1. ¿Ndáa ki̱ʼva íyo na̱ ñuu Ndióxi̱ tiempo vitin, ta ndáaña chi̱kaa̱-inina keʼéna?

 TIEMPO vitin ku̱a̱ʼání na̱ yiví kítáʼanna ña̱ ndásakáʼnuna Jehová ta ku̱a̱ʼání ña̱ va̱ʼa kéʼéna, ndiʼi na̱yóʼo kúú na̱ ñuu Jehová ta va̱ʼaní kítáʼanna ta chíkaa̱na ndee̱ ña̱ ixato̱ʼó táʼanna. Xa̱a̱ chi̱kaa̱-inina ña̱ iinlá Jehová ndasakáʼnuna ta saátu kúni̱na ña̱ ku̱a̱ʼání na̱ yiví ná xa̱a̱na vií kutáʼanna xíʼin Jehová ta ndasakáʼnunara.

2. ¿Nda̱chun va̱ʼaní kítáʼan na̱ ñuu Jehová?

² Ku̱a̱ʼání ña̱ kini kéʼé na̱ yiví na̱ ndóo tiempo vitin ta sáa̱ní-inina xíni-táʼanna. Soo Jehová kúúmiíra iin ñuu ta ndiʼiyó na̱ ñúʼu ti̱xin ña̱yóʼo íxato̱ʼó táʼanyó ta va̱ʼaní kítáʼanyó (1 Juan 5:19; Apoc. 12:12). Jehová xíni̱ra ña̱ kivi ixandi̱va̱ʼa na̱ yiví xíʼinyó ña̱kán ka̱nara miíyó ña̱ ñúʼuyó ti̱xin ñuura ta yóʼo va̱ʼaní ndásakáʼnuyóra nda̱a̱ táki̱ʼva kúni̱ra. Biblia káʼa̱nña ña̱ nda̱a̱ táki̱ʼva íyo iin jardín ña̱ liviní saá íyo ñuura (Is. 4:6; 58:11). Mií Jehová táxi bendición ndaʼa̱yó ña̱kán ndiʼi miíyó na̱ ñúʼu ti̱xin ñuura kúsi̱íní-iniyó ta va̱ʼaní kúniyó ni ndóoyó ki̱vi̱ so̱ndíʼi (Is. 54:14; 2 Tim. 3:1).

3. ¿Ama ni̱xi̱nu táʼví nu̱ú profecía ña̱ va̱xi nu̱ú Isaías capítulo 65?

³ Nu̱ú Isaías capítulo 65 Jehová ni̱ka̱ʼa̱nra ndáa ki̱ʼva koo na̱ ñuura. Iin táʼví profecía ña̱ ni̱ka̱ʼa̱n ta̱ Isaías ni̱xi̱nuña ku̱i̱ya̱ 537 tiempo xi̱naʼá. Ku̱i̱ya̱ saá na̱ judío na̱ ndi̱kó-ini ke̱ena ñuu Babilonia ta ndi̱kóna ñuu Jerusalén. Mií Jehová chi̱ndeétáʼan xíʼinna ta nda̱saviína ñuu Jerusalén saáchi ndi̱ʼi̱-xa̱ʼa̱ ndiʼiña tasaá ndu̱livi tukuña. Saátu nda̱saviína templo ña̱ va̱ʼa kixáʼa tukuna ndasakáʼnuna Jehová (Is. 51:11; Zac. 8:3).

4. ¿Ndáa ki̱ʼva xínu ña̱ káʼa̱n Isaías capítulo 65 tiempo vitin?

