1, 2. ¿Ndáa ejemplo chíndeétáʼan xíʼinyó kunda̱a̱-iniyó xíʼin ña̱ káʼa̱n 1 Pedro 2:21?

NÁ NDAKANIXI̱NÍYÓ ña̱ ku̱a̱ʼa̱nyó kotonde̱ʼéyó iin yuku̱ xíʼin iin tiʼvi na̱ yiví, soo nda̱ʼyi̱ní yichi̱ nu̱ú ku̱a̱ʼa̱nyó ta kininí káa. Ta ku̱a̱ʼa̱n iin ta̱ xíni̱ va̱ʼa xíʼinyó, ta nani xíkara ku̱a̱ʼa̱nra nána xa̱ʼa̱ra nu̱ú nda̱ʼyi̱. Ta iin kama kǒokara xítoyó, soo va̱ása yíʼviyó. Ndiʼi na̱ ku̱a̱ʼa̱n xíʼinyó chíka̱a̱na ndee̱ ña̱ viíní kundiku̱nna xa̱ʼa̱ ta̱yóʼo ña̱ na̱na nu̱ú nda̱ʼyi̱.

² Ki̱ʼva saá íyo ña̱ kéʼé miíyó na̱ ndásakáʼnu Ndióxi̱ saáchi ku̱a̱ʼa̱nyó iin yichi̱ ña̱ kininí káa, ta ña̱yóʼo kúú ñuyǐví ta̱ Ndi̱va̱ʼa. Soo Jehová ta̱xira se̱ʼera ta̱ Jesús ña̱ va̱ʼaní kuniʼira yichi̱ nu̱úyó, ña̱kán xíniñúʼu viíní kundiku̱nyó yichi̱ra (1 Ped. 2:21). Iin tutu ña̱ káʼa̱n xa̱ʼa̱ Biblia káchiña, ña̱ chi̱táʼan ta̱ Pedro ta̱ Jesús xíʼin iin ta̱ níʼi yichi̱ nu̱ú inkana. Nda̱a̱ táki̱ʼva kéʼé na̱ yiví na̱ ku̱a̱ʼa̱n sa̱tá ta̱ níʼi yichi̱ nu̱úna, saátu miíyó xíniñúʼu kundiku̱nyó yichi̱ ña̱ sa̱ndákoo ta̱ Jesús. Soo, ¿ndáa yichi̱ kúú ña̱ sa̱ndákoora nu̱úyó? ¿Nda̱chun xíniñúʼu kundiku̱nyóña? Ta, ¿ndáa ki̱ʼva kundiku̱nyóña?

3. ¿Ndáaña kúni̱ kachi ña̱ kundiku̱nyó yichi̱ inkana?

³ ¿Ndáaña kúni̱ kachi ña̱ kundiku̱nyó yichi̱ inkana? Tá káʼa̱n tu̱ʼun Ndióxi̱ xa̱ʼa̱ ña̱ xíkana á xa̱ʼa̱na kúni̱ kachiña xa̱ʼa̱ ña̱ ke̱ʼé iin na̱ yiví ndiʼi tiempo ña̱ xi̱takuna (Gén. 6:9; Prov. 4:26). Ña̱ kundiku̱nyó yichi̱ iin na̱ yiví kivi chitáʼanyóña xíʼin ña̱ kundiku̱nyó xa̱ʼa̱na ña̱ nána nu̱ú ñuʼú tá xíkana ku̱a̱ʼa̱nna. Ña̱kán tá káʼa̱nyó xa̱ʼa̱ ña̱ kundiku̱nyó yichi̱ inka, kúni̱ kachiña keʼéyó nda̱a̱ táki̱ʼva kéʼéna.

4. ¿Ndáaña kúni̱ kachi ña̱ kundiku̱nyó yichi̱ ta̱ Jesús?

