ARTÍCULO ÑA̱ KAʼVIYÓ 32
Ná kuaʼnuka ña̱ kúʼvi̱-iniyó xíni táʼanyó
“Ña̱yóʼo kúú ña̱ káʼa̱nkai̱ xíʼin Ndióxi̱: ña̱ ná kuaʼnuka ña̱ kúʼvi̱ní-inindó xíni táʼanndó” (FILIP. 1:9).
YAA 106 Ná kuʼvi̱-iniyó kuniyó na̱ táʼanyó
ÑA̱ KA̱ʼA̱NYÓ XA̱ʼA̱ *
1. ¿Ndáana chi̱ka̱a̱ ndee̱ ña̱ va̱ʼa xi̱kundúʼu congregación ña̱ ñuu Filipos?
TÁ NI̱XA̱A̱ ta̱ apóstol Pablo, ta̱ Silas, ta̱ Lucas xíʼin ta̱ Timoteo ña̱ ñuu Filipos, nda̱ni̱ʼína ku̱a̱ʼání na̱ yiví na̱ kúni̱ kunda̱a̱-ini xa̱ʼa̱ tu̱ʼun Ndióxi̱. Ku̱mí saá na̱ cristiano yóʼo chi̱ka̱a̱nína ndee̱ ña̱ va̱ʼa xi̱kundúʼu iin congregación ña̱ ñuu kán. Ndiʼi na̱ discípulo ki̱xáʼana nda̱kutáʼanna, sana veʼe iin ñá cristiana ñá naní Lidia (Hech. 16:40).
2. ¿Ndáa nu̱ú tu̱ndóʼo ndi̱ku̱n ni̱ya̱ʼa ña̱ congregación ña̱ Filipos?
2 Ña̱ congregación xa̱á kán ndi̱ku̱n ni̱ya̱ʼaña nu̱ú tu̱ndóʼo. Ta̱ Ndi̱va̱ʼa chi̱ka̱a̱ra-ini na̱ yiví ña̱ sa̱a̱-inina kunina ku̱mí saá na̱ cristiano yóʼo ta ixandi̱va̱ʼana xíʼinna ña̱ va̱ása natúʼunkana. Na̱ chíñu ti̱inna ta̱ Pablo xíʼin ta̱ Silas ta ka̱ninana xíʼin yitu̱n ta ta̱ánnana veʼeka̱a. Tá inka ki̱vi̱ ta̱vánana veʼeka̱a. ¿Ndáaña ke̱ʼéna tá ke̱ena veʼeka̱a? Ni̱xa̱ʼa̱nna xi̱tona na̱ discípulo xa̱á ta chi̱ka̱a̱na ndee̱ xíʼinna. Tándi̱ʼi, ta̱ Timoteo xíʼin na̱ sava ke̱ena ña̱ ñuu kán, soo sana ta̱ Lucas ni̱ndo̱ora. ¿Ndáaña ke̱ʼé na̱ discípulo xa̱á? Espíritu santo chi̱ndeétáʼan xíʼinna ña̱ chi̱ka̱a̱kana ndee̱ nda̱sakáʼnuna Jehová (Filip. 2:12). Ta̱ Pablo ni̱kusi̱íní-inira xa̱ʼa̱ ña̱ ke̱ʼéna.
3. Nda̱a̱ táki̱ʼva káchi Filipenses 1:9-11, ¿ndáaña xi̱ndukú ta̱ Pablo tá xi̱ka̱ʼa̱nra xíʼin Ndióxi̱?
3 Tá ni̱ya̱ʼa u̱xu̱ ku̱i̱ya̱, ta̱ Pablo ka̱ʼyíra iin carta ku̱a̱ʼa̱n ndaʼa̱na. Tá káʼviyóña, ndi̱ku̱n kúnda̱a̱-iniyó ña̱ xi̱kuʼvi̱ní-inira xi̱xinira na̱ hermano kán. Ni̱ka̱ʼa̱nra xíʼinna ña̱ kúsuchíní-inira xa̱ʼa̱na ta kúni̱níra xínirana nda̱a̱ táki̱ʼva ke̱ʼé ta̱ Jesús (Filip. 1:8). Ta saátu ni̱ka̱ʼa̱nra xíʼinna ña̱ káʼa̱nra xíʼin Ndióxi̱ xa̱ʼa̱na. Xi̱ka̱ʼa̱nra xíʼin Jehová ña̱ ná chindeétáʼanra xíʼinna ña̱ kuaʼnuka ña̱ kúʼvi̱-inina xíni táʼanna, ña̱ ná kundi̱ʼi̱ka-inina xa̱ʼa̱ ña̱ʼa ña̱ ndáyáʼvika, ña̱ ná kǒo kuumiína ni iin ña̱ va̱ása va̱ʼa, ña̱ ná chika̱a̱na ndee̱ keʼéna ña̱ va̱ʼa. Ta saátu kivi keʼé miíyó ña̱ ni̱ka̱ʼa̱n ta̱ Pablo tiempo vitin (kaʼvi Filipenses 1:9-11). * Nu̱ú ña̱ artículo yóʼo sakuaʼayó xa̱ʼa̱ ña̱ ni̱ka̱ʼa̱nra ta nda̱saa kivi keʼéyóña.
