1. ¿Ndáa ki̱ʼva ni̱na̱ʼa̱ iin ta̱ loʼo ña̱ kándíxaníra ña̱ ndataku na̱ ni̱xi̱ʼi̱?

 IIN TA̱ loʼo ta̱ naní Matthew ndóʼora iin kue̱ʼe̱ ña̱ ndeéní ta xa̱a̱ ku̱a̱ʼání yichi̱ ndáta na̱ doctor miíra. Tá kúúmiíra u̱xa̱ ku̱i̱ya̱, ku̱u iin ña̱ʼa ña̱ ndákanda̱ní-iniyó xíʼin. Saáchi iin ki̱vi̱ tá xítora programa ña̱ JW Broadcasting^® xíʼin na̱ veʼera, xi̱tona iin video ña̱ yaa nu̱ú kée na̱ hermano ndákiʼinna na̱ nda̱taku nu̱ú ñuyǐví xa̱á. b Tá ndi̱ʼi ña̱ video kán, ta̱ Matthew ku̱yatinra nu̱ú na̱ yivára, ti̱inra ndaʼa̱na tasaá ni̱ka̱ʼa̱nra xíʼinna: “Nu̱ú video yóʼo xi̱niyó ña̱ tá ná kuvii̱ ndatakuvai̱, ña̱kán kundatundó yi̱ʼi̱”. ¿Á ndákanixi̱níndó ndáa ki̱ʼva ku̱ni na̱ yivá ta̱ loʼo yóʼo tá xi̱niso̱ʼona ña̱ ni̱ka̱ʼa̱nra ña̱ kándíxaníra ña̱ ndataku na̱ ni̱xi̱ʼi̱? Nu̱ú ta̱ Matthew iin ña̱ ndixaní kúú ña̱ ndataku na̱ ni̱xi̱ʼi̱.

2, 3. ¿Nda̱chun iin ña̱ va̱ʼa kúú ña̱ ndakanixi̱níyó xa̱ʼa̱ ña̱ ndataku na̱ ni̱xi̱ʼi̱?

² Iin ña̱ va̱ʼaní kúú ña̱ taváyó tiempo ña̱ ndakanixi̱níyó xa̱ʼa̱ ña̱ káʼa̱n Ndióxi̱ sandátakura na̱ ni̱xi̱ʼi̱ (Juan 5:28, 29). ¿Nda̱chun? Saáchi va̱ása kúnda̱a̱-iniyó ndáaña kivi kundoʼoyó. Kivi kiʼin iin kue̱ʼe̱ ndeé miíyó á iin kama kuití kuvi na̱ veʼeyó (Ecl. 9:11; Sant. 4:13, 14). Ta ña̱ káʼa̱n Ndióxi̱ sandátakura na̱ ni̱xi̱ʼi̱, ña̱yóʼo kivi chindeétáʼanníña xíʼinyó (1 Tes. 4:13). Biblia káʼa̱nña xíʼinyó ña̱ va̱ʼaní xíni̱ Jehová miíyó ta kúʼvi̱ní-inira xínira miíyó (Luc. 12:7). Jehová va̱ʼaní xíni̱ra miíyó, xa̱ʼa̱ ña̱kán tá ná sandátakura miíyó kuumiíyó ndiʼi ña̱ va̱ʼa ña̱ xi̱kuumiíyó ta ndakaʼányó xa̱ʼa̱ ndiʼi ña̱ʼa. Ta xa̱ʼa̱ ña̱ kúʼvi̱ní-inira xínira miíyó káʼa̱nra taxira ña̱ kutakuyó ndiʼi tiempo. Ta ni tá ni̱xi̱ʼi̱yó kivi sandátakura miíyó.

³ Nu̱ú artículo yóʼo sakúaʼayó nda̱chun kúú ña̱ kivi kandíxayó ña̱ ndataku na̱ ni̱xi̱ʼi̱. Saátu kotoyó texto nu̱ú ka̱na  ña̱ artículo yóʼo, chi ña̱yóʼo ndasandakúkaña ña̱ kándíxayó Ndióxi̱. Ña̱ texto yóʼo káchiña: “Ndatakuva ku̱ʼvaún” (Juan 11:23). Tándi̱ʼi, saá kotoyó ndáaña kivi keʼéyó ña̱ va̱ʼa kǒo kaka-iniyó ña̱ ndataku na̱ ni̱xi̱ʼi̱.