 ⁴ Tá saá, ¿ndáaña kúni̱ kachi ña̱ kundiku̱nyó yichi̱ ta̱ Jesús? Ña̱ keʼéyó táʼan ña̱ ke̱ʼéra. Nu̱ú texto ña̱ ka̱na artículo yóʼo ta̱ apóstol Pedro káxiní ni̱ka̱ʼa̱nra ña̱ va̱ʼaní yichi̱ sa̱ndákoo ta̱ Jesús nu̱úyó, saáchi ku̱ndeé-inira tá ni̱xo̱ʼvi̱ra. Soo íyo ku̱a̱ʼáka ña̱ʼa ña̱ ke̱ʼé ta̱ Jesús ña̱ kivi kundiku̱nyó (1 Ped. 2:18-25). Va̱ʼaní yichi̱ sa̱ndákoo ta̱ Jesús nu̱úyó xíʼin ndiʼi ña̱ ni̱ka̱ʼa̱nra ta saátu ña̱ ke̱ʼéra tá ni̱xi̱yora nu̱ú ñuʼú yóʼo.

5. Ka̱ʼa̱n nda̱chun ndiʼiyó kivi kundiku̱n yichi̱ ta̱ Jesús ni kúúyó na̱ yiví ku̱a̱chi.

⁵ ¿Á kuchiñu miíyó na̱ yiví ku̱a̱chi kundiku̱nyó yichi̱ ta̱ Jesús? Kuchiñuvayó. Ta̱ Pedro va̱ása níka̱ʼa̱nra ña̱ “nda̱a̱ táki̱ʼva ke̱ʼé” ta̱ Jesús iin ña̱ʼa saá keʼéyóña, saáchi ña̱ ni̱ka̱ʼa̱nra kúú ña̱ “viíní keʼéyóña”. Ña̱kán tá chíka̱a̱yó ndee̱ ña̱ vií kundiku̱nyó ña̱ ke̱ʼé ta̱ Jesús, ndíku̱nyó consejo ña̱ ta̱xi ta̱ apóstol Juan, ña̱ ndakundeéyó keʼéyó táʼan ña̱ ke̱ʼé ta̱ Jesús (1 Juan 2:6).

6, 7. ¿Nda̱chun va̱ʼaníka kutáʼanyó xíʼin Jehová tá ndíku̱nyó yichi̱ ta̱ Jesús?

⁶ Tá ndíku̱nyó yichi̱ ta̱ Jesús viíka kutáʼanyó xíʼin Jehová. ¿Nda̱chun? Ña̱ nu̱ú, saáchi ta̱ Jesús xi̱takura nda̱a̱ táki̱ʼva kúni̱ mií Jehová ta xíʼin ña̱yóʼo va̱ʼaní yichi̱ sa̱ndákoora nu̱úyó (Juan 8:29). Ña̱kán tá ndíku̱nyó yichi̱ ta̱ Jesús, sákusi̱íyó-ini Jehová. Ta saátu va̱ása xíka-iniyó ña̱ kúyatin Jehová nu̱ú na̱ chíka̱a̱ ndee̱ ña̱ kutáʼan viína xíʼinra (Sant. 4:8).

⁷ Ña̱ u̱vi̱, ta̱ Jesús ke̱ʼéra nda̱a̱ táki̱ʼva kéʼé yivára. Ña̱kán ni̱ka̱ʼa̱nra: “Na̱ xi̱ni yi̱ʼi̱ xa̱a̱ xi̱nituna yiváí” (Juan 14:9). Ndíku̱nyó yichi̱ Jehová tá viíní kéʼéyó xíʼin inkana nda̱a̱ táki̱ʼva xi̱keʼé ta̱ Jesús, tá kúú viíní ke̱ʼéra xíʼin iin ta̱a ta̱ xi̱kuumií lepra, ta ni̱na̱ʼa̱ra ña̱ ku̱ndaa̱-inira xíʼin ña̱ ndo̱ʼo iin ñá ñaʼá ñá xi̱kuumií iin kue̱ʼe̱ ña̱ ndeéní, ta saátu ku̱ndáʼvi-inira xi̱nira na̱ ni̱xi̱ʼi̱ iin na̱ veʼe (Mar. 1:40, 41; 5:25-34;  Juan 11:33-35). Tá chíka̱a̱yó ndee̱ ña̱ keʼéyó táʼan ña̱ kéʼé Jehová saá kúú ña̱ viíníka kutáʼanyó xíʼinra.

