1. ¿Ndáaña ni̱ka̱ʼa̱n ta̱ Isaías xa̱ʼa ta̱ Jesús, ta nda̱chun chíndeéní ña̱yóʼo miíyó?

NU̱Ú iin profecía ña̱ káʼa̱n xa̱ʼa ta̱ Jesús ta̱ Isaías ni̱ka̱ʼa̱nra: “Va̱ása tiinra ku̱a̱chi xíʼin ña̱ xíto kuitíra, ni va̱ása tiinra ku̱a̱chi xa̱ʼa ña̱ xíniso̱ʼo kuitíra. Nda̱kúní tiinra ku̱a̱chi xíʼin na̱ ndáʼvi” (Is. 11:3, 4). Chíndeéní tu̱ʼun yóʼo miíyó. ¿Nda̱chun? Saáchi íyoyó iin ñuyǐví nu̱ú kúndasítáʼan na̱ yiví. Ndiʼiyó kúni̱yó ná kixa̱a̱ ki̱vi̱ ña̱ tiin ta̱ Jesús ku̱a̱chi xíʼinyó chi ta̱yóʼo va̱ása tiinra ku̱a̱chi xa̱ʼa ña̱ xíto kuitíra.

2. ¿Ndáaña ni̱ka̱ʼa̱n ta Jesús xíʼinyó keʼéyó, ta ndáaña ka̱ʼa̱nyó xa̱ʼa nu̱ú artículo yóʼo?

² Ndiʼi ki̱vi̱ ndákanixi̱níyó inka ña̱ʼa xa̱ʼa na̱ yiví. Soo xa̱ʼa ña̱ kúúyó na̱ yiví ku̱a̱chi, sava ndákanixi̱níyó inka ña̱ʼa xa̱ʼana ta kǒo kéʼéyó táki̱ʼva kéʼé ta̱ Jesús. Xa̱ʼa ña̱ xíto kuitíyó ndákanixi̱níyó ña̱ va̱ása va̱ʼa xa̱ʼa na̱yóʼo. Soo tá ni̱xi̱yo ta̱ Jesús nu̱ú ñuʼú yóʼo ni̱ka̱ʼa̱nra: “Va̱ása ndakanixi̱níndó inka ña̱ʼa xa̱ʼa inkana xa̱ʼa ña̱ xíto kuitíndó, siʼna xíniñúʼu kunda̱a̱ va̱ʼa inindó xa̱ʼaña” (Juan 7:24). Xíʼin ña̱yóʼo kúnda̱a̱-iniyó, ta̱yóʼo kúni̱ra kundiku̱nyó yichi̱ra ta va̱ása ndakanixi̱níyó inka ña̱ʼa xa̱ʼa inkana xa̱ʼa ña̱ xíto  kuitíyó. Nu̱ú artículo yóʼo ka̱ʼa̱nyó xa̱ʼa u̱ni̱ ña̱ʼa ña̱ kivi chindaʼá miíyó ña̱ ndakanixi̱níyó inka ña̱ʼa xa̱ʼa inkana: xa̱ʼa razana, xa̱ʼa ñuu nu̱ú ke̱ena, xa̱ʼa xu̱ʼúnna á ku̱i̱ya̱na. Xíʼin iin iin ña̱yóʼo kotoyó nda̱saa kivi kundiku̱nyó ña̱ ni̱ka̱ʼa̱n ta̱ Jesús.

3, 4. a) ¿Nda̱chun na̱sama ta̱ apóstol Pedro ña̱ xi̱ndakanixi̱níra xa̱ʼa na̱ va̱ása kúú judío? (Koto na̱ʼná ña̱ va̱xi chí xa̱ʼa). b) ¿Ndáaña sa̱náʼa̱ Jehová ta̱ Pedro?