⁴ Iinka táʼví profecía ña̱ ni̱ka̱ʼa̱n ta̱ Isaías xínuña tiempo vitin.  Ña̱yóʼo ki̱xáʼaña ku̱i̱ya̱ 1919 chi ku̱i̱ya̱ saá kúúña ke̱e na̱ ñuu Ndióxi̱ ti̱xin Babilonia ña̱ káʼnu á veʼe-ñu̱ʼu vatá. Nani ku̱i̱ya̱ saá xa̱a̱ ku̱a̱ʼání na̱ yiví kíʼvina ti̱xin ñuu Jehová. Xa̱ʼa̱ ña̱ xi̱kusi̱íní-ini na̱ xi̱ndasakáʼnu Jehová, ku̱a̱ʼání congregación ki̱xáʼa íyo. Ku̱a̱ʼání na̱ ta̱a xíʼin ná ñaʼá na̱ kue̱ʼe̱ní ni̱xi̱yo á na̱ xi̱keʼé ña̱ kini, na̱samana ki̱ʼva ña̱ íyona ta ki̱xáʼana kéʼéna ña̱ kútóo Ndióxi̱ (Efes. 4:24). Soo ku̱a̱ʼání bendición ña̱ ni̱ka̱ʼa̱n ta̱ Isaías xa̱ʼa̱ xi̱nuña nu̱ú ñuyǐví xa̱á. Soo ni saá ku̱a̱ʼáníva ña̱ va̱ʼa ndákiʼinyó tiempo vitin. Nu̱ú artículo yóʼo sakúaʼayó ndáaña va̱ʼa ndákiʼinyó xa̱ʼa̱ ña̱ ñúʼuyó ti̱xin ñuu Ndióxi̱ ta nda̱chun kǒo xíniñúʼu sandákooyó ña̱ ndásakáʼnuyóra.

BENDICIÓN ÑA̱ TÁXI JEHOVÁ NDAʼA̱YÓ

5. Nda̱a̱ táki̱ʼva káchi Isaías 65:​13, ¿ndáa bendición ndákiʼinyó xa̱ʼa̱ ña̱ ndásakáʼnuyó Jehová?

⁵ Va̱ʼaní kúniyó ta kǒo ña̱ kúma̱ní nu̱úyó. Ta̱ profeta Isaías ni̱ka̱ʼa̱nra ña̱ síínní íyo na̱ yiví na̱ kǒo ndásakáʼnu Ndióxi̱ ta síínní íyo miíyó na̱ ndásakáʼnura (kaʼvi Isaías 65:13). a Miíyó na̱ ndásakáʼnu Jehová, kǒo ña̱ kúma̱ní nu̱úyó ña̱ va̱ʼa sakúaʼayó xa̱ʼa̱ra. Chi táxira espíritu santora ndaʼa̱yó, tu̱ʼunra ña̱ Biblia xíʼin inkaka ña̱ xíniñúʼuyó ña̱ va̱ʼa sakúaʼayó xa̱ʼa̱ra, ta ndiʼi ña̱yóʼo sákusi̱íníña-iniyó (chitáʼanña xíʼin Apocalipsis 22:17). Soo na̱ yiví na̱ kǒo ndásakáʼnu Jehová kǒo ña̱yóʼo kúúmiína ña̱ va̱ʼa sakúaʼana xa̱ʼa̱ra (Amós 8:11).

6. ¿Ndáaña káʼa̱n Joel 2:​21-24 xa̱ʼa̱, ndáaña ndánaʼa̱ña ta ndáa ki̱ʼva táxi Jehová ña̱ xíniñúʼuyó?

⁶ Nu̱ú iin profecía ta̱ profeta Joel ni̱ka̱ʼa̱nra xa̱ʼa̱ si̱ʼva, aceite tá oliva xíʼin vino. Ta ña̱yóʼo ndánaʼa̱ña ña̱ táxi Jehová ndiʼi ña̱ xíniñúʼu na̱ ñuura, ña̱ kuxuna xíʼin ña̱ xíniñúʼuna ña̱ sakúaʼana xa̱ʼa̱ra (Joel 2:​21-24). ¿Ndáaña táxi Jehová ndaʼa̱yó ña̱ va̱ʼa sakúaʼayó xa̱ʼa̱ra tiempo vitin? Táxira Biblia, tutu ña̱ tává na̱ ñuura, sitio ña̱ kúúmiíyó nu̱ú internet, reunión xíʼin asamblea. Ña̱yóʼo chíndeétáʼanña xíʼinyó ña̱ va̱ʼa sakúaʼakayó xa̱ʼa̱ra tasaá va̱ʼaníka kitáʼanyó xíʼinra.