8. Ka̱ʼa̱n nda̱chun kuchiñuyó xíʼin ñuyǐví yóʼo tá ná kundiku̱nyó yichi̱ ta̱ Jesús.

⁸ Tá ná kundiku̱nyó yichi̱ ta̱ Jesús va̱ása keʼéyó ña̱ íyo nu̱ú ñuyǐví ta̱ Ndi̱va̱ʼa yóʼo. Ñuú tá kúma̱ní kuvi ta̱ Jesús ni̱ka̱ʼa̱nra: “Xa̱a̱ ku̱chiñuvai̱ xíʼin ñuyǐví yóʼo” (Juan 16:33). Ña̱ xi̱kuni̱ kachira kúú ña̱ va̱ása níkixáʼara ndakanixi̱níra nda̱a̱ táki̱ʼva ndákanixi̱ní na̱ ñuyǐví yóʼo, ta keʼéra nda̱a̱ táki̱ʼva kéʼéna. Va̱ása ní nandósó-inira nda̱chun kúú ña̱ ki̱xira nu̱ú ñuʼú yóʼo: saáchi ki̱xira ña̱ va̱ʼa ndasayi̱i̱ra ki̱vi̱ yivára. ¿Ndáaña keʼé miíyó? Íyo ku̱a̱ʼání ña̱ʼa ña̱ kivi kasi nu̱úyó ña̱ kundi̱ʼi̱-iniyó xa̱ʼa̱ iinlá chiñu Jehová. Soo tá ná chika̱a̱yó ndee̱ ña̱ keʼéyó ña̱ kúni̱ Jehová, nda̱a̱ táki̱ʼva ke̱ʼé ta̱ Jesús, saátu miíyó kuchiñuyó xíʼin ñuyǐví ta̱ Ndi̱va̱ʼa yóʼo (1 Juan 5:5).

9. ¿Ndáaña xíniñúʼu keʼéyó ña̱ va̱ása sandákooyó yichi̱ ña̱ taxi kutakuyó ndiʼi tiempo?

⁹ Tá ná kundiku̱nyó yichi̱ ta̱ Jesús ndakiʼinyó ña̱ kutakuyó ndiʼi tiempo. Tá ni̱nda̱ka̱tu̱ʼun iin ta̱ loʼo ku̱i̱ká ta̱ Jesús ndáaña xíniñúʼu keʼéra ña̱ va̱ʼa ndakiʼinra ña̱ kutakura ndiʼi tiempo, ta̱ Jesús ni̱ka̱ʼa̱nra xíʼinra: “Kixiún ta kundikún yi̱ʼi̱” (Mat. 19:16-21). Ta̱ Jesús ni̱ka̱ʼa̱nra xíʼin sava na̱ judío na̱ va̱ása níkandíxa ña̱ kúúra ta̱ Cristo: “Tí kúú ndikachi sa̱na̱i̱ [...] ndíku̱nrí yi̱ʼi̱. Yi̱ʼi̱ taxii̱ kutakurí ndiʼi tiempo” (Juan 10:24-29). Ta iin ta̱a ta̱ xi̱táʼan xíʼin na̱ Sanedrín ta̱ xi̱naní Nicodemo, xi̱kuni̱ra kunda̱a̱-inira xa̱ʼa̱ ña̱ xi̱sanáʼa̱ ta̱ Jesús, ña̱kán ta̱ Jesús ni̱ka̱ʼa̱nra xíʼinra ña̱ na̱ ndixa náʼa̱ ña̱ kándíxanara, ndakiʼinna ña̱ kutakuna ndiʼi tiempo (Juan 3:16). Náʼa̱yó ña̱ kándíxayó ta̱ Jesús tá kéʼéyó ña̱ ni̱ka̱ʼa̱nra ta saátu ña̱ ke̱ʼéra. Ta tá ná keʼéyó ña̱yóʼo va̱ása sandákooyó yichi̱ ña̱ taxi kutakuyó ndiʼi tiempo (Mat. 7:14).

10. ¿Ndáaña xíniñúʼu keʼéyó ña̱ va̱ʼa xa̱a̱yó kuxini̱kayó ta̱ Jesús? (Juan 17:3).

¹⁰ Ña̱ va̱ʼa vií kundiku̱nyó yichi̱ ta̱ Jesús, siʼna xíniñúʼu kuxini̱yóra (kaʼvi Juan 17:3). * Ña̱ va̱ʼa xa̱a̱yó kuxini̱yóra xíniñúʼu sakuaʼayó xa̱ʼa̱ra ndiʼi tiempo. Tá kúú ndáa ña̱ va̱ʼa kúúmiíra, ndáa ki̱ʼva ndákanixi̱níra ta ndáaña kúni̱ra ná keʼéyó. Ni loʼo á ku̱a̱ʼá tiempo kúú ña̱ ñúʼuyó ti̱xin ñuu Ndióxi̱, ndiʼiyó xíniñúʼu chika̱a̱yó ndee̱ ña̱ kuxini̱yó Jehová xíʼin se̱ʼera.

