1. ¿Nda̱chun táxiyó comentario tá xáʼa̱nyó reunión?

 ¿NDA̱CHUN xáʼa̱nyó reunión? Saáchi kúni̱yó ndasakáʼnuyó Jehová (Sal. 26:12; 111:1). Tá xáʼa̱nyó reunión chíka̱a̱yó ndee̱ xíʼin táʼanyó chi tiempo ña̱ yo̱ʼvi̱ní kúú ña̱ ndóoyó (1 Tes. 5:11). Ta tá táxiyó comentario, saá kúú ña̱ kéʼéyó u̱vi̱ saá ña̱ ni̱ka̱ʼa̱nyó xa̱ʼa̱ yóʼo.

2. ¿Ama kúú ña̱ kivi taxiyó comentario ti̱xin reunión?

² Ndiʼi semana kivi taxiyó comentario tá xáʼa̱nyó reunión. Tá kúú reunión ña̱ xíyo sábado á domingo kivi taxiyó comentario tá xa̱a̱ káʼviyó Tutu Ña̱ Nátúʼun xíʼinyó. Ta saátu tá xíyo reunión ña̱ ma̱ʼñú semana kivi taxiyó comentarioyó tá xíyo táʼví ña̱ naní “Ná ka̱ʼa̱nyó xa̱ʼa̱ ña̱ chindeétáʼan xíʼinyó”. Ta ti̱xin Estudio ña̱ congregación ta saátu tá káʼviyó xa̱ʼa̱ inkaka ña̱ʼa nu̱ú ndáka̱tu̱ʼunna miíyó, kivi taxiyó comentario.

3. a) ¿Ndáaña kivi kasi nu̱úyó ña̱ taxiyó comentario? b) ¿Ndáa ki̱ʼva chíndeétáʼan Hebreos 10:24, 25 xíʼinyó?

³ Ndiʼiyó kúni̱yó taxiyó comentario ña̱ va̱ʼa ndasakáʼnuyó Jehová á ña̱ chikaa̱yó ndee̱ xíʼin na̱ hermanoyó. Soo íyo sava ña̱ kivi kasi nu̱úyó ña̱ keʼéyó ña̱yóʼo: ña̱ kivi kixáʼayó yi̱ʼvíníyó ta va̱ása taxikayó comentario, á ña̱ ku̱a̱ʼání yichi̱ ndániʼiyó ndaʼa̱yó ta sana kǒo táxina ndiʼi comentario ndaʼa̱yó. Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ hebreo, va̱xi iin ña̱ kivi chindeétáʼan xíʼinyó. Tá ni̱ka̱ʼa̱n ta̱ Pablo xa̱ʼa̱ ña̱ ndáyáʼviní ku̱ʼu̱nyó reunión, ni̱ka̱ʼa̱nra xa̱ʼa̱ ña̱ ndáyáʼviní “chika̱a̱yó ndee̱ xíʼin táʼanyó” (kaʼvi Hebreos 10:24, 25). Tá  ná ndakanixi̱níyó ña̱ kivi chindeétáʼan comentarioyó xíʼin na̱ hermano ni loʼoníña, saá kúú ña̱ va̱ása yi̱ʼvíkayó taxiyóña. Soo tá kǒo kívi taxiyó comentario nda̱a̱ táki̱ʼva kúni̱yó, kusi̱íníva-iniyó tá xítoyó ña̱ táxi inkana comentario (1 Ped. 3:8).

4. ¿Ndáa u̱ni̱ ña̱ʼa sakúaʼayó nu̱ú artículo yóʼo?

⁴ Nu̱ú artículo yóʼo siʼna sakúaʼayó ndáa ki̱ʼva chika̱a̱yó ndee̱ xíʼin táʼanyó tá ñúʼuyó ti̱xin iin congregación ña̱ loʼoní, nu̱ú kivi taxiyó ku̱a̱ʼání comentario. Tándi̱ʼi, sakúaʼayó ndáa ki̱ʼva taxiyó comentario ti̱xin iin congregación ña̱ káʼnuní, nu̱ú íyo ku̱a̱ʼání na̱ hermano. Ta so̱ndíʼi sakúaʼayó ndáa ki̱ʼva koo comentarioyó ña̱ va̱ʼa chika̱a̱ña ndee̱ xíʼin inkana.