³ Ná ndakanixi̱níyó xa̱ʼa ña̱ ndo̱ʼo ta̱ apóstol Pedro tá ni̱ka̱ʼa̱nna xíʼinra ña̱ ná ku̱ʼu̱nra chí ñuu Cesarea veʼe iin ta̱a ta̱ va̱ása níxikuu judío ta̱ xi̱naní Cornelio (Hech. 10:17-29). Ta̱ Pedro xi̱ndakanixi̱níra xa̱ʼa na̱ va̱ása kúú judío ña̱ xi̱kuuna na̱ yaku̱a̱ nda̱a̱ táki̱ʼva xi̱ndakanixi̱ní na̱ judío na̱ xi̱ndoo tiempora. Soo xi̱nira iin visión ña̱ ni̱na̱ʼa̱ Ndióxi̱ nu̱úra tasaá na̱samara ña̱ ndákanixi̱níra (Hech. 10:9-16). Nu̱ú visión yóʼo xi̱nira tá káa iin ti̱ko̱to̱ saa káaña ta nu̱ú ña̱yóʼo íyoní kití tí yaku̱a̱ ta iinna ni̱ka̱ʼa̱n xíʼinra ña̱ ná kaʼníra tí kití yóʼo ta ná kuxurarí. U̱ni̱ yichi̱ va̱ása níxiin ta̱ Pedro keʼéra ña̱yóʼo. Tá xi̱ka̱ʼa̱nra ña̱ va̱ása kuxurarí, tu̱ʼun xi̱ka̱ʼa̱nña xíʼinra: “Va̱ása ka̱ʼún ña̱ yaku̱a̱ xíʼin ña̱ʼa ña̱ xa̱a̱ nda̱sandií Ndióxi̱”. Tándi̱ʼi visión yóʼo va̱ása níkunda̱a̱-ini ta̱ Pedro ña̱ kúni̱ kachi tu̱ʼun kán xíʼinra. Mií saá ki̱xa̱a̱ na̱ káchíñu nu̱ú ta̱ Cornelio. Ta ni̱xa̱ʼa̱nra xíʼinna xa̱ʼa ña̱ ndíku̱nra yichi̱ ña̱ espíritu santo.

⁴ Na̱ judío va̱ása níxi̱kiʼvina ini veʼe na̱ va̱ása níxi̱kuu judío. Ña̱kán tá níkeʼé ta̱ Pedro ña̱ ndákanixi̱ní miíra, va̱ása ku̱ʼu̱nra veʼe ta̱ Cornelio. Soo ¿nda̱chun ke̱ʼéra ña̱yóʼo? Ke̱ʼéra ña̱yóʼo xa̱ʼa ña̱ xi̱nira iin visión ta xi̱ndiku̱nra yichi̱ ña̱ espíritu santo. Tá xi̱niso̱ʼo ta̱ Pedro ña̱ ni̱ka̱ʼa̱n ta̱ Cornelio nda̱a̱ ni̱taʼví níma̱ra ta ni̱ka̱ʼa̱nra: “Vitin kúnda̱a̱-ini, Ndióxi̱ kǒo ndáka̱xinra na̱ yiví ndiʼi na̱ yiví na̱ ndásakáʼnu-ñaʼá ta kéʼéna ña̱ nda̱kú, na̱yóʼo kúú na̱ va̱ʼa nu̱úra” (Hech. 10:34, 35). Ña̱ sa̱kuaʼa ta̱ Pedro kivi chindeétáʼanña xíʼin inka na̱ hermano. ¿Nda̱saa chindeétáʼanña xíʼinna?

5. a) ¿Ndáaña kúni̱ Jehová ná kunda̱a̱-ini ndiʼiyó? b) ¿Ndáaña kivi kundoʼoyó ni xa̱a̱ xíni̱vayó ña̱ va̱ása ndáka̱xin Jehová na̱ yiví?

⁵ Jehová xi̱niñúʼura ta̱ Pedro ña̱ va̱ʼa chindeétáʼanra xíʼin na̱ cristiano ña̱ va̱ʼa kunda̱a̱-inina ña̱ kǒo ndáka̱xinra na̱ yiví. Nu̱ú Ndióxi̱ va̱ása ndáyáʼvi razana, ñuuna, tribuna á tu̱ʼun ña̱ káʼa̱nna. Va̱ʼa ndiʼi na̱ yiví nu̱úra tá kéʼéna ña̱ va̱ʼa (Gál. 3:26-28; Rev. 7:9, 10). Sana xa̱a̱ ndiʼiyó xíni̱ xa̱ʼa ña̱yóʼo ta sana ndákanixi̱níyó ña̱ va̱ása ndáka̱xinyó na̱ yiví. Soo sana ñuu nu̱ú xa̱ʼnuyó á na̱ veʼeyó kúndasína xínina inka na̱ yiví ta sana nda̱a̱ miíyó ndákanixi̱ní saá. Ni va̱ʼaníva chi̱ndeé ta̱ Pedro inkana ña̱ na̱kunda̱a̱-inina xa̱ʼa Jehová ña̱ va̱ása ndáka̱xinra na̱ yiví, soo tá ni̱ya̱ʼa tiempo ni̱na̱ʼa̱ra ña̱ va̱ása va̱ʼa ña̱ ndákanixi̱níra xa̱ʼa inkana (Gál. 2:11-14). Soo, ¿ndáaña kivi keʼéyó ña̱ va̱ʼa kundiku̱nyó consejo ña̱ ta̱xi ta̱ Jesús ta va̱ása ndakanixi̱níyó inka ña̱ʼa xa̱ʼa inkana?

