1. ¿Ndáa ki̱ʼva xi̱ndaa Jehová na̱ ñuura tá siglo nu̱ú?

 TÁ TÁXI Jehová chiñu ndaʼa̱ na̱ káchíñu nu̱úra ndátura ña̱ keʼéna nda̱a̱ táki̱ʼva kúni̱ miíra (1 Cor. 14:33). Jehová kúni̱ra ña̱ ndiʼi na̱ yiví ná xa̱a̱na kunda̱a̱-inina xa̱ʼa̱ra (Mat. 24:14). Ta ta̱xira chiñu ndaʼa̱ ta̱ Jesús ña̱ kuniʼira yichi̱ nu̱úyó, ta ta̱ Jesús kúú ta̱ chíndeétáʼan xíʼinyó ña̱ viíní keʼéyó chiñu yóʼo. Tá siglo nu̱ú, ni̱xi̱yo na̱ apóstol xíʼin na̱ anciano ñuu Jerusalén ta na̱yóʼo kúú na̱ xi̱ndaka̱xin ndáaña keʼéna tiempo kán, ta xi̱ka̱ʼa̱nna xíʼin na̱ congregación ndáaña xíniñúʼu keʼéna (Hech. 15:2; 16:4). Ti̱xin congregación xi̱ndaka̱xinna na̱ koo anciano ta na̱yóʼo kúú na̱ xi̱kaʼa̱n xíʼin na̱ hermano ndáaña keʼéna (Hech. 14:23). Ta xa̱ʼa̱ ña̱ va̱ʼaní xi̱xiniso̱ʼo na̱ hermano ña̱ xi̱kaʼa̱n na̱yóʼo “na̱ congregación va̱ʼaníka ki̱xáʼana kándíxana Ndióxi̱, ta ndiʼi ki̱vi̱ ku̱a̱ʼáka xi̱nduuna” (Hech. 16:5).

2. ¿Ndáa ki̱ʼva níʼi Jehová yichi̱ nu̱ú na̱ ñuura nda̱a̱ tá ku̱i̱ya̱ 1919?

² Tiempo vitin Jehová chíndeétáʼanra xíʼin na̱ ñuura ña̱ viíní keʼéna chiñu ña̱ táxira ndaʼa̱na. Tá ku̱i̱ya̱ 1919 ta̱ Jesús nda̱kaxinra iin tiʼvi loʼo na̱ ungido na̱ ka̱ʼa̱n ndáa ki̱ʼva koo ña̱ predicación ta saátu ndáa ki̱ʼva sakúaʼayó xa̱ʼa̱ Ndióxi̱ (Luc. 12:42). a Ta xítoyó ña̱ mií Jehová chíndeétáʼan xíʼinna ña̱ keʼéna chiñu yóʼo (Is. 60:22; 65:​13, 14).

3, 4. a) Ka̱ʼa̱n xa̱ʼa̱ iin ejemplo ña̱ náʼa̱ nda̱chun ndáyáʼviní koo na̱ ka̱ʼa̱n xíʼinyó ndáaña keʼéyó. b) ¿Ndáaña sakúaʼayó nu̱ú artículo yóʼo?

 ³ Tá ná kǒo na̱ kuniʼi yichi̱ nu̱úyó ti̱xin ñuu Ndióxi̱, kǒo kivi saxínuyó chiñu ña̱ ni̱ka̱ʼa̱n ta̱ Jesús xíʼinyó (Mat. 28:​19, 20). Tá kúú, tá ná kǒo ka̱ʼa̱nna xíʼinyó ndáa territorio natúʼunyó xíʼin na̱ yiví, sana ndiʼiyó keʼéyó ña̱ kúni̱ miívayó. Tasaá iin territorio ku̱a̱ʼá yichi̱ ku̱ʼu̱nyó natúʼunyó xíʼin na̱ yiví ta inkaña kǒo ku̱ʼu̱nyó. ¿Ndáaña va̱ʼa ndákiʼinyó tá viíní kéʼéyó chiñu ña̱ káʼa̱nna xíʼinyó?