5. ¿Ndáaña kivi keʼéyó ña̱ va̱ʼa chika̱a̱yó ndee̱ xíʼin táʼanyó ni loʼo kúúyó ti̱xin reunión?

⁵ Nu̱ú íyo iin grupo á iin congregación ña̱ loʼoní, sana loʼova kúú na̱ kivi taxi comentario ña̱ va̱ʼa chindeétáʼanna xíʼin ta̱ hermano ta̱ kéʼé pregunta. Ta sana ta̱ hermano yóʼo xíniñúʼu naʼá kundatura ña̱ va̱ʼa ndaniʼi iinna ndaʼa̱na. Tá kǒo ku̱a̱ʼá na̱ taxi comentario ña̱yóʼo kivi sándakavaña-iniyó ta va̱ása kama ndiʼi reunión. ¿Ndáaña kivi keʼéyó tá kúu ña̱yóʼo? Ná koo tu̱ʼvayó ña̱ va̱ʼa ndakuiinyó ku̱a̱ʼání yichi̱, chi tá saá ná keʼéyó chika̱a̱yó ndee̱ xíʼin inkana ña̱ kuni̱na taxina comentario.

6, 7. ¿Ndáaña kivi keʼún ña̱ va̱ása yi̱ʼvíún tá táxiún comentario?

⁶ Ku̱a̱ʼání na̱ hermano tá ndakani kuití xi̱nína ña̱ taxina iin comentario, ndeéní kíxáʼa yíʼvina. Tá saá ndóʼún, ¿ndáaña kivi keʼún? Ndukú inkaka ña̱ʼa ña̱ kivi chindeétáʼan xíʼún ña̱ va̱ása yi̱ʼvíníún tasaá va̱ʼa chika̱ún ndee̱ xíʼin inkana tá ná taxiún comentario.

⁷ Iin ña̱ kivi chindeétáʼan xíʼún kúú ña̱ kaʼviún tutu La Atalaya b ña̱ xa̱a̱ ka̱na tá ya̱chi̱, chi nu̱ú ña̱yóʼo káʼa̱nña xíʼinyó ña̱ xa̱a̱ ya̱chi̱ka ná kaʼvi kúeeyó ña̱ va̱ʼa taxiyó comentario (Prov. 21:5). Tá ná kunda̱a̱ka-iniún ndáaña káʼa̱n ña̱ káʼviún xa̱ʼa̱, va̱ása ixayo̱ʼvi̱ña xíʼún taxiún comentario. Inka ña̱ kivi keʼún kúú ña̱ loʼo kuití ka̱ʼún (Prov. 15:23; 17:27). Chi tá loʼo ná ka̱ʼún va̱ása yi̱ʼvíún saá. Ta saátu iin comentario ña̱ va̱ása káni̱ní chíndeétáʼanña xíʼin na̱ hermano ña̱ kunda̱a̱-inina xíʼin ña̱ káʼa̱nyó, chi tá ku̱a̱ʼání káʼa̱nyó kǒo kunda̱a̱-inina xíʼin ndiʼiña. Tá loʼo ná ka̱ʼún ta xíʼin tu̱ʼun miíún ka̱ʼún, inkana kunina ña̱ xa̱a̱ ya̱chi̱ka ka̱ʼvi kúeún ña̱kán va̱ʼaní kúnda̱a̱-iniún xíʼinña.

8. ¿Ndáaña ndóʼo Jehová tá xítora ña̱ chíka̱a̱níún ndee̱ ña̱ taxiún comentario?