4. ¿Ndáaña xíniñúʼu kandíxayó tá káʼa̱nna keʼéna iin ña̱ʼa xa̱ʼa̱yó? Ka̱ʼa̱n xa̱ʼa̱ iin ejemplo.

⁴ Ña̱ va̱ʼa kandíxayó iin ña̱ káʼa̱nna xíʼinyó, siʼna xíniñúʼu kotoyó á ndixa kúni̱na keʼéna ña̱ káʼa̱nna xíʼinyó ta á kúúmiína ndee̱ ña̱ saxínunaña á ña̱ keʼénaña. Ná ndakanixi̱níyó ña̱ ndi̱ʼi-xa̱ʼa̱ veʼeyó xa̱ʼa̱ ña̱ kininí ku̱un sa̱vi̱. Ta iin na̱ migoyó ni̱ka̱ʼa̱nna xíʼinyó ña̱ chindeétáʼanna xíʼinyó ña̱ sandáʼayó veʼeyó. Kúnda̱a̱va-iniyó ña̱ kúni̱na chindeétáʼanna xíʼinyó ta kiviva keʼéna ña̱yóʼo. Ta saátu xíni̱nína keʼéna iin veʼe ta kúúmiína ndiʼi ña̱ʼa ña̱ va̱ʼa keʼéna ña̱yóʼo, xa̱ʼa̱ ña̱kán kúnda̱a̱-iniyó ña̱ kiviva chindeétáʼanna xíʼinyó. Ña̱kán kándíxavayó ña̱ káʼa̱nna keʼéna xa̱ʼa̱yó. ¿Á saá xíniñúʼu kandíxaníyó ña̱ káʼa̱n Ndióxi̱ sandátakura na̱ ni̱xi̱ʼi̱? ¿Á ndixa kúni̱ Ndióxi̱ sandátakura na̱ ni̱xi̱ʼi̱ ta kúúmiíra ndee̱ ña̱ keʼéraña?

5, 6. ¿Nda̱chun va̱ʼa kándíxayó ña̱ kúni̱va Jehová sandátakura na̱ ni̱xi̱ʼi̱?

⁵ ¿Á kúni̱ Ndióxi̱ sandátakura na̱ ni̱xi̱ʼi̱? Kúni̱vara. Ta̱kán chi̱ndeétáʼanra xíʼin sava na̱ ka̱ʼyí Biblia ña̱ ka̱ʼa̱nna xa̱ʼa̱ ña̱ ndataku na̱ ni̱xi̱ʼi̱ (Is. 26:19; Os. 13:14; Apoc. 20:11-13). Ta tá káʼa̱n Jehová keʼéra iin ña̱ʼa, sáxi̱nuvaraña (Jos. 23:14). Jehová kúni̱níra sandátakura na̱ ni̱xi̱ʼi̱. Soo, ¿nda̱chun va̱ʼa káʼa̱nyó ña̱yóʼo?

⁶ Ná ndakanixi̱níyó xa̱ʼa̱ ña̱ ni̱ka̱ʼa̱n ta̱ Job. Ta̱kán xi̱kunda̱a̱-inira ña̱ tá ná kuvira, Jehová kusi̱íní-inira sandátakurara (Job 14:14, 15, nota). Saátu kúni̱ní Jehová sandátakura na̱ ndásakáʼnu miíra na̱ xa̱a̱ ni̱xi̱ʼi̱. Kúni̱níra sandátakurana ta va̱ása kuumiíkana kue̱ʼe̱ ta si̱íní kutakuna. Soo, ¿ndáaña keʼé Jehová xa̱ʼa̱ ndiʼi na̱ ni̱xi̱ʼi̱ na̱ va̱ása níkivi sakúaʼa xa̱ʼa̱ra? Jehová kúni̱tura sandátakura na̱yóʼova (Hech. 24:15). Kúni̱ra ná xa̱a̱na koona migora ta kutakuna ndiʼi tiempo nu̱ú ñuʼú yóʼo (Juan 3:16). Ña̱kán kúnda̱a̱-iniyó ña̱ kúni̱níva yiváyó Jehová sandátakura na̱ ni̱xi̱ʼi̱.

