ARTÍCULO ÑA̱ KAʼVIYÓ 33
“Na̱ xíniso̱ʼo ña̱ sánáʼún” ka̱kuna
“Kuentaní koún xíʼin ña̱ kéʼún ta saátu xíʼin ña̱ sánáʼún. Ndakundeún keʼún ña̱yóʼo, chi tá saá ná keʼún, sakǎkún miíún ta saátu na̱ xíniso̱ʼo ña̱ sánáʼún” (1 TIM. 4:16).
YAA 67 Natúʼun xa̱ʼa tu̱ʼun Ndióxi̱
ÑA̱ KA̱ʼA̱NYÓ XA̱ʼA̱ *
1. ¿Ndáaña kúni̱yó ná keʼé na̱ veʼeyó?
IIN ñá hermana ñá naní Pauline * káchiñá: “Nda̱a̱ tá ku̱nda̱a̱-inii̱ xa̱ʼa̱ ña̱ nda̱a̱, xi̱kuni̱i̱ ña̱ ndiʼi na̱ veʼi̱ ná koona xíʼi̱n nu̱ú ñuʼú livi. Soo ña̱ xi̱kuni̱níkai̱ kúú ña̱ inkáchi ndasakáʼnui̱ Jehová xíʼin yiíi̱ ta̱ Wayne xíʼin ta̱ loʼo se̱ʼei̱”. Ta sava na̱ veʼeyó ta̱ʼán kunda̱a̱-inina xa̱ʼa̱ Jehová, sana ndóʼoyó nda̱a̱ táki̱ʼva ndo̱ʼo ñá Pauline.
2. ¿Ndáa pregunta ndakuiinyó nu̱ú artículo yóʼo?
2 Va̱ása kivi ixandúxayó xíʼin na̱ veʼeyó ña̱ sakuaʼana xa̱ʼa̱ Ndióxi̱. Soo kiviva chindeétáʼanyó xíʼinna ña̱ kuni̱na kuniso̱ʼona ña̱ káʼa̱n Biblia (2 Tim. 3:14, 15). ¿Nda̱chun xíniñúʼu natúʼunyó xa̱ʼa̱ Ndióxi̱ xíʼin na̱ táʼanyó? ¿Nda̱chun xíniñúʼu na̱ʼa̱yó ña̱ ndíʼi̱-iniyó xa̱ʼa̱na? ¿Ndáaña kivi keʼéyó ña̱ va̱ʼa xa̱a̱na kuʼvi̱-inina kunina Jehová táki̱ʼva kéʼéyó? Ta ¿nda̱saa kivi chindeétáʼan na̱ hermano congregación xíʼinyó?
¿NDA̱CHUN XÍNIÑÚʼU NATÚʼUNYÓ XA̱ʼA̱ NDIÓXI̱ XÍʼIN NA̱ VEʼEYÓ?
3. Táki̱ʼva káchi 2 Pedro 3:9, ¿nda̱chun xíniñúʼu natúʼunyó xa̱ʼa̱ Ndióxi̱ xíʼin na̱ veʼeyó?
3 Si̱lóʼo tiempo kúma̱ní ta sandiʼi-xa̱ʼa̱ Jehová ñuyǐví ta̱ Ndi̱va̱ʼa. Ta nda̱saa na̱ kúni̱ kutaku ndiʼi tiempo, kúú na̱ ka̱ku (Hech. 13:48). Xíniñúʼuyó ndee̱yó xíʼin tiempoyó ña̱ nátúʼunyó xa̱ʼa̱ Ndióxi̱ xíʼin na̱ yiví na̱ íyo ñuuyó, tasaá kúni̱tuyó natúʼunyó xíʼin na̱ veʼeyó ña̱ ná ndasakáʼnuna Jehová. Yiváyó, ta̱ kúʼvi̱ní-ini xíni miíyó va̱ása kúni̱ra ña̱ ná ndiʼi-xa̱ʼa̱ ni iin na̱ yiví chi ña̱ kúni̱ra kúú ña̱ ná ndandikó-inina xa̱ʼa̱ ku̱a̱china (kaʼvi 2 Pedro 3:9). *
4. ¿Ndáaña va̱ása xíniñúʼu keʼéyó tá nátúʼunyó xíʼin na̱ veʼeyó?