11. ¿Ndáaña nátúʼun ku̱mí saá ña̱ Evangelio?

¹¹ Xa̱ʼa̱ ña̱ kúni̱ní Jehová xínira miíyó chíndeétáʼanra xíʼinyó ña̱ kuxini̱yó se̱ʼera, ña̱kán ta̱xira ña̱ ná ka̱ʼyi̱ nu̱ú tu̱ʼunra ku̱mí saá ña̱ Evangelio. Ña̱yóʼo nátúʼunña xa̱ʼa̱ ki̱ʼva ña̱ xi̱taku ta̱ Jesús ta saátu ndáa ki̱ʼva na̱túʼunra xa̱ʼa̱ Ndióxi̱. Nátúʼunña xíʼinyó ndáaña ni̱ka̱ʼa̱nra,  ndáaña ke̱ʼéra ta ndáaña ndo̱ʼora. Ku̱mí saá libro yóʼo chíndeétáʼanña xíʼinyó ña̱ viíníka sakuaʼayó xa̱ʼa̱ ña̱ ke̱ʼé ta̱ Jesús (Heb. 12:3). Ña̱yóʼo chíndeétáʼanña xíʼinyó ña̱ kunda̱a̱-iniyó ndáa yichi̱ kúú ña̱ sa̱ndákoora nu̱úyó. Tá ná káʼviyó ña̱ Evangelio xa̱a̱yó kuxini̱kayó ta̱ Jesús ta viíníka kundiku̱nyó yichi̱ra.

12. ¿Ndáaña kivi keʼéyó ña̱ va̱ʼa viíníka chindeétáʼan ña̱ Evangelio yóʼo xíʼinyó?

¹² Ña̱ va̱ʼa chindeétáʼan ña̱ Evangelio xíʼinyó, va̱ása xíniñúʼu kaʼvi kuitíyóña, chi xíniñúʼu taváyó tiempo ña̱ viíní kaʼviyóña ta saátu ndakanixi̱níyó xa̱ʼa̱ ña̱ káʼviyó nu̱úña (chitáʼanña xíʼin Josué 1:8). Vitin ná ka̱ʼa̱nyó xa̱ʼa̱ u̱vi̱ ña̱ʼa ña̱ chindeétáʼan xíʼinyó ndakanixi̱níyó xa̱ʼa̱ ña̱ káʼviyó nu̱ú Evangelio, ta saátu ndáa ki̱ʼva keʼéyó ña̱ sákuaʼayó nu̱ú ña̱yóʼo.

13. ¿Ndáaña kivi keʼéyó tá káʼviyó ña̱ Evangelio?

¹³ Ña̱ nu̱ú, ná ndakanixi̱níyó ña̱ xítoyó ña̱ nátúʼun ña̱ Evangelio yóʼo xa̱ʼa̱. Tá káʼviyó ña̱yóʼo ná ndakanixi̱níyó ña̱ xítoyó ta xíniso̱ʼoyó ña̱ kúú á nda̱a̱ ndóʼoyó táʼan ña̱ ndóʼona. Kivi nandukúyó xa̱ʼa̱ ña̱ káʼviyó nu̱ú tutu ña̱ tává na̱ ñuu Ndióxi̱. Ná kaʼviyó ña̱ va̱xi chí sa̱táka ta saátu ña̱ va̱xi chí nu̱úka ña̱ va̱ʼa kunda̱a̱ka-iniyó xíʼinña. Ná nandukúyó xa̱ʼa̱ na̱ yiví xíʼin ñuu ña̱ káʼa̱nña xa̱ʼa̱, ta saátu ná nandukúyó xa̱ʼa̱ ña̱ ku̱u tá ya̱chi̱ ta saátu ña̱ ku̱u tá ni̱ya̱ʼa tiempo. Tá káʼviyó iin relato ná chitáʼanyóña xíʼin ña̱ va̱xi nu̱ú inkaka ña̱ Evangelio, saáchi kivi sákuaʼayó xa̱ʼa̱ iin ña̱ʼa ña̱ ni̱ka̱ʼyi̱ nu̱ú iinña soo kǒoña níka̱ʼyi̱ nu̱ú inkaña.