7, 8. ¿Nda̱chun va̱ʼa kúnda̱a̱-iniyó ña̱ kúúmií Jehová ndee̱ ña̱ sandátakura na̱ ni̱xi̱ʼi̱?

⁷ ¿Á kúúmií Jehová ndee̱ ña̱ sandátakura na̱ ni̱xi̱ʼi̱? Kúúmiívaraña. Miíra kúú ta̱ kúúmií ndiʼi ndee̱ (Apoc. 1:8). Jehová kúúmiíra ndee̱ ña̱ sandíʼi-xa̱ʼa̱ra ndiʼi na̱ sáa̱-ini xíni miíra, ta nda̱a̱ ña̱ xíʼi̱yó kuchiñura sandíʼi-xa̱ʼa̱ra (1 Cor. 15:26). Ndúndakúní-iniyó tá kúnda̱a̱-iniyó xa̱ʼa̱ ña̱yóʼo ta saátu sándi̱koníña-iniyó. Ná kotoyó ña̱ ndo̱ʼo ñá ku̱ʼvayó Emma Arnold. Ñáyóʼo xíʼin na̱ veʼeñá ni̱xo̱ʼvi̱nína tá ni̱xi̱yo ña̱ Segunda Guerra Mundial. Ta ña̱ va̱ʼa sandíkoñá-ini ñá loʼo se̱ʼeñá xa̱ʼa̱ ña̱ ni̱xi̱ʼi̱ na̱ veʼená, ña̱yóʼo ni̱ka̱ʼa̱nñá xíʼinñá: “Tá na̱ yiví na̱ xa̱a̱ ni̱xi̱ʼi̱ va̱ása kívi ndatakukana, ña̱yóʼo kúni̱ kachiña ña̱ ndakúka ña̱ xíʼi̱yó nu̱úka Ndióxi̱, soo kúnda̱a̱va-iniyó ña̱ ndakúkava Jehová”. Ta̱kán kúú ta̱ ta̱xi ña̱ tákuyó, ña̱kán kúúmiíra ndee̱ ña̱ sandátakura na̱ ni̱xi̱ʼi̱.

⁸ Saátu kándíxayó ña̱ sandátaku Jehová na̱ ni̱xi̱ʼi̱, chi ta̱kán va̱ʼaní ndákaʼánra xa̱ʼa̱ ndiʼi ña̱ʼa. Ña̱ Biblia káʼa̱nña xa̱ʼa̱ Jehová ña̱ káʼa̱nra ki̱vi̱ iin tá iin ki̱mi (Is. 40:26). Ta̱kán ndákaʼánra ndáa ki̱ʼva ni̱xi̱yo ndiʼi na̱ ni̱xi̱ʼi̱ (Job 14:13; Luc. 20:37, 38). Ta tá ná sandátakurana, kivi ndakaʼánra ndáa ki̱ʼva ni̱xi̱yo, ndáaña va̱ʼa xi̱kuumiína ta ndáaña xi̱keʼéna.

9. ¿Nda̱chun kándíxaún ña̱ káʼa̱n Ndióxi̱ sandátakura na̱ ni̱xi̱ʼi̱?

⁹ Nda̱a̱ táki̱ʼva xa̱a̱ sa̱kúaʼayó, kiviva kandíxayó ña̱ ndataku na̱ ni̱xi̱ʼi̱, chi kúnda̱a̱-iniyó  ña̱ kúni̱va Jehová sandátakura na̱ ni̱xi̱ʼi̱ ta kúúmiítura ndee̱ ña̱ keʼéra ña̱yóʼo. Inka ña̱ chindeétáʼan xíʼinyó ña̱ kandíxayó ña̱ sandátakura na̱ ni̱xi̱ʼi̱ kúú ña̱ xa̱a̱ sa̱ndátakura sava na̱ yiví. Tiempo xi̱naʼá Jehová ta̱xira ndee̱ ndaʼa̱ sava na̱ ta̱a ña̱ sandátakuna na̱ ni̱xi̱ʼi̱. Tá kúú, ta̱xira ndee̱ ndaʼa̱ ta̱ Jesús ña̱ keʼéra ña̱yóʼo. Ná kotoyó ndáa ki̱ʼva sa̱ndátaku ta̱ Jesús sava na̱ yiví. Ña̱ káʼa̱n xa̱ʼa̱ ña̱yóʼo va̱xiña nu̱ú Juan capítulo 11.