NÁ KUAʼNUKA ÑA̱ KÚʼVI̱-INIYÓ XÍNI TÁʼANYÓ
4. a) Nda̱a̱ táki̱ʼva káchi 1 Juan 4:9, 10, ¿nda̱saa ni̱na̱ʼa̱ Jehová ña̱ kúʼvi̱ní-inira xínira miíyó? b) ¿Nda̱saa xíniñúʼu kuʼvi̱-iniyó kuniyó Ndióxi̱?
4 Jehová ni̱na̱ʼa̱ra ña̱ kúʼvi̱ní-inira xínira miíyó tá chi̱ndaʼára se̱ʼera ki̱xira nu̱ú ñuʼú yóʼo ña̱ ni̱xi̱ʼi̱ra xa̱ʼa̱ ku̱a̱chiyó (kaʼvi 1 Juan 4:9, 10). * Ña̱yóʼo chíndaʼáña miíyó ña̱ kuʼvi̱ka-iniyó kuniyóra (Rom. 5:8). ¿Nda̱saa xíniñúʼu kuʼvi̱-iniyó kuniyó Ndióxi̱? Ta̱ Jesús nda̱kuiinra ña̱ pregunta yóʼo tá ni̱ka̱ʼa̱nra xíʼin iin ta̱ fariseo: “Xíniñúʼu kuʼvi̱-iniún kuniún Jehová xíʼin ndiʼi níma̱ún, xíʼin ndiʼi ña̱ tákún ta xíʼin ndiʼi xi̱níún” (Mat. 22:36, 37). Va̱ása kúni̱yó loʼo kuití kuʼvi̱-iniyó kuniyó Ndióxi̱. Kúni̱yó ná kuaʼnu ña̱ kúʼvi̱-iniyó xíniyóra ndiʼi ki̱vi̱. Ta̱ Pablo ni̱ka̱ʼa̱nra xíʼin na̱ ñuu Filipos ña̱ xíniñúʼu kuaʼnuka ña̱ kúʼvi̱-inina xíni táʼanna. ¿Ndáaña kivi keʼéyó ña̱ ndasandakúkayó ña̱ kúʼvi̱-iniyó xíniyó Ndióxi̱?
5. ¿Ndáaña xíniñúʼu keʼéyó ña̱ va̱ʼa kuaʼnuka ña̱ kúʼvi̱-iniyó xíniyó Ndióxi̱?
5 Ña̱ va̱ʼa kuʼvi̱-iniyó kuniyó Ndióxi̱ xíniñúʼu kuxini̱yóra. Ña̱ Biblia káchiña: “Na̱ kǒo kúʼvi̱-ini xíni inkana ta̱ʼán xa̱a̱na kuxini̱na Ndióxi̱, chi mií Ndióxi̱ kúú ta̱ kúʼvi̱-ini xíni miíyó” (1 Juan 4:8). Ta̱ apóstol Pablo ni̱ka̱ʼa̱nra ña̱ xáʼnuka ña̱ kúʼvi̱-iniyó xíniyó Ndióxi̱ tá kúnda̱a̱ va̱ʼaka iniyó xa̱ʼa̱ra ta nda̱saa ndákanixi̱níra xa̱ʼa̱ sava ña̱ʼa (Filip. 1:9). Tá ki̱xáʼayó káʼviyó Biblia, ku̱nda̱a̱-iniyó sava ña̱ʼa xa̱ʼa̱ Ndióxi̱, ta xíʼin ña̱yóʼo ni̱xa̱a̱yó kúʼvi̱-iniyó xíniyóra. Soo ña̱ kúʼvi̱-iniyó xíniyóra xa̱ʼnukaña tá ni̱xa̱a̱yó sa̱kuaʼakayó xa̱ʼa̱ra xíʼin xa̱ʼa̱ ña̱ va̱ʼa ña̱ kúúmiíra. Xa̱ʼa̱ ña̱kán ndáyáʼviní ña̱ kaʼviyó tu̱ʼunra ndiʼi ki̱vi̱ ta ndakanixi̱níyó xa̱ʼa̱ña (Filip. 2:16).