14, 15. ¿Ndáa ki̱ʼva keʼéyó ña̱ sákuaʼayó nu̱ú Evangelio?

¹⁴ Ña̱ u̱vi̱, ná keʼéyó ña̱ káʼa̱n ña̱ Evangelio (Juan 13:17). Tándi̱ʼi ka̱ʼviyó iin relato ña̱ va̱xi nu̱ú ña̱ Evangelio ná ndakanixi̱níyó xa̱ʼa̱ pregunta yóʼo: “¿Ndáaña sákuaʼi̱ xíʼin ña̱yóʼo? ¿Ndáa ki̱ʼva kivi kuniñúʼi̱ña ña̱ va̱ʼa chindeétáʼi̱n xíʼin inkana?”. Ná ndakanixi̱níyó xa̱ʼa̱ iin na̱ xíni̱yó na̱ kivi chindeétáʼan ña̱yóʼo xíʼin, ta ná kotoyó ama kivi ka̱ʼa̱nyó xíʼinna xa̱ʼa̱ ña̱ sa̱kuaʼayó soo viíní ná ka̱ʼa̱nyó xíʼinna.

¹⁵ Vitin ná kotoyó ndáa ki̱ʼva keʼéyó u̱vi̱ saá ña̱ xa̱a̱ ni̱ka̱ʼa̱nyó xa̱ʼa̱ yóʼo. Ná ka̱ʼa̱nyó xa̱ʼa̱ relato ña̱  nátúʼun xa̱ʼa̱ ñá ñaʼá ndáʼvi ñá ni̱xi̱ʼi̱ yií, ñá xi̱ni ta̱ Jesús ini templo.

16. Ka̱ʼa̱n xa̱ʼa̱ ña̱ káʼa̱n Marcos 12:41.

¹⁶ Ná ndakanixi̱níyó ña̱ xítoyó ta xíniso̱ʼoyó ña̱ nátúʼun ña̱ relato xa̱ʼa̱ (kaʼvi Marcos 12:41). * Ná ndakanixi̱níyó ña̱ kúúña ki̱vi̱ 11 tí nisán ña̱ ku̱i̱ya̱ 33 ta ndáa si̱lóʼo ki̱vi̱ kúma̱ní ta kaʼnína ta̱ Jesús, soo ndíka̱a̱ra ini templo ña̱ sánáʼa̱ra na̱ yiví xa̱ʼa̱ Ndióxi̱. Sava na̱ su̱tu̱ na̱ sáa̱-ini xíni ñaʼá ki̱xáʼana xítondosónara, savana ndáka̱tu̱ʼunnara ndáana ta̱xi chiñu ndaʼa̱ra ña̱ sanáʼa̱ra na̱ yiví, inkana ndáka̱tu̱ʼunna xa̱ʼa̱ ña̱ʼa ña̱ yo̱ʼvi̱ saáchi túvina ña̱ va̱ása kuchira ndakuiinra yuʼúna (Mar. 11:27-33; 12:13-34). Tasaá, ta̱ Jesús nda̱kiʼinra ku̱a̱ʼa̱nra chí inka táʼví ña̱ templo, sana chí patio ná ñaʼá. Ta chí kán íyo ku̱a̱ʼá ña̱ʼa nu̱ú táanna xu̱ʼún, ta ki̱xáʼara xítora ña̱ táan na̱ yiví xu̱ʼún ta saátu na̱ ku̱i̱ká. Ta sana nda̱a̱ xíniso̱ʼora káxán tá táannaña.

17. ¿Ndáaña ke̱ʼé ñaʼá ñá ndáʼvi ñá ni̱xi̱ʼi̱ yií ñá nátúʼun Marcos 12:42 xa̱ʼa̱?