10. ¿Ndáaña ku̱u ñuu Betania nani xíka ta̱ Jesús nátúʼunra xa̱ʼa̱ Ndióxi̱ inka ñuu, ta ndáaña nda̱kaxinra ke̱ʼéra? (Juan 11:1-3).

¹⁰ (Kaʼvi Juan 11:1-3). Ta̱ Jesús ni̱xi̱yo sava na̱ migora chí Betania: ta̱ Lázaro xíʼin u̱vi̱ ná ku̱ʼvara, ñá María xíʼin ñá Marta (Luc. 10:38-42). Tá xa̱a̱ ku̱a̱ʼa̱n ndíʼi ku̱i̱ya̱ 32, ta̱ Lázaro ki̱xáʼa ndeéndóʼora ta ná ku̱ʼvara ki̱xáʼa ndíʼi̱ní-ininá. Ta ti̱ʼvíná chiñu ku̱a̱ʼa̱n nu̱ú ta̱ Jesús, ta ta̱kán íyora chí inka táʼví yuʼú tá yu̱ta Jordán. Ta ki̱ʼva u̱vi̱ ki̱vi̱ví ku̱ʼu̱nyó tasaá xa̱a̱yó kán (Juan 10:40). Soo ni̱xi̱ʼi̱va ta̱ Lázaro tá ni̱xa̱a̱na xíʼin chiñu nu̱ú ta̱ Jesús. Ni ku̱ndaa̱-ini ta̱ Jesús ña̱ ni̱xi̱ʼi̱ migora ta̱ Lázaro, u̱vi̱ka ki̱vi̱ ki̱ndoo̱ra ñuu kán ta saáví nda̱kiʼinra ku̱a̱ʼa̱nra chí Betania. Ta xa̱a̱ ku̱míví ki̱vi̱ ni̱xi̱ʼi̱ ta̱ Lázaro tá ni̱xa̱a̱ra ñuu Betania. Ta ña̱ xi̱kuni̱ ta̱ Jesús keʼéra kúú iin ña̱ va̱ʼa xa̱ʼa̱ na̱ migora ta xíʼin ña̱yóʼo ndukáʼnu Jehová (Juan 11:4, 6, 11, 17).

11. ¿Ndáaña kivi keʼéyó xa̱ʼa̱ na̱ migoyó xíʼin ña̱ sa̱kúaʼayó nu̱ú relato yóʼo?

¹¹ ¿Ndáaña kivi keʼéyó xa̱ʼa̱ na̱ migoyó xíʼin ña̱ sa̱kúaʼayó nu̱ú relato yóʼo? Tá chi̱ndaʼá ñá María xíʼin ñá Marta chiñu ku̱a̱ʼa̱n nu̱ú ta̱ Jesús, va̱ása níka̱ʼa̱nná xíʼinra ña̱ ku̱ʼu̱nra chí ñuu Betania. Chi ña̱ ni̱ka̱ʼa̱nná xíʼin ta̱ Jesús kúú ña̱ ndeéndóʼo ta̱ migora (Juan 11:3). Tá ni̱xi̱ʼi̱ ta̱ Lázaro, ta̱ Jesús kiviva sandátakurara ni xíka íyora. Soo nda̱kaxinra ku̱ʼu̱nra ñuu Betania ña̱ va̱ʼa kotora ñá María xíʼin ñá Marta, chi náyóʼo va̱ʼaní xi̱kitáʼanná xíʼinra. ¿Á kúúmiíún iin na̱ migoún na̱ va̱ʼaní chíndeétáʼan xíʼún ni va̱ása ndúkú miíúnña nu̱úna? Tá saá íyoña, na̱kán chindeétáʼan xíʼún tá íyo ña̱ sándi̱ʼi̱-iniún (Prov. 17:17). Va̱ʼaní na̱ migo xa̱a̱yó kooyó tá ná kundiku̱nyó yichi̱ ta̱ Jesús. Vitin ná koto tukuyó relato yóʼo, ta ná kotoyó ndáaña ku̱u tándi̱ʼi.