6. Nda̱a̱ táki̱ʼva káchi 1 Juan 4:11, 20, 21, ¿ndáa inka na̱ xíniñúʼu kúʼvi̱-iniyó kuniyó?
6 Ña̱ kúʼvi̱-iniyó xíniyó Ndióxi̱ chindaʼáña miíyó ña̱ kuʼvi̱ka-iniyó kuniyó na̱ hermano (kaʼvi 1 Juan 4:11, * 20, 21). * Sana ndákanixi̱níyó ña̱ va̱ása yo̱ʼvi̱ xa̱a̱yó kuʼvi̱-iniyó kuniyóna. Soo ña̱ ndáyáʼvika kúú ña̱ ndiʼiyó ndásakáʼnuyó Jehová ta kúni̱yó keʼéyó táʼan ña̱ kéʼéra. Ta saátu ndíku̱nyó yichi̱ ta̱ Jesús, ña̱ ni̱kuʼvi̱ní-inira xi̱nira miíyó ta nda̱a̱ ni̱xi̱ʼi̱ra xa̱ʼa̱yó. Soo ña̱ nda̱a̱ kúú ña̱ sava yichi̱ íxayo̱ʼvi̱ña xíʼinyó ña̱ kandíxayó ley yóʼo, ña̱ kuʼvi̱-iniyó kuni táʼanyó. Ná kotoyó ña̱ ku̱u ti̱xin congregación ña̱ Filipos.
7. ¿Ndáaña sákuaʼayó xíʼin consejo ña̱ ta̱xi ta̱ Pablo ndaʼa̱ ñá Evodia xíʼin ñá Síntique?
7 Ñá Evodia xíʼin ñá Síntique, u̱vi̱ saá náyóʼo va̱ʼaní ka̱chíñuná xíʼin ta̱ apóstol Pablo. Soo sana ña̱ va̱ása níkivika kutáʼan va̱ʼaná ta̱ʼvíñaná. Ta̱ Pablo ni̱ka̱ʼa̱nra xa̱ʼa̱ná nu̱ú carta ña̱ ka̱ʼyíra ta ta̱xira consejo ndaʼa̱ná. Ni̱ka̱ʼa̱nra xíʼinná ña̱ xíniñúʼu inkáchi ná ndakanixi̱níná (Filip. 4:2, 3). Ta saátu ni̱ka̱ʼa̱nra xíʼin ndiʼi na̱ congregación: “Chika̱a̱ndó ndee̱ keʼéndó ndiʼi ña̱ʼa ta va̱ása ka̱ʼa̱n kúáchindó” (Filip. 2:14). Ña̱ consejo yóʼo va̱ʼaní nda̱sandakúña ña̱ kúʼvi̱-ini ná hermana yóʼo xíni táʼanná ta saátu ndiʼi na̱ congregación.
¿Nda̱chun xíniñúʼu kotoyó ña̱ va̱ʼa ña̱ kéʼé inkana? (Koto párrafo 8). *
8. ¿Ndáaña kivi ixayo̱ʼvi̱ xíʼinyó ña̱ kuʼvi̱-iniyó kuniyó na̱ hermano, ta ndáaña kivi chindeétáʼan xíʼinyó?
8 Nda̱a̱ táki̱ʼva ndo̱ʼo ñá Evodia xíʼin ñá Síntique, ta ná kotoyó ña̱ va̱ása va̱ʼa ña̱ kéʼé na̱ hermano kivi ixayo̱ʼvi̱ña xíʼinyó ña̱ kuʼvi̱-iniyó kuniyóna. Ndiʼiyó kéʼéyó ña̱ va̱ása va̱ʼa ndiʼi ki̱vi̱, xa̱ʼa̱ ña̱kán ta ná kotoyó ña̱ kéʼé inkana, xa̱a̱yó sandákooyó ña̱ kuʼvi̱-iniyó kuniyóna. Ná ka̱ʼa̱nyó xa̱ʼa̱ iin ejemplo. Tá iin ta̱ hermano na̱ndósóra chindeétáʼanra xíʼinyó ña̱ ndaya̱kúnyó salón, kíxáʼayó sáa̱yó xíʼinra. Soo tá ná ndakaʼánkayó xa̱ʼa̱ ndiʼi ña̱ va̱ása va̱ʼa kéʼéra sáa̱kayó ta ña̱ kúʼvi̱-iniyó xíniyóra ndiʼiña. Tá saá ndóʼoyó, ná ndakaʼányó chi Jehová xítora ndiʼi ña̱ va̱ása va̱ʼa ña̱ keʼéyó xíʼin ña̱ kéʼé na̱ hermanoyó, ta ni saá kúʼvi̱ní-inira xínira ndiʼiyó. Xa̱ʼa̱ ña̱yóʼo xíniñúʼu keʼéyó nda̱a̱ táki̱ʼva kéʼé Jehová, ta kotoyó ña̱ va̱ʼa ña̱ kéʼé inkana. Ki̱vi̱ chíka̱a̱yó ndee̱ ña̱ kuʼvi̱-iniyó kuniyó na̱ hermanoyó, yatinka íyoyó xíʼinna (Filip. 2:1, 2).