⁸ Tá xa̱a̱ ke̱ʼún ña̱ xa̱a̱ ni̱ka̱ʼa̱nyó xa̱ʼa̱ yóʼo ta ndákundeún yíʼviún ña̱ taxiún ku̱a̱ʼá comentario, ¿ndáaña kivi keʼékaún? Ndakaʼán chi Jehová kúsi̱íníva-inira tá xítora ña̱ chíka̱a̱níún ndee̱ ña̱ taxiún comentario (Luc. 21:1-4). Jehová kǒo kúni̱ra ña̱ ná ixandúxaníún xíʼin miíún tá kǒo kívi keʼún iin ña̱ʼa (Filip. 4:5). Ña̱kán ndakanixi̱ní nda̱saa comentario kivi taxiún ta ka̱ʼa̱n xíʼin Jehová ná chindeétáʼanra xíʼún ña̱ va̱ʼa kuchiñún keʼún ña̱yóʼo. Ta ña̱ va̱ʼa kixáʼún taxiún comentario, loʼo kuitíva kivi ka̱ʼún.

9. ¿Ndáaña kivi kundoʼoyó ti̱xin iin congregación ña̱ káʼnuní?

⁹ Tá ku̱a̱ʼání kúú na̱ publicador ñúʼu ti̱xin congregación nu̱ú xáʼún, sana inkava kúú tu̱ndóʼo ña̱ íyo nu̱ún. Sana sava yichi̱  kǒo nda̱a̱ ni iin comentario táxiún saáchi ndiʼina kúni̱ ka̱ʼa̱n. Ná ka̱ʼa̱nyó xa̱ʼa̱ iin ñá hermana ñá naní Daniela, ñáyóʼo kútóoníñá taxiñá comentario ti̱xin reunión. c Nu̱ú ñáyóʼo ndáyáʼviní ña̱ taxiñá comentario chi saá kúú ña̱ ndásakáʼnuñá Jehová, chíka̱a̱ñá ndee̱ xíʼin na̱ hermano ta chíndeétáʼantuña xíʼin miíñá ña̱ kǒo nandósóñá xa̱ʼa̱ ña̱ sákuaʼañá. Soo tá na̱samañá iin congregación ña̱ káʼnuní, va̱ása níkivi taxikañá ku̱a̱ʼá comentario ta sava yichi̱ nda̱a̱ ni iinña va̱ása níkivi taxiñá. Ñáyóʼo káchiñá: “Ndeéní xi̱ndi̱ʼi̱-inii̱ ta xi̱kusuchí-inii̱, chi xi̱ndakanixi̱níi̱ ña̱ ki̱ndaana iin chiñu ña̱ ndáyáʼviní ndaʼíi̱. Tá xa̱a̱ ku̱a̱ʼání yichi̱ va̱ása táxina comentario ndaʼa̱yó, xáa̱yó ndákanixi̱níyó ña̱ va̱ása kúni̱ na̱ hermano kán taxina comentario ndaʼa̱yó”.

10. ¿Ndáaña kivi keʼún ña̱ va̱ʼa taxina ku̱a̱ʼáka comentario ndaʼún?