¹⁷ (Kaʼvi Marcos 12:42). * Tasaá, ta̱ Jesús xi̱nira iin ñaʼá ñá ni̱xi̱ʼi̱ yií (Luc. 21:2). Xóʼvi̱níñá saáchi íxayo̱ʼvi̱níña xíʼinñá ña̱ ni̱ʼíñá xu̱ʼún ña̱ va̱ʼa satáñá ña̱ʼa ña̱ xíniñúʼuñá. Soo ni saá ku̱yatinñá nu̱ú chíka̱a̱na xu̱ʼún ta tá va̱ása xíto inkana chi̱kaa̱ñá u̱vi̱ xu̱ʼún válí, sana ni va̱ása níkaxánví tá ni̱ko̱yo ña̱yóʼo. Soo ku̱nda̱a̱va-ini ta̱ Jesús ña̱ chi̱kaa̱ñá u̱vi̱ xu̱ʼún ña̱ xi̱naní leptón, loʼoní xi̱ndayáʼvi ña̱yóʼo tiempo saá. Ña̱yóʼo va̱ása nanivíña ña̱ va̱ʼa satáñá iin gorrión, iin saa loʼo tí núuní ya̱ʼvi tí xi̱satána ña̱ va̱ʼa kuxuna.

18. Nda̱a̱ táki̱ʼva káchi Marcos 12:43, 44, ¿ndáaña ni̱ka̱ʼa̱n ta̱ Jesús xa̱ʼa̱ xu̱ʼún ña̱ chi̱kaa̱ ñá ñaʼá ñá ni̱xi̱ʼi̱ yií?

¹⁸ (Kaʼvi Marcos 12:43, 44). * Ta̱ Jesús nda̱kanda̱ní-inira xíʼin ña̱ ke̱ʼé ñá ñaʼá ndáʼvi ñá ni̱xi̱ʼi̱ yií. Ña̱kán ka̱nara na̱ discípulora ta ni̱ka̱ʼa̱nra xíʼinna ña̱ ná kotona ña̱ kéʼé ñáyóʼo, ta ka̱chira: “Ña̱ nda̱a̱ káʼi̱n xíʼinndó ku̱a̱ʼáka ña̱ chi̱ka̱a̱ ñaʼá ñá ndáʼvi ñá ni̱xi̱ʼi̱ yií yóʼo nu̱úka na̱ káa”. Tasaá ni̱ka̱ʼa̱nkara: “Ndiʼi na̱ [ku̱i̱ká] káa táxina ña̱ ndóo ndaʼa̱na; soo ñáyóʼo ni ndáʼviníñá ta̱xiñá ndiʼi ña̱ xi̱kuumiíñá”. Tá chi̱ka̱a̱ ñá ñaʼá kán ndiʼi xu̱ʼún ña̱ kúúmiíñá ki̱vi̱ kán, ni̱na̱ʼa̱ñá ña̱ kándíxañá ña̱ kundaa Jehová miíñá (Sal. 26:3).

19. ¿Ndáaña sákuaʼayó xíʼin ña̱ ni̱ka̱ʼa̱n ta̱ Jesús xa̱ʼa̱ ñá ñaʼá ndáʼvi ñá ni̱xi̱ʼi̱ yií?

¹⁹ Ná keʼéyó ña̱ sákuaʼayó xíʼin ña̱ relato yóʼo. Ná ndakanixi̱níyó xa̱ʼa̱ pregunta yóʼo: “¿Ndáaña kivi sakuaʼi̱ xíʼin ña̱ ni̱ka̱ʼa̱n ta̱ Jesús xa̱ʼa̱ ñá ñaʼá ndáʼvi ñá ni̱xi̱ʼi̱ yií?”. Ná ndakanixi̱níyó xa̱ʼa̱ ña̱ ke̱ʼéñá. Sana xi̱kuni̱kavañá taxiñá ku̱a̱ʼá ña̱ʼa ndaʼa̱ Jehová, soo ni saá ta̱xivañá ndiʼi ña̱ va̱ʼa ña̱ xi̱kuumiíñá ndaʼa̱ra. Ta̱ Jesús xi̱kunda̱a̱-inira ña̱ ndáyáʼviní ña̱ ta̱xi ñáyóʼo nu̱ú yivára. Íyo iin ña̱ ndáyáʼviní sákuaʼayó xíʼin ña̱yóʼo: kúsi̱íní-ini Jehová tá táxiyó ndiʼi ña̱ va̱ʼa ña̱ kúúmiíyó ndaʼa̱ra ta xíʼin ndiʼi níma̱yó káchíñuyó nu̱úra (Mat. 22:37; Col. 3:23). Kúsi̱íní-ini Jehová tá chíka̱a̱yó ndee̱ ña̱ kachíñuyó nu̱úra. Tá kúú tá xíniñúʼuyó tiempoyó xíʼin ndee̱yó ña̱ ndasakáʼnuyóra, tá ku̱a̱ʼa̱nyó nátúʼunyó xa̱ʼa̱ra ta saátu tá ku̱a̱ʼa̱nyó reunión.