12. ¿Ndáaña ni̱ka̱ʼa̱n ta̱ Jesús xíʼin ñá Marta, ta nda̱chun xi̱niñúʼu kandíxañá ña̱ saxínura ña̱ ni̱ka̱ʼa̱nra keʼéra? (Juan 11:23-26).

¹² (Kaʼvi Juan 11:23-26). Tá ku̱ndaa̱-ini ñá Marta ña̱ xa̱a̱ ki̱xaa̱ ta̱ Jesús ñuu Betania, saá nda̱kiʼinñá ku̱a̱ʼa̱nñá kotoñára. Ta ña̱yóʼo ni̱ka̱ʼa̱nñá xíʼinra: “Táta, tá níxi̱yoún yóʼo, va̱ása kuviví ku̱ʼvai” (Juan 11:21). Ta̱kán kuchiñuvara sandáʼara ta̱ Lázaro, soo ta̱kán ke̱ʼéra iin ña̱ʼa ña̱ nda̱kanda̱ní-inina xíʼin. Ta ña̱yóʼo ni̱ka̱ʼa̱nra xíʼin ñá Marta: “Ndatakuva ku̱ʼvaún”. Ta ña̱ va̱ʼa kandíxakañá ña̱ ni̱ka̱ʼa̱nra xíʼinñá, ka̱chira xíʼinñá: “Yi̱ʼi̱ kúú ta̱ sándataku na̱ yiví ta yi̱ʼi̱ kúú ta̱ táxi ña̱ tákuna”. Tasaá íyovaña, chi Jehová ta̱xira ndee̱ ndaʼa̱ ta̱ Jesús ña̱ va̱ʼa sandátakura na̱ ni̱xi̱ʼi̱. Tá ku̱u ña̱yóʼo, ta̱ Jesús  xa̱a̱ sandátakuvara iin ñá loʼo tá ni̱ya̱ʼa loʼo tiempo ña̱ ni̱xi̱ʼi̱ñá, ta saátu iin ta̱ loʼo sa̱ndátakurara mií ki̱vi̱ ña̱ ni̱xi̱ʼi̱ra (Luc. 7:11-15; 8:49-55). Soo, ¿á kivi sandátakura iin na̱ xa̱a̱ ku̱a̱ʼa̱n ku̱mí ki̱vi̱ ni̱xi̱ʼi̱ ta xa̱a̱ ki̱xáʼa táʼyi̱ ku̱ñuna?

13. Nda̱a̱ táki̱ʼva káchi Juan 11:32-35, ¿ndáaña ndo̱ʼo ta̱ Jesús tá xi̱nira ñá María xíʼin inkana ña̱ ndeéní xákuna? (Koto na̱ʼná).

¹³ (Kaʼvi Juan 11:32-35). Ná ndakanixi̱níyó xa̱ʼa̱ ña̱ ku̱u yóʼo. Ñá María ñá inka ku̱ʼva ta̱ Lázaro ku̱yatinñá nu̱ú ta̱ Jesús ta ni̱ka̱ʼa̱nñá xíʼinra táʼan ña̱ ni̱ka̱ʼa̱n ñá Marta xíʼinra: “Táta, tá níxi̱yoún yóʼo, va̱ása kuviví ku̱ʼvai̱”. Miíñá xíʼin ndiʼi na̱ ndóo kán ndeéní kúsuchí-inina. Tá xi̱ni ta̱ Jesús ña̱ ndeékaví xákuna, ku̱suchíní-inira. Ta xa̱ʼa̱ ña̱ kúndáʼvi-inira xínira na̱ migora, ki̱xáʼara xákura xíʼinna. Ta̱ Jesús kúnda̱a̱va-inira ña̱ yo̱ʼvi̱ní tá xíʼi̱ iin na̱ veʼeyó, ña̱kán kúni̱ra sandíʼi-xa̱ʼa̱ra ña̱ xíʼi̱yó.