ÑA̱ʼA ÑA̱ NDÁYÁʼVIKA
9. ¿Ndáaña kúú sava ña̱ʼa ña̱ ndáyáʼvika ña̱ ni̱ka̱ʼa̱n ta̱ Pablo xa̱ʼa̱ nu̱ú carta ña̱ ku̱a̱ʼa̱n ndaʼa̱ na̱ ñuu Filipos?
9 Xíʼin ndee̱ espíritu santo ta̱ Pablo ni̱ka̱ʼa̱nra xíʼin na̱ ñuu Filipos xíʼin ndiʼi na̱ cristiano ña̱ ná kundi̱ʼi̱ka-inina xa̱ʼa̱ ña̱ʼa ña̱ ndáyáʼvika (Filip. 1:10). Ña̱ nduyi̱i̱ ki̱vi̱ Jehová, ña̱ xi̱nu ndiʼi ña̱ ni̱ka̱ʼa̱nra chí nu̱únínu ña̱ táxin koo inina xíʼin ña̱ inkáchi kutáʼan ndiʼi na̱ congregación (Mat. 6:9, 10; Juan 13:35). Ki̱vi̱ ndákanikaxi̱níyó xa̱ʼa̱ ña̱yóʼo, náʼa̱yó ña̱ kúʼvi̱-iniyó xíniyó Jehová.
10. ¿Ndáaña xíniñúʼu keʼéyó ña̱ ná kǒo kuumiíyó ni iin ña̱ va̱ása va̱ʼa nu̱ú Jehová?
10 Saátu ni̱ka̱ʼa̱n ta̱ Pablo ña̱ ná kǒo kuumiíyó ni iin ña̱ va̱ása va̱ʼa. Ña̱yóʼo va̱ása kúni̱ kachiña ña̱ xíniñúʼu kooyó na̱ kǒo ku̱a̱chi kúúmií. Va̱ása kivi kooyó nda̱a̱ táki̱ʼva íyo Jehová ta̱ kǒo ku̱a̱chi kúúmií. Soo ta̱kán kotora miíyó nda̱a̱ táki̱ʼva íyo ná kǒo ña̱ va̱ása va̱ʼa kúúmií tá chíka̱a̱yó ndee̱ ña̱ kuʼvi̱-iniyó kuni táʼanyó ta ndi̱ʼi̱ka-iniyó xa̱ʼa̱ ña̱ʼa ña̱ ndáyáʼvika. Iin ki̱ʼva ña̱ kivi na̱ʼa̱yó ña̱ kúʼvi̱-iniyó xíni táʼanyó kúú ña̱ chika̱a̱yó ndee̱ ña̱ va̱ása sandákavayó-ini inkana.
11. ¿Nda̱chun va̱ása xíniñúʼu sandákavayó-ini inkana?
11 Iin ña̱ ndáyáʼviníka kúú ña̱ va̱ása sándakavayó-ini inkana. Tá kúú ña̱ xítonde̱ʼéyó ña̱ sísikíyó, ti̱ko̱to̱yó á nda̱a̱ chiñu ña̱ káchíñuyó kivi sandákavaña-ini inkana. Sana va̱ása kéʼéyó ña̱ʼa ña̱ va̱ása va̱ʼa, soo ña̱ ndáka̱xinyó keʼéyó kivi sandákavaña-ini inkana á va̱ása va̱ʼa ndakanixi̱nína xa̱ʼa̱ña. Ta̱ Jesús ni̱ka̱ʼa̱nra ña̱ va̱ʼaka kúú ña̱ ná chíka̱a̱na iin yu̱u̱ káʼnu su̱kúnyó ta ná sakánana miíyó ini tá mar nu̱úka ña̱ sandákavayó-ini inkana (Mat. 18:6).
12. ¿Ndáaña sákuaʼayó xíʼin ejemplo na̱ matrimonio na̱ kúú precursor?