6. a) ¿Ndáaña chindeétáʼan xíʼinyó ña̱ va̱ása kundasíyó kuniyó inkana? b) ¿Ndáaña ni̱ka̱ʼa̱n iin ta̱ hermano nu̱ú iin informe ña̱ ke̱ʼéra?

⁶ Ña̱ va̱ʼa kunda̱a̱-iniyó á kúndasíyó xíniyó na̱ yiví, xíniñúʼu kotoyó á ña̱ ndákanixi̱níyó kítáʼanña xíʼin ña̱ sákuaʼayó nu̱ú tu̱ʼun Ndióxi̱ (Sal. 119:105). Saátu kivi nda̱ka̱tu̱ʼunyó iin na̱ va̱ʼa kítáʼan xíʼinyó á xítona ña̱ kúndasíkayó xíniyó inkana (Gál. 2:11, 14). Sana ni va̱ása kíʼinyó kuenta ña̱ ndíka̱a̱ ña̱yóʼo níma̱yó. Ná kotoyó ña̱ ndo̱ʼo iin ta̱ hermano ta̱ kúú anciano, ta̱yóʼo chi̱ndaʼára iin informe nu̱ú na̱ Betel xa̱ʼa iin matrimonio na̱ kúú  precursor. Ta̱ hermano ta̱ íyo ñá síʼí yóʼo ke̱era iin ñuu loʼo ña̱ xi̱kundasí na̱ yiví xi̱xinina. Ta̱ hermano ta̱ ke̱ʼé informe yóʼo va̱ása níkiʼinra kuenta ña̱ xi̱kundasítu ta̱yóʼo xi̱xinira na̱ ñuu ta̱ hermano kán. Ni ka̱ʼyíra ña̱ va̱ʼa xa̱ʼa ta̱ hermano ta̱ íyo ñá síʼí kán, tá sa̱ndíʼira informe yóʼo ni̱ka̱ʼa̱nra: “Ni ke̱e ta̱ hermano yóʼo [ñuu kán], va̱ʼaníva ña̱ kéʼéra ta va̱ʼaní chíndeétáʼanra xíʼin inkana ña̱ va̱ʼa kunda̱a̱-inina, ni kúúna na̱ [ñuu kán] kǒo xíniñúʼu koo yaku̱a̱na á keʼéna ña̱ kini chi ña̱yóʼo kúú ña̱ kéʼé na̱ ñuu kán”. ¿Á kunda̱a̱-iniyó xíʼin ña̱yóʼo? Ni kúúmiíyó ku̱a̱ʼá chiñu nu̱ú ñuu Ndióxi̱ xíniñúʼu kiʼinyó kuenta xíʼin ña̱ ndákanixi̱níyó xa̱ʼa inkana ta saátu ná taxiyó ná chindeétáʼan inkana xíʼinyó tá xítona ña̱ kúndasíyó xíniyó inkana á ndíka̱a̱ ña̱ va̱ása va̱ʼa níma̱yó. ¿Ndáaña kivi keʼéyó?

7. ¿Nda̱saa kivi na̱ʼa̱yó ña̱ kǒo kúndasíyó xíniyó na̱ yiví?