14. ¿Ndáaña sákuaʼayó xa̱ʼa̱ Jehová xíʼin ña̱ ke̱ʼé ta̱ Jesús tá xi̱tora xáku ñá María?

¹⁴ Ña̱ ku̱ndáʼvi-ini ta̱ Jesús xi̱nira ñá María tá ndeéní xákuñá, sánáʼa̱ña miíyó ña̱ saátu kúndáʼviní-ini Jehová xínira miíyó tá xóʼvi̱yó. Soo, ¿nda̱chun va̱ʼa kúnda̱a̱-iniyó xa̱ʼa̱ ña̱yóʼo? Saáchi nda̱a̱ táki̱ʼva xa̱a̱ sa̱kúaʼayó nu̱ú artículo ni̱ya̱ʼa, ta̱ Jesús va̱ʼaní ndána̱ʼa̱ra ki̱ʼva ña̱ íyo yivára. Tá kúú, ña̱ ndákanixi̱níra xíʼin ña̱ ndóʼora (Juan 12:45). Ña̱kán, tá káʼviyó xa̱ʼa̱ ña̱ xa̱ku ta̱ Jesús xíʼin na̱ migora, saátu Jehová kúsuchíní-inira tá xítora ña̱ ndeéní xóʼvi̱yó (Sal. 56:8). ¿Á su̱ví ña̱ kúnda̱a̱-iniyó xa̱ʼa̱ ña̱yóʼo chíndeétáʼanña xíʼinyó ña̱ kuyatinkayó nu̱ú yiváyó ta̱ kúʼvi̱ní-ini xíni miíyó?

15. Nda̱a̱ táki̱ʼva káchi Juan 11:41-44, ¿ndáaña ku̱u nu̱ú sa̱ndúxu̱nna ta̱ Lázaro? (Koto na̱ʼná).

¹⁵ (Kaʼvi Juan 11:41-44). Tá ni̱xa̱a̱ ta̱ Jesús nu̱ú ni̱ndu̱xu̱n ta̱ Lázaro, ni̱ka̱ʼa̱nra xíʼinna ña̱ ná sakútaʼana yu̱u̱ ña̱ ndási kán. Soo ñá Marta ni̱ka̱ʼa̱nñá xíʼin ta̱ Jesús ña̱ xa̱a̱ xáʼa̱nva ta̱ Lázaro. Ta ña̱yóʼo ni̱ka̱ʼa̱n ta̱ Jesús xíʼinñá: “¿Á su̱ví ni̱ka̱ʼi̱n xíʼún tá kándíxaún Ndióxi̱ kuniún ndee̱ ña̱ kúúmiíra?” (Juan 11:39, 40). Tasaá nda̱niʼi ta̱ Jesús nu̱úra chí ndiví ta ke̱ʼéra iin oración nu̱ú ndiʼina. Chi xi̱kuni̱ra ña̱ ná ndukáʼnu Jehová xa̱ʼa̱ ña̱ ku̱nu̱mí keʼéra.  Tasaá ndeéní ni̱ka̱ʼa̱nra: “Lázaro, kita”. Tasaá ki̱ta ta̱ Lázaro. Ta̱ Jesús ke̱ʼéra iin ña̱ʼa ña̱ ku̱a̱ʼánína nda̱kanixi̱ní ña̱ nda̱a̱ ni iinna kǒo kivi keʼé.

16. ¿Ndáa ki̱ʼva chíndeétáʼan Juan capítulo 11 xíʼinyó ña̱ kandíxayó ña̱ ndataku na̱ ni̱xi̱ʼi̱?

