Na̱ hermano kunda̱a̱-inina ña̱ xa̱a̱ xa̱ʼndara tutu xíʼin ñá ni̱xi̱yo xíʼinra ta ñá íyo xíʼinra vitin kúú ñá síʼira. Ña̱ va̱ʼa kunda̱a̱-iniyó nda̱chun káʼa̱nyó ña̱yóʼo ná kotoyó ndáaña ni̱ka̱ʼa̱n ta̱ Jesús xa̱ʼa̱ na̱ sándakootáʼan ta tíndaʼa̱ tukuna.

Nu̱ú Mateo 19:9 ta̱ Jesús ni̱ka̱ʼa̱nra ndáa xa̱ʼa̱ kúú ña̱ kivi sandákootáʼan na̱ ti̱ndaʼa̱. Yóʼo káchiña: “Yi̱ʼi̱ káʼi̱n xíʼinndó ndiʼi ta̱ sándakoo ñá síʼi, tá su̱ví xa̱ʼa̱ ña̱ níkeʼéñá ku̱a̱chi kini kúúña, tá ná tindaʼa̱ra xíʼin inkañá ki̱ʼvira ku̱a̱chi”. Xíʼin ña̱ ni̱ka̱ʼa̱n ta̱ Jesús sákuaʼayó u̱vi̱ ña̱ʼa. Ña̱ nu̱ú, tá ni̱ki̱si̱ iin na̱ xa̱a̱ ti̱ndaʼa̱ xíʼin inkana saá kúú ña̱ kivi sandákootáʼanna. Ña̱ u̱vi̱, tá su̱ví xa̱ʼa̱ ña̱ níki̱ʼvina ku̱a̱chi kúú ña̱ sándákoo táʼanna ta tíndaʼa̱na xíʼin inkana saá kúú ña̱ kíʼvina ku̱a̱chi. *

Tá iin ta̱a kísi̱ra xíʼin inka ñaʼá ta sándakoora ñá síʼira, ¿á xi̱kuni̱ kachi ta̱ Jesús ña̱ kíndo̱o librera ña̱ tindaʼa̱ tukura? Va̱ásaví. Tá ta̱ ta̱a kúú ta̱ ni̱ki̱ʼvi ku̱a̱chi, ñá síʼira kivi ndaka̱xinñá á ixakáʼnu-iniñá xa̱ʼa̱ra á va̱ása. Tá ná va̱ása ixakáʼnu-iniñá xa̱ʼa̱ra ta ku̱a̱ʼa̱nñá nu̱ú na̱ chíñu ña̱ va̱ʼa sándakoo táʼanna, u̱vi̱ saána kindo̱o librena ña̱ tindaʼa̱ tukuna tá xa̱a̱ ná ta̱ʼnda̱ tutuna.

Tá ñá ñaʼá va̱ása kúni̱ñá sandákooñá yiíñá ta káʼa̱nñá ña̱ kúni̱ñá ixakáʼnu-iniñá xa̱ʼa̱ra. ¿Ndáaña kuu tá va̱ása xíínkara koora xíʼinñá ta xáʼndara tutu ña̱ ti̱ndaʼa̱na? Ta̱yóʼo va̱ása íyo librera nu̱ú Ndióxi̱ ña̱ ndikó tukura tindaʼa̱ra, saáchi kúni̱va ñá síʼira ixakáʼnu-iniñá xa̱ʼa̱ra. Soo tá tíndaʼa̱ tukura ni kúnda̱a̱va-inira ña̱ va̱ása kivi keʼéra ña̱yóʼo, kíʼvi tukura ku̱a̱chi á adulterio. Na̱ anciano ndaka̱xin tukuna na̱ koo comité judicial ña̱ va̱ʼa ka̱ʼa̱n tukuna xíʼinra xa̱ʼa̱ ku̱a̱chi ña̱ ni̱ki̱ʼvira (1 Cor. 5:1, 2; 6:9, 10).