⁴ Tiempo vitin ta̱ Jesús va̱ʼaní níʼira yichi̱ nu̱ú na̱ ñuu Ndióxi̱ nda̱a̱ táki̱ʼva ke̱ʼéra xíʼin na̱ discípulora tiempo xi̱naʼá. Nu̱ú artículo yóʼo sakúaʼayó ndáa ki̱ʼva xi̱niʼi ta̱ Jesús yichi̱ nu̱ú na̱ discípulora ña̱ natúʼunna xa̱ʼa̱ Ndióxi̱, ta kotoyó ndáa ki̱ʼva ndíku̱n na̱ ñuu Ndióxi̱ ña̱yóʼo tiempo vitin. Ta saátu sakúaʼayó ndáaña kivi keʼéyó ña̱ va̱ʼa na̱ʼa̱yó ña̱ kándíxayó ndiʼi ña̱ káʼa̱n na̱ ñuu Jehová xíʼinyó.

NA̱ ÑUU NDIÓXI̱ NDÍKU̱NNA YICHI̱ TA̱ JESÚS

5. ¿Ndáa ki̱ʼva ndíku̱n na̱ ñuu Ndióxi̱ yichi̱ ña̱ sa̱ndákoo ta̱ Jesús? (Juan 8:28).

⁵ Va̱ʼaní sa̱kúaʼa ta̱ Jesús ndáaña ka̱ʼa̱nra ta ndáaña keʼéra chi Jehová sa̱náʼa̱ miíra. Ta saátu na̱ ñuu Ndióxi̱ tá kúni̱na sanáʼa̱na iin ña̱ʼa á tá kúni̱na taxina iin consejo, nina nu̱ú Biblia távánaña (kaʼvi Juan 8:28; 2 Tim. 3:​16, 17). Ta saátu ndiʼi tiempo káʼa̱nna xíʼinyó ña̱ ná kaʼviyó Biblia ta keʼéyó ña̱ sákuaʼayó. ¿Ndáaña va̱ʼa ndákiʼinyó tá xíniso̱ʼoyó consejo yóʼo?

6. ¿Ndáaña va̱ʼa ndákiʼinyó tá káʼviyó Biblia?

⁶ Tá xíniñúʼuyó tutu ña̱ tává na̱ ñuu Ndióxi̱ tá xa̱a̱ káʼviyó Biblia, va̱ʼaní kúnda̱a̱-iniyó xíʼinña. Saáchi kivi chitáʼanyó ña̱ káʼa̱n Biblia xíʼin ña̱ káʼa̱n na̱ ñuu Ndióxi̱ xíʼinyó. Tá kíʼinyó kuenta ña̱ ndiʼi ña̱ káʼa̱nna xí’inyó nu̱ú Biblia távánaña saá va̱ʼaníka kándíxayó ña̱ káʼa̱nna (Rom. 12:2).

7. ¿Ndáaña na̱túʼun ta̱ Jesús xa̱ʼa̱, ta ndáa ki̱ʼva ndíku̱n na̱ ñuu Ndióxi̱ yichi̱ra tiempo vitin?

⁷ Ta̱ Jesús na̱túʼunra tu̱ʼun va̱ʼa xa̱ʼa̱ reino Ndióxi̱ (Luc. 4:​43, 44). Saátu ni̱ka̱ʼa̱nra xíʼin na̱ discípulora ña̱ saá keʼéna (Luc. 9:​1, 2; 10:​8, 9). Ta ki̱ʼva saá kéʼé na̱ ñuu Ndióxi̱ tiempo vitin saáchi ni nda̱a̱ ndáaka ñuu ndóona chíkaa̱na ndee̱ ña̱ natúʼunna xa̱ʼa̱ reino Ndióxi̱ xíʼin na̱ yiví.

8. ¿Ndáa chiñu ña̱ ndáyáʼviní ta̱xi Ndióxi̱ ndaʼa̱yó?

⁸ Iin chiñu ña̱ ndáyáʼviní kúú ña̱ ku̱ʼu̱nyó natúʼunyó xíʼin na̱ yiví xa̱ʼa̱ reino Ndióxi̱ ta su̱ví ndiʼina kivi keʼé ña̱yóʼo. Tá kúú tá ni̱xi̱yo ta̱ Jesús nu̱ú ñuʼú yóʼo, kǒo nítaxira ña̱ natúʼun na̱ ta̱chí ndi̱va̱ʼa xa̱ʼa̱ ndiʼi ña̱ xi̱keʼéra (Luc. 4:41). Na̱ kúni̱ kee predicación xíʼin na̱ testigo Jehová siʼna xíniñúʼu keʼéna sava ña̱ʼa. ¿Ndáa ki̱ʼva náʼa̱yó ña̱ ndáyáʼviní chiñu ña̱ ta̱xi Ndióxi̱ ndaʼa̱yó? Xíniñúʼu ndiʼi tiempo natúʼunyó xa̱ʼa̱ra xíʼin na̱ yiví. Nda̱a̱ táki̱ʼva ke̱ʼé ta̱ Jesús saá kéʼéyó chi chíndeétáʼanyó xíʼin na̱ yiví ña̱ kunda̱a̱-inina xa̱ʼa̱ Jehová (Mat. 13:​3, 23; 1 Cor. 3:6).