¹⁶ Ña̱ káʼa̱n Juan capítulo 11 chíndeétáʼanníña xíʼinyó ña̱ kandíxayó ña̱ ndataku na̱ ni̱xi̱ʼi̱. Ná ndakaʼányó ña̱ ni̱ka̱ʼa̱n ta̱ Jesús xíʼin ñá Marta: “Ndatakuva ku̱ʼvaún” (Juan 11:23). Nda̱a̱ táki̱ʼva íyo Jehová saátu íyo ta̱ Jesús, chi kúni̱ra sandátakura na̱ ni̱xi̱ʼi̱ ta íyo ndee̱ ndaʼa̱ra ña̱ keʼéra ña̱yóʼo. Ña̱ xa̱ku ta̱ Jesús sánáʼa̱ña miíyó ña̱ ndixaní kúni̱ra sandíʼi-xa̱ʼa̱ra ña̱ xíʼi̱yó, chi ña̱yóʼo ndeéní sákusuchíña-iniyó. Tá sa̱ndátaku ta̱ Jesús ta̱ Lázaro, saá ni̱na̱ʼa̱ tukura ña̱ kúúmiíra ndee̱ ña̱ sandátakura na̱ ni̱xi̱ʼi̱. Ná ndakanitu xi̱níyó xa̱ʼa̱ ña̱ ni̱ka̱ʼa̱n ta̱ Jesús xíʼin ñá Marta: “¿Á su̱ví ni̱ka̱ʼi̱n xíʼún tá kándíxaún Ndióxi̱ kuniún ndee̱ ña̱ kúúmiíra?” (Juan 11:40). Kúúmiíyó ku̱a̱ʼání ña̱ kivi chindeétáʼan xíʼinyó ña̱ kandíxayó ña̱ sandátaku Jehová na̱ ni̱xi̱ʼi̱. Soo, ¿ndáaña kivi keʼéyó ña̱ kǒo kaka-iniyó ña̱ ndixa xi̱nu ña̱yóʼo?

17. ¿Ndáaña xíniñúʼu keʼéyó tá káʼviyó xa̱ʼa̱ na̱ nda̱taku tiempo xi̱naʼá na̱ káʼa̱n Biblia xa̱ʼa̱?

¹⁷ Ná kaʼviyó xa̱ʼa̱ na̱ nda̱taku tiempo xi̱naʼá ta ná ndakanixi̱níyó xa̱ʼa̱ ña̱yóʼo. Nu̱ú Biblia va̱xi u̱na̱ ña̱ káʼa̱n xa̱ʼa̱ na̱ nda̱taku nu̱ú ñuʼú yóʼo. c ¿Á kivi chika̱a̱yó ndee̱ ña̱ kaʼviyó xa̱ʼa̱ iin tá iin na̱yóʼo? Nani káʼviyó xa̱ʼa̱ na̱yóʼo, ná ndakanixi̱níyó ña̱ xi̱kuuna na̱ yiví táki̱ʼva íyo miíyó. Sava na̱yóʼo xi̱kuu ta̱a, ñaʼá xíʼin na̱ va̱lí. Ná kotoyó ndáaña kivi sakúaʼayó xíʼin ña̱ káʼa̱n xa̱ʼa̱ na̱yóʼo. Ta tá káʼviyó xa̱ʼa̱na, ná ndakaʼányó ña̱ kúni̱va Ndióxi̱ sandátakura na̱ ni̱xi̱ʼi̱ ta íyova ndee̱ ndaʼa̱ra ña̱ keʼéra ña̱yóʼo. Ta ña̱ ndáyáʼvi va̱ʼa kúú ña̱ ndakanixi̱níyó xa̱ʼa̱ ña̱ nda̱taku ta̱ Jesús. Ku̱a̱ʼání na̱ yiví xi̱ni ta̱ Jesús  tá xa̱a̱ nda̱takura, xa̱ʼa̱ ña̱kán miíyó kándíxaníyó ña̱ ndataku na̱ ni̱xi̱ʼi̱ (1 Cor. 15:3-6, 20-22).

18. ¿Nda̱saa kivi kuniñúʼuyó yaa ña̱ káʼa̱n xa̱ʼa̱ na̱ ndataku? (Koto nota).