7. ¿Nda̱chun kúsi̱íní-iniyó? (Isaías 65:14).

⁷ Kúsi̱í-iniyó ta va̱ʼaní kúniyó. Miíyó na̱ ndásakáʼnu Ndióxi̱ kúsi̱íní-iniyó (kaʼvi Isaías 65:14). b ¿Nda̱chun kúsi̱íní-iniyó? Saáchi xáa̱yó kúnda̱a̱-iniyó xa̱ʼa̱ ña̱ nda̱a̱ ña̱ káʼa̱n Ndióxi̱ keʼéra chí nu̱únínu ta ña̱yóʼo va̱ʼaní chíkaa̱ña ndee̱ xíʼinyó. Ta xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ndátuyó ndakiʼinyó ña̱ va̱ʼa chí nu̱únínu ta kúsi̱íní-iniyó tá nátúʼunyó xa̱ʼa̱ ña̱yóʼo xíʼin na̱ hermanoyó (Sal. 34:8; 133:​1-3).

8. ¿Ndáa u̱vi̱ ña̱ va̱ʼa kéʼé na̱ ñuu Jehová?

⁸ U̱vi̱ ña̱ va̱ʼa ña̱ kéʼé na̱ ñuu Ndióxi̱ kúú ña̱ kúʼvi̱ní-inina xínitáʼanna ta va̱ʼaní kítáʼanna. Ta ña̱yóʼo chíndeétáʼanña xíʼinyó kunda̱a̱-iniyó ndáa ki̱ʼva kooyó nu̱ú ñuyǐví xa̱á. Kán va̱ʼaníka na̱ʼa̱yó ña̱ kúʼvi̱-iniyó xínitáʼanyó ta saátu va̱ʼaníka kutáʼanyó xíʼin inkana (Col 3:14). Iin ñá hermana káʼa̱nñá ndáaña ndo̱ʼoñá tá xi̱nitáʼanñá xíʼin na̱ testigo Jehová. Ñáyóʼo káchiñá: “Kǒo níxi̱xinii̱ ndáaña keʼíi̱ ña̱ va̱ʼa si̱í koi̱ ta saátu ña̱ si̱í koi̱ xíʼin na̱ veʼi̱. Soo iin ki̱vi̱ xi̱nii̱ ña̱ na̱ kúʼvi̱ní-ini xínitáʼan kúú na̱ testigo Jehová”. Ña̱kán tá kúni̱ún si̱í koún, ndasakáʼnu Jehová. Ni na̱ yiví kúsi̱kindaana miíyó á káʼa̱n ndi̱va̱ʼana xíʼinyó, soo nu̱ú Jehová xíʼin na̱ ñuura va̱ʼaníva íyo ña̱ kéʼéyó (Is. 65:15).

9. ¿Ndáaña keʼé Jehová xíʼin ña̱ʼa ña̱ sáxo̱ʼvi̱ miíyó? (Isaías 65:​16, 17).

 ⁹ Va̱ʼaní kúniyó ta kǒo ña̱ sándi̱ʼi̱-iniyó. Isaías 65:14 káʼa̱nña ña̱ na̱ kǒo ñúʼu ti̱xin ñuu Jehová ndeéní xo̱ʼvi̱na ta kuakuna chi ndeéní ndakava-inina. Soo, ¿ndáaña kundoʼo na̱ ndásakáʼnu Ndióxi̱ na̱ ndeéní xóʼvi̱ tiempo vitin? Jehová káʼa̱nra ña̱ kǒo ndakaʼánkayó xa̱ʼa̱ ña̱ sáxo̱ʼvi miíyó tiempo vitin chi sandíʼi-xa̱ʼa̱raña (kaʼvi Isaías 65:​16, 17). c

10. ¿Nda̱chun iin ña̱ va̱ʼaní kúú ña̱ kutáʼanyó xíʼin na̱ hermano? (Koto na̱ʼná).