9. ¿Ndáaña kéʼéyó ña̱ va̱ʼa kunda̱a̱-ini na̱ yiví xa̱ʼa̱ ki̱vi̱ Ndióxi̱?

⁹ Ta̱ Jesús sa̱náʼa̱ra na̱ yiví nda̱saa naní Ndióxi̱. Iin yichi̱ ni̱ka̱ʼa̱nra xíʼin yivára: “Na̱túʼi̱n xa̱ʼa̱ ki̱vi̱ún xíʼinna” (Juan 17:26). Ta na̱ ñuu Ndióxi̱ ndíku̱nna yichi̱ ta̱ Jesús saáchi chíkaa̱nína ndee̱ ña̱ ka̱ʼa̱nna xíʼin na̱ yiví nda̱saa naní Ndióxi̱. Ta ña̱ xíniñúʼuyó ña̱ natúʼunyó xa̱ʼa̱ Ndióxi̱ kúú Biblia ña̱ naní Traducción del Nuevo Mundo, ta xa̱a̱ 270 nu̱ú tu̱ʼun íyoña. Savaña xa̱a̱ sa̱ndáya̱ʼa iníínaña nu̱ú inka tu̱ʼun ta savaña sa̱kán iin táʼví kuitíña íyo. Nu̱ú sava Biblia sa̱kútaʼana ki̱vi̱  Ndióxi̱, soo nu̱ú ña̱ Traducción del Nuevo Mundo, va̱xi ki̱vi̱ Ndióxi̱ nu̱ú xíniñúʼu kixiña. Nu̱ú apéndice A4 xíʼin A5 nátúʼunña xíʼinyó ndaa ki̱ʼva nda̱taánna ki̱vi̱ Ndióxi̱. Ta nu̱ú apéndice C, ña̱ va̱xi nu̱ú ña̱ Biblia de estudio, káʼa̱nña xa̱ʼa̱ ku̱a̱ʼání prueba ña̱ náʼa̱ nu̱úyó ña̱ 237 yichi̱ xíniñúʼu kixi ki̱vi̱ Ndióxi̱ nu̱ú ña̱ Escrituras Griegas Cristianas.

10. ¿Ndáaña sákuaʼayó xíʼin ña̱ ndo̱ʼo iin ñaʼá ñá íyo chí Myanmar?

¹⁰ Nda̱a̱ táki̱ʼva ke̱ʼé ta̱ Jesús saá kéʼéyó chi kúni̱yó ña̱ ndiʼi na̱ yiví ná xa̱a̱na kunda̱a̱-inina xa̱ʼa̱ ki̱vi̱ Ndióxi̱. Chí ñuu Myanmar, iin ñá hermana ni̱ka̱ʼa̱nñá xíʼin iin náná ñá 67 ku̱i̱ya̱ ña̱ ki̱vi̱ Ndióxi̱ kúú Jehová. Ñá náná kán ni̱kusi̱íní-iniñá ta nda̱a̱ ki̱xáʼañá xákuñá. Tasaá ni̱ka̱ʼa̱nñá: “Ña̱yóʼo kúú yichi̱ nu̱ú ña̱ ku̱ndaa̱-inii̱ xa̱ʼa̱ ki̱vi̱ Ndióxi̱, ña̱kán ndáyáʼviní ña̱ sa̱náʼún yi̱ʼi̱ ki̱vi̱ vitin”. Experiencia yóʼo sánáʼa̱ña miíyó ña̱ tá xáa̱ iin na̱ yiví kúnda̱a̱-inina ña̱ ki̱vi̱ Ndióxi̱ kúú Jehová xáa̱na nása̱mana ta kíxáʼana sákuaʼana xa̱ʼa̱ra.

NDIʼI TIEMPO NÁ KANDÍXAYÓ ÑA̱ KÁʼA̱N NA̱ ÑUU NDIÓXI̱

11. ¿Ndáaña kivi keʼé na̱ anciano ña̱ va̱ʼa na̱ʼa̱na ña̱ kándíxana ña̱ káʼa̱n na̱ ñuu Jehová xíʼinna? (Koto na̱ʼná).