¹⁸ Ná kuniso̱ʼoyó yaa ña̱ káʼa̱n xa̱ʼa̱ na̱ ndataku (Efes. 5:19). d Chi yaa yóʼo va̱ʼaní chíndeétáʼanña xíʼinyó ña̱ kandíxayó ña̱ kixaa̱ iin ki̱vi̱ ña̱ ndataku na̱ ni̱xi̱ʼi̱ ta chindeétáʼanña xíʼinyó ña̱ va̱ása kaka-iniyó xa̱ʼa̱ ña̱yóʼo. Ña̱kán ndáyáʼviní kuniso̱ʼoyó yaa yóʼo. Ta kivi katayó yaa yóʼo tá káʼviyó xíʼin na̱ veʼeyó ta kivi natúʼun xíʼin táʼanyó ndáaña sánáʼa̱ ña̱ yaa yóʼo miíyó. Ná sakúaʼa xíʼin xi̱níyó yaa yóʼo, ta ná ndakanixi̱níyó xa̱ʼa̱ña. Chi ña̱yóʼo chindeétáʼanníña xíʼinyó ña̱ kandíxaníyó ña̱ ndataku na̱ ni̱xi̱ʼi̱. Tasaá tá ná ya̱ʼayó nu̱ú iin tu̱ndóʼo ña̱ kivi kuviyó xíʼin á tá ná kuvi iin na̱ veʼeyó, espíritu santo Jehová chindeétáʼan xíʼinyó ña̱ ndakaʼányó xa̱ʼa̱ yaa yóʼo. Ta ña̱yóʼo sandíkoña-iniyó ta chindeétáʼanña xíʼinyó ña̱ kandíxayó ña̱ ndataku na̱ ni̱xi̱ʼi̱.

19. ¿Nda̱saa kivi ndakanixi̱níyó xa̱ʼa̱ na̱ ndataku? (Koto recuadro ña̱ naní “ ¿Ndáaña nda̱ka̱tu̱ʼúnna?”).

¹⁹ Ná kuniñúʼuyó ña̱ ndákanixi̱níyó. Jehová chíndeétáʼanra xíʼinyó ña̱ ndakanixi̱níyó ña̱ xa̱a̱ íyoyó nu̱ú ñuyǐví xa̱á. Iin ñá hermana káchiñá: “Ku̱a̱ʼání tiempo távái̱ ña̱ ndakanixi̱níi̱ ña̱ xa̱a̱ íyoi̱ nu̱ú ñuyǐví xa̱á ta nda̱a̱ xáʼa̱n támi yita ña̱ íyo kán nu̱úi̱ túvii̱”. Ná ndakanixi̱níyó ndáaña kundoʼoyó tá ná kuniyó na̱ káʼa̱n Biblia xa̱ʼa̱, na̱ xi̱ndoo tiempo xi̱naʼá. ¿Ndáana kúni̱ún kuxini̱kaún? ¿Ndáaña nda̱ka̱tu̱ʼúnna? Ná ndakanixi̱níyó ndáaña kundoʼoyó tá ná ndataku na̱ veʼeyó. Ná ndakanixi̱níyó ndáaña siʼna ka̱ʼa̱nyó xíʼinna, ndáa ki̱ʼva numiyóna ta saátu ná ndakanixi̱níyó ndáa ki̱ʼva kusi̱íní-iniyó tá ná kuniyóna.

20. ¿Ndáaña xíniñúʼu ndakundeéyó keʼéyó?

²⁰ Táxiníyó tíxa̱ʼvi ndaʼa̱ Jehová xa̱ʼa̱ ña̱ káʼa̱nra sandátakura na̱ ni̱xi̱ʼi̱. Ta kándíxaníyó ña̱ saxínuvara ña̱yóʼo chi kúni̱ra sandátakura na̱ ni̱xi̱ʼi̱ ta íyo ndee̱ ndaʼa̱ra ña̱ keʼéraña. Ta táki̱ʼva íyo ta̱ káʼa̱n xíʼinyó ña̱ ndatakuva na̱ veʼeyó na̱ ni̱xi̱ʼi̱ saá íyora. Ná ndakundeéyó kandíxayó ña̱ ndatakuva na̱ ni̱xi̱ʼi̱. Tá saá ná keʼéyó, kuyatinkayó nu̱ú Jehová ta̱ káʼa̱n sandátaku na̱ veʼeyó na̱ ni̱xi̱ʼi̱.