ÑA̱ KANDÍXAYÓ Ndióxi̱ ku̱a̱ʼání ndee̱ kúúmiíña. Ni ta̱ Ndi̱va̱ʼa kúni̱ra sakuxíkara miíyó nu̱ú Ndióxi̱, soo ña̱ kándíxayó Ndióxi̱ kivi chindeétáʼanña xíʼinyó ña̱ ya̱ʼayó nu̱ú ña̱ kúni̱ra keʼéra xíʼinyó (Efes. 6:16). Saátu ña̱ kándíxayó Ndióxi̱ kivi chindeétáʼanña xíʼinyó ña̱ ya̱ʼayó nu̱ú tu̱ndóʼo ña̱ íyo nda̱a̱ táki̱ʼva íyo iin yuku̱. Ta̱ Jesús ni̱ka̱ʼa̱nra xíʼin na̱ discípulora: “Tá ña̱ kándíxandó Ndióxi̱ íyoña nda̱a̱ táki̱ʼva íyo iin si̱ʼva̱ ña̱ mostaza, ka̱ʼa̱nndó xíʼin ña̱ yuku̱ yóʼo: ‘Ku̱a̱ʼa̱n chí inka táʼvíʼ ta ku̱ʼu̱nvaña” (Mat. 17:20). Saáchi ña̱ kándíxayó Ndióxi̱ kivi ndasandakúña ña̱ kítáʼanyó xíʼinra, ña̱kán ná nda̱ka̱tu̱ʼun xíʼin miíyó ña̱yóʼo: ¿Ndáa ki̱ʼva íyo ña̱ kándíxayó Ndióxi̱? ¿Ndáaña keʼéyó ña̱ va̱ʼa chindayáʼviyó ña̱yóʼo? ¿Nda̱saa kivi ndasandakúkayóña? Ta ¿ndáana xíniñúʼu kandíxayó? (Rom. 4:3).

Su̱ví nda̱saa kandíxa kuitíyó ta kunda̱a̱-iniyó xa̱ʼa̱ ña̱ ka̱ʼa̱n Biblia ta xa̱a̱ va̱ʼaví, chi ña̱yóʼo káchiña ña̱ nda̱a̱ na̱ ta̱chí ndi̱va̱ʼa kándíxana ña̱ íyo Ndióxi̱ ta yíʼvina (Sant. 2:19). Ña̱kán, ¿ndáa ki̱ʼva íyo ña̱ kándíxayó Ndióxi̱?

Ña̱ Biblia káʼa̱nña ña̱ íyo u̱vi̱ ña̱ kúni̱ káchi ña̱ kandíxayó Ndióxi̱. Ña̱ nu̱ú, “ña̱ kándíxayó Ndióxi̱, kúni̱ kachiña ña̱ va̱ása kaka-iniyó xa̱ʼa̱ ña̱ ndátuyó koo chí nu̱únínu”, chi ña̱ xi̱nu kúúvaña (Heb. 11:1a). Tá kándíxayó Jehová saátu kandíxayó ña̱ ndiʼi ña̱ káʼa̱nra kúúña ña̱ nda̱a̱ ta ndixa xi̱nuña. Tá kúú, Ndióxi̱ ni̱ka̱ʼa̱nra xíʼin na̱ israelita ña̱yóʼo: “Tá ndóʼó ná kuchiñundó sandiʼi-xa̱ʼa̱ndó pacto ña̱ kúúmiíi̱ xíʼin káʼñu ta saátu xíʼin ña̱ ñuú, ta va̱ása kooka káʼñu xíʼin ñuú mií tiempo ña̱ xíniñúʼu kooña, ta saátu kivi sandiʼi-xa̱ʼíi̱ pacto ña̱ kúúmiíi̱ xíʼin ta̱ David” (Jer. 33:20, 21). ¿Á xa̱a̱ xíka-iniyó sava yichi̱ xa̱ʼa̱ ña̱ va̱ása kita ñu̱ʼu á ña̱ ki̱ʼviña, ta va̱ása kǒoka káʼñu xíʼin ñuú? Va̱ása, chi tá kándíxayó ña̱ ndiʼi ki̱vi̱ kita ñu̱ʼu ta ki̱ʼviña, ¿á xíniñúʼu kaka-iniyó xa̱ʼa̱ Ndióxi̱ ña̱ va̱ása kuchiñura saxínura ña̱ ni̱ka̱ʼa̱nra? (Is. 55:10, 11; Mat. 5:18).