¹⁰ Tiempo vitin va̱ʼaní kúniyó ta kǒo ndíʼi̱-iniyó tá xáʼa̱nyó reunión, ta nda̱a̱ nándósó-iniyó xa̱ʼa̱ ndiʼi ña̱ kini ña̱ kúu nu̱ú ñuʼú yóʼo. Ña̱kán, ¿ndáaña xíniñúʼu keʼéyó tasaá viíní kutáʼanyó xíʼin na̱ hermanoyó? Xíniñúʼu kuʼvi̱-iniyó kunitáʼanyó, ña̱ si̱í koo iniyó, ña̱ táxi̱n koo iniyó, ña̱ vií koo iniyó xíʼin ña̱ va̱ʼa koo iniyó (Gál. 5:​22, 23). Kúsi̱íní-iniyó ña̱ ñúʼuyó ti̱xin ñuu Ndióxi̱. Tá ndiʼi tiempo ná ndasakáʼnuyó Jehová, saá kúúña kotoyó ña̱ saxínura ña̱ ni̱ka̱ʼa̱nra ña̱ ndasaxa̱ára ndiví ta saátu nu̱ú ñuʼú yóʼo.

11. ¿Ndáa ki̱ʼva kúniyó ña̱ ñúʼuyó ti̱xin ñuu Jehová? (Isaías 65:​18, 19).

¹¹ Táxiníyó tíxa̱ʼvi ndaʼa̱ Jehová ta kúsi̱íní-iniyó. Ta̱ Isaías káʼa̱nra ña̱ xíniñúʼu kusi̱íní-ini miíyó na̱ ndásakáʼnu Jehová, saáchi ti̱xin ñuura ñúʼuyó ta miíra kíʼin kuenta xíʼinyó (kaʼvi Isaías 65:​18, 19). d Ña̱kán, xa̱ʼndara chiñu nu̱úyó ña̱ ku̱ʼu̱nyó natúʼunyó xíʼin na̱ yiví ña̱ va̱ʼa xa̱a̱na sakúaʼana xa̱ʼa̱ra chi kǒo ña̱ʼa sákuaʼana ñuyǐví yóʼo. Soo tá xa̱a̱ kíʼvina ñuu Jehová íyoníva ña̱ sakúaʼana xa̱ʼa̱ra. Ku̱a̱ʼání bendición táxi Jehová ndaʼa̱yó ña̱kán kúni̱yó ka̱ʼa̱nyó xa̱ʼa̱ ña̱yóʼo xíʼin na̱ yiví (Jer. 31:12).

12. ¿Ndáaña ndóʼún tá káʼviún ña̱ káʼa̱n Isaías 65:​20-24, ta nda̱chun?

¹² Miíyó na̱ ñúʼu ti̱xin ñuu Jehová kúsi̱íní-iniyó xa̱ʼa̱ ña̱ ndátuyó ndakiʼinyó chí nu̱únínu. Ndakanixi̱ní xa̱ʼa̱ ndiʼi ña̱ kivi kotoún ta saátu ndiʼi ña̱ kivi keʼún tá xa̱a̱ ná koún ñuyǐví xa̱á. Biblia káchiña: “Kán, va̱ása kooka na̱ lée válí na̱ kutaku loʼo kuití ki̱vi̱, na̱ xa̱a̱ chée  kutakuna nda̱a̱ ná xi̱nu va̱ʼana ku̱i̱ya̱na”, ta saátu káʼa̱nña ña̱ ixava̱ʼa na̱ yiví veʼe ta miína kundoo iniña; chiʼina tú uva ta miína kaxí ku̱i̱ʼinú, ta ndeéní kachíñuna soo kundayáʼviva ña̱ keʼéna chi mií Jehová taxi bendición ndaʼa̱na. Jehová káʼa̱nra ña̱ kusi̱íní-iniyó, va̱ʼaní kooyó ta kǒo kundi̱ʼi̱-iniyó. Ni kúma̱níka ka̱ʼa̱nyó xíʼinra xa̱ʼa̱ ña̱ xíniñúʼuyó xa̱a̱ kunda̱a̱va-inira xíʼin ña̱yóʼo ta taxira ña̱ ndukuyó nu̱úra (Is. 65:​20-24; Sal. 145:16).

13. Nda̱a̱ táki̱ʼva káchi Isaías 65:​25, ¿ndáaña xíniñúʼu keʼé na̱ yiví tá kúni̱na ndasakáʼnuna Jehová?

¹³ Kǒo ndíʼi̱ní-iniyó chi va̱ʼaní ndáa Jehová miíyó. Espíritu santo chíndeétáʼanña xíʼin na̱ yiví na̱ xi̱keʼé nda̱a̱ táki̱ʼva kéʼé kití yukú ña̱ nasamana ki̱ʼva ña̱ íyona (kaʼvi Isaías 65:25). e Kǒo kéʼékana nda̱a̱ táki̱ʼva xi̱keʼéna tá ya̱chi̱ (Rom. 12:2; Efes. 4:​22-24). Soo xa̱ʼa̱ ña̱ kúúyó na̱ yiví ku̱a̱chi sava yichi̱ kéʼékavayó ña̱ va̱ása va̱ʼa. Iin milagro ke̱ʼé Jehová saáchi ku̱chiñura sa̱ndákutáʼanra ku̱a̱ʼání na̱ yiví na̱ xa̱a̱ síín ñuu ña̱ ndasakáʼnunara. Ta va̱ʼaní kítáʼanna ta kúʼvi̱ní-inina xínitáʼanna (Tito 2:11). Iinlá Jehová kúúmií ndee̱ ña̱ keʼéra ña̱yóʼo.

14. ¿Ndáa ki̱ʼva ki̱xáʼa iin ta̱a kéʼéra ña̱ káʼa̱n Isaías 65:25?

¹⁴ ¿Á ndixa kivi nasama iin na̱ yiví ki̱ʼva ña̱ íyona? Ná kotoyó iin ejemplo ña̱ káʼa̱n xa̱ʼa̱ ña̱yóʼo. Iin ta̱a ta̱ xi̱kuumií 20 ku̱i̱ya̱ ku̱e̱ʼe̱ní ni̱xi̱yora ta xi̱kisi̱ra xíʼin ku̱a̱ʼání ná ñaʼá, ta xa̱a̱ ku̱a̱ʼání yichi̱ ni̱xa̱ʼa̱nra veʼeka̱a xa̱ʼa̱ ña̱ xi̱ ixakuíʼnara carro á xa̱ʼa̱ inkaka ña̱ʼa. Ta ndiʼi tiempo xi̱kuni̱ra kanitáʼanra xíʼin na̱ yiví. Tá yichi̱ nu̱ú ña̱ xi̱niso̱ʼora ña̱ nda̱a̱ ña̱ sánáʼa̱ Biblia, ki̱xáʼara xáʼa̱nra reunión xíʼin na̱ testigo Jehová. Nda̱kanixi̱níra ña̱ nda̱ni̱ʼíra ña̱ kivi chindeétáʼan xíʼinra ña̱ kusi̱í-inira, saáchi sa̱kuaʼara ndáa ki̱ʼva ndasakáʼnura Ndióxi̱. Tándi̱ʼi, nda̱kuchira. Ta ki̱ʼinra kuenta ña̱ ki̱xáʼara kéʼéra ña̱ káʼa̱n Isaías 65:​25, saáchi tá ya̱chi̱ ni̱xi̱yora nda̱a̱ táki̱ʼva íyo iin león tí kue̱ʼe̱ní. Ta tá ki̱xáʼara sákuaʼara xa̱ʼa̱ Jehová ndu̱ura nda̱a̱ táki̱ʼva íyo iin levo á iin ndikachi.

15. ¿Nda̱chun kúni̱yó chindeétáʼanyó xíʼin na̱ yiví ña̱ ndasakáʼnuna Jehová, ta ndáaña kivi keʼéyó?

¹⁵ Isaías 65:13 káchiña: “Ña̱yóʼo kúú ña̱ káʼa̱n táta káʼnu Jehová” ta nu̱ú so̱ndíʼi ña̱ versículo 25 káʼa̱nña ña̱yóʼo: “Káchi Jehová”, ña̱kán ndiʼi ña̱ káʼa̱n Jehová xínuvaña (Is. 55:​10, 11). Tá ni̱ka̱ʼa̱n Jehová ña̱ koo iin ñuu ña̱ ndasakáʼnu miíra, ndixava ni̱xi̱nu ña̱ ni̱ka̱ʼa̱nra. Chi va̱ʼaní ndásakáʼnuyóra ta kǒo ña̱ sándi̱ʼi̱-iniyó, ni kininí kéʼé na̱ yiví tiempo vitin (Sal. 72:7). Xa̱ʼa̱ ña̱yóʼo kúni̱yó chindeétáʼanyó xíʼin ku̱a̱ʼá na̱ yiví ña̱ ná kixáʼana ndasakáʼnuna Jehová ta ki̱ʼvina ti̱xin ñuura. Soo, ¿ndáa ki̱ʼva keʼéyó ña̱yóʼo? Xíniñúʼu chika̱a̱yó ndee̱ ña̱ keeyó natúʼunyó xíʼin na̱ yiví xa̱ʼa̱ra (Mat. 28:​19, 20).

NÁ CHINDEÉTÁʼANYÓ XÍʼIN NA̱ YIVÍ ÑA̱ NDASAKÁʼNUNA JEHOVÁ

16. ¿Ndáaña xíto na̱ yiví kéʼéyó ña̱kán kuni̱na ndasakáʼnuna Jehová?

¹⁶ Tá kéʼéyó ndiʼi ña̱ káʼa̱n Ndióxi̱ xíʼinyó ña̱yóʼo chindeétáʼanña xíʼin na̱ yiví ña̱ kuni̱na sakúaʼana xa̱ʼa̱ra ta ndasakáʼnunara. ¿Ndáa ki̱ʼva keʼéyó ña̱yóʼo? Ña̱ keʼéyó nda̱a̱ táki̱ʼva kéʼé Jehová. Kǒo íxandúxa̱ví Jehová xíʼin na̱ yiví ña̱ ndasakáʼnunara chi viíní kánarana ña̱ ndasakáʼnunara (Jer. 31:3; Juan 6:44). Na̱ ndixa kúni̱ sákuaʼa xa̱ʼa̱ Jehová tá xíniso̱ʼona xa̱ʼa̱ra kúni̱na kuyatinna nu̱úra. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ yiví ña̱ kixáʼana ndasakáʼnuna Jehová?

17. ¿Ndáaña keʼéyó tasaá chindeétáʼanyó xíʼin na̱ yiví ña̱ sakúaʼana xa̱ʼa̱ Ndióxi̱?

 ¹⁷ Iin ña̱ kivi keʼéyó ña̱ va̱ʼa ku̱a̱ʼáka na̱ yiví kuni̱na ndasakáʼnuna Jehová kúú ña̱ na̱ʼa̱yó ña̱ kúʼvi̱-iniyó xíniyó na̱ hermano ta va̱ʼa koo iniyó xíʼinna. Kúni̱yó ña̱ ná ka̱ʼa̱n na̱ yiví na̱ xáʼa̱n reunión nda̱a̱ táki̱ʼva ni̱ka̱ʼa̱n na̱ yiví na̱ ni̱xa̱ʼa̱n congregación ña̱ Corinto ña̱ ni̱xi̱yo xi̱naʼá. Ña̱yóʼo ni̱ka̱ʼa̱nna: “Ña̱ ndixava kúú ña̱ íyo Ndióxi̱ xíʼinndó” (1 Cor. 14:​24, 25; Zac. 8:23). Ña̱kán, xíniñúʼu kuniso̱ʼoyó consejo yóʼo: “Viíní kutáʼanndó xíʼin inkana” (1 Tes. 5:13).

18. ¿Ndáaña kivi chindeétáʼan xíʼin na̱ yiví ña̱ kuni̱na ndasakáʼnuna Ndióxi̱?

¹⁸ Ná chika̱a̱yó ndee̱ kuʼvi̱-iniyó kuniyó na̱ hermanoyó nda̱a̱ táki̱ʼva kúʼvi̱-ini Jehová xínirana. Ña̱kán ná kiʼinyó kuenta xíʼin ña̱ va̱ʼa ña̱ kéʼéna ta su̱ví ña̱ va̱ása va̱ʼa kéʼéna. Chi tá xa̱a̱ ná kooyó nu̱ú ñuyǐví xa̱á va̱ása kookavína na̱ yiví ku̱a̱chi. Ña̱kán, tá kúʼvi̱-iniyó xíniyóna saá kúú ña̱ ixakáʼnu-iniyó xa̱ʼa̱na tasaá keʼéyó ña̱ káʼa̱n consejo yóʼo: “Viíní keʼéndó xíʼin táʼanndó, ta kundáʼvi-inindó kunitáʼanndó, xíʼin ndiʼi níma̱ndó ixakáʼnu-inindó xa̱ʼa̱ táʼanndó” (Efes. 4:32). Ña̱kán tá kúʼvi̱-iniyó xíniyó na̱ yiví ña̱yóʼo chindeétáʼanña xíʼinna ña̱ sakúaʼana xa̱ʼa̱ Jehová ta ndasakáʼnunara. f

KǑO SANDÁKOOYÓ ÑA̱ NDASAKÁʼNUYÓ NDIÓXI̱

19. a) ¿Ndáaña káʼa̱n sava na̱ ndi̱kó ti̱xin ñuu Ndióxi̱? (Koto recuadro ña̱ naní “ Ke̱ena soo tuku ndi̱kóna”). b) ¿Ndáaña kivi keʼéyó? (Koto na̱ʼná).

¹⁹ Kúsi̱íní-iniyó ña̱ ndásakáʼnuyó Jehová ta xa̱a̱ ku̱a̱ʼání na̱ yiví ñúʼu ti̱xin ñuura ta inkáchi kítáʼanyó ña̱ ndásakáʼnuyóra. Táxiníyó tíxa̱ʼvi  ndaʼa̱ Ndióxi̱ xa̱ʼa̱ ña̱ táxira ñúʼuyó ti̱xin ñuura. Ndiʼi na̱ yiví na̱ kúni̱ kusi̱í-ini ta vií koona xíniñúʼu ki̱ʼvina ti̱xin ñuu Jehová ta kixáʼana ndasakáʼnunara. Soo ná kiʼinníyó kuenta chi ta̱ Ndi̱va̱ʼa kúni̱ra sándaʼvira miíyó ta kúni̱ra sakúxíkara miíyó nu̱ú Jehová (1 Ped. 5:8; Apoc. 12:9). Soo ná kǒo taxiyó ña̱ sándaʼvina miíyó. Ná kǒo keʼéyó ña̱ kini, va̱ʼaka ná chikaa̱yó ndee̱ ña̱ vií kutáʼanyó tasaá kusi̱íní-iniyó ndasakáʼnuyó Jehová.