¹⁰ ¿Á xa̱a̱ ndóʼún nda̱a̱ táki̱ʼva ndóʼo ñá Daniela? Tá saá ndóʼún, sana ndákanixi̱níún ña̱ va̱ása ndaniʼikaún ndaʼún chi kǒo xíínna taxina comentario ndaʼún. Kǒo ndakava-iniún tá ndóʼún ña̱yóʼo. ¿Ndáaña kivi keʼún ña̱ va̱ʼa taxiún comentario? Ku̱a̱ʼá va̱ʼa comentario taváún. Tasaá tá ná kǒo taxina ña̱ nu̱ú ndaʼún, xa̱a̱ kúúmiíún inka ña̱ kivi taxiún. Tá xa̱a̱ káʼviún Tutu Ña̱ Nátúʼun xíʼinyó, kiʼin kuenta ndáa ki̱ʼva kítáʼan iin tá iin párrafo xíʼin títuloña. Tasaá ndiʼi tiempo koo comentario ña̱ taxiún. Inka ña̱ kivi keʼún kúú ña̱ xa̱a̱ kaʼvi kúeún párrafo ña̱ yo̱ʼvi̱ka káʼa̱n, ta kivi nandukú va̱ʼún xa̱ʼa̱ña ta ña̱yóʼo kivi ka̱ʼún xa̱ʼa̱ (1 Cor. 2:10). Chi xa̱ʼa̱ ña̱ yo̱ʼvi̱ní ndakaniyó xa̱ʼa̱ ña̱yóʼo, loʼoní na̱ hermano táxi comentario. Soo, ¿ndáaña kivi keʼún tá xa̱a̱ ke̱ʼún ndiʼi ña̱ xa̱a̱ ni̱ka̱ʼa̱nyó xa̱ʼa̱ yóʼo ta ni saá kǒo comentario táxina ndaʼún? Tá kúma̱níka kixáʼa reunión ka̱ʼa̱n xíʼin ta̱ hermano ta̱ taxi Tutu Ña̱ Nátúʼun xíʼinyó ndáa párrafo kúni̱ún taxiún iin comentario.

11. Nda̱a̱ táki̱ʼva káchi Filipenses 2:4, ¿ndáaña kivi keʼéyó?

¹¹ (Kaʼvi Filipenses 2:4). Ndióxi̱ xi̱niñúʼura ta̱ apóstol Pablo ña̱ va̱ʼa ka̱ʼa̱nra xíʼin na̱ hermano ña̱ ná kundi̱ʼi̱-inina xa̱ʼa̱ inkana. ¿Ndáa ki̱ʼva kundiku̱nyó consejo yóʼo ti̱xin  reunión? Ná ndakaʼányó chi íyo inkaka na̱ hermano na̱ kúni̱ taxi comentario.

12. ¿Ndáaña kivi keʼéyó ña̱ va̱ʼa ná taxi inkana comentario? (Koto na̱ʼná).

¹² Ná ka̱ʼa̱nyó xa̱ʼa̱ iin ejemplo ña̱ kivi chindeétáʼan xíʼinyó kunda̱a̱-iniyó xa̱ʼa̱ ña̱yóʼo. Tá nátúʼún xíʼin na̱ migoún, su̱ví iinlá miíún kúú na̱ káʼa̱n chi saátu táxiún ña̱ ka̱ʼa̱n na̱yóʼova. Saáchi ña̱ kúni̱ún kúú ña̱ ndiʼina ná kusi̱í-ini tá nátúʼun xíʼin táʼanndó. Ta ki̱ʼva saá ndóʼoyó ti̱xin reunión. Kúni̱yó ña̱ ndiʼi na̱ hermano ná taxina comentario. Tá táxiyó ña̱ ná taxi na̱ hermanoyó comentario, saá kúú ña̱ chíka̱a̱yó ndee̱ xíʼinna (1 Cor. 10:24). Ná kotoyó ndáaña kivi keʼéyó ña̱ va̱ʼa ku̱a̱ʼáka na̱ hermano ná taxina comentario ti̱xin reunión.

13. ¿Ndáaña kivi keʼéyó ña̱ va̱ʼa ku̱a̱ʼákana ná taxi comentario?

¹³ Tá ná taxiyó comentario, loʼo ná koo ña̱ ka̱ʼa̱nyó. Chi saá kindo̱o tiempo ña̱ taxi inka na̱ hermano comentario. Na̱ anciano xíʼin na̱ xa̱a̱ ku̱a̱ʼá tiempo ñúʼu ti̱xin ñuu Ndióxi̱ kivi chinúuna iin yichi̱ va̱ʼa nu̱úyó tá táxina comentario. Válí ná koo comentario ña̱ taxiyó ta ná kǒo ka̱ʼa̱nyó xa̱ʼa̱ ku̱a̱ʼání ña̱ʼa. Tá ná ka̱ʼún xa̱ʼa̱ ndiʼi ña̱ va̱xi nu̱ú párrafo, kǒoka ña̱ kivi ka̱ʼa̱n inka na̱ hermano xa̱ʼa̱. Tá kúú, nu̱ú ña̱ párrafo yóʼo va̱xi u̱vi̱ ña̱ kivi kundiku̱nyó: ña̱ válí ná koo comentarioyó ta ná kǒo ka̱ʼa̱nyó xa̱ʼa̱ ku̱a̱ʼání ña̱ʼa. Ña̱kán, tá siʼna ndaʼa̱ miíún ta̱xina comentario nu̱ú ña̱ párrafo yóʼo, ¿á kivi ka̱ʼún xa̱ʼa̱ iin kuití ña̱ ni̱ka̱ʼa̱nyó xa̱ʼa̱ yóʼo?