Tá iin ta̱a tíndaʼa̱ tukura ní kúnda̱a̱-inira ña̱ yáʼandosóra ña̱ káʼa̱n tu̱ʼun Ndióxi̱, ¿ndáaña ndakanixi̱ní na̱ congregación xa̱ʼa̱ra ña̱ sa̱ndákoora ñá síʼira ta ti̱ndaʼa̱ra xíʼin inkañá? Nu̱ú Ndióxi̱, ¿á ndáyáʼvika ña̱ ti̱ndaʼa̱ra xíʼin ñá síʼira ñá nu̱ú? ¿Á kivika ixakáʼnu-ini ñá síʼira ñá nu̱ú xa̱ʼa̱ra á va̱ása? Xa̱ʼa̱ ña̱ ti̱ndaʼa̱ tukura, ¿á kíʼvi miíra ku̱a̱chi ta saátu ñá síʼira ñá u̱vi̱?

Tá ya̱chi̱ xi̱ndakanixi̱níyó ña̱ miíra xíʼin ñá síʼira ñá u̱vi̱ kíʼvivana ku̱a̱chi nani tá tákuka ñá síʼira ñá nu̱ú á tá ta̱ʼán tindaʼa̱ tukuñá á tá kǒo ku̱a̱chi kíʼviñá xíʼin inka ta̱a. Soo ta̱ Jesús va̱ása níka̱ʼa̱nvíra xa̱ʼa̱ ñá ñaʼá ñá ni̱ndo̱o i̱xaa yií tá ni̱ka̱ʼa̱nra xa̱ʼa̱ na̱ sándakootáʼan á na̱ ndíkó tuku tíndaʼa̱. Saáchi ña̱ ni̱ka̱ʼa̱nra kúú ña̱ tá sándakoo iin ta̱a ñá síʼira ni kǒova ku̱a̱chi níki̱ʼviñá ta tíndaʼa̱ra xíʼin inkañá, saá kúú ña̱ kíʼvira ku̱a̱chi. Xíʼin ña̱yóʼo xi̱kuni̱ kachi ta̱ Jesús, ña̱ kíʼvivara ku̱a̱chi xa̱ʼa̱ ña̱ sa̱ndákoora ñá síʼira ñá nu̱ú ta tíndaʼa̱ra xíʼin inkañá, ta ña̱ ti̱ndaʼa̱ra xíʼin ñá nu̱ú va̱ása ndáyáʼvikavíña.

 Tá iin ta̱a xáʼndara tutu xíʼin ñá síʼira ta tíndaʼa̱ra xíʼin inkañá, ñá síʼira ñá nu̱ú va̱ása kivikaví ixakáʼnu-iniñá xa̱ʼa̱ra á ka̱ʼa̱nñá ña̱ va̱ása kúni̱kavíñá kooñá xíʼinra. Ña̱kán, ñá síʼira ñá nu̱ú kǒoka ña̱ xíniñúʼu ndaka̱xinñá keʼéñá. Xa̱ʼa̱ ña̱yóʼo ni tákukava ñá síʼira ñá nu̱ú á ni ta̱ʼán tindaʼa̱ñá á ni kǒo ku̱a̱chi kini níki̱ʼviñá, na̱ congregación va̱ása ndakanikaví xi̱nína ña̱ kíʼvira ku̱a̱chi. *

Chí xa̱ʼa̱ ni̱ka̱ʼa̱nyó xa̱ʼa̱ iin ta̱ hermano, ta̱ ni̱ki̱si̱ xíʼin inka ñaʼá ta xa̱ʼa̱ ña̱yóʼo ni̱nda̱ta̱ tutu ña̱ ti̱ndaʼa̱ra xíʼin ñá síʼira. Soo, ¿ndáaña kuu tá iin ta̱ hermano va̱ása níki̱ʼvira ku̱a̱chi xíʼin inka ñaʼá, soo xáʼndara tutu xíʼin ñá síʼira ta tíndaʼa̱ra xíʼin inka ñaʼá? Á tá iin ta̱ hermano xáʼndara tutu ña̱ ti̱ndaʼa̱ra xíʼin ñá síʼira ta su̱ví xa̱ʼa̱ ña̱ níki̱sira xíʼin inka ñaʼá kúúña, chi tá xa̱a̱ xa̱ʼndana tutu xíʼin táʼanna saáví kúú ña̱ ni̱ki̱si̱ra xíʼin inka ñaʼá, ta ñá ni̱xi̱yo ñá síʼira kúni̱vañá ixakáʼnu-iniñá xa̱ʼa̱ra soo va̱ása xíínra chi tíndaʼa̱ra xíʼin inkavañá, ¿ndáaña kuu tá ná kuu u̱vi̱ saá ña̱ ni̱ka̱ʼa̱nyó xa̱ʼa̱ yóʼo? Xa̱ʼa̱ ña̱ xa̱ʼndara tutu xíʼin ñá síʼira ñá nu̱ú ta ti̱ndaʼa̱ra xíʼin inkañá, ni̱ki̱ʼvira ku̱a̱chi. Ta ña̱ ti̱ndaʼa̱ra xíʼin ñá síʼira ñá nu̱ú ndi̱ʼi-xa̱ʼa̱vaña. Ña̱kán, ña̱ ndáyáʼvi vitin kúú ña̱ ti̱ndaʼa̱ra xíʼin ñá síʼira ñá u̱vi̱. Nu̱ú tutu La Atalaya ña̱ 15 tí febrero ña̱ ku̱i̱ya̱ 1980, página 30 ni̱ka̱ʼa̱nña ña̱ “va̱ása kívi sandákoora ñá síʼira ñá u̱vi̱ ta ndakiʼin tukura ñá nu̱ú, saáchi xa̱ʼa̱ ña̱ nda̱tána tutu ta saátu xa̱ʼa̱ ku̱a̱chi ña̱ ni̱ki̱ʼvira ta ti̱ndaʼa̱ tukura, ndi̱ʼi-xa̱ʼa̱va ña̱ ti̱ndaʼa̱ra xíʼin ñá nu̱ú”.

