ta̱ Jesús ta kuvira xa̱ʼa̱yó. Soo su̱ví ña̱yóʼo kúú ña̱ níxi̱kuni̱ Jehová tá xa̱ʼa̱. Ni kǒo ña̱ va̱ása va̱ʼa níkeʼé ta̱ Jesús, soo xi̱niñúʼu xo̱ʼvi̱ra ta kuvira xa̱ʼa̱yó ña̱ va̱ʼa na̱ʼa̱ra ña̱ ta̱ vatá kúú ta̱ Ndi̱va̱ʼa, ta saátu ña̱ va̱ʼa ndachaʼvira xa̱ʼa̱ ña̱ ke̱ʼé ta̱ Adán ta ndatavára miíyó ndaʼa̱ ku̱a̱chi (Mar. 8:31; 1 Ped. 2:21-24). Ni ndiʼi tiempo xi̱ndaa Jehová ta̱ Jesús, soo ña̱ va̱ʼa saxínu ta̱ Jesús chiñura xi̱niñúʼu sandákoondaʼa̱ Jehová ta̱yóʼo.
Á sanatu xi̱kuni̱ ta̱ Jesús chindeétáʼanra xíʼin na̱ xi̱ndiku̱n sa̱tára ña̱ ndakanixi̱nína nda̱chun kúú ña̱ taxi Jehová kuvira ndaʼa̱ iin yitu̱n. * Ta̱ Jesús xi̱kunda̱a̱-inira ña̱ ku̱a̱ʼánína va̱ása kundiku̱nna miíra xa̱ʼa̱ ki̱ʼva ña̱ kuvira, saáchi ka̱tikaanara ndaʼa̱ iin yitu̱n nda̱a̱ táki̱ʼva kéʼéna xíʼin iin na̱ kui̱ʼná (1 Cor. 1:23). Tá ná ndakanixi̱nína nda̱chun kúú ña̱ ni̱xi̱ʼi̱ ta̱ Jesús, saá kúú ña̱ xa̱a̱na kunda̱a̱-inina ndáaña kúni̱ kachi ña̱ ni̱xi̱ʼi̱ra ndaʼa̱ iin yitu̱n (Gál. 3:13, 14). Tasaá va̱ása xa̱a̱na nda̱kanixi̱nína ña̱ kúúra iin ta̱ kui̱ʼná chi iin ta̱ sa̱kǎku miívana kúúra.
Ni nda̱a̱ ndáaka xa̱ʼa̱ kúú ña̱ ni̱ka̱ʼa̱n ta̱ Jesús ña̱ tu̱ʼun yóʼo, soo xi̱kunda̱a̱va-inira ña̱ sa̱xínura ña̱ kúni̱ Jehová. Saáchi tá ndi̱ʼi ni̱ka̱ʼa̱nra ña̱ va̱xi nu̱ú Salmo 22:1, saá ni̱ka̱ʼa̱nra ña̱ tu̱ʼun yóʼo: “Xa̱a̱ ni̱xi̱nuña” (Juan 19:30; Luc. 22:37). Jehová xi̱niñúʼu sandákoondaʼa̱ra ta̱ Jesús loʼo tiempo ña̱ va̱ʼa sáxi̱nura chiñu ña̱ ki̱xira ke̱ʼéra nu̱ú ñuʼú yóʼo. Ta saátu saxínura ndiʼi ña̱ ni̱ka̱ʼyi̱ xa̱ʼa̱ra tá kúú ña̱ ka̱ʼyí ta̱ Moisés, ña̱ ka̱ʼyí na̱ Profeta xíʼin ña̱ va̱xi nu̱ú Salmos (Luc. 24:44).
^ párr. 2 Koto párrafo 9 xíʼin 10 ña̱ va̱xi nu̱ú artículo ña̱ naní “¿Ndáaña sákuaʼayó xíʼin ña̱ ni̱ka̱ʼa̱n ta̱ Jesús tá kúma̱ní kuvira?” ña̱ va̱xi nu̱ú mií tutu yóʼo.
^ párr. 4 Tá ni̱xi̱yo ta̱ Jesús nu̱ú ñuʼú yóʼo, xi̱ka̱ʼa̱nra sava ña̱ʼa á xi̱keʼétura sava pregunta ña̱ va̱ʼa kunda̱a̱-inira ndáaña ndákanixi̱ní na̱ discípulora, ta va̱ása níxi̱keʼéra ña̱yóʼo ña̱ va̱ʼa kunda̱a̱-ini inkana ndáaña ndákanixi̱ní miíra (Mar. 7:24-27; Juan 6:1-5; koto La Atalaya 15 tí octubre ña̱ ku̱i̱ya̱ 2010, página 4 xíʼin 5).
