1. ¿Ndáaña kivi keʼéyó ña̱ va̱ʼa kachíñuyó xíʼin Jehová?

TÁ I̱XAVA̱ʼA Jehová miíyó xi̱kuni̱ra ña̱ ndiʼiyó ná chindeétáʼan xíʼinra ña̱ va̱ʼa xi̱nu ña̱ kúni̱ra. Ni vitin kúúyó na̱ yiví ku̱a̱chi, soo miíyó na̱ ndásakáʼnu Ndióxi̱ kivi kachíñuyó xíʼinra ndiʼi ki̱vi̱. Nu̱ú Biblia káchiña ndiʼiyó “na̱ káchíñu xíʼin Ndióxi̱ kúúyó” tá ku̱a̱ʼa̱nyó nátúʼunyó xa̱ʼara xíʼin na̱ yiví ña̱ va̱ʼa xa̱a̱na ndasakáʼnunara (1 Cor. 3:5-9). Iin ña̱ va̱ʼaní kúúña chi xíniñúʼu Ndióxi̱ miíyó ña̱ keʼéyó chiñu yóʼo nu̱úra. Soo íyoka sava ña̱ kivi keʼéyó ña̱ va̱ʼa kachíñuyó nu̱úra. Nu̱ú ña̱ artículo yóʼo ka̱ʼa̱nyó xa̱ʼa savaña: ña̱ chindeétáʼanyó xíʼin na̱ veʼeyó ta saátu xíʼin na̱ hermanoyó, ña̱ va̱ʼa koo iniyó xíʼin inkana, ña̱ taxiyó miíyó ña̱ chindeétáʼanyó xíʼin na̱ ñuu Ndióxi̱ ta saátu ña̱ ku̱a̱ʼáka chiñu keʼéyó nu̱úra (Col. 3:23).

2. ¿Nda̱chun va̱ása xíniñúʼu chitáʼanyó ña̱ kéʼéyó nu̱ú Jehová xíʼin ña̱ kéʼé inkana?

² Tá káʼviyó ña̱ va̱xi nu̱ú artículo yóʼo, ná kǒo chitáʼanyó ña̱ kivi keʼéyó nu̱ú Jehová xíʼin ña̱ kéʼé inkana. Ná kǒo nandósóyó chi ku̱i̱ya̱yó, kue̱ʼe̱ kúúmiíyó, ña̱ ndóʼoyó, ña̱ xíni̱yó keʼéyó su̱ví inkáchi kúúña. Ta̱ apóstol Pablo ni̱ka̱ʼa̱nra: “Soo iin iinyó ná kotondósóyó ndáa ki̱ʼva íyo ña̱ kéʼéyó tasaá kusi̱í-iniyó xíʼin ña̱ kéʼéyó  ta va̱ása chitáʼanyó miíyó xíʼin inkana” (Gál. 6:4).

3. ¿Nda̱chun kivi ka̱ʼa̱nyó xa̱ʼa savana ña̱ káchíñuna xíʼin Ndióxi̱ tá ndáana na̱ veʼena?

³ Jehová kúni̱ra na̱ ndásakáʼnu miíra ná kundaana na̱ veʼena. Tá kúú savana xíniñúʼu kachíñuna ña̱ va̱ʼa taxina ña̱ xíniñúʼu na̱ veʼena. Ku̱a̱ʼání ná ñaʼá ná íyo se̱ʼe ndáaná na̱ va̱lí se̱ʼená. Ta savaka na̱ ndásakáʼnu Ndióxi̱ xíniñúʼu kundaana yivána na̱ xa̱chée. Ña̱yóʼo kúú ña̱ ndáyáʼvika keʼéyó. Ña̱ Biblia káchiña: “Tá iinna kǒo táxina ña̱ xíniñúʼu na̱ táʼanna tá kúú na̱ veʼena náʼa̱na ña̱ kǒo kándíxana Ndióxi̱ ta ndeéka ña̱ kéʼé na̱yóʼo nu̱ú na̱ kǒo kándíxa Ndióxi̱” (1 Tim. 5:8). Tá kúúmiíyó táʼan chiñu yóʼo sana va̱ása kivika keʼéyó chiñu Ndióxi̱ nda̱a̱ táki̱ʼva kúni̱yó. Soo ná kǒo ndakava-iniyó. Ndióxi̱ kúsi̱íní-inira tá ndáayó na̱ veʼeyó (1 Cor. 10:31).

4. ¿Ndáaña kivi keʼé na̱ íyo se̱ʼe ña̱ va̱ʼa chindeétáʼanna xíʼin se̱ʼena ña̱ kachíñukana nu̱ú Ndióxi̱, ta ndáaña va̱ʼa ndákiʼinna xa̱ʼa ña̱yóʼo?

⁴ Na̱ íyo se̱ʼe chíndeétáʼanna xíʼin Jehová tá chíka̱a̱na ndeé xíʼin se̱ʼena ña̱ kachíñukana nu̱ú Ndióxi̱. Tá yáʼa ku̱i̱ya̱, ku̱a̱ʼání na̱yóʼo kíxaʼá ku̱a̱ʼáka tiempo káchíñuna nu̱ú Ndióxi̱, ta nda̱a̱ ku̱a̱ʼa̱nna inka ñuu. Savana kúúna misionero, inkana kúúna precursor ta ku̱a̱ʼa̱nna nu̱ú xíniñúʼukana na̱ natúʼun xa̱ʼa Ndióxi̱, ta savakana káchíñuna Betel. Xa̱ʼa ña̱ kéena ku̱a̱ʼa̱n xíkana na̱ yivána va̱ása kívi kunikanana, soo ni saá na̱ ndixa ndíʼi-ini xa̱ʼa chiñu Jehová chíndeétáʼanna xíʼin se̱ʼena. ¿Nda̱chun? Saáchi kúsi̱íní-inina xíʼin se̱ʼena xa̱ʼa ña̱ ndíʼi-inina xa̱ʼa chiñu Ndióxi̱ (3 Juan 4). Sava na̱yóʼo sana nda̱a̱ táki̱ʼva ndo̱ʼo ñá Ana saá ndóʼona, ñáyóʼo ni̱ka̱ʼa̱nñá ña̱ ta̱xiñá se̱ʼeñá ta̱ Samuel ña̱ ka̱chíñura nu̱ú Jehová. Na̱ íyo se̱ʼe va̱ʼaní kéʼéna tá va̱ʼa sánáʼa̱na se̱ʼena tasaá chíndeétáʼanna xíʼin Ndióxi̱ (1 Sam. 1:28).

5. ¿Nda̱saa kivi chindeétáʼanyó xíʼin na̱ congregación nu̱ú ñúʼuyó? (Koto na̱ʼná ña̱ va̱xi chí xa̱ʼa).

⁵ ¿Ndáaña kivi keʼéyó tá kǒo chiñu táʼan ña̱ ni̱ka̱ʼa̱nyó xa̱ʼa yóʼo kúúmiíyó xíʼin na̱ veʼeyó? Sana kivi chindeétáʼanyó xíʼin na̱ hermano na̱ xa̱a̱ ku̱chée, na̱ ndeé ndóʼo, á na̱ kúúmií inkaka tu̱ndóʼo. Kivitu chindeétáʼanyó xíʼin na̱ ndáa na̱ hermano yóʼo. ¿Á su̱ví iin ña̱ va̱ʼaní kúúña tá ná kotoyó ndáana kivi chindeétáʼanyó xíʼin ti̱xin congregación nu̱ú ñúʼuyó? Ná kachiyó iin ñá hermana ndáañá yiváñá chi xa̱a̱ ku̱chéera. ¿Á kivi chindeétáʼanyó xíʼinñá ña̱ kundaayóra ña̱ va̱ʼa keʼékañá inka chiñu? Á sana kivitu ka̱ʼa̱nyó xíʼin iinna, ña̱ ya̱ʼayó xa̱ʼana ña̱ ku̱ʼu̱nna xíʼinyó reunión, á ña̱ ku̱ʼu̱nyó kotoyó iin na̱ táʼanna na̱ ndíka̱a̱ hospital, á ña̱ ku̱ʼu̱nyó satáyó ña̱ʼa ña̱ xíniñúʼuna. Tá kéʼéyó ña̱yóʼo saá kúú ña̱ chíndeétáʼanyó xíʼin Jehová ña̱ ndakuiinra oración ña̱ kéʼéna nu̱úra (kaʼvi 1 Corintios 10:24). *

6. ¿Ndáaña kúni̱ kachiña ña̱ va̱ʼa koo iniyó xíʼin inkana?

⁶ Na̱ yiví xínina ña̱ va̱ʼaní ini na̱ ndásakáʼnu Ndióxi̱. Nu̱ú ña̱ Escrituras Griegas Cristianas, ña̱ tu̱ʼun “va̱ʼaní inina” kúni̱ kachiña “va̱ʼaní inina xíʼin na̱ va̱ása xíni̱na” (Heb. 13:2; nota). Nu̱ú Biblia va̱xi ku̱a̱ʼání relato ña̱ sánáʼa̱ miíyó ña̱ va̱ʼa koo iniyó xíʼin inkana (Gén. 18:1-5). Va̱ʼaní kéʼéyó tá chíndeétáʼanyó xíʼin na̱ ndásakáʼnu Ndióxi̱ ta saátu xíʼin na̱ va̱ása ndásakáʼnu-ñaʼá (Gál. 6:10).

7. ¿Nda̱chun xíniñúʼu va̱ʼa koo iniyó xíʼin na̱ va̱xi xíto miíyó ti̱xin congregaciónyó?

⁷ Kivi chindeétáʼanyó xíʼin Jehová tá va̱ʼa íyo iniyó xíʼin na̱ káchíñu ku̱a̱ʼáka tiempo nu̱úra  tá va̱xina congregaciónyó (kaʼvi 3 Juan 5, 8). * Tá va̱xi na̱yóʼo xítona miíyó saá kúú ña̱ va̱ʼaníka ‘táxiyó ndée ndaʼa̱ táʼanyóʼ (Rom. 1:11, 12). Ná ka̱ʼa̱nyó xa̱ʼa iin ta̱ hermano ta̱ naní Olaf. Xa̱a̱ ku̱a̱ʼání ku̱i̱ya̱, tá loʼokara ni̱xa̱a̱ iin ta̱ superintendente ña̱ circuito congregaciónra ta nda̱a̱ ni iin na̱ hermano va̱ása níkivi ndakiʼinnara veʼena. Ta̱ Olaf ni̱nda̱ka̱tu̱ʼunra na̱ yivára, na̱ va̱ása kúú testigo Jehová, á kivi kindo̱o ta̱ hermano yóʼo veʼena. Ni̱ka̱ʼa̱nna xíʼinra ña̱ kiviva soo xíniñúʼu ku̱su̱n ta̱ Olaf nu̱ú sillón. Va̱ʼaníva ña̱ ke̱ʼéra ña̱yóʼo. Ta̱ Olaf ndákáʼanra ña̱ va̱ʼaní ni̱xi̱yo semana kán, káchira: “Ta̱ superintendente ña̱ circuito xíʼin yi̱ʼi̱ tá xi̱ndako̱ondi̱ xi̱ta̱an nina xa̱ʼa ña̱ ndáyáʼvi xi̱natúʼundi̱ tá xi̱xixindi̱. Ña̱ ni̱ka̱ʼa̱n ta̱yóʼo xíʼi̱n chi̱ndeéníña yi̱ʼi̱ ña̱ ki̱xaʼá káchíñui̱ ku̱a̱ʼáka tiempo nu̱ú Jehová”. Ta̱ Olaf xa̱a̱ 40 ku̱i̱ya̱ kúúra misionero ta xa̱a̱ ku̱a̱ʼání país xáʼa̱nra.

8. ¿Nda̱chun xíniñúʼu va̱ʼa koo iniyó xíʼin inkana ni tá kǒo táxina tixaʼvi ndaʼa̱yó túviyó? Ka̱ʼa̱n xa̱ʼa iin ejemplo.

⁸ Ku̱a̱ʼání ña̱ʼa kivi keʼéyó ña̱ va̱ʼa na̱ʼa̱yó ña̱ va̱ʼa íyo iniyó xíʼin na̱ kǒo xíniyó, ni tá kǒo táxina tixaʼvi ndaʼa̱yó. Ná kotoyó iin ejemplo. Chí ñuu España iin ñá hermana íyoñá sánáʼa̱ñá iin ñá nána ñá ñuu Ecuador ñá naní Yésica, ta ñáyóʼo ki̱xaʼáñá xákuñá. Ñá hermana ni̱nda̱ka̱tu̱ʼunñañá nda̱chun xákuñá, ta ñá Yésica ni̱ka̱ʼa̱nñá xíʼinñá, tá ta̱ʼánka ku̱ʼu̱nñá kooñá chí ñuu España ndáʼviní ni̱xi̱yoñá, iin ki̱vi̱ ni loʼo ña̱ʼa ña̱ kuxuñá kǒo. Ndáa ti̱kui̱íva xi̱taxiñá ndaʼa̱ ñá loʼo se̱ʼeñá xi̱xiʼiñá. Tá ki̱xaʼá sákúsu̱nñá ñá loʼo se̱ʼeñá, ke̱ʼéñá iin oración. Tándi̱ʼi ki̱xa̱a̱ u̱vi̱ ná hermana ta ka̱nindaʼa̱na yéʼéñá. Ni̱sa̱a̱ní ñá Yésica xíʼin ná hermana yóʼo ta nda̱tá ndiʼiñá revista ña̱ ta̱xiná ndaʼa̱ñá. Ta ni̱ka̱ʼa̱nñá xíʼinná: “¿Á ña̱yóʼo taxii̱ kuxu se̱ʼi̱?”. Ná hermana yóʼo va̱ása níkivi sándi̱koná ini ñá Yésica. Soo tándi̱ʼi ná hermana yóʼo ndi̱kóna ta sa̱ndákoona ña̱ kuxu ñá Yésica xíʼin se̱ʼe loʼoñá chí yéʼéñá. Vitin kúsi̱íní-ini ñá Yésica tá ndákaʼánñá xa̱ʼa ña̱ va̱ʼaní ni̱xi̱yo ini ná hermana kán xíʼinñá soo saátu ndákavaní-iniñá xa̱ʼa ña̱ va̱ása va̱ʼa níkeʼéñá xíʼinná, saáchi Ndióxi̱ kúú ta̱ xi̱niñúʼu náyóʼo ña̱ nda̱kuiinra oraciónñá. Soo vitin kúni̱níñá kachíñuñá nu̱ú Jehová, xa̱ʼa ña̱ va̱ʼaní ni̱xi̱yo ini ná hermana kán xíʼinñá (Ecl. 11:1, 6).

9, 10. a) ¿Ama kúú ña̱ xi̱xiniñúʼu na̱ ñuu Israel na̱ xi̱kuni̱ kachíñu nu̱ú Ndióxi̱? b) ¿Ndáaña kúú sava ña̱ xíniñúʼu keʼéyó ti̱xin congregación tiempo vitin?

⁹ Tiempo xi̱naʼá na̱ ñuu Israel sava yichi̱ xi̱xiniñúʼuna na̱ kúni̱ kachíñu nu̱ú Ndióxi̱ (Éx. 36:2; 1 Crón. 29:5; Neh. 11:2). Saátu tiempo vitin íyo ku̱a̱ʼání ña̱ kivi keʼéyó ti̱xin ñuu Ndióxi̱, kivi taxiyó tiempoyó, á ña̱ kúúmiíyó, á ña̱ xíni̱yó keʼéyó ña̱ va̱ʼa chindeétáʼanyó xíʼin na̱ hermanoyó. Tá ná keʼéyó ña̱yóʼo kusi̱íní-iniyó ta ku̱a̱ʼání ña̱ va̱ʼa ndakiʼinyó.

¹⁰ Biblia káʼa̱nña xíʼin na̱ ta̱a ña̱ ná kachíñuna xíʼin Jehová ta ná chika̱a̱na ndée ña̱ va̱ʼa xa̱a̱na koona anciano á siervo ministerial (1 Tim. 3:1, 8, 9; 1 Ped. 5:2, 3). Na̱ kéʼé ña̱yóʼo náʼa̱na ña̱ kúni̱nína chindeétáʼanna xíʼin na̱ hermano nda̱a̱ ndáaka ña̱ xíniñúʼuna (Hech. 6:1-4). ¿Á xa̱a̱ ndáka̱tu̱ʼun na̱ anciano miíyó á kúni̱yó chindeétáʼanyó xíʼinna ña̱ kooyó acomodador, ña̱ ndataʼvíyó tutu ndaʼa̱ na̱ hermano, ña̱ ndataʼvíyó territorio á ña̱ ndasaviíyó veʼe nu̱ú ndátakayó? Na̱ xa̱a̱ kéʼé ña̱yóʼo kivi ka̱ʼa̱nna xíʼinyó ña̱ kúsi̱íní-inina tá chíndeétáʼanna xíʼin inkana.

11. ¿Nda̱saa chi̱ndeétáʼan na̱ migo iin ñá hermana xíʼinñá tá ni̱xa̱ʼa̱nñá ka̱chíñuñá nu̱ú ku̱va̱ʼa veʼe nu̱ú ndátakayó?

 ¹¹ Na̱ káchíñu xíʼin na̱ ñuu Ndióxi̱ ku̱a̱ʼáka migona íyo. Ná kotoyó ndáaña ndo̱ʼo ñá Margie, ñáyóʼo 18 ku̱i̱ya̱ ka̱chíñuñá nu̱ú kúva̱ʼa veʼe nu̱ú ndátakayó. Ti̱xin ku̱a̱ʼání ku̱i̱ya̱ sa̱náʼa̱ñá ku̱a̱ʼání ná hermana válí. Ta va̱ʼaní xi̱chika̱a̱ná ndeé xíʼin táʼanná (Rom. 1:12). Tá ni̱ya̱ʼañá nu̱ú tu̱ndóʼo ndiʼi ná migañá sa̱ndíkoná iniñá. ¿Á xa̱a̱ xáʼa̱n miíyó nu̱ú kúva̱ʼa veʼe nu̱ú ndátakayó sava yichi̱? Kivi keʼéyó ña̱yóʼo ni xíni̱yó keʼéyó iin chiñu á ni va̱ása xíni̱yó.

12. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ ndóʼo tu̱ndóʼo?

¹² Tá yáʼa savana nu̱ú tu̱ndóʼo saá kúúña va̱ʼaníka náʼa̱ na̱ ñuu Ndióxi̱ ña̱ va̱ʼaní-inina xíʼin na̱ hermano, ta chíndeétáʼanna xíʼinna. Kivi taxina xu̱ʼún ña̱ va̱ʼa chindeétáʼanna xíʼin na̱ yáʼa nu̱ú tu̱ndóʼo yóʼo (Juan 13:34, 35; Hech. 11:27-30). Saátu kivi ndayakúnna veʼe na̱yóʼo á ndasaviína veʼena. Iin ñá hermana ñá ñuu Polonia ñá naní Gabriela, ku̱a̱ʼání ña̱ʼa ña̱ xi̱kuumiíñá ndi̱ʼi-xa̱ʼa. Soo ku̱si̱íní-iniñá tá ni̱xa̱ʼa̱n na̱ hermano xi̱tonañá. Ñáyóʼo káchiñá: “Va̱ása kúni̱ ka̱ʼi̱n xa̱ʼa ña̱ʼi̱ ña̱ ndi̱ʼi-xa̱ʼa chi va̱ása ndáyáʼví ña̱yóʼo. Ña̱ nda̱kiʼin kúú ña̱ ndáyáʼvíka. Ndiʼi ña̱ ndo̱ʼi̱ sa̱náʼa̱ña yi̱ʼi̱ ña̱ kǒo ni iin ña̱ʼa ña̱ kivi kitáʼan xíʼin ña̱ kúúyó na̱ ñuu Ndióxi̱ ta kúsi̱íní-inii̱ xíʼin ña̱yóʼo”. Ku̱a̱ʼání na̱ hermano na̱ yáʼa nu̱ú tu̱ndóʼo, kúsi̱íní-inina ña̱ chíndeétáʼanna xíʼinna. Ta na̱ káchíñu xíʼin Jehová kúsi̱íní-inina ña̱ chíndeétáʼanna xíʼin inkana (kaʼvi Hechos 20:35; * 2 Corintios 9:6, 7). *

13. ¿Nda̱chun va̱ʼa ndúndakúka ña̱ kúʼvi̱-iniyó xíniyó Jehová tá chíndeétáʼanyó xíʼin inkana? Ka̱ʼa̱n xa̱ʼa iin ejemplo.

¹³ Iin ñá hermana ñá naní Stephanie xíʼin inka na̱ hermano ku̱si̱íní-inina ña̱ ka̱chíñuna xíʼin Jehová, ta chi̱ndeétáʼanna xíʼin na̱ hermano na̱ ke̱e inka ñuu nu̱ú íyoní ku̱a̱chi, tá ki̱xa̱a̱na chí Estados Unidos. Ndu̱kúna veʼe nu̱ú kundoo na̱ hermano yóʼo. Ñáyóʼo káchiñá: “Va̱ʼaní ku̱nindi̱ tá xi̱nindi̱ ña̱ ku̱si̱íní-ini na̱  hermano yóʼo, ta ta̱xina tixaʼvi xa̱ʼa ndiʼi ña̱ ke̱ʼé na̱ ñuu Ndióxi̱ xa̱ʼana. Na̱kán ndákanixi̱nína ña̱ miíndi̱ chi̱ndeétáʼan xíʼinna soo miívana kúú na̱ chi̱ndeéka ndi̱ʼi̱. Ña̱ kúʼvi̱ní-iniyó xíni táʼanyó, ña̱ inkáchi kítáʼanyó, ña̱ kándíxayó Jehová chindeétáʼanña xíʼindi̱ ña̱ ndu̱ndakúka ña̱ kúʼvi̱-inindi̱ xínindi̱ Ndióxi̱. Ta saátu chi̱ndeéníña ndi̱ʼi̱ ña̱ chindayáʼvikandi̱ ndiʼi ña̱ kéʼé Jehová xa̱ʼa na̱ ñuura”.

14, 15. a) ¿Ndáaña ke̱ʼé ta̱ profeta Isaías? b) ¿Nda̱saa kivi kundiku̱nyó yichi̱ ta̱ Isaías?

¹⁴ ¿Á kivi kachíñukayó xíʼin Jehová? ¿Á kivi ku̱ʼu̱nyó inka ñuu nu̱ú xíniñúʼukana na̱ natúʼun xa̱ʼa Ndióxi̱? Kúnda̱a̱-iniyó su̱ví ña̱ nduxa̱ kúúña ku̱ʼu̱nyó inka ñuu ña̱ na̱ʼa̱yó ña̱ va̱ʼa íyo iniyó xíʼin inkana. Soo sava na̱ hermano va̱ʼava kéena ku̱a̱ʼa̱nna inka ñuu ña̱ va̱ʼa kachíñuna nu̱ú Jehová. Na̱yóʼo kéʼéna nda̱a̱ táki̱ʼva ke̱ʼé ta̱ profeta Isaías. Jehová ni̱nda̱ka̱tu̱ʼunra: “¿Ndáana chindaʼíi̱ ku̱ʼu̱n? ¿Ndáana ku̱ʼu̱n nu̱úyó?” ta ta̱yóʼo nda̱kuiinra: “Yóʼo íyo yi̱ʼi̱, yi̱ʼi̱ chindaʼún ku̱ʼu̱n” (Is. 6:8). ¿Á saá kandíxa miíyó ku̱ʼu̱nyó inka ñuu ña̱ chindeétáʼanyó xíʼin inkana? ¿Ndáaña xíniñúʼuníka keʼéyó vitin?

¹⁵ Tá ni̱ka̱ʼa̱n ta̱ Jesús xa̱ʼa ña̱ ku̱ʼu̱nyó natúʼunyó xa̱ʼa Ndióxi̱ xíʼin na̱ yiví ña̱ va̱ʼa ndasakáʼnunara, ka̱chira: “Ku̱a̱ʼání kúú ña̱ xíniñúʼu sakeena ta loʼoní kúu na̱ sákee. Ña̱kán ka̱ʼa̱nkandó xíʼin ta̱ káchíñundó nu̱ú ná taxikara na̱ kachíñu” (Mat. 9:37, 38). ¿Á kivi kooyó precursor nu̱ú xíniñúʼukana na̱ natúʼun xa̱ʼa Ndióxi̱? ¿Á kivi chindeéyó inkana ña̱ keʼéna ña̱yóʼo? Ku̱a̱ʼání na̱ hermano, náʼa̱na ña̱ kúʼvi̱-inina xínina Ndióxi̱ xíʼin na̱ yiví tá xáʼa̱nna nu̱ú xíniñúʼukana na̱ natúʼun xa̱ʼa Ndióxi̱, ta kúúna precursor. ¿Á kivi keʼéyó inka ña̱ʼa ña̱ va̱ʼa ku̱a̱ʼáka chiñu keʼéyó nu̱ú Ndióxi̱? Tá ná keʼéyó ndiʼi ña̱yóʼo, si̱íní kooyó.

16, 17. ¿Ndáaka ña̱ kivi keʼé na̱ kúni̱ kachíñu ku̱a̱ʼáka tiempo nu̱ú Jehová?

¹⁶ ¿Á kandíxayó kachíñuyó Betel, á nu̱ú kúva̱ʼa veʼe nu̱ú ndátakayó? Sana kivi kachíñuyó loʼo tiempo á kachíñuyó loʼo ki̱vi̱ nu̱ú semana. Xíniñúʼunína na̱ hermano na̱ kúni̱ kachíñu ni nda̱a̱ ndáaka ñuu ná chindaʼánana ku̱ʼu̱nna, á nda̱a̱ ndáaka chiñu ná taxina ndaʼa̱na. Sana chindaʼánana ku̱ʼu̱nna nu̱ú kúma̱níka ña̱ kachíñu nu̱ú Ndióxi̱, soo sana va̱ása ka̱ʼa̱nna xíʼinna ña̱ keʼéna iin chiñu ña̱ xa̱a̱ xíni miína keʼéna chi inkava chiñu taxina ndaʼa̱na. Soo ni saá Jehová chíndayáʼviníra na̱ táxi mií ña̱ kéʼéna nda̱a̱ ndáaka chiñu ña̱ xíniñúʼu ti̱xin ñuura (Sal. 110:3).

¹⁷ Tá kúni̱kayó sakuaʼa va̱ʼayó ña̱ kachíñuyó nu̱ú Jehová, sana sandakutúyó requisito ña̱ va̱ʼa ku̱ʼu̱nyó Escuela nu̱ú Sákuaʼa na̱ Nátúʼun xa̱ʼa ña̱ Kaʼndachíñu Ndióxi̱. Ti̱xin ña̱ escuela yóʼo sánáʼa̱na na̱ ta̱a xíʼin ná ñaʼá na̱ káchíñu ku̱a̱ʼá tiempo nu̱ú Ndióxi̱, ña̱ va̱ʼa kuniñúʼukanana ña̱ keʼéna chiñu Ndióxi̱. Na̱ kúni̱ ku̱ʼu̱n curso yóʼo xíniñúʼu kandíxana ku̱ʼu̱nna nda̱a̱ ndáaka ñuu ná chindaʼánana ku̱ʼu̱nna, tá ná ndiʼi curso yóʼo. ¿Á kandíxa miíyó ku̱ʼu̱nyó escuela yóʼo ta saá ku̱a̱ʼáka chiñu keʼéyó nu̱ú Ndióxi̱? (1 Cor. 9:23).

18. ¿Ndáaña va̱ʼa ndakiʼinyó tá káchíñuyó xíʼin Jehová ndiʼi ki̱vi̱?

¹⁸ Miíyó na̱ ndásakáʼnu Jehová kúni̱níyó va̱ʼa koo iniyó xíʼin inkana, ta náʼa̱yó ña̱ kúʼvi̱-iniyó xíniyóna, ta saátu ndíʼi̱-iniyó xa̱ʼana ndiʼi ki̱vi̱, ta chindeétáʼanyó xíʼinna. Ña̱yóʼo sákusi̱íníña iniyó ta va̱ʼaní kúniyó (Gál. 5:22, 23). Ni nda̱a̱ ndáaka ña̱ ndóʼoyó, ndiʼiyó kivi kusi̱í-ini tá táxiyó ña̱ kúúmiíyó ndaʼa̱ inkana, nda̱a̱ táki̱ʼva kéʼé Jehová, ta saá kooyó táʼan na̱ káchíñu xíʼin Ndióxi̱ na̱ kúni̱níra xínira (Prov. 3:9, 10).