4 Xíniñúʼu ndakaʼányó ña̱ u̱vi̱ nu̱ú kúú ña̱ kivi keʼéyó ña̱ natúʼunyó xa̱ʼa̱ Ndióxi̱. Sana viíva káʼa̱nyó xa̱ʼa̱ Ndióxi̱ xíʼin iin na̱ yiví na̱ va̱ása xíni̱yó, soo na̱ veʼeyó ndeé ta káxi káʼa̱nyó xíʼinna.
5. ¿Ndáaña xíniñúʼu ndakaʼányó xa̱ʼa̱ tá natúʼunyó xa̱ʼa̱ Ndióxi̱ xíʼin na̱ veʼeyó?
5 Tá ndákaʼányó xa̱ʼa̱ yichi̱ nu̱ú ña̱ ni̱ka̱ʼa̱nyó xa̱ʼa̱ Ndióxi̱ xíʼin na̱ veʼeyó, sana ndándikó-iniyó xa̱ʼa̱ ña̱ va̱ása vií níka̱ʼa̱nyó xíʼinna ta ndákanixi̱níyó ña̱ xi̱niñúʼu viíka ka̱ʼa̱nyó xíʼinna. Ta̱ apóstol Pablo ta̱xira consejo yóʼo ndaʼa̱ na̱ cristiano: “Tá káʼa̱nndó xíʼinna viíní ka̱ʼa̱nndó ña̱ va̱ʼa ná kusi̱í-inina, ta viíní ndakuiinndó yuʼúna ña̱ ndáka̱tu̱ʼunna xa̱ʼa̱” (Col. 4:5, 6). Xíniñúʼu ndakaʼányó xa̱ʼa̱ tu̱ʼun yóʼo tá káʼa̱nyó xíʼin na̱ táʼanyó xa̱ʼa̱ Ndióxi̱. Saáchi nu̱úka ña̱ chindeétáʼanyó xíʼinna ña̱ kunda̱a̱-inina xa̱ʼa̱ Ndióxi̱ kivi sakuxíkayóna nu̱ú ña̱ nda̱a̱, tá va̱ása kíʼinyó kuenta xíʼin ña̱ káʼa̱nyó.
¿NDÁAÑA KIVI KEʼÉYÓ ÑA̱ CHINDEÉTÁʼANYÓ XÍʼIN NA̱ VEʼEYÓ?
Kivi chindeétáʼanyó xíʼin na̱ yiví ña̱ kuyatinna nu̱ú Ndióxi̱ tá náʼa̱yó ña̱ ndíʼi̱-iniyó xa̱ʼa̱na ta vií kéʼéyó. (Koto párrafo 6 nda̱a̱ 8). *
6, 7. Ka̱ʼa̱n xa̱ʼa̱ iin ejemplo ña̱ náʼa̱ nda̱chun ndáyáʼviní na̱ʼa̱yó ña̱ ndíʼi̱-iniyó xa̱ʼa̱ na̱ ti̱ndaʼa̱ xíʼinyó na̱ va̱ása kúú testigo.
6 Ná na̱ʼa̱yó ña̱ ndíʼi̱-iniyó xa̱ʼa̱na. Ñá Pauline, ñá xa̱a̱ ni̱ka̱ʼa̱nyó xa̱ʼa̱, káchiñá: “Tá xa̱ʼa̱, nina xa̱ʼa̱ ña̱ káʼa̱n Biblia xi̱kuni̱i̱ ka̱ʼi̱n xíʼin yiíi̱. Ta va̱ása níxi̱ka̱ʼa̱nndi̱ xa̱ʼa̱ inkaka ña̱ʼa”. Soo ta̱ Wayne loʼova xi̱kunda̱a̱-inira xa̱ʼa̱ Biblia ta va̱ása níxikunda̱a̱-inira xíʼin ña̱ xi̱ka̱ʼa̱nñá xíʼinra. Xi̱ndakanixi̱níra ña̱ nina xa̱ʼa̱ religión ña̱ ndíku̱nñá ndíʼi̱-iniñá xa̱ʼa̱. Ta ni̱yi̱ʼvíra ña̱ kítáʼanñá xíʼin na̱ yiví na̱ va̱ása va̱ʼa ta kivi sandáʼvinañá.