12 Ná kotoyó nda̱a̱ ki̱ʼva ke̱ʼé iin matrimonio na̱ kúú precursor ña̱ va̱ása sandákavana-ini inkana. Ti̱xin congregaciónna, íyo iin na̱ matrimonio na̱ sa̱kán nda̱kuchi ta nda̱a̱ tá válína sa̱kuaʼana ña̱ va̱ása va̱ʼa keʼéna ku̱a̱ʼání ña̱ʼa. Na̱ hermano yóʼo xi̱ndakanixi̱ní ña̱ ná cristiano va̱ása xíniñúʼu ku̱ʼu̱nna cine ni ña̱ kotona iin película. Ña̱kán ni̱sa̱a̱nína tá ku̱nda̱a̱-inina ña̱ xi̱tonde̱ʼé na̱ precursor iin película. Xa̱ʼa̱ ña̱yóʼo, na̱ precursor va̱ása níxa̱ʼa̱nkana ña̱ cine, nda̱a̱ ná kixáʼa na̱ hermano na̱ sa̱kán nda̱kuchi yóʼo vií ndakanixi̱nína xa̱ʼa̱ sava ña̱ʼa (Heb. 5:14). Saá ni̱na̱ʼa̱na ña̱ ndixa kúʼvi̱-inina xíninana xíʼin ña̱ ke̱ʼéna (Rom. 14:19-21; 1 Juan 3:18).
13. ¿Nda̱saa kivi sandákavayó iinna ña̱ keʼéna ña̱ va̱ása va̱ʼa?
13 Saátu kivi sandákavayó-ini inkana ta ná ka̱ʼa̱nyó xíʼinna kéʼéna iin ña̱ va̱ása va̱ʼa. Ná kotoyó nda̱saa kivi kuuña. Ná ndakanixi̱níyó ña̱ iin ta̱ káʼviyó xíʼin sa̱ndákoora ña̱ koʼora ndíxi ta chi̱ka̱a̱níra ndee̱ ña̱ va̱ʼa keʼéra ña̱yóʼo. Ta kúnda̱a̱-inira ña̱ va̱ása xíniñúʼu ndikóra koʼora nda̱a̱ ni loʼo ndíxi, ta sa̱ndákoora ku̱a̱ʼání ña̱ʼa ta nda̱kuchira. Soo iin ki̱vi̱ iin ta̱ hermano kánara ta̱yóʼo xíʼin inkaka na̱ hermano ña̱ ku̱ʼu̱nna veʼera. Ta táxira ndíxi koʼora ta káchira xíʼinra: “Xa̱a̱ nda̱kuchiún ta kúúmiíún espíritu Jehová. Ndákaʼún ña̱ iin ña̱ va̱ʼa ña̱ kúúmií espíritu kúú ña̱ ka̱ʼnu̱-iniyó. Ta xáʼnu-iniún va̱ása ku̱a̱ʼára koʼún”. Tá níxiniso̱ʼo ta̱ hermano xa̱á yóʼo ña̱ ni̱ka̱ʼa̱nra kivi tuku ndikóra koʼora ndíxi.
14. ¿Nda̱saa chíndeétáʼan reunión xíʼinyó ña̱ kundiku̱nyó consejo ña̱ Filipenses 1:10?
14 Reunión kúú ña̱ chíndeétáʼan xíʼinyó ña̱ kundiku̱nyó consejo ña̱ va̱xi nu̱ú Filipenses 1:10. Ña̱ nu̱ú, sándakaʼánña miíyó ndáaña kúú ña̱ ndáyáʼvika nu̱ú Jehová. Ña̱ u̱vi̱, sánáʼa̱ña miíyó ndáa ki̱ʼva keʼéyó ña̱ sákuaʼayó tasaá kǒo kuumiíyó ni iin ña̱ va̱ása va̱ʼa. Ta ña̱ u̱ni̱, sánáʼa̱ña miíyó ña̱ ná kuʼvi̱ka-iniyó kuni táʼanyó ta na̱ʼa̱yóña xíʼin ña̱ kéʼéyó (Heb. 10:24, 25). Ki̱vi̱ chíka̱a̱yó ndee̱ xíʼin táʼanyó kúʼvi̱ka-iniyó xíniyó na̱ hermanoyó ta saátu Jehová. Tá kúʼvi̱-iniyó xíniyóra xíʼin ndiʼi níma̱yó ta saátu na̱ hermanoyó, chika̱a̱yó ndee̱ ña̱ va̱ása sandákavayó-ini nda̱a̱ ni iinna.
NÁ CHIKA̱A̱YÓ NDEE̱ KEʼÉYÓ ÑA̱ VA̱ʼA
15. ¿Ndáaña kúni̱ kachi ña̱ chika̱a̱yó ndee̱ keʼéyó ña̱ va̱ʼa?