Ña̱ sa̱kán na̱kunda̱a̱-iniyó nu̱ú artículo yóʼo va̱ása kúni̱ kachiña ña̱ va̱ása ndáyáʼví ña̱ ti̱ndaʼa̱yó nu̱ú Ndióxi̱, á ña̱ su̱ví ku̱a̱chi ndeéví kúú ña̱ sandáʼvitáʼan na̱ ti̱ndaʼa̱. Tá iin ta̱a xáʼndara tutu xíʼin ñá síʼira ni kǒova ku̱a̱chi níki̱ʼviñá xíʼin inka ta̱a ta ni miíra kǒo ku̱a̱chi níki̱ʼvira xíʼin inka ñaʼá, soo tándi̱ʼi tíndaʼa̱ra xíʼin inka ñaʼá ni kúnda̱a̱-inira ña̱ va̱ása kívi keʼéra ña̱yóʼo, na̱ anciano xíniñúʼu ndaka̱xinna na̱ koo comité judicial na̱ ndatiin ku̱a̱chi xíʼinra saáchi ni̱ki̱ʼvira ku̱a̱chi (tá iin ñá ndásakáʼnu Ndióxi̱ kúú ñá ti̱ndaʼa̱ra xíʼin, saátu ñáyóʼo xíniñúʼu ndatiinna ku̱a̱chi xíʼinñá chi ni̱ki̱ʼviñá ku̱a̱chi). Ni kǒokaví ku̱a̱chi kíʼvi na̱ sa̱kán ti̱ndaʼa̱ yóʼo, soo ta̱ hermano yóʼo ku̱a̱ʼání ku̱i̱ya̱ va̱ása kivi kuumiíra iin chiñu ti̱xin congregación. Chi xíniñúʼu kundatura nda̱a̱ ná nandósó-ini na̱ yiví xa̱ʼa̱ ña̱ ke̱ʼéra. Saátu xíniñúʼu kiʼinna kuenta ndáa ki̱ʼva kúni ñá xi̱kuu ñá síʼira xa̱ʼa̱ ña̱ sa̱ndáʼvirañá, ta saátu ndáa ki̱ʼva kúni na̱ se̱ʼe válíra na̱ sa̱ndákoora (Mal. 2:14-16).

Nu̱ú artículo yóʼo sa̱kúaʼayó ndáaña kivi kundoʼo iin na̱ hermano á iin ñá hermana tá xáʼndana tutu ña̱ ti̱ndaʼa̱na ni kǒova ku̱a̱chi níki̱ʼvina, ta tándi̱ʼi ndíkó tukuna tíndaʼa̱na. Xa̱ʼa̱ ña̱yóʼo va̱ʼaní keʼéyó tá ná kundiku̱nyó yichi̱ Jehová ta chindayáʼviyó ña̱ ti̱ndaʼa̱yó chi ña̱yóʼo iin ña̱ yi̱i̱ kúúña (Ecl. 5:4, 5; Heb. 13:4).