7 Ñá Pauline káchiñá ña̱ ndiʼi xi̱ku̱aá xíʼin sábado á domingo xi̱ndakitáʼanñá xíʼin na̱ hermano, tá kúú ña̱ xáʼa̱nñá reunión á tá xáʼa̱nñá nátúʼunñá xa̱ʼa̱ Ndióxi̱ ta saátu xi̱xa̱ʼa̱nñá veʼe sava na̱ hermano. Káchiñá: “Sava yichi̱, tá xi̱ndixaa̱ ta̱ Wayne veʼe, nda̱a̱ ni iinndi̱ kǒo íyo ta xi̱kusuchí-inira”. Xi̱kusuchí-inira xa̱ʼa̱ ñá síʼíra xíʼin se̱ʼera. Ta va̱ása xíni̱ra na̱ yiví na̱ kítáʼan xíʼinñá, ta nda̱a̱ nda̱kanixi̱níra ña̱ ndáyáʼviníka na̱kán nu̱ú ñá Pauline. Xa̱ʼa̱ ña̱yóʼo ni̱ka̱ʼa̱nra xíʼinñá ña̱ va̱ása kúni̱kara koora xíʼinñá. Ña̱ xi̱niñúʼu keʼéñá kúú ña̱ kundi̱ʼi̱ka-iniñá xa̱ʼa̱ra.
8. Táki̱ʼva káchi 1 Pedro 3:1, 2, ¿ndáaña kíʼinka na̱ veʼeyó kuenta xíʼin?
8 Ná kunina ña̱ va̱ʼa íyo ña̱ kéʼéyó. Ku̱a̱ʼání yichi̱ na̱ veʼeyó kíʼinkana kuenta xíʼin ña̱ kéʼéyó nu̱úka ña̱ káʼa̱nyó (kaʼvi 1 Pedro 3:1, 2). * Ñá Pauline ku̱nda̱a̱-iniñá xa̱ʼa̱ ña̱yóʼo yóʼo tá ni̱ya̱ʼa tiempo. Káchiñá: “Xi̱kunda̱a̱-inii̱ ña̱ kúni̱níva ta̱ Wayne ndi̱ʼi̱, ta va̱ása ndixa kúni̱ra sandákoora ndi̱ʼi̱. Soo xíʼin ña̱ ni̱ka̱ʼa̱nra ku̱nda̱a̱-inii̱ ña̱ xíniñúʼu keʼíi̱ ña̱ káʼa̱n Jehová. Ña̱ xi̱niñúʼu keʼíi̱ kúú ña̱ na̱ʼi̱ iin yichi̱ va̱ʼa nu̱úra, nu̱úka ña̱ ku̱a̱ʼání ka̱ʼi̱n”. Tasaá sa̱ndákooñá ña̱ ixandúxañá xíʼin yiíñá ña̱ ka̱ʼa̱nra xa̱ʼa̱ ña̱ káʼa̱n Biblia, ta ki̱xáʼana káʼa̱nna xa̱ʼa̱ ña̱ʼa ña̱ kéʼéna ki̱vi̱ tá ki̱vi̱. Ta̱ Wayne ki̱ʼinra kuenta ña̱ na̱sama ñá síʼíra ta vitá íyo iniñá ta se̱ʼera to̱ʼó íyora (Prov. 31:18, 27, 28). Tá ki̱ʼinra kuenta ña̱ chíndeétáʼan Biblia xíʼin na̱ veʼera ki̱xáʼara kúni̱ra kunda̱a̱-inira xa̱ʼa̱ ña̱ káʼa̱nña (1 Cor. 7:12-14, 16).