15 Ta̱ Pablo ni̱ka̱ʼa̱nníra xíʼin Jehová xa̱ʼa̱ na̱ ñuu Filipos ña̱ ná chika̱a̱na ndee̱ keʼéna ña̱ va̱ʼa (Filip. 1:11). Xíʼin ña̱yóʼo xi̱na̱ʼa̱na ña̱ kúʼvi̱-inina xínina Jehová xíʼin na̱ ñuura. Ta saátu ña̱ ka̱ʼa̱nna xíʼin inkana xa̱ʼa̱ ña̱ kándíxana ta̱ Jesús xíʼin ña̱ ndátuna koo chí nu̱únínu. Saátu, ni̱ka̱ʼa̱n ta̱ Pablo ña̱ sandáye̱ʼena miína nu̱ú na̱ ñuyǐví xíʼin ña̱ kéʼéna (Filip. 2:15). Ta nda̱a̱ mií ta̱ Jesús ni̱ka̱ʼa̱n ña̱ na̱ ndíku̱nñaʼá kúúna luz nu̱ú na̱ ñuyǐví (Mat. 5:14-16). Ta saátu ni̱ka̱ʼa̱nra xíʼin na̱ discípulora ña̱ ná ku̱ʼu̱nna natúʼunna xíʼin na̱ yiví ña̱ ná kundiku̱nnara ta koona testigo xa̱ʼa̱ra iníísaá nu̱ú ñuʼú (Hech. 1:8; Mat. 28:18-20). Chíka̱a̱yó ndee̱ ña̱ keʼéyó ña̱ va̱ʼa tá ndíʼi̱-iniyó xa̱ʼa̱ chiñu yóʼo.
Tá nda̱kasina ta̱ Pablo ini iin veʼe chí ñuu Roma, ka̱ʼyíra carta ña̱ ku̱a̱ʼa̱n ndaʼa̱ na̱ congregación ña̱ Filipos. Saátu chi̱ka̱a̱ra ndee̱ ña̱ na̱túʼunra xíʼin na̱ xi̱ndaañaʼá ta saátu xíʼin na̱ xi̱xa̱ʼa̱n xi̱xitoñaʼá. (Koto párrafo 16).
16. Nda̱a̱ táki̱ʼva káchi Filipenses 1:12-14, ¿nda̱saa kivi kooyó nda̱a̱ táki̱ʼva íyo iin luz nu̱ú na̱ yiví ni íyo tu̱ndóʼo nu̱úyó? (Koto na̱ʼná ña̱ va̱xi chí nu̱ú kíxáʼaña).
16 Nda̱a̱ ndáaka ña̱ ndóʼoyó kivi kooyó nda̱a̱ táki̱ʼva íyo iin luz nu̱ú na̱ yiví. Sava yichi̱ ña̱ʼa ña̱ sási nu̱úyó ña̱ natúʼunyó kivi nduuña iin ña̱ chindeétáʼan xíʼinyó. Ña̱yóʼo kúú ña̱ ndo̱ʼo ta̱ Pablo. Tá ka̱ʼyíra carta ña̱ ku̱a̱ʼa̱n ndaʼa̱ na̱ ñuu Filipos, tá nda̱kasinara ini iin veʼe chí ñuu Roma xi̱kuuña. Soo ña̱yóʼo va̱ása nísasiña nu̱úra ña̱ natúʼunra xa̱ʼa̱ Ndióxi̱ xíʼin na̱ xi̱ndaañaʼá á xíʼin na̱ xi̱xa̱ʼa̱n xi̱xitoñaʼá. Ña̱ ke̱ʼéra ta̱xiníña ndee̱ ndaʼa̱ inkaka na̱ hermano ña̱ chika̱a̱kana ndee̱ ña̱ natúʼunna xíʼin na̱ yiví xa̱ʼa̱ tu̱ʼun Ndióxi̱ (kaʼvi Filipenses 1:12-14; * 4:22).
Ndiʼi tiempo ná ndukúyó nda̱a̱ ki̱ʼva natúʼunyó xa̱ʼa̱ Ndióxi̱ xíʼin na̱ yiví. (Koto párrafo 17). *