⁷ Tá ná ndakunayó níma̱yó nu̱ú inkana saá xa̱a̱yó kuʼvi̱-iniyó kuniyóna ta va̱ása kundasíyóna (2 Cor. 6:11-13). ¿Á kúúmiíyó costumbre ña̱ kítáʼan kuitíyó xíʼin na̱ káʼa̱n tu̱ʼun miíyó á na̱ kúú ñuu miíyó? Tásaá kéʼéyó, va̱ʼaka ná chika̱a̱yó ndeé ña̱ kitáʼanyó xíʼin inkana. Va̱ʼa ka̱ʼa̱nyó xíʼinna ná ku̱ʼu̱nna xíʼinyó natúʼunyó xa̱ʼa Ndióxi̱, á kanayóna veʼeyó ña̱ kuxuna xíʼinyó (Hech. 16:14, 15). Tá ná keʼéyó ña̱yóʼo kuʼvi̱níka iniyó kuniyó na̱ hermanoyó ta va̱ása kundasíyóna. Soo íyo inka xa̱ʼa kúú ña̱ kivi ndakanixi̱níyó inka ña̱ʼa xa̱ʼa inkana, kivi kooña, xa̱ʼa xu̱ʼún ña̱ kúúmiína.

8. ¿Ndáaña káʼa̱n Levítico 19:15 xa̱ʼa ña̱ ndákanixi̱níyó xa̱ʼa inkana?

⁸ Inka xa̱ʼa ña̱ kivi ndakanixi̱níyó inka ña̱ʼa xa̱ʼa inkana kúú, xu̱ʼún ña̱ kúúmiína. Xa̱ʼa ña̱yóʼo Levítico 19:15 káchiña: “Viiní tiinndó ku̱a̱chi. Va̱ása kundasiún kuniún na̱ ndáʼvi, ni va̱ása chindayáʼviún na̱ ndúkáʼnuka. Nda̱kúní tiiún ku̱a̱chi xíʼin inkana”. ¿Nda̱chun kivi ndakanixi̱níyó inka ña̱ʼa xa̱ʼa inkana xa̱ʼa ña̱ kúúna na̱ ku̱i̱ká á na̱ ndáʼvi?

9. ¿Ndáaña ka̱ʼyí ta̱ Salomón ta ndáa ña̱ sákuaʼayó xíʼin ña̱yóʼo?

⁹ Xa̱ʼa ña̱ nda̱kiʼinra espíritu santo, ta̱ Salomón ka̱ʼyíra ña̱yóʼo xa̱ʼa ña̱ kúúyó na̱ yiví ku̱a̱chi: “Na̱ ndáʼvi, nda̱a̱ na̱ kítáʼan xíʼinna va̱ása kúni̱nana, soo ku̱a̱ʼáníva kúú na̱ kítáʼan xíʼin na̱ ku̱i̱ká” (Prov. 14:20). ¿Ndáaña sákuaʼayó xíʼin texto yóʼo? Tá kǒo kíʼinyó kuenta kivi kixaʼáyó ndukúyó kutáʼanyó xíʼin na̱ hermano na̱ kúúmií ku̱a̱ʼá xu̱ʼún ta va̱ása kuni̱yó kutáʼanyó xíʼin na̱ ndáʼvi. ¿Nda̱chun su̱ví ña̱ va̱ʼa kúúña chindayáʼviyó na̱ yiví xa̱ʼa ña̱ʼa ña̱ kúúmiína?

10. ¿Ndáa ku̱a̱chi kúú ña̱ ni̱ka̱ʼa̱n ta̱ Santiago xa̱ʼa?

¹⁰ Tá ndákanixi̱níyó inka ña̱ʼa xa̱ʼa inkana, xa̱ʼa xu̱ʼún ña̱ kúúmiína, kivi kixaʼá ndatáʼviyó congregación. Ta̱ discípulo Santiago ni̱ka̱ʼa̱nra, ña̱yóʼo nda̱taʼvíña sava congregación tá siglo nu̱ú (kaʼvi Santiago 2:3, 4). * Ná kǒo taxiyó kuu ña̱yóʼo ti̱xin congregaciónyó. ¿Ndáaña kivi keʼéyó?