9. ¿Nda̱chun va̱ása xíniñúʼu ndakava-iniyó?
9 Ná va̱ása ndakava-iniyó. Jehová va̱ʼaní yichi̱ sánáʼa̱ra nu̱úyó. Táxira ku̱a̱ʼání tiempo ndaʼa̱ na̱ yiví ña̱ va̱ʼa ná sakuaʼana xa̱ʼa̱ra ta ndakiʼinna ña̱ kutakuna ndiʼi tiempo (Jer. 44:4). Ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná chika̱a̱ra ndee̱ natúʼunra xíʼin inkana chi saá saka̱kura miíra ta saátu saka̱kura na̱ xíniso̱ʼo ña̱ káʼa̱nra (1 Tim. 4:16). Xa̱ʼa̱ ña̱ kúʼvi̱ní-iniyó xíniyó na̱ veʼeyó, kúni̱yó ná kunda̱a̱-inina xa̱ʼa̱ ña̱ nda̱a̱ ña̱ sánáʼa̱ Biblia. Ñá Pauline, va̱ʼaní chi̱ndeétáʼanñá xíʼin na̱ veʼeñá xíʼin ña̱ xi̱ka̱ʼa̱nñá ta saátu xíʼin ña̱ xi̱keʼéñá. Vitin kúsi̱íní-iniñá chi inkáchi ndásakáʼnuñá Jehová xíʼin yiíñá, ta u̱vi̱ saána kúúna precursor ta ta̱ Wayne kúúra anciano.
10. ¿Nda̱chun xíniñúʼu kúee koo iniyó?
10 Kúee ná koo iniyó. Ki̱vi̱ kíxáʼayó kéʼéyó ña̱ káʼa̱n Biblia, sana íxayo̱ʼvi̱ña xíʼin na̱ veʼeyó ña̱ kunda̱a̱-inina nda̱chun va̱ása kéʼékayó sava ña̱ʼa. Sava yichi̱, ña̱ nu̱ú ña̱ xínina kéʼéyó kúú ña̱ va̱ása kéʼékayó vikó na̱ veʼe-ñu̱ʼu xíʼinna, ta saátu va̱ása kíʼvikayó xíʼin ña̱ político, ta sana savana sáa̱na xíʼinyó (Mat. 10:35, 36). Soo ná kǒo ndakanixi̱níyó ña̱ va̱ása kivi xa̱a̱na nasamana ña̱ kéʼéna. Tá ná sandákooyó ña̱ chindeétáʼanyó xíʼinna ña̱ kunda̱a̱-inina xa̱ʼa̱ ña̱ kándíxayó, tá íyo na̱ ndátiin ku̱a̱chi xíʼinna saá íyoyó chi túviyó ña̱ va̱ása xíniñúʼu ndakiʼinna ña̱ kutakuna ndiʼi tiempo. Soo Jehová ta̱xira chiñu ndaʼa̱ ta̱ Jesús ña̱ ndatiinra ku̱a̱chi xíʼinna ta su̱ví miíyó xíniñúʼu keʼéña (Juan 5:22). Tá kúee íyo iniyó sana na̱ veʼeyó kúni̱na kunda̱a̱-inina xa̱ʼa̱ Ndióxi̱ (koto recuadro “ Ná kuniñúʼuyó sitioyó ña̱ Internet”).
11-13. ¿Ndáaña sákuaʼayó xíʼin ña̱ ke̱ʼé ñá Alice xíʼin na̱ yiváñá?