17. Ka̱ʼa̱n xa̱ʼa̱ iin ejemplo ña̱ náʼa̱ nu̱úyó ña̱ kiviva natúʼunyó xa̱ʼa̱ Ndióxi̱ ni íyo ña̱ sási nu̱úyó.
17 Ku̱a̱ʼání na̱ hermano náʼa̱na ña̱ ndukú íyo inina nda̱a̱ táki̱ʼva ni̱xi̱yo ini ta̱ Pablo. Íyona país nu̱ú va̱ása kívi natúʼunna xa̱ʼa̱ Ndióxi̱ nu̱ú íyo ku̱a̱ʼá na̱ yiví ni veʼe tá veʼe, soo ndúkúna inka ki̱ʼva ña̱ kéʼénaña (Mat. 10:16-20). Ti̱xin sava ña̱ ñuu yóʼo, iin ta̱ superintendente ña̱ circuito ni̱ka̱ʼa̱nra ña̱ iin iin na̱ publicador ná chika̱a̱na ndee̱ ña̱ natúʼunna xíʼin na̱ veʼena, na̱ íyo yatin xíʼinna, na̱ káʼvi xíʼinna escuela á na̱ káchíñu xíʼinna, xíʼin inkaka na̱ xíni̱táʼanna xíʼin. Ti̱xin ña̱ u̱vi̱ ku̱i̱ya̱, ndu̱u ku̱a̱ʼáka congregación ña̱ íyo ti̱xin ña̱ circuito kán. Sana nu̱ú íyo miíyó kǒo ña̱ sási nu̱úyó ña̱ natúʼunyó. Soo ni saá sákuaʼayó iin ña̱ ndáyáʼviní xíʼin ña̱ ke̱ʼé na̱ hermano yóʼo, ná chika̱a̱yó ndee̱ ña̱ ndukúyó nda̱a̱ ki̱ʼva natúʼunyó, ta ná kandíxayó ña̱ mií Jehová taxi ndee̱ ndaʼa̱yó ña̱ keʼéyóña ni íyo ña̱ sási nu̱úyó (Filip. 2:13).
18. ¿Ndáaña xíniñúʼu chika̱a̱yó ndee̱ keʼéyó?
18 Tiempo vitin kúú ña̱ xíniñúʼu chika̱a̱yó ndee̱ ña̱ kundiku̱nyó consejo ta̱ Pablo ña̱ va̱xi nu̱ú carta ña̱ ku̱a̱ʼa̱n ndaʼa̱ na̱ ñuu Filipos. Ná chika̱a̱yó ndee̱ ña̱ kundi̱ʼi̱ka-iniyó xa̱ʼa̱ ña̱ʼa ña̱ ndáyáʼvika, ná kǒo kuumiíyó ni iin ña̱ va̱ása va̱ʼa, ná va̱ása sandákavayó-ini inkana ta ná chika̱a̱yó ndee̱ ña̱ keʼéyó ña̱ va̱ʼa. Tá saá kéʼéyó, ña̱ kúʼvi̱-iniyó xíni táʼanyó kuaʼnukaña ta ndasakáʼnuyó Jehová ta̱ kúʼvi̱ní-ini xíni miíyó.
YAA 17 “Kúni̱vai̱”
^ párr. 5 Vitin kúú ña̱ xíniñúʼu ndasandakúkayó ña̱ kúʼvi̱-iniyó xíniyó na̱ hermanoyó. Carta ña̱ ka̱ʼyí ta̱ Pablo ku̱a̱ʼa̱n ndaʼa̱ na̱ ñuu Filipos chíndeétáʼanña xíʼinyó ña̱ kunda̱a̱-iniyó ndáaña keʼéyó ña̱ kuaʼnuka ña̱ kúʼvi̱-iniyó xíni táʼanyó, ni íyo tu̱ndóʼo nu̱úyó.
^ párr. 3 Filipenses 1:9-11: “Ña̱yóʼo kúú ña̱ káʼa̱nkai̱ xíʼin Ndióxi̱: ña̱ ná kuaʼnuka ña̱ kúʼvi̱ní-inindó xíni táʼanndó xíʼin ña̱ sákuaʼakandó ku̱a̱ʼa̱nndó xíʼin ña̱ va̱ʼaka ndakanixi̱níndó. Kundi̱ʼi̱ka-inindó xa̱ʼa̱ ña̱ʼa ña̱ ndáyáʼvika, tasaá tá ná ndikó ta̱ Cristo kǒo ña̱ va̱ása va̱ʼa ka̱ʼa̱nna xa̱ʼa̱ndó tasaá va̱ása sandákavandó ni iinna nda̱a̱ ná kixaa̱ ta̱ Cristo, ta xa̱ʼa̱ ndee̱ ña̱ táxi ta̱ Jesucristo ndaʼa̱ndó va̱ʼaní ná koo ña̱ keʼéndó, tasaá va̱ʼa ndukáʼnu Ndióxi̱ xa̱ʼa̱ ña̱ kéʼéndó”.
^ párr. 4 1 Juan 4:9, 10: “Xa̱ʼa̱ ña̱yóʼo ni̱na̱ʼa̱ Ndióxi̱ ña̱ kúʼvi̱-inira xínira miíyó, saáchi chi̱ndaʼára se̱ʼera ta̱ mitúʼun ña̱ ki̱xira ñuyǐví yóʼo ña̱ va̱ʼa ni̱ʼíyó ña̱ kutakuyó. Ña̱ va̱ʼa kunda̱a̱-iniyó ndáaña kúni̱ kachi ña̱ kuʼvi̱-iniyó kuniyó iinna, chi su̱víka miíyó siʼna níkuʼvi̱-ini kuni Ndióxi̱, chi miíra siʼnaka ni̱kuʼvi̱-ini xi̱ni miíyó chi chi̱ndaʼára se̱ʼera ña̱ ni̱xi̱ʼi̱ra xa̱ʼa̱yó, ña̱ va̱ʼa chaʼvira xa̱ʼa̱ ku̱a̱chiyó”.
^ párr. 6 1 Juan 4:11: “Tasaá ni̱kuʼvi̱-ini Ndióxi̱ xi̱nira miíyó, saátu miíyó xíniñúʼu kuʼvi̱-iniyó kunitáʼanyó”.
^ párr. 6 1 Juan 4:20, 21: “Tá iinna káʼa̱nna: ‘Yi̱ʼi̱ kúʼvi̱-inii̱ xínii̱ Ndióxi̱ʼ, soo sáa̱-inina xínina ñanina, na̱ vatá kúúna. Chi na̱ va̱ása kúʼvi̱-ini xíni ñanina na̱ xínina, kǒo kívi kuʼvi̱-inina kunina Ndióxi̱ ta̱ kǒo xínina. Ta ña̱ ley yóʼo miíra kúú ta̱ ta̱xiña ndaʼa̱yó, na̱ kúʼvi̱-ini xíni Ndióxi̱ na̱ kuʼvi̱-inina kunina ñanina”.
^ párr. 16 Filipenses 1:12-14: “Ta vitin, kúni̱i̱ ná kunda̱a̱-inindó ñaniyó, ña̱ ndiʼi ña̱ ndóʼi̱ xa̱ʼa̱ ña̱ kunda̱a̱-inina xa̱ʼa̱ tu̱ʼun Ndióxi̱ kúúña, ta xa̱a̱ ndiʼina xíni̱ ña̱ núʼnii̱ xíʼin cadena chi xa̱ʼa̱ ña̱ kítáʼi̱n xíʼin ta̱ Cristo kúúña ta nda̱a̱ na̱ guardia pretoriana xíʼin inkaka na̱ yiví xíni̱; ta ku̱a̱ʼání na̱ hermano na̱ ndíku̱n sa̱tá ta̱ Jesús, kándíxanína xa̱ʼa̱ ña̱ ndíka̱i̱ [veʼeka̱a], ndúndakúka-inina ta va̱ása yíʼvina ka̱ʼa̱nna xa̱ʼa̱ tu̱ʼun Ndióxi̱”.
^ párr. 59 ÑA̱ KÁʼA̱N XA̱ʼA̱ NA̱ʼNÁ: Tá ñúʼuna ndáya̱kúnna ti̱xin salón, ta̱ Joe sa̱ndakoora ña̱ ndaya̱kúnra ta ki̱xáʼara nátúʼunra xíʼin iin ta̱ hermano xíʼin se̱ʼera. Soo ta̱ Mike ta̱ xíka ndáya̱kún xíʼin aspiradora sáa̱ra xa̱ʼa̱ ña̱yóʼo. Ndákanixi̱níra ña̱ ta̱ Joe xíniñúʼu ndaya̱kúnra nu̱úka ña̱ natúʼunra. Soo tándi̱ʼi xítora ña̱ ta̱ Joe xíʼin ña̱ si̱í-ini chíndeétáʼanra xíʼin iin ñá hermana ñá xa̱a̱ chée. Ña̱yóʼo sándakaʼánña ta̱ Mike ña̱ xíniñúʼu kotora ña̱ va̱ʼa ña̱ kúúmií ta̱ Joe.
^ párr. 63 ÑA̱ KÁʼA̱N XA̱ʼA̱ NA̱ʼNÁ: Iin país nu̱ú va̱ása kívi natúʼun na̱ testigo xa̱ʼa̱ Ndióxi̱, iin ta̱ hermano káʼa̱n se̱ʼéra xíʼin iin ta̱ xíni̱táʼan xíʼinra xa̱ʼa̱ Ndióxi̱. Tá ni̱ya̱ʼa loʼo tá ndóona ndákindee̱na nu̱ú káchíñuna, nátúʼunra xíʼin iin ta̱ káchíñu xíʼinra.