20. ¿Ndáaña keʼéyó xíʼin ña̱ sa̱kuaʼayó xa̱ʼa̱ ñá ñaʼá ñá ni̱xi̱ʼi̱ yií? Ka̱ʼa̱n xa̱ʼa̱ iin ejemplo.

²⁰ ¿Ndáaña keʼéyó xíʼin ña̱ sa̱kuaʼayó xa̱ʼa̱ ñá ñaʼá ñá ni̱xi̱ʼi̱ yií? Ná ndakanixi̱níyó xa̱ʼa̱ sava  na̱ hermano na̱ kivi ka̱ʼa̱nyó xíʼin ña̱ kúsi̱í-ini Jehová xíʼin chiñu ña̱ kéʼéna. Sana xíni̱yó iin ñá hermana ñá xa̱a̱ chée, ta va̱ása va̱ʼa kúniñá á túviñá ña̱ va̱ása ndáyáʼvikañá xa̱ʼa̱ ña̱ va̱ása ku̱a̱ʼáka tiempo nátúʼunñá xa̱ʼa̱ Ndióxi̱. Á sanatu xíni̱yó iin ta̱ hermano ta̱ xa̱a̱ ku̱a̱ʼá tiempo kúúmií iin kue̱ʼe̱ ta xóʼvi̱níra xíʼin ña̱yóʼo, ta ndákava-inira xa̱ʼa̱ ña̱ va̱ása kívi ku̱ʼu̱nra ndiʼi reunión. Tá ná ka̱ʼa̱nyó tu̱ʼun va̱ʼa xíʼinna kivi chika̱a̱ña ndee̱ xíʼinna (Efes. 4:29). Ná natúʼunyó xíʼina xa̱ʼa̱ ña̱ sa̱kuaʼayó xíʼin relato ña̱ nátúʼun xa̱ʼa̱ ñá ñaʼá ndáʼvi ñá ni̱xi̱ʼi̱ yií. Ña̱ ka̱ʼa̱nyó xíʼinna sandákaʼánñana ña̱ kúsi̱í-ini Jehová xa̱ʼa̱ ña̱ chíka̱a̱na ndee̱ ña̱ kachíñuna nu̱úra (Prov. 15:23; 1 Tes. 5:11). Ndíku̱nyó yichi̱ ta̱ Jesús tá chíka̱a̱yó ndee̱ ña̱ ka̱ʼa̱nyó tu̱ʼun va̱ʼa xíʼin inkana xa̱ʼa̱ ña̱ táxina ndiʼi ña̱ va̱ʼa kúúmiína ndaʼa̱ Jehová ni túvina ña̱ loʼoní kúúña.

21. ¿Ndáaña chika̱a̱-iniún keʼún?

²¹ Táxiníyó tíxa̱ʼvi xa̱ʼa̱ ña̱ Evangelio saáchi nu̱ú ña̱yóʼo va̱xi ndiʼi ña̱ ke̱ʼé ta̱ Jesús, tasaá kivi viíní kundiku̱nyó yichi̱ra. Ña̱kán ná chika̱a̱-iniyó ña̱ kaʼvikayó xa̱ʼa̱ ña̱ Evangelio á kaʼviyóña xíʼin na̱ veʼeyó. Ña̱ va̱ʼa chindeétáʼan ña̱yóʼo xíʼinyó xíniñúʼu ndakanixi̱níyó ña̱ xítoyó ta xíniso̱ʼoyó ña̱ nátúʼun ña̱ Evangelio xa̱ʼa̱, ta saátu keʼéyó ña̱ sákuaʼayó xíʼin ña̱yóʼo. Va̱ása xíniñúʼu keʼé kuitíyó táʼan ña̱ ke̱ʼé ta̱ Jesús, chi saátu ndáyáʼviní kuniso̱ʼoyó ña̱ ni̱ka̱ʼa̱nra. Nu̱ú inka artículo ka̱ʼa̱nyó xa̱ʼa̱ ña̱ kivi sakuaʼayó xíʼin ña̱ ni̱ka̱ʼa̱n ta̱ Jesús tá tíkaara ndaʼa̱ yitu̱n.