11 To̱ʼó ná kooyó soo káxi ná ka̱ʼa̱nyó (Prov. 15:2). Ná ka̱ʼa̱nyó xa̱ʼa̱ ña̱ ke̱ʼé ñá Alice. Ku̱nda̱a̱-iniñá xa̱ʼa̱ ña̱ nda̱a̱ tá ni̱xi̱yo xíkañá nu̱ú na̱ yiváñá, ta na̱yóʼo va̱ása kándíxana ña̱ íyo Ndióxi̱ ta xi̱kitáʼana xíʼin na̱ político. Ku̱nda̱a̱-iniñá ña̱ xíniñúʼu ndi̱ku̱n natúʼunñá xíʼinna xa̱ʼa̱ ndiʼi ña̱ va̱ʼa ña̱ sákuaʼañá. Káchiñá: “Tá ná taxiún ña̱ ya̱ʼa tiempo tasaá natúʼún xíʼinna xa̱ʼa̱ ña̱ kándíxaún, ndeéka sa̱a̱na xíʼún”. Xa̱ʼa̱ ña̱yóʼo na̱ndukúñá sava ña̱ káʼa̱n Biblia ña̱ sana kutóo na̱ yiváñá, tá kúú ña̱ kuʼvi̱-inina kuni táʼanna, ta ka̱ʼyíñá iin carta ku̱a̱ʼa̱n ndaʼa̱na nu̱ú ni̱nda̱ka̱tu̱ʼunñána ndáaña ndákanixi̱nína xa̱ʼa̱ña (1 Cor. 13:1-13). Xi̱taxiñá tíxa̱ʼvi ndaʼa̱na xa̱ʼa̱ ña̱ xi̱ndaanañá ta sa̱kuaʼnunañá, ta xi̱chindaʼáñá regalo ndaʼa̱na. Tá xi̱xa̱ʼa̱nñá xi̱xitoñána xi̱chindeétáʼanñá xíʼin siʼíñá ña̱ keʼéná sava chiñu ña̱ íyo ti̱xin veʼena. Soo tá xa̱ʼa̱, va̱ása va̱ʼa níkunina tá na̱túʼunñá xíʼinna xa̱ʼa̱ ña̱ kándíxañá.
12 Tá ni̱xi̱yoñá xíʼin na̱ yiváñá chi̱ka̱a̱ñá ndee̱ ña̱ kaʼviñá Biblia ndiʼi ki̱vi̱. Ñá Alice káchiñá ña̱ chi̱ndeétáʼanní ña̱yóʼo xíʼin siʼíñá ña̱ kunda̱a̱-iniñá ña̱ ndáyáʼviní tu̱ʼun Ndióxi̱ nu̱úñá. Ta saátu yiváñá ki̱xáʼara káʼvira Biblia ña̱ va̱ʼa kunda̱a̱-inira ndáaña ndákanixi̱ní se̱ʼera xíʼin ña̱ ndani̱ʼíra ña̱ va̱ása va̱ʼa íyo nu̱ú Biblia. Ñá Alice káchiñá: “Ta̱xii̱ iin Biblia ndaʼa̱ra ta ka̱ʼyíi̱ iin nota xa̱ʼa̱ ña̱ kúni̱i̱ ka̱ʼi̱n xíʼinra”. ¿Ndáaña ku̱u? Va̱ása níndani̱ʼí yiváñá ni iin ña̱ va̱ása va̱ʼa íyo, chi iin nda̱kanda̱-inira xíʼin ña̱ ka̱ʼvira.
13 Xíniñúʼu to̱ʼó kooyó ta káxi ka̱ʼa̱nyó ni ná ya̱ʼayó nu̱ú sava ña̱ yo̱ʼvi̱ (1 Cor. 4:12b). Tá kúú, ñá Alice ku̱ndeé-iniñá tá ni̱sa̱a̱ siʼíñá xíʼinñá. Káchiñá: “Tá nda̱kuchii̱ ni̱ka̱ʼa̱n siʼíi̱ xíʼi̱n ña̱ va̱ása va̱ʼa ña̱ kéʼíi̱”. ¿Ndáaña ke̱ʼé ñá Alice? Miíñá káʼa̱n: “To̱ʼóní ni̱ka̱ʼi̱n xíʼinñá xa̱ʼa̱ ña̱ nda̱ka̱xin koi̱ testigo Jehová ta va̱ása ndandikó-inii̱ xa̱ʼa̱ña. Ni̱ka̱ʼi̱n xíʼinñá ña̱ kúʼvi̱ní-inii̱ xínii̱ñá. U̱vi̱ saándi̱ xa̱kundi̱, ta ke̱ʼíi̱ iin comida ña̱ ya̱sinní kuxuñá. Saá ku̱nda̱a̱-ini siʼíi̱ ña̱ chíndeétáʼanní Biblia xíʼi̱n ña̱ koi̱ iin ñaʼá ñá va̱ʼaní-ini”.