Ña̱ u̱vi̱, tá kándíxayó Ndióxi̱ saátu kandíxayó ña̱ ndixa xi̱nu ña̱ ni̱ka̱ʼa̱nra ni kǒoña xíniyó vitin (Heb. 11:1b; nota). Ná ndakanixi̱níyó xa̱ʼa̱ iin ejemplo. Ná kachiyó ña̱ iin na̱ va̱lí ndáka̱tu̱ʼunna miíyó nda̱chun va̱ʼa xíni̱yó ña̱ íyo ta̱chí. Ni nda̱a̱ ni iin yichi̱ ta̱ʼán kuniyóña, soo va̱ása ixayo̱ʼvi̱ña xíʼinyó ka̱ʼa̱nyó xíʼin na̱ va̱lí yóʼo xa̱ʼa̱ña, chi kúnda̱a̱-iniyó ña̱ íyoña ki̱vi̱ ndákiʼinyó ta̱chíyó, á ña̱ sákandáña inkaka ña̱ʼa. Tá xa̱a̱ ku̱nda̱a̱-ini na̱ va̱lí yóʼo ña̱ íyova ña̱yóʼo, xáa̱na kándíxana ña̱ íyoña ni kǒo xítonaña. Ki̱ʼva saá íyo ña̱ kándíxayó Ndióxi̱ (Rom. 1:20).

Ña̱ va̱ʼa xa̱a̱yó kandíxayó Ndióxi̱ siʼna xíniñúʼu kunda̱a̱-iniyó ña̱ nda̱a̱ xa̱ʼa̱ra (1 Tim. 2:4).  Soo su̱ví ña̱yóʼo kúú ndiʼiña. Ta̱ apóstol Pablo ni̱ka̱ʼa̱nra ña̱ kandíxayó Ndióxi̱ xíʼin ndiʼi níma̱yó (Rom. 10:10). Va̱ása xíniñúʼu kandíxa kuitíyó ña̱ nda̱a̱ chi xíniñúʼu kundayáʼviña nu̱úyó. Chi saá kúú ña̱ na̱ʼa̱yó ña̱ kándíxayó Ndióxi̱ ta kúni̱yó keʼéyó ña̱ káʼa̱nra (Sant. 2:20). Na̱ va̱ása ndáyáʼvi ña̱ nda̱a̱ nu̱ú xíʼin ndiʼi níma̱na, va̱ása kándíxana ña̱ káʼa̱n inkana chi ña̱ ndáyáʼvika nu̱úna kúú ña̱ kúni̱na keʼéna ña̱ va̱ása va̱ʼa á ña̱ kándíxa miína (2 Ped. 3:3, 4; Jud. 18). Xa̱ʼa̱ ña̱yóʼo su̱ví ndiʼi na̱ yiví na̱ xi̱ni milagro tá tiempo xi̱naʼá ni̱xa̱a̱ ka̱ndíxa Ndióxi̱ (Núm. 14:11; Juan 12:37). Espíritu santo Ndióxi̱ íyoña xíʼin na̱ kúʼvi̱-ini xíni ña̱ nda̱a̱ ta sáa̱-inina xínina ña̱ vatá (Gál. 5:22; 2 Tes. 2:10, 11).

Nda̱a̱ táki̱ʼva ni̱xi̱yo ku̱a̱ʼání na̱ nda̱sakáʼnu Ndióxi̱ xíʼin ndinuʼu-inina tá xi̱naʼá, saá ni̱xi̱yo ta̱ rey David (Heb. 11:32, 33). Soo su̱ví saá ni̱xi̱yo ndiʼi na̱ veʼe ta̱ David. Tá kúú, ñanira ta̱ káʼnu Eliab ni̱na̱ʼa̱ra ña̱ va̱ása kándíxara Ndióxi̱ tá ni̱nda̱ʼyi̱ra nu̱ú ta̱ David xa̱ʼa̱ ña̱ xi̱kuni̱ra kunda̱a̱ka-inira xa̱ʼa̱ ña̱ ni̱ka̱ʼa̱n ta̱ Goliat xíʼin na̱ ñuu Israel (1 Sam. 17:26-28). Ni iinna va̱ása kákuna ta xa̱a̱ kándíxana Ndióxi̱ ta ni na̱ yivána va̱ása sándaya̱ʼana ña̱yóʼo ndaʼa̱na. Ña̱kán ta̱ David ndakúní ni̱xi̱yo ña̱ ka̱ndíxara Ndióxi̱ xa̱ʼa̱ ña̱ va̱ʼaní xi̱kitáʼanra xíʼinra.

Nu̱ú ña̱ Salmo 27, ta̱ David ni̱ka̱ʼa̱nra nda̱saa ni̱xa̱a̱ra ka̱ndíxa ndinuʼu-inira Ndióxi̱ (versículo 1). Ta̱kán xi̱ndakanixi̱níra xa̱ʼa̱ ña̱ ndo̱ʼora tá ya̱chi̱ xíʼin xa̱ʼa̱ ña̱ ke̱ʼé Jehová xíʼin na̱ sáa̱-ini xíniñaʼá (versículos 2 xíʼin 3). Xi̱ndayáʼviní tabernáculo Jehová nu̱úra (versículo 4) ta kán xi̱ndasakáʼnura Jehová xíʼin inkaka na̱ israelita (versículo 6). Ta xíʼin oración xi̱ka̱ʼa̱nra xíʼin Jehová ña̱ ná na̱ʼa̱ra iin yichi̱ ña̱ va̱ʼa nu̱úra (versículos 7 xíʼin 8). Ta saátu xi̱kuni̱ra ña̱ ná sanáʼa̱ Jehová miíra ña̱ kakara yichi̱ra (versículo 11). Xa̱ʼa̱ ña̱ ndáyáʼviní ña̱ kándíxara Ndióxi̱ nu̱úra, ni̱nda̱ka̱tu̱ʼun xíʼin miíra ndáa míí íyora tá kǒo níkandíxarara (versículo 13).

Kivi xa̱a̱yó kandíxayó Ndióxi̱ nda̱a̱ táki̱ʼva ke̱ʼé ta̱ David tá ná ndakanixi̱níyó nda̱a̱ táki̱ʼva xi̱ndakanixi̱níra ta keʼéyó táʼan ña̱ va̱xi nu̱ú ña̱ Salmo 27. Ña̱ va̱ʼa kandíxakayó Ndióxi̱ xíniñúʼu kaʼviyó Biblia ndiʼi ki̱vi̱ xíʼin tutu ña̱ tává na̱ ñuura, chi xíʼin ña̱yóʼo xa̱a̱yó kuumiíyó ña̱ va̱ʼa ña̱ kúúmií espíritu Ndióxi̱ (Sal. 1:2, 3). Tá káʼviyó na̱ taváyó tiempo ña̱ ndakanixi̱níyó xa̱ʼa̱ña, saá náʼa̱yó ña̱ táxiyó tíxa̱ʼvi ndaʼa̱ Ndióxi̱. Ta saátu náʼa̱yó ña̱ kándíxayóra tá ndásakáʼnuyóra ti̱xin reunión á ta káʼa̱nyó xíʼin inkana xa̱ʼa̱ra (Heb. 10:23-25). Ta saátu náʼa̱yóña tá chíka̱a̱yó ndee̱ ña̱ káʼa̱nyó xíʼinra ta va̱ása sandákooyó keʼéyóña (Luc. 18:1-8).  Xa̱ʼa̱ ña̱kán ná ka̱ʼa̱n ni̱ʼiyó xíʼinra ta ná kandíxayó ña̱ ndíʼi̱-inira xa̱ʼa̱yó (1 Tes. 5:17; 1 Ped. 5:7). Ña̱ kándíxayó Ndióxi̱ chíndaʼáña miíyó kéʼéyó ña̱ va̱ʼa, ta ndúndakúka ña̱ kándíxayóra (Sant. 2:22).

Ñuú tá kúma̱ní kuvi ta̱ Jesús ni̱ka̱ʼa̱nra xíʼin na̱ discípulora: “Kandíxandó Ndióxi̱, ta kandíxatundó yi̱ʼi̱va” (Juan 14:1). Ña̱kán xíniñúʼu kandíxayó ta̱ Jesús ta su̱ví iinlá Jehová kandíxayó. ¿Ndáa ki̱ʼva keʼéyóña? Ná ka̱ʼa̱nyó xa̱ʼa̱ u̱ni̱ña.

Ña̱ nu̱ú, ná kandíxayó ña̱ iin regalo ña̱ ta̱xi Ndióxi̱ ndaʼa̱ iin iinyó kúú ña̱ ta̱xira se̱ʼera ni̱xi̱ʼi̱ xa̱ʼa̱yó. Ta̱ apóstol Pablo ni̱ka̱ʼa̱nra: “Tákui̱ vitin saáchi se̱ʼe Ndióxi̱ kúú ta̱ ni̱kuʼvi̱-ini xi̱ni yi̱ʼi̱ ta nda̱taxi xíʼin miíra xa̱ʼíi̱” (Gál. 2:20). Ki̱vi̱ kándíxayó ta̱ Jesús, kándíxayó ña̱ iin regalo ña̱ ta̱xira ndaʼa̱yó kúú ña̱ ni̱xi̱ʼi̱ra xa̱ʼa̱yó, ta xa̱ʼa̱ ña̱yóʼo va̱ʼa kúkaʼnu-ini Ndióxi̱ xa̱ʼa̱ ku̱a̱chiyó xíʼin ña̱ va̱ʼa kutakuyó ndiʼi tiempo, ta saátu xíʼinña náʼa̱ Ndióxi̱ ña̱ kúʼvi̱-inira xínira miíyó (Rom. 8:32, 38, 39; Efes. 1:7). Ña̱yóʼo chindeétáʼanña xíʼinyó ña̱ va̱ása ndakanixi̱níyó xa̱ʼa̱ ña̱ va̱ása va̱ʼa ña̱ ke̱ʼéyó tá ya̱chi̱ (2 Tes. 2:16, 17).

Ña̱ u̱vi̱, xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi kuyatinkayó nu̱ú Jehová xíʼin oración. Tíxa̱ʼvi ña̱ ni̱xi̱ʼi̱ra kivi ka̱ʼa̱nyó xíʼin Jehová xa̱ʼa̱ ndiʼi ña̱ kúni̱yó ña̱ va̱ʼa chindeétáʼanra xíʼinyó (Heb. 4:15, 16; 10:19-22). Tá ná ka̱ʼa̱nyó xíʼin Jehová ndakúka koo ña̱ kándíxayóra ta va̱ása ki̱ʼviyó ni iin ku̱a̱chi (Luc. 22:40).

Ña̱ u̱ni̱, ná kuniso̱ʼoyó ta̱ Jesús. Ta̱ apóstol Juan ka̱ʼyíra: “Na̱ kándíxa ndinuʼu-ini se̱ʼe Ndióxi̱ kutakuna ndiʼi tiempo, ta na̱ kǒo xíniso̱ʼo ña̱ káʼa̱nra va̱ása kutakuna, chi Ndióxi̱ taxira castigo ndaʼa̱na” (Juan 3:36). Ta̱ Juan ni̱ka̱ʼa̱nra ña̱ va̱ása kivi kandíxayó Ndióxi̱ tá va̱ása xíniso̱ʼoyó. Ña̱kán náʼa̱yó ña̱ kándíxayó ta̱ Jesús tá xíniso̱ʼoyó ña̱ káʼa̱nra. Ta saátu xíniso̱ʼoyóra tá ndíku̱nyó “ley ta̱ Cristo” ta kéʼéyó ndiʼi ña̱ ni̱ka̱ʼa̱nra xíʼin ña̱ sa̱náʼa̱ra (Gál. 6:2). Ta xíniso̱ʼotuyóra tá ndíku̱nyó ña̱ káʼa̱n na̱ esclavo fiel y discreto (Mat. 24:45). Tá kéʼéyó ña̱ káʼa̱n ta̱ Jesús xíʼinyó, ndakú koo iniyó ña̱ ya̱ʼayó nu̱ú tu̱ndóʼo (Mat. 7:24, 25).

Iin yichi̱, iin ta̱ ta̱a ni̱ka̱ʼa̱nra xíʼin ta̱ Jesús: “Kándíxavai̱ Ndióxi̱. Chindeétáʼan xíʼi̱n tá va̱ása ndakú íyo ña̱ kándíxai̱ra” (Mar. 9:24). Ta̱ ta̱a yóʼo kándíxavara Ndióxi̱, soo nda̱kunira ña̱ xíniñúʼu chika̱a̱kara ndee̱ ña̱ ndakúka koo ña̱ kándíxarara. Nda̱a̱ táki̱ʼva ke̱ʼé ta̱yóʼo, ndiʼiyó xíniñúʼu ndakúka koo ña̱ kándíxayó Ndióxi̱ sava yichi̱. Ta ndiʼiyó kivi ndasandakúkayóña vitin. Nda̱a̱ táki̱ʼva xa̱a̱ ku̱nda̱a̱-iniyó, ndásandakúyóña ki̱vi̱ káʼviyó tu̱ʼun Ndióxi̱ ta ndákanixi̱níyó xa̱ʼa̱ña, tasaá táxikayó tíxa̱ʼvi ndaʼa̱ra. Saátu ndásandakúkayó ña̱ kándíxayó Ndióxi̱ ki̱vi̱ ndásakáʼnuyóra xíʼin na̱ hermanoyó, tá káʼa̱nyó xíʼin inkana xa̱ʼa̱ ña̱ kándíxayó ta saátu tá káʼa̱n ni̱ʼiyó xíʼinra, tá kéʼéyó ndiʼi ña̱yóʼo sákuaʼnukayó ña̱ kándíxayóra ta ku̱a̱ʼání ña̱ va̱ʼa ndakiʼinyó, ta yatin kooyó xíʼinra (Jud. 20, 21).