14. ¿Ndáaña xíniñúʼu kiʼinyó kuenta xíʼin tá ku̱a̱ʼání yichi̱ kúni̱yó ndaniʼiyó ndaʼa̱yó? (Koto na̱ʼná).

¹⁴ Ná kiʼinníyó kuenta nda̱saa yichi̱ ndániʼiyó ndaʼa̱yó tá kúni̱yó taxiyó comentario. Chi tá ku̱a̱ʼání yichi̱ ndániʼiyó ndaʼa̱yó, sana sandíʼi̱yó-ini ta̱ hermano ta̱ sáya̱ʼa reunión, ta xa̱ʼa̱ ña̱kán sana taxira ku̱a̱ʼá comentario ndaʼa̱yó ta ni va̱ása taxikaraña ndaʼa̱ na̱ kúma̱níka taxi comentario. Ta sana inkana ndakava-inina ta va̱ása kúni̱kana taxina comentario (Ecl. 3:7).

15. a) ¿Ndáaña keʼéyó tá kǒo táxina comentario ndaʼa̱yó? b) Ta̱ hermano ta̱ kéʼé pregunta, ¿ndáaña xíniñúʼu kiʼinra kuenta xíʼin? (Koto recuadro ña̱ naní “ Na̱ hermano na̱ kéʼé pregunta ti̱xin reunión, ¿ndáaña xíniñúʼu kiʼinna kuenta xíʼin?”).

 ¹⁵ Tá ku̱a̱ʼání na̱ hermano ndániʼina ndaʼa̱na ña̱ taxina comentario, sana loʼova comentario taxina ndaʼa̱yó. Ta sava yichi̱ nda̱a̱ ni iin comentario kǒo nítaxiyó ta xa̱a̱ ndi̱ʼiva reunión. Sana sakúsuchíva ña̱yóʼo iniyó, soo ná kǒo sa̱a̱yó tá va̱ása táxina comentario ndaʼa̱yó (Ecl. 7:9).

16. ¿Ndáaña kivi keʼéyó ña̱ va̱ʼa chika̱a̱yó ndee̱ xíʼin na̱ táxi comentario?

¹⁶ Ni tá kǒo kívi taxiyó ku̱a̱ʼání comentario, kiviva kuniso̱ʼoyó ña̱ táxi inkana, ta tá ná ndiʼi reunión kivi ka̱ʼa̱nyó xíʼinna ña̱ va̱ʼaní comentario ta̱xina. Ta tu̱ʼun ña̱ ka̱ʼa̱nyó xíʼin na̱yóʼo kivi chika̱a̱níña ndee̱ xíʼinna. Ta nda̱a̱ táki̱ʼva íyo ña̱ taxiyó comentario saátu íyo ña̱yóʼova (Prov. 10:21). Tá ná ka̱ʼa̱nyó xíʼin na̱ hermanoyó ña̱ va̱ʼaní comentario táxina, ña̱yóʼo kivi chika̱a̱níña ndee̱ xíʼinna.

17. a) ¿Ndáaña kivi keʼé na̱ íyo se̱ʼe? b) Nda̱a̱ táki̱ʼva xi̱toyó nu̱ú video, ¿ndáa ku̱mí ña̱ʼa kúú ña̱ xíniñúʼu keʼéyó ña̱ va̱ʼa taxiyó iin comentario? (Koto nota).

