Galleta ña̱ kuxu ti̱na sa̱na̱i̱
IIN ta̱a ta̱ naní Nick, ta̱ íyo chí Oregón (Estados Unidos), ka̱ʼyíra ña̱yóʼo: “Tá ki̱xáʼa ku̱i̱ya̱ 2014 ki̱xáʼíi̱ xáʼi̱n xíʼin u̱vi̱ ti̱na válí sa̱na̱i̱ chí centro ña̱ ñuu yóʼo. Kán xi̱xinii̱ na̱ testigo Jehová xíʼin carro válína, ta viíkaví ndíxina ta xíʼin ña̱ si̱í-ini xi̱chindeéna ndiʼi na̱ xi̱yaʼa kán.
”Su̱ví nda̱saa xíʼin na̱ yiví viíní níxikeʼéna, chi saátu xi̱keʼéna xíʼin ti̱na válí sa̱na̱i̱. Iin ki̱vi̱ níndichi iin ñaʼá ñá naní Elaine xíʼin tú carro válí, ta ta̱xiñá galleta xi̱xi u̱vi̱ saá ti̱na válí sa̱na̱i̱. Ta ndiʼi yichi̱ ña̱ xi̱yaʼi̱ xíʼinrí chí kán, xi̱kuni̱kavírí ku̱ʼu̱nrí nu̱ú ndítana ña̱ va̱ʼa taxina galleta kuxurí.
”Tasaá ke̱ʼéna ku̱a̱ʼá yo̱o̱. Tí ti̱na válí sa̱na̱i̱ xi̱kusi̱íkaví-inirí xi̱xixirí galleta ta yi̱ʼi̱ xi̱kutói̱ ña̱ xi̱natúʼunna xíʼi̱n. Soo va̱ása níxikutóoníi̱ kutáʼi̱n xíʼinna. Tiempo kán, xa̱a̱ yáʼaka 70 ku̱i̱ya̱ xi̱kuumiíi̱, ta va̱ása níxi̱kunda̱a̱ va̱ʼa inii̱ ndáaña xi̱kandíxa na̱ testigo Jehová. Xa̱ʼa̱ ña̱ va̱ása níxikutói̱ ña̱ xi̱keʼé na̱ inka veʼe-ñu̱ʼu, ña̱kán nda̱kanixi̱níi̱ ña̱ va̱ʼaka kaʼvi iinlá miíi̱ Biblia.
”Tá tiempo saá ki̱xáʼíi̱ xínii̱ ku̱a̱ʼáka na̱ testigo ña̱ ndítana xíʼin carro válí xa̱a̱ síín síín lugar ñuu yóʼo. Saátu na̱yóʼo to̱ʼóní xi̱ka̱ʼa̱nna xíʼi̱n. Ta nina Biblia xi̱xiniñúʼuna ña̱ va̱ʼa ndakuiinna ña̱ xi̱nda̱ka̱tu̱ʼíi̱nna, ña̱kán ki̱xáʼíi̱ kándíxakai̱na.
”Iin ki̱vi̱ ñá Elaine ni̱nda̱ka̱tu̱ʼunñá yi̱ʼi̱: ‘¿Á iin regalo ña̱ ta̱xi Ndióxi̱ ndaʼa̱yó kúú kití sa̱na̱yó túviún?’. ‘Ndióxi̱ ta̱xivarí’, ka̱chii̱ xíʼinñá. Tasaá ka̱ʼviñá Isaías 11:6-9 nu̱úi̱. Nani saá ki̱xáʼíi̱ kúni̱i̱ sakúaʼakai̱ xa̱ʼa̱ Biblia, soo va̱ása níxikuni̱i̱ kiʼi̱n nda̱a̱ ni iin tutu ña̱ xi̱tavá na̱ testigo Jehová.
”Tá ni̱ya̱ʼaka sava ki̱vi̱, ñá Elaine xíʼin yiíñá ta̱ Brent ki̱xáʼana nátúʼunna xíʼi̱n xa̱ʼa̱ ña̱ yo̱ʼvi̱ka ña̱ va̱xi nu̱ú tu̱ʼun Ndióxi̱, ni loʼo xi̱natúʼunna xíʼi̱n soo xi̱kutóonívai̱ña. Ta ni̱ka̱ʼa̱nna xíʼi̱n kaʼvii̱ Mateo nda̱a̱ Hechos ña̱ va̱ʼa kunda̱a̱-inii̱ ndáa ña̱ kúni̱ kachi ña̱ kundiku̱nyó yichi̱ ta̱ Cristo. Tasaá ke̱ʼévai̱. Tá ni̱ya̱ʼa loʼo tiempo ki̱xáʼa ta̱ Brent xíʼin ñá Elaine káʼvina xíʼi̱n. Ta ña̱yóʼo ku̱uña tiempo sáví ña̱ ku̱i̱ya̱ 2016.
”Xi̱kusi̱íní-inii̱ xi̱ndatui̱ ña̱ kaʼvina xíʼi̱n semana tá semana ta saátu ña̱ ku̱ʼi̱n reunión. Saátu xi̱kusi̱íní-inii̱ ta xi̱taxiníi̱ tíxa̱ʼvi ndaʼa̱ Jehová xa̱ʼa̱ ña̱ ki̱xáʼíi̱ sákuaʼi̱ xa̱ʼa̱ra. Ta tá ni̱ya̱ʼa iin ku̱i̱ya̱ ni̱xa̱i̱ nda̱kuchii̱. Vitin xa̱a̱ 79 ku̱i̱ya̱i̱ ta kúnda̱a̱-inii̱ ña̱ nda̱ni̱ʼíi̱ religión ña̱ nda̱a̱. Iin ña̱ va̱ʼaní kúú ña̱ ta̱xi Jehová ndaʼíi̱ saáchi táxira kítáʼi̱n xíʼin na̱ ñuura na̱ ndásakáʼnu-ñaʼá”.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