14. Tá íxandúxa na̱ veʼeyó xíʼinyó ña̱ keʼéyó iin ña̱ʼa, ¿ndáaña kivi keʼéyó?
14 Sana na̱ veʼeyó kúeeva saá kúnda̱a̱-inina ña̱ ndáyáʼviní chiñu Jehová nu̱úyó. Tá kúú tá nda̱ka̱xin ñá Alice ña̱ kooñá precursora nu̱úka ña̱ kaʼviñá iin carrera ña̱ xi̱kuni̱ na̱ yiváñá, tuku ki̱xáʼa siʼíñá xákuñá. Soo ñá Alice ndakúní ni̱xi̱yo iniñá. Káchiñá: “Tá xíniso̱ʼún ña̱ káʼa̱n na̱ veʼún, sana kuchiñuna sandákavana-iniún ña̱ keʼún inka ña̱ʼa. Soo ta ndakú íyo iniún ta vií káʼún xíʼinna, sana savana kuniso̱ʼona ña̱ ka̱ʼún”. Ña̱yóʼo kúú ña̱ ndo̱ʼoñá. Vitin u̱vi̱ saá na̱ yiváñá kúúna precursor, ta yiváñá kúúra anciano.
¿NDA̱SAA KIVI CHINDEÉTÁʼAN NA̱ CONGREGACIÓN XÍʼINYÓ?
¿Nda̱saa kivi chindeétáʼan na̱ congregación xíʼin na̱ veʼeyó na̱ va̱ása kúú testigo Jehová? (Koto párrafo 15 xíʼin 16). *
15. Nda̱a̱ táki̱ʼva káchi Mateo 5:14-16 xíʼin 1 Pedro 2:12, ¿nda̱saa kivi chindeétáʼan ña̱ va̱ʼa ña̱ kéʼé na̱ hermano xíʼin na̱ veʼeyó?
15 Jehová xíniñúʼura ña̱ va̱ʼa ña̱ kéʼé na̱ káchíñu nu̱úra ña̱ chindeétáʼanra xíʼin inkana ña̱ kuyatinna nu̱úra (kaʼvi Mateo 5:14-16; * 1 Pedro 2:12). * Tá na̱ ti̱ndaʼa̱ xíʼún su̱ví testigo Jehová kúúna ¿á xíni̱na na̱ congregación? Ñá Pauline ñá xa̱a̱ ni̱ka̱ʼa̱nyó xa̱ʼa̱, xi̱kanañá na̱ hermano ña̱ ku̱ʼu̱nna veʼeñá ña̱ va̱ʼa kuni ta̱ Wayne nda̱a̱ ki̱ʼva íyona. Ta̱ Wayne ndákaʼánra nda̱saa chi̱ndeétáʼan iin ta̱ hermano xíʼinra ña̱ va̱ása kundasíkara na̱ hermano. Káchira: “Ta̱ hermano yóʼo ndu̱kúra permiso iníí ki̱vi̱ nu̱ú káchíñura ña̱ va̱ʼa kotonde̱ʼéndi̱ nu̱ú sásikína. Saá ki̱ʼii̱n kuenta ña̱ síínva íyora”.
16. ¿Nda̱chun xíniñúʼu ka̱ʼa̱nyó xíʼin na̱ veʼeyó ña̱ ku̱ʼu̱nna reunión?
16 Iin ña̱ kivi keʼéyó ña̱ chindeétáʼanyó xíʼin na̱ veʼeyó kúú ña̱ ka̱ʼa̱nyó xíʼinna ña̱ ku̱ʼu̱nna reunión xíʼinyó (1 Cor. 14:24, 25). Ña̱ nu̱ú reunión ña̱ ni̱xa̱ʼa̱n ta̱ Wayne xi̱kuu ña̱ conmemoración, chi ni̱xi̱yoña tá xa̱a̱ ndi̱ʼi ña̱ ka̱chíñura ta va̱ása ku̱a̱ʼá hora ni̱xi̱yoña. Káchira: “Va̱ása níkunda̱a̱-inii̱ xíʼin ndiʼi ña̱ ni̱ka̱ʼa̱nna, soo ndákaʼíi̱n xa̱ʼa̱ ña̱ va̱ʼaní nda̱kiʼinna yi̱ʼi̱, ku̱yatinna ta chi̱ndeéna yi̱ʼi̱, ki̱ʼii̱n kuenta ña̱ ndixa ndíʼi̱-inina xa̱ʼíi̱”. Iin na̱ matrimonio ña̱ congregación chi̱ndeétáʼannína xíʼin ñá Pauline ña̱ xi̱ndaana se̱ʼeñá tá xíyo reunión á tá ku̱a̱ʼa̱nna natúʼunna xa̱ʼa̱ Ndióxi̱. Tasaá ta̱ Wayne ki̱xáʼara kúni̱ra kunda̱a̱ka-inira xa̱ʼa̱ ña̱ kándíxa ñá síʼíra, ta ni̱ka̱ʼa̱nra xíʼin ta̱ hermano kán ña̱ ná sanáʼa̱rara xa̱ʼa̱ Biblia.
17. ¿Ndáaña va̱ása xíniñúʼu chika̱a̱yó ku̱a̱chi miíyó xa̱ʼa̱, soo nda̱chun va̱ása xíniñúʼu sandákooyó ña̱ chindeétáʼanyó xíʼin na̱ veʼeyó?
17 Kúni̱yó ña̱ ná kixaa̱ iin ki̱vi̱ ña̱ ndiʼi na̱ veʼeyó ndasakáʼnuna Jehová. Soo kúnda̱a̱-iniyó ña̱ ni ná chika̱a̱yó ndee̱ ña̱ chindeétáʼanyó xíʼinna, sana va̱ása xa̱a̱na ndasakáʼnuna Ndióxi̱. Tá saá íyoña ná va̱ása chika̱a̱yó ku̱a̱chi miíyó xa̱ʼa̱ ña̱ nda̱ka̱xinna. Saáchi va̱ása kivi ixandúxayó xíʼin ni iinna ña̱ kandíxana Ndióxi̱. Soo ná va̱ása ndakava-iniyó chi tá ná kunina ña̱ si̱í íyo iniyó ña̱ ndásakáʼnuyó Jehová kivi chindeétáʼanña xíʼinna. Ná ka̱ʼa̱nyó xíʼin Ndióxi̱ xa̱ʼa̱na, to̱ʼó ná ka̱ʼa̱nyó xíʼinna xa̱ʼa̱ ña̱ nda̱a̱ ta ná chika̱a̱yó ndee̱ ña̱ chindeétáʼanyó xíʼinna (Hech. 20:20). Ná kándíxayó ña̱ chindeétáʼan Jehová xíʼinyó. Ta tá ná kuniso̱ʼo na̱ veʼeyó ña̱ káʼa̱nyó, kivi ka̱kuna.
YAA 57 Nátúʼunyó xíʼin ndiʼi na̱ yiví
^ párr. 5 Kúni̱níyó ná kunda̱a̱-ini na̱ veʼeyó xa̱ʼa̱ Jehová, soo miína kúú na̱ xíniñúʼu ndaka̱xin á ndasakáʼnunara á va̱ása. Nu̱ú ña̱ artículo yóʼo sakuaʼayó ndáaña keʼéyó ña̱kán kuni̱na kuniso̱ʼona ña̱ káʼa̱nyó.
^ párr. 1 Na̱sama sava ki̱vi̱na.
^ párr. 3 2 Pedro 3:9: “Jehová va̱ása kúee íyo inira ña̱ saxínura ña̱ káʼa̱nra, táki̱ʼva ndákanixi̱ní sava na̱ yiví, soo ndátura ndóʼó chi va̱ása kúni̱ra ni iinna ná ndiʼi-xa̱ʼa̱, ña̱ kúni̱ra kúúña, ná ndikó-inina xa̱ʼa̱ ku̱a̱china”.
^ párr. 8 1 Pedro 3:1, 2: “Ndóʼó ná si̱ʼí na̱ xa̱a̱ tindaʼa̱ kuniso̱ʼondó ña̱ káʼa̱n yiíndó, tá savana su̱ví na̱ káʼvi tu̱ʼun Ndióxi̱ kúúna, va̱ʼa xa̱a̱na sakuaʼana xa̱ʼa̱ Ndióxi̱, xa̱ʼa̱ ña̱ kéʼéndó, xa̱ʼa̱ ña̱ xi̱nina ña̱ va̱ʼa-inindó ta íxato̱ʼóndóna”.
^ párr. 15 Mateo 5:14-16: “Ndóʼó kúúndó ñuʼu̱ ña̱ ndáye̱ʼe̱ ñuyǐví yóʼo. Ta kǒo kívi chise̱ʼéna iin ñuu káʼnu ña̱ kúnúu xi̱ní xi̱kí. Va̱ása ndátuunna iin lámpara ta chika̱a̱naña ti̱xin canasta, chi nu̱ú súkunva chínúunaña ña̱ va̱ʼa ndaye̱ʼe̱ña nu̱ú ndiʼi na̱ ndóo veʼe. Tasaá miíndó sándaye̱ʼe̱ndó ñuʼu̱ ña̱ kúúmiíndó nu̱ú na̱ yiví, ña̱ ná kunina kéʼéndó ña̱ va̱ʼa ta ka̱ʼa̱n va̱ʼana xa̱ʼa̱ yivándó ta̱ íyo chí ndiví”.
^ párr. 15 1 Pedro 2:12: “Keʼéndó ña̱ va̱ʼa nu̱ú ndiʼi na̱ yiví, ni tá káʼa̱nna ña̱ va̱ása va̱ʼa xa̱ʼa̱ndó, soo tá ná kunina ña̱ va̱ʼa kéʼéndó nda̱a̱ kivi xa̱a̱na ndasakáʼnuna Ndióxi̱ tá ná kixira sakákura miíyó”.
^ párr. 57 ÑA̱ KÁʼA̱N XA̱ʼA̱ NA̱ʼNÁ: Iin ta̱ hermano loʼo chíndeétáʼanra xíʼin yivára ta̱ va̱ása kúú testigo Jehová ña̱ keʼéra carrora. Tasaá náʼa̱ra nu̱úra iin video ña̱ va̱xi nu̱ú sitio jw.org®.
^ párr. 59 ÑA̱ KÁʼA̱N XA̱ʼA̱ NA̱ʼNÁ: Iin ñá hermana xíniso̱ʼoñá ña̱ káʼa̱n yiíñá ta̱ va̱ása kúú testigo tá nátúʼunra xa̱ʼa̱ ndiʼi ña̱ ke̱ʼéra iníí ki̱vi̱. Tándi̱ʼi, si̱í íyoñá xíʼin yiíñá ta saátu xíʼin ta̱ loʼo se̱ʼena.
^ párr. 61 ÑA̱ KÁʼA̱N XA̱ʼA̱ NA̱ʼNÁ: Ñá hermana yóʼo ka̱nañá na̱ hermano ña̱ congregación veʼeñá, ta na̱yóʼo kúni̱na kuxini̱na yiíñá. Tá ni̱ya̱ʼa loʼo, yiíñá ku̱a̱ʼa̱nra xíʼinñá conmemoración.