¹¹ ¿Ndáa ki̱ʼva na̱ʼa̱ na̱ anciano ña̱ kándíxana ña̱ káʼa̱n na̱ ñuu Ndióxi̱? Iin ki̱ʼva ña̱ keʼéna ña̱yóʼo kúú ña̱ kuniso̱ʼona ndiʼi ña̱ káʼa̱n na̱ ñuu Ndióxi̱ xíʼinna ta chika̱a̱na ndee̱ ña̱ keʼéna ña̱yóʼo. Tá kúú, káʼa̱nna xíʼinna ndáa ki̱ʼva koo ña̱ reunión ta saátu ndáa ki̱ʼva keʼéna oración tá xíyo reunión. Ta káʼa̱nna xíʼinna ndáa ki̱ʼva kundaana na̱ hermano. Tá xíniso̱ʼo na̱ anciano ndiʼi ña̱ káʼa̱n na̱ ñuu Ndióxi̱ xíʼinna, va̱ʼaní kúni na̱ hermano chi kiʼinna kuenta ña̱ kúʼvi̱ní-ini Jehová xínirana ta ndáarana.

12. a) ¿Nda̱chun xíniñúʼu kuniso̱ʼoyó ña̱ káʼa̱n na̱ anciano xíʼinyó? (Hebreos 13:​7, 17). b) ¿Nda̱chun kǒo xíniñúʼu kotoyó ña̱ va̱ása va̱ʼa kéʼé na̱ anciano?

¹² Tá káʼa̱n na̱ anciano xíʼinyó ndáaña xíniñúʼu keʼéyó ná chika̱a̱yó ndee̱ ña̱ kuniso̱ʼoyó ña̱ káʼa̱nna. Saá kúú ña̱ va̱ása ixayo̱ʼvi̱ña xíʼinna keʼéna chiñu ña̱ ta̱xi Ndióxi̱ ndaʼa̱na. Biblia káʼa̱nña xíʼinyó ña̱ ná kuniso̱ʼoyó ndiʼi ña̱ káʼa̱n na̱ anciano xíʼinyó (kaʼvi Hebreos 13:​7, 17). Ta sana kivi ixayo̱ʼvi̱ña xíʼinyó ña̱ kuniso̱ʼoyó ña̱ káʼa̱n na̱ anciano xíʼinyó saáchi na̱ yiví ku̱a̱chi kúúna. Soo tá nina ña̱ va̱ása va̱ʼa kéʼéna kúú ña̱ xítoyó, saá kúú ña̱ keʼéyó ña̱ kútóo ta̱ Ndi̱va̱ʼa. ¿Nda̱chun káʼa̱nyó ña̱yóʼo? Saáchi saá kúú ña̱ kixáʼayó kaka-iniyó xa̱ʼa̱ na̱ ñuu Ndióxi̱ ta ña̱yóʼo kúú ña̱ kúni̱ ta̱ Ndi̱va̱ʼa ná keʼéyó. Ña̱kán, ¿ndáaña kivi keʼéyó ña̱ va̱ʼa ndakuniyó ña̱ vatá ña̱ káʼa̱n na̱ sáa̱-ini xíni Ndióxi̱?

NÁ KǑO KAKA-INIYÓ XA̱ʼA̱ NA̱ ÑUU NDIÓXI̱

13. ¿Ndáaña káʼa̱n na̱ sáa̱-ini xíni Ndióxi̱ xa̱ʼa̱ na̱ ñuura?

¹³ Na̱ yiví na̱ sáa̱-ini xíni Ndióxi̱ káʼa̱nna ña̱ va̱ása va̱ʼa xa̱ʼa̱ na̱ ñuura. Tá kúú, Biblia káʼa̱nña xa̱ʼa̱ Jehová ña̱ kúni̱ra limpio ná kooyó, ña̱ kǒo keʼéyó ña̱ kini ta ná kǒo ndasakáʼnuyó ndióxi̱ vatá. Saátu káʼa̱nra ña̱ tá iin na̱ yiví kéʼéna ña̱ kini ta kǒo ndándikó-inina xa̱ʼa̱ ña̱ ke̱ʼéna xíniñúʼu keena ti̱xin congregación (1 Cor. 5:​11-13; 6:​9, 10). Xa̱ʼa̱ ña̱ kándíxayó ña̱ káʼa̱n Ndióxi̱ na̱ sáa̱-ini xíni miíra káʼa̱nna ña̱ kǒo kúʼvi̱-iniyó xíniyó na̱ yiví, ña̱ íxandi̱va̱ʼayó xíʼinna ta saátu ña̱ kúndasíyó xíniyóna.

14. ¿Ndáana kúú na̱ sáa̱-ini xíni na̱ ñuu Ndióxi̱?

¹⁴ Ta̱ Ndi̱va̱ʼa kúú ta̱ sáa̱-ini xíni miíyó. Ná ndakaʼányó chi miíra kúú ta̱ káʼa̱n ña̱ vatá xa̱ʼa̱ na̱ ñuu Ndióxi̱ (Juan 8:44; Gén. 3:​1-5). Ña̱kán kǒo ndákanda̱-iniyó ña̱ xíniñúʼura na̱  yiví ña̱ ka̱ʼa̱nna ña̱ vatá xa̱ʼa̱ na̱ ñuu Ndióxi̱ chi saá ke̱ʼéra tá siglo nu̱ú.

15. ¿Ndáaña ke̱ʼé na̱ su̱tu̱ xíʼin ta̱ Jesús ta saátu xíʼin na̱ discípulora?

¹⁵ Ni se̱ʼe Ndióxi̱ kúú ta̱ Jesús ta keʼéra ku̱a̱ʼání milagro tá ki̱xira nu̱ú ñuʼú yóʼo, ta̱ Ndi̱va̱ʼa xi̱niñúʼura na̱ yiví ña̱ ka̱ʼa̱nna ña̱ vatá xa̱ʼa̱ra. Tá kúú na̱ su̱tu̱ xi̱kaʼa̱nna xíʼin na̱ yiví ña̱ távára na̱ ta̱chí ndi̱va̱ʼa xíʼin ndee̱ “ta̱ xáʼndachíñu nu̱ú na̱ ta̱chí ndi̱va̱ʼa” (Mar. 3:22). Tá xa̱a̱ tíinna ku̱a̱chi xíʼinra, na̱ su̱tu̱ chi̱kaa̱ ku̱a̱chinara ña̱ káʼa̱nra ña̱ va̱ása va̱ʼa xa̱ʼa̱ Ndióxi̱. Ta saátu ni̱ka̱ʼa̱nna xíʼin na̱ yiví ña̱ ná ka̱ʼa̱nna xíʼin na̱ chíñu ña̱ ná kaʼnínara (Mat. 27:20). Tá ni̱ya̱ʼa tiempo, na̱ discípulo ta̱ Jesús ki̱xáʼana nátúʼunna xíʼin na̱ yiví xa̱ʼa̱ Ndióxi̱ ta na̱ sáa̱-ini xíni na̱yóʼo sa̱ndátakana ku̱a̱ʼání na̱ yiví ña̱ ka̱ʼa̱nna ña̱ va̱ása va̱ʼa xa̱ʼa̱na ta ixandi̱va̱ʼana xíʼinna (Hech. 14:​2, 19). Tutu La Atalaya 1 tí diciembre ña̱ ku̱i̱ya̱ 1998 ni̱ka̱ʼa̱nña xa̱ʼa̱ Hechos 14:2 ta ña̱yóʼo káchiña: “Na̱ judío na̱ xi̱saa̱-ini xi̱xini na̱ discípulo kǒo níxi̱kaʼa̱n kuitína ña̱ va̱ása va̱ʼa xa̱ʼa̱ chiñu ña̱ xi̱keʼéna chi saátu ki̱xáʼana káʼa̱nna xíʼin na̱ yiví na̱ xi̱ndoo inka ñuu ña̱ ná kǒo kuniso̱ʼona ña̱ xi̱natúʼun na̱ discípulo”.

16. ¿Ndáaña xíniñúʼu ndakaʼányó tá káʼa̱nna ña̱ vatá xa̱ʼa̱ na̱ ñuu Ndióxi̱?

¹⁶ Ndiʼi tiempo káʼa̱n ta̱ Ndi̱va̱ʼa ña̱ vatá ta sándaʼvira ndiʼi na̱ yiví na̱ ndóo nu̱ú ñuʼú yóʼo (Apoc. 12:9). Ña̱kán, tá xíniso̱ʼoyó ña̱ káʼa̱nna ña̱ va̱ása va̱ʼa xa̱ʼa̱ na̱ ñuu Ndióxi̱ á xa̱ʼa̱ na̱ níʼi yichi̱ nu̱úyó, ná ndakaʼányó xa̱ʼa̱ ña̱ ke̱ʼé na̱ yiví xíʼin ta̱ Jesús ta saátu xíʼin na̱ discípulora. Nda̱a̱ táki̱ʼva ni̱ka̱ʼa̱n Biblia, na̱ yiví íxandi̱va̱ʼana xíʼin na̱ testigo Jehová ta káʼa̱nna ña̱ vatá xa̱ʼa̱na (Mat. 5:​11, 12). Ta̱  Ndi̱va̱ʼa kúú ta̱ xíniñúʼu na̱ yiví ña̱ sandáʼvina miíyó, ña̱kán ná kǒo kuniso̱ʼoyó ña̱ káʼa̱nna. Soo, ¿ndáaña xíniñúʼu keʼéyó tasaá kǒo kandíxayó ña̱ káʼa̱n na̱yóʼo?

17. ¿Ndáaña xíniñúʼu keʼéyó tá kíxáʼana káʼa̱nna ña̱ vatá xíʼinyó? (2 Timoteo 1:13; koto recuadro ña̱ naní “ ¿Ndáaña keʼún tá káʼa̱nna ña̱ vatá xa̱ʼa̱ na̱ ñuu Ndióxi̱?”).

¹⁷ Ná kǒo kuniso̱ʼoyó ña̱ vatá ña̱ káʼa̱n na̱ yiví. Ta̱ apóstol Pablo ni̱ka̱ʼa̱nra ndáaña xíniñúʼu keʼéyó tá káʼa̱nna ña̱ vatá xa̱ʼa̱ na̱ ñuu Ndióxi̱. Nu̱ú 1 Timoteo 1:​3, 4 ni̱ka̱ʼa̱nra ña̱ “kǒo kuniso̱ʼona cuento vatá”. Ta ña̱yóʼo ni̱ka̱ʼa̱nra xíʼin ta̱ Timoteo “xíniñúʼu kundasíún kuniún cuento vatá ña̱ nátúʼun na̱ yiví” (1 Tim. 4:7). Ná ka̱ʼa̱nyó xa̱ʼa̱ iin ejemplo ña̱ va̱ʼa kunda̱a̱-iniyó xíʼin ña̱ ni̱ka̱ʼa̱nra. Tá kúú: na̱ va̱lí ndákayana ña̱ʼa ña̱ ni̱ko̱yo nu̱ú ñuʼú ta xáxinaña chi kǒo kúnda̱a̱-inina. Soo miíyó na̱ xa̱a̱ chée, kǒo kaxivíyóña chi xíni̱yó ña̱ yaku̱a̱ña ta kivi kiʼin kue̱ʼe̱ miíyó xíʼinña. Ki̱ʼva saá kéʼé miíyó chi kǒo xíniso̱ʼoyó ña̱ vatá ña̱ sánáʼa̱ na̱ yiví chi iinlá ña̱ sánáʼa̱ na̱ ñuu Ndióxi̱ kúú ña̱ xíniso̱ʼoyó (kaʼvi 2 Timoteo 1:13).

18. ¿Ndáaña kivi keʼéyó tasaá na̱ʼa̱yó ña̱ kándíxayó ña̱ káʼa̱n na̱ ñuu Ndióxi̱?

¹⁸ Nu̱ú artículo yóʼo sa̱kúaʼayó u̱ni̱ ña̱ʼa ña̱ kéʼé na̱ ñuu Ndióxi̱ tasaá ndíku̱nna ña̱ kéʼé ta̱ Jesús, soo su̱ví ña̱yóʼo kúú ndiʼiña chi íyokava ña̱ kéʼéna. Ña̱kán chindeétáʼan xíʼin na̱ hermano ña̱ kandíxakana ña̱ káʼa̱n na̱ ñuu Ndióxi̱. Ta chika̱a̱ ndee̱ ña̱ nda̱kú koo iniún xíʼin Jehová. Ta kǒo taxiún ña̱ nda̱a̱ ni iin ña̱ʼa sakúxíkaña yóʼó nu̱ú na̱ ñuu Ndióxi̱ chi na̱yóʼo kúú na̱ xíniñúʼura ña̱ va̱ʼa saxínura ña̱ kúni̱ra (Sal. 37:28). Kúsi̱íní-iniyó ña̱ ñúʼuyó ti̱xin ñuu Jehová saáchi kúʼvi̱-iniyó xíni táʼanyó ta iinlá Jehová ndásakáʼnuyó.