¹⁷ ¿Ndáa inkaka ña̱ xíniñúʼu keʼéyó ña̱ va̱ʼa chika̱a̱yó ndee̱ xíʼin táʼanyó ti̱xin reunión? Tá íyo na̱ va̱lí se̱ʼún, chindeétáʼan xíʼinna ña̱ ná taxina comentario ña̱ kivi taxina (Mat. 21:16). Sava yichi̱ ti̱xin reunión káʼa̱nna ndáaña  kivi keʼé na̱ ti̱ndaʼa̱ tá íyo tu̱ndóʼo nu̱úna á ndáa ki̱ʼva kundaayó miíyó nu̱ú ña̱ kini. Soo ni ná ka̱ʼa̱nvana xa̱ʼa̱ ña̱yóʼo, sana koova iin á u̱vi̱ párrafo nu̱ú kivi taxi na̱ va̱lí comentario. Saátu kivi ka̱ʼún xíʼin na̱ va̱lí se̱ʼún nda̱chun su̱ví ndiʼiví yichi̱ kivi taxina comentario ndaʼa̱na. Tá ná ka̱ʼún ña̱yóʼo xíʼin na̱ va̱lí se̱ʼún, kǒo ndakava-inina tá ná taxina comentario ndaʼa̱ inkana (1 Tim. 6:18). d

18. ¿Ndáaña va̱ása xíniñúʼu keʼéyó tá táxiyó comentario? (Proverbios 27:2).

¹⁸ Ndiʼiyó kivi taváyó comentario ña̱ kivi ndasakáʼnu Jehová ta chika̱a̱ña ndee̱ xíʼin na̱ hermano (Prov. 25:11). Ni sava yichi̱ kiviva ka̱ʼa̱nyó xa̱ʼa̱ ña̱ ndóʼo miíyó, soo va̱ása xíniñúʼu ku̱a̱ʼání tiempo ka̱ʼa̱nyó xa̱ʼa̱ miíyó (kaʼvi Proverbios 27:2; e 2 Cor. 10:18). Ta ta̱ xíniñúʼu ka̱ʼa̱nkayó xa̱ʼa̱ kúú Jehová, xa̱ʼa̱ tu̱ʼunra xíʼin xa̱ʼa̱ na̱ ñuura (Apoc. 4:11). Soo tá íyo iin pregunta ña̱ káʼa̱n xíʼinyó ña̱ ná ka̱ʼa̱nyó xa̱ʼa̱ ña̱ ndóʼo miíyó, kiviva ka̱ʼa̱nyó xa̱ʼa̱ña. Nu̱ú inka párrafo va̱xi iin ejemplo ña̱ káʼa̱n xa̱ʼa̱ ña̱yóʼo.

19. a) ¿Ndáaña keʼéyó tá ndíʼi̱-iniyó xa̱ʼa̱ na̱ hermanoyó? (Romanos 1:11, 12). b) ¿Nda̱chun kútóún taxiún comentario ti̱xin reunión?

¹⁹ Ni kǒova iin ña̱ káʼa̱n xíʼinyó ndáa ki̱ʼva taxiyó comentario, soo ndiʼiyó kivi viíní koo comentario ña̱ taxiyó ña̱ va̱ʼa chika̱a̱yó ndee̱ xíʼin inkana. Sava na̱ hermano xíniñúʼu chika̱a̱na ndee̱ ña̱ ku̱a̱ʼáka comentario taxina. Ta savana kǒo ndakava-inina tá loʼo comentario táxina ta kúsi̱í-inina ña̱ íyo ku̱a̱ʼá na̱ táxi comentario. Tá ndíʼi̱-iniyó xa̱ʼa̱ na̱ hermanoyó, saá kúú ña̱ va̱ʼaní chíka̱a̱yó ndee̱ xíʼinna (kaʼvi Romanos 1:11, 12).