11. Ka̱ʼa̱n ndáa xa̱ʼa kúú ña̱ kivi ixayo̱ʼvi̱ña xíʼin na̱ íyo ku̱a̱ʼá ña̱ʼa ña̱ kutáʼan va̱ʼana xíʼin Jehová.

¹¹ Xíniñúʼu chindayáʼviyó na̱ hermano nda̱a̱ táki̱ʼva kéʼé Jehová. Ta̱kán chindayáʼvira ndiʼiyó ni kúúyó na̱ ku̱i̱ká á na̱ ndáʼvi, ña̱ va̱ʼa kutáʼan va̱ʼayó xíʼin Ndióxi̱ kǒo xíniñúʼu kumiíyó ku̱a̱ʼá ña̱ʼa. Ta̱ Jesús ni̱ka̱ʼa̱nra ña̱yóʼo, “yo̱ʼvi̱ní kooña nu̱ú na̱ ku̱i̱ká ña̱ ki̱ʼvina ti̱xin Reino Ndióxi̱”, soo va̱ása níka̱ʼa̱nra ña̱ kǒo  kivi ki̱ʼvina (Mat. 19:23). Saátu ni̱ka̱ʼa̱n ta̱ Jesús ña̱yóʼo: “Si̱íní íyo ndóʼó na̱ ndáʼvi saáchi xa̱ʼa ndóʼó íyo Reino Ndióxi̱” (Luc. 6:20) Ña̱yóʼo va̱ása kúni̱ kachiña ña̱ ndiʼi na̱ ndáʼvi kuniso̱ʼo ña̱ sanáʼa̱ra ta ndakiʼinna ña̱ va̱ʼa. Nda̱a̱ ni̱xi̱yo ku̱a̱ʼání na̱ yiví na̱ ndáʼvi ta va̱ása nínduuna discípulora. Ña̱ kúni̱ kachi ña̱yóʼo kúúña, kǒo kivi ka̱ʼa̱nyó ña̱ kivi xa̱a̱ iin na̱ yiví koona migo Jehová, á va̱ása xa̱a̱na koona migora xa̱ʼa ña̱ʼa ña̱ kúúmiína.

12. ¿Ndáaña káʼa̱n Biblia xíʼin na̱ ku̱i̱ká ta saátu xíʼin na̱ ndáʼvi?

¹² Ti̱xin ñuu Jehová íyo ku̱a̱ʼá na̱ ñaniyó xíʼin ná ku̱ʼvayó na̱ kúʼvi̱-ini xíni miíra ta káchíñuna nu̱úra xíʼin ndiʼi níma̱na. Savana kúúna na̱ ku̱i̱ká ta inkana kúúna na̱ ndáʼvi. Biblia káʼa̱nña ña̱yóʼo xíʼin na̱ ku̱i̱ká: “Ná kǒo chindayáʼvikana ña̱ ku̱i̱ká kúúmiína chi ña̱ ndiʼi-xa̱ʼava kúúña va̱ʼaka ná chindayáʼvina Ndióxi̱” (kaʼvi 1 Timoteo 6:17-19). * Saátu káʼa̱nra xíʼin ndiʼi na̱ ndásakáʼnu Ndióxi̱, ni kúúna na̱ ku̱i̱ká á na̱ ndáʼvi ña̱ i̱yoní xa̱a̱na kuʼvi̱-inina kunina xu̱ʼún (1 Tim. 6:9, 10). Tá ná kotoyó na̱ hermano táki̱ʼva xíto Jehová miína va̱ása ndakanixi̱níyó inka ña̱ʼa xa̱ʼana xa̱ʼa ña̱ʼa ña̱ kúúmiína. Soo ¿á va̱ʼa ndakanixi̱níyó inka ña̱ʼa xa̱ʼana xa̱ʼa ku̱i̱ya̱ ña̱ kúúmiína? Ná sakuaʼayó xa̱ʼaña.

13. ¿Ndáaña káʼa̱n Biblia xíʼinyó keʼéyó xa̱ʼa na̱ xa̱chée?

¹³ Nu̱ú Biblia ku̱a̱ʼání yichi̱ káʼa̱nña xíʼinyó ña̱ ná ixato̱ʼóyó na̱ xa̱chée. Levítico 19:32 káchiña: “Kundichi nu̱ú na̱ xi̱ku̱aʼa ta to̱ʼó koún xíʼinna ta to̱ʼótu koún xíʼin Ndióxi̱”. Proverbios 16:31 káchiña, “liviní vi̱xi xi̱ní na̱ xi̱ku̱aʼa tá xíkana nu̱ú yichi̱ ña̱ nda̱kú”. Saátu ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná va̱ása nda̱ʼyi̱ra nu̱ú iin ta̱a ta̱ xa̱chée, va̱ʼaka ná ka̱ʼa̱nra xíʼinra ‘táki̱ʼva ka̱ʼa̱nra xíʼin yiváraʼ (1 Tim. 5:1, 2). Ni xi̱kuumií ta̱ Timoteo chiñu ña̱ ka̱ʼa̱nra xíʼin na̱ xa̱chée xa̱ʼa ña̱ keʼéna, soo xi̱niñúʼu ixato̱ʼóra na̱yóʼo ta ka̱ʼa̱nra ña̱ va̱ʼa xíʼinna.

14. ¿Ama kúú ña̱ xíniñúʼu taxiyó consejo ndaʼa̱ na̱ xa̱chée?

¹⁴ ¿Ndáaña kundoʼo iin na̱ hermano na̱ xa̱chée tá xíni̱na ndáaña kúú ña̱ va̱ʼa soo kéʼéna ña̱ kini nu̱ú Ndióxi̱? Jehová va̱ása tiinra ku̱a̱chi xíʼinna xa̱ʼa ña̱ xíto kuitíra ni va̱ása sáya̱ʼara ku̱a̱chi na̱yóʼo xa̱ʼa ña̱ kúúna na̱ xa̱chée. Ná kotoyó ña̱ káʼa̱n Isaías 65:20: “Soo tá iinna keʼé ña̱ kini nu̱ú Ndióxi̱ ni tá ta̱ʼánka xi̱nuna cien ku̱i̱ya̱ kǒo ña̱ va̱ʼa ndakiʼinna”. Kivi ndani̱ʼíyó inka texto ña̱ kítáʼan xíʼin ña̱yóʼo nu̱ú visión ña̱ xi̱ni ta̱ Ezequiel (Ezeq. 9:5-7). Ña̱kán ña̱ xíniñúʼu kundayáʼvika nu̱úyó kúú ña̱ ixato̱ʼóyó Jehová, ta̱ káʼnuka nu̱ú ndiʼina (Dan. 7:9, 10, 13, 14). Tasaá, va̱ása yi̱ʼvíyó taxiyó consejo ndaʼa̱ inkana ni loʼo á ku̱a̱ʼá ku̱i̱ya̱ kúúmiína (Gál. 6:1).

15. ¿Ndáaña sákuaʼayó xíʼin ña̱ ni̱ka̱ʼa̱n ta̱ apóstol Pablo xa̱ʼa ña̱ ixato̱ʼóyó na̱ válí?

¹⁵ Ta ¿nda̱saa xíniñúʼu keʼéyó xíʼin na̱ va̱lí? Ná sakuaʼayó xa̱ʼa ta̱ Timoteo. Ta̱ apóstol Pablo ta̱xira consejo yóʼó ndaʼa̱ra: “Va̱ása taxiún ña̱ sandákavana-iniún xa̱ʼa ña̱ loʼún. Keʼé ña̱ va̱ʼa nu̱ú inkana ña̱ va̱ʼa ná kundiku̱nna yichi̱ún xíʼin ña̱ káʼún, ña̱ kéʼún, ña̱ kúʼvi̱-iniún xíniúnna, ña̱ kándíxaún, xíʼin ña̱ vií kéʼún” (1 Tim. 4:12). Tá ka̱ʼyí ta̱ apóstol Pablo ña̱yóʼo, sana 30 ku̱i̱ya̱ xi̱kuumií ta̱ Timoteo. Soo ta̱xi ta̱ Pablo iin chiñu káʼnu ndaʼa̱ra.  Va̱ása xíni̱yó nda̱chun ta̱xi ta̱ Pablo consejo yóʼo ndaʼa̱ ta̱ Timoteo, soo kúnda̱a̱-iniyó ña̱ va̱ása va̱ʼa ndakanixi̱níyó inka ña̱ʼa xa̱ʼa na̱ va̱lí xa̱ʼa ku̱i̱ya̱na. Ná ndakaʼányó chi tá ni̱xi̱ka ta̱ Jesús sa̱náʼa̱ra na̱ yiví xi̱kuumiíra yáʼa loʼoka 30 ku̱i̱ya̱.

16, 17. a) ¿Ndáaña kéʼé na̱ anciano ña̱ va̱ʼa kúnda̱a̱-inina á sáxi̱nu iin na̱ hermano requisito ña̱ va̱ʼa xa̱a̱na koona anciano á siervo ministerial? b) ¿Á kítáʼan ña̱ káʼa̱n Biblia xíʼin ña̱ ndákanixi̱ní miíyó á na̱ ñuuyó?

¹⁶ Sava ñuu kǒo chíndáyáʼvina na̱ va̱lí. Sana saá kéʼéna ñuu nu̱ú ndóoyó, ta sana xa̱ʼa ña̱yóʼo kǒo xíín sava na̱ anciano ka̱ʼa̱nna xa̱ʼa inkaka na̱ hermano válí ña̱ kivi koona anciano á siervo ministerial ni xa̱a̱ sandákutúna requisito. Na̱ anciano xíniñúʼu ndakaʼánna chi Biblia kǒo táxiña iin ku̱i̱ya̱ ña̱ va̱ʼa kuumiíyó iin chiñu ti̱xin ñuu Ndióxi̱ (1 Tim. 3:1-10, 12, 13; Tito 1:5-9). Tá iin ta̱ anciano kéʼéra táki̱ʼva kéʼé na̱ ñuura, va̱ása ndíku̱nra ña̱ káʼa̱n Biblia. Na̱ anciano va̱ása xíniñúʼu keʼéna xíʼin na̱ va̱lí nda̱a̱ táki̱ʼva ndákanixi̱ní miína, ña̱ xíniñúʼu keʼéna kúúña, kundiku̱nna ña̱ káʼa̱n Biblia (2 Tim. 3:16, 17).

¹⁷ Tá ndíku̱n na̱ anciano ña̱ ndakanixi̱ní na̱ ñuuna ta kǒo ndíku̱nna ña̱ káʼa̱n Biblia, sana ni va̱ása chindeétáʼanna xíʼin inka na̱ va̱lí ña̱ va̱ʼa xa̱a̱na koona anciano á siervo ministerial. Iin ñuu iin ta̱ hermano xi̱kuura siervo ministerial ta va̱ʼaní xi̱keʼéra chiñu ti̱xin congregación. Soo na̱ anciano va̱ása níndakanixi̱nína xa̱ʼara ña̱ xa̱a̱ kivi koora anciano, ni xa̱a̱ va̱ʼaníva sa̱ndákutúra requisito. Sava na̱ anciano na̱ xa̱chée xi̱ka̱ʼa̱nna ña̱ loʼoníva ta̱ hermano yóʼo ña̱ xa̱a̱ra koora anciano, ta xa̱ʼa ña̱yóʼo va̱ása níndakiʼinra chiñu kán. Iin ejemplova kúú ña̱yóʼo, soo sava informe káʼa̱nña ña̱ saá ndákanixi̱ní ku̱a̱ʼání na̱ anciano sava ñuu. Ndáyáʼviní ña̱ kundiku̱nyó ña̱ káʼa̱n Biblia ta va̱ása kundiku̱nyó ña̱ ndákanixi̱ní miíyó á ña̱ ndákanixi̱ní na̱ ñuuyó. Tá ndíku̱nyó ña̱ káʼa̱n Biblia saá xa̱a̱yó kuniso̱ʼoyó ña̱ káʼa̱n ta̱ Jesús ta va̱ása kotoyó ndáa ki̱ʼva náʼa̱ na̱ yiví.

18, 19. ¿Ndáaña xíniñúʼu keʼéyó ña̱ va̱ʼa kotoyó na̱ yiví táki̱ʼva xíto Jehová miína?

¹⁸ Ni kúúyó na̱ yiví ku̱a̱chi, kivi sakuaʼayó ña̱ kotoyó ndiʼi na̱ yiví táki̱ʼva xíto Jehová miína (Hech. 10:34, 35). Ña̱kán xíniñúʼu ndiʼi tiempo chika̱a̱yó ndée ña̱ va̱ʼa kundiku̱nyó ña̱ káʼa̱n tu̱ʼun Ndióxi̱. Tá kéʼéyó ña̱yóʼo, saá ndíku̱nyó consejo ña̱ ta̱xi ta̱ Jesús ña̱ va̱ása kotoyó ndáa ki̱ʼva náʼa̱ na̱ yiví (Juan 7:24).

¹⁹ Si̱lóʼo tiempo kúma̱ní ta nda̱kúní tiin ta̱ Jesús ku̱a̱chi xíʼin ndiʼi na̱ yiví, ta va̱ása tiinra ku̱a̱chi xíʼinna xa̱ʼa ña̱ xíto kuitíra á xa̱ʼa ña̱ xíniso̱ʼo kuitíra (Is. 11:3, 4). Va̱ʼaníva koo ña̱